Rĩ, Mũkristũ no Etĩkĩĩrie Kũrigitwa?

Ũrĩa Bibiria yugaga

Ĩĩ. Jesũ noonanĩrie atĩ athingati baawe no bacwe ũrigitani rĩrĩa augĩre ũjũ “Barĩa baajĩtue nĩbo bacwaga ndagitarĩ, ĩndĩ barĩa batĩajĩtue batĩmũcwaga.” (Mathayo 9:12 Kimeru Bible, 2010) Kinya kethĩra Bibiria tĩ iuku rĩa ũrigitani, nĩtwejaga ũtaaro bũrĩa bũtũteethagia gũtua matua jarĩa jakũgwĩria Mũrungu.

Biũria birĩa ũũmba gũciũria

1. Rĩ, nĩngũciũkĩrwa bwega nĩ ũrigitani bũu nkwenda kũthithĩrua? Bibiria nĩtwĩraga tũcũnkũũne mantũ bwega antũ a ‘gwĩtĩkia nteto cionthe.ʼ—Njuno 14:15.

2. Rĩ, no mbĩte kĩrĩ ndagitarĩ ũngĩ nkaigua maoni jaawe? Arĩa kũrĩna antũ babaingĩ ba “kwathana kirira” nĩ gũkwega, mono mono kethĩra ũrĩna mũrimo jũmũnene.—Njuno 15:22.

3. Rĩ, ũrigitani bũu nĩbũkuuna watho bwa Bibiria bwegie gũciebania na “tharike”?—Mathithio 15:20.

4. Rĩ, irundu biithũũku nĩbigũtumĩrwa ũrigitanine bũu? Bibiria nĩregaga “mantu ja marogi.” (Agalatia 5:19-21) Nĩkenda ũmenya kethĩra mantũ ja irundu biithũũku jagatumĩrwa, cũnkũũna biũria bibi:

• Rĩ, muntũ ũjũ ũkũndigita natumagĩra irundu bibithũũku?

• Rĩ, ũrigitani bũbũ neka bũkũringithanua na wĩtĩkio bwa atĩ mbajua ĩjĩ yumanĩtie na mĩrungu kana kũthũũria anthũ barĩa batumagĩra marogi?

• Rĩ, igongwana, ũrogi kana mantũ jangĩ ja iruundu biithũũku nĩjagũtumĩrwa kũthithia kana gũtumĩra ndawa iu ũkwewa?

5. Rĩ, nĩnkũmakĩra ũgima bwakwa bwa mwĩrĩ nkũrũki ya kĩthimi? Bibiria nĩtwejaga ũtaaro bũbũ: ‘Rekeni ũngʼananĩru bwenu bũmenyekane mbere ya antũ bonthe.’ (Afilipi 4:5) Kwĩthĩrwa na ũngʼananĩru gũgagũtethia “kuthuura jaria meega,” ta mantũ ja gĩkĩrundu.—Afilipi 1:10; Mathayo 5:3.