JULAĨ 27–AGASTI 2, 2026
RWĨMBO NA. 56 Eethia Ũmma Njĩra Yaaku ya Ũtũũro
Kara Akuĩ na Jehova Ĩgiita Rĩrĩa Ũkwongeera Kĩthomo
‘Na rĩ, imenyagĩĩreni bwĩtage na mĩĩtĩre ĩngˈuanene na ĩrĩa bũkinyĩrĩte.ʼ—AFL. 3:16.
JARĨA TŨKAIRITANA
Tũkoona mooritani ja Bibiria jarĩa jomba gũgũtethia gũkara akuĩ na Jehova rĩrĩa ũkwongeera kĩthomo.
1-2. (a) Kethĩra ũkathuura kwongeera kĩthomo rĩ, nĩ mantũ jarĩku ũbuĩrĩte gwĩta na mbere kũthithia? (b) Nĩatĩa biugo ‘gwĩtaga na mĩĩtĩre ĩrĩa tũkinyĩrĩteʼ bionanagia? (Afilipi 3:16)
AKŨŨJĨ bamwe ba Jehova nĩbathuurĩte kwongeera kĩthomo nyuma ya kũrĩkia sekondarĩ. Kĩthomo kĩu, no kĩbatethie kwona ngũgĩ ĩrĩa ĩkabaigĩka rĩrĩa bagũtumĩkĩra Jehova ĩgiita rĩonthe. Kethĩra nũthuurĩte kwongeera kĩthomo rĩ, nĩatĩa ũkathithia nĩkenda ũkara akuĩ na Jehova? (Jak. 4:8a) Mbuga rĩrĩa waarĩ sekondarĩ, nĩwakũrũkĩrĩre magerio jamaingĩ na wombana. Nĩkenda wĩta na mbere gũtumĩkĩra Jehova ũrĩ mwĩtĩkĩkua, ũkabatara gwĩtaga na ‘mĩĩtĩre ĩngũ’anene na o ĩrĩa wakinyĩrĩte’ rĩrĩa waarĩ cukuru.—Thoma Afilipi 3:16.
2 Biugo bia Kĩgiriki birĩa bitaũrĩ ‘gwĩtaga na mĩĩtĩre ĩrĩa tũkinyĩrĩte’ kaingĩ biatumagĩrwa mantũne ja kĩnjeshi bagĩtaarĩĩria ũrĩa asikarĩ baacencaga betanĩrĩtie. Rĩrĩa ũkathuura kwongeera kĩthomo, ũkabatara gwĩta na mbere kũthithia mantũ jarĩa jagatũma ũrikia ngwatanĩro yaaku amwe na Jehova. Kĩrĩ kĩthomo gĩkĩ, tũkaarĩĩria mooritani jana ja Bibiria jarĩa jomba gũgũtethia. Mooritani jaja tĩ jameerũ, mbuga ũrajatumĩra na ũgeeta na mbere kũjatumĩra rĩrĩa ũkwongeera kĩthomo na kinya rĩrĩa ũkarĩkia cukuru.
THITHIA MANTŨ JARĨA JAGWĨKĨRA INYA NGWATANĨRO YAAKU AMWE NA JEHOVA
3. Rĩrĩa ũkwongeera kĩthomo nĩ ũgwati bũrĩkũ ũũmba gũcemania nabu?
3 Nĩ ũgwati bũrĩkũ bũrĩo? Kwongeera kĩthomo kwomba kwĩthĩrwa na ngũgĩ inyiingĩ cia kũthithia. Tontũ nũkwenda kũthithia bwega mathomone, no ũtige gwĩka mantũ ja gĩkĩrundu mbere. No wambie gũtĩĩra mĩcemanione, ũgatiga gwĩta ũtungatĩrine, na kinya ũgatiga kũthoma Bibiria na wĩthĩre na kũromba.—Kug. 2:4.
4. Nĩmbĩ bigagũtethia kũrita ‘ngũgĩ ya Mwathani magiita jonthe’? (1 Akorintho 15:58)
4 Thoma 1 Akorintho 15:58. Nĩkenda wĩtithia baisikiri bwega, no mwanka wĩte na mbere kũmĩconcera, ũu nou tũbuĩrĩte kwĩthĩrwa na jamaingĩ ja kũthithia kĩrĩ ũtungatĩri bwa Jehova nĩkenda ngwatanĩro yeetũ amwe nawe ĩgĩa inya. Kũthithia ũu, tĩ gũtumĩra ĩgiita rĩkai akĩ kĩrĩ mantũ ja gĩkĩrundu. Ĩndĩ, nĩ kũjeeka mbere ũtũũrone bwaku. Ĩĩka mantũ ja Jehova mbere, mathomo jakeeja nyumene. (Mat. 22:37.) Mwarĩ wa baaba ũmwe ũgwĩtwa Samantha aaugĩre ũjũ, “Gũkeeja kwĩthĩrwa mathomo jaakwa jarĩngĩndigĩĩria ntĩgatumĩkĩre Jehova, ndĩngĩtigana na cukuru.”
5. Nĩatĩa ũũmba kũthithia nĩkenda wĩta na mbere gũtumĩkĩra Jehova o ũkĩthomaga?
5 Mantũ jarĩa ũũmba kũthithia mbere ya wambia kwongeera kĩthomo. Ĩĩka Jehova mbere ũtũũrone bwaku. Ciũrie ũjũ, ‘Nĩ mĩbango ĩrĩkũ nthithĩtie nĩkenda ntĩgatĩĩre mĩcemanione, ũtungatĩrine, na ntĩgatigane na ũthomi bwakwa bwa Bibiria?’ (Jos. 1:8; Mat. 28:19, 20; Ahi. 10:25) Kinya ciũrie ũjũ: Rĩrĩa ndaarĩ Sekondarĩ nĩatĩa ndathithagia nĩkenda mbĩĩka mantũ ja gĩkĩrundu mbere ũtũũrone bwakwa? Kethĩra nũkwigua teka ũtathithĩrie mantũ bwega rĩ, nĩ mogarũrũku jarĩkũ ũũmba kũthithia nandĩ? Ĩthĩrwa na jamaingĩ ja kũthithia o wĩtĩte na mbere kwongeera kĩthomo. Ciũmie mathomone, ĩndĩ menya ũtiganĩria mantũ ja gĩkĩrundu.a—Mat. 6:24.
6. Nĩ biũria birĩkũ ũũmba gũciũria rĩrĩa ũgwicũnkũũna wengwa? (Tega kinya mbica.)
6 O wĩtĩte na mbere kũthoma, ĩthĩrwa ũgiicũnkũũnaga na kwombĩka ũthithagie ũu o mweri. No ũciũrie ũjũ, ‘Rĩ, nĩngwĩka mantũ ja gĩkĩrundu mbere ũtũũrone bwakwa?’ Nĩngũtĩĩra mĩcemanione kana nkeeja ncereeri? Nĩnkũthũgaanĩria mantũ ja cukuru mĩcemanio ĩtĩĩte na mbere? Rĩ, ndĩthikĩĩra mĩcemaanio ndĩ nyomba, antũ a gwĩta mbonana na ataana na aarĩ ba baaba? Wĩru bwakwa bwa kũromba na bwa kũthoma nĩbũnyiĩte? Rĩ, ndĩĩta gũtũmĩĩria nĩkenda mpingia watho? Ũkeeja kwona ũrĩ na mĩtugo ta ĩu, ciũmie kũmĩgarũra na mpwĩ. Menya ũrekeeria mathomo jatũma ũtiga gũtumĩkĩra Jehova.
Menya ũrekeeria mathomo jakũrigĩĩria wĩka mantũ ja Ũnene mbere (Tega gĩcuncĩ kĩa 6)
“KARIA MATHŨGAANIO JAAKU”
7. Nĩatĩa kwongeera kĩthomo kũũmba kũgarũra mwonere jwaku?
7 Nĩ ũgwati bũrĩkũ bũrĩo? Kũringana na kosi ĩrĩa ũkũthithia, kwongeera kĩthomo no gũtũme ũgatũngana na ‘mawĩthĩre ja nthĩgũrũ ĩjĩ na nkuagaya,ʼ najo nĩ ta kũrega gwĩtĩkia Mũrungu na gwĩtĩkia kũgaruka kwa into. (Akol. 2:8) Kinya no gũtũme ũkambia gũciĩrĩgĩĩra wengwa. Mũtaana wa baaba ũmwe ariuga ũjũ: “Tũtaritanagwa mathomo akĩ; ĩndĩ baatũritanaga njĩra ya kũthũgaania, ĩrĩa ĩtagwatanagĩra na wendi bwa Jehova. Ngerekano, twaritanagwa atĩ nĩkenda ũũmbana ũtũũrone no mwanka ũciĩrĩgĩĩre wengwa. Nĩndambĩrĩĩrie kũthũgaania atĩ ntĩkũbatara ũtethio bwa Jehova nĩkenda mbĩthĩrwa na kũgwĩrua. Nĩbwarĩ bubũũmũ kĩrĩni kwĩrĩgĩra Jehova mantũne jonthe.”
8. Nĩkĩ bũrĩ ũntũ bwa gĩtũmi gũkaria ‘ũũmbi [bwetũ] bwa gũciũra mantũ’? (Njuno 5:1, 2)
8 Thoma Njuno 5:1, 2; Kimeru Bible, 2010 Bibiria ĩtwĩraga tũkarie ‘ũũmbi [bwetũ] bwa gũciũra mantũ.’ Gũkaria gĩntũ, kwonanagia gĩntũ kĩu kĩrĩ ũgwatine. Ũu nĩu tũbuĩrĩte gũkaria mathũgaanio jeetũ. (1 Pet. 5:8) Ũrĩa antũ bakũthũgaania bwegie mĩtugo, kaumo ka ũtũũro, na kethĩra Mũrungu arĩo, no gũtũme ũkagĩa nkanja na mma irĩa wiritanĩte. Antũ no bagerie kwonania maoni jaao nĩ ja ‘ũũme’, ĩndĩ kaama tĩu. Ũũma nĩ atĩ ‘ũũme bwa antũ nĩ waa kĩrĩ Mũrungu.’—1 Ako. 3:18-20.
9. Nĩatĩa ũũmba kũthithia nĩkenda ũkaria ũũmbi bwaku bwa kũthũgaania?
9 Mantũ jarĩa ũũmba kũthithia mbere wambia kwongeera kĩthomo. Nĩkenda ũkaria mathũgaanio jaaku, no mwanka wĩthĩrwe na wĩtĩkio bũũriku kĩrĩ jarĩa Bibiria ĩritanaga, mbere ya wĩta kwongeera kĩthomo. No ũtumĩre biũria ta bibi gwicũnkũũna: ‘Nĩkĩ mbĩtĩkĩtie Mũrungu? Nĩmbi bindikithagĩria Bibiria nĩ Rũteto rwawe? Nĩmbi bindikithagĩria ithimi bia Mũrungu bia wagĩru nĩbio biega nkũrũki ya bia nthĩgũru?’ Mbuga kinya ũkeeja kũriikana, mĩaka ĩu ĩngĩ wĩthĩrĩtwe ũrĩ cukuru ũracemania na mooritani ta ja kũgarũka kwa into. Rĩ, nĩwaigagua wĩtĩkio bwaku bũkĩaga inya rĩrĩa wona bangĩ bagĩĩtĩkanĩĩria na mooritani ta jau? Rĩ, nĩwaigagua ũgĩkucĩĩrua nĩ mĩtugo ĩtĩagĩrĩte ya aritwa bangĩ? Ũkeeja kwĩthĩrwa ũgũcokia ĩĩ kĩrĩ biũria biu, nĩatĩa ũũmba kũthithia nandĩ nĩkenda ũrikia wĩtĩkio bwaku? Ciũmie gũkaria mathũgaanio jaaku ĩgiita rĩrĩa ũkwongeera kĩthomo.—2 Tim. 2:16-18.b
10. Nĩatĩa ũũmba gwĩta na mbere gũkaria mathũgaanio jaaku?
10 Ĩta na mbere gwicũnkũũna wengwa rĩrĩa ũkwongeera kĩthomo. Ciũrie ũjũ: Rĩ, nĩmpambĩtie kwona mantũ jatĩbui jarĩa bangĩ bakũthithia teka jarĩ jameega? Rĩ, nĩ nkũũmba kwathũrana mantũ jarĩa tũkũritanwa jarĩa jarĩ giutatĩ na ũũme bwa Mũrungu? Kamma nĩ ngwĩtĩkia atĩ Ũnene bwa Mũrungu nĩbu bũkathiria mathĩĩna ja antũ?’ Nĩkenda wĩta na mbere gũkaria mathũgaanio jaaku, ciũmie kwiritana Rũteto rwa Mũrungu na gũtumĩra jarĩa ũkwiritana. Wathithia ũu, ũtĩĩthĩrwa na nkanja kinya aniini atĩ jarĩa Bibiria ĩritanaga nĩ ja mma.—1 Tim. 4:15.
TUMĨRA ĨGIITA RĨAKU BWEGA
11. Rĩrĩa ũkwongeera kĩthomo nĩ ũgwati bũrĩkũ bũũmba kuumĩra bwegie ũrĩa ũgũtumĩra ĩgiita rĩaku?
11 Nĩ ũgwati bũrĩkũ bũrĩo? Kwongeera kĩthomo kwomba gũtumĩra ĩgiita rĩaku rĩriingĩ, mono mono rĩrĩa ũkwithuranĩra tontũ bwa igerio na kinya rĩrĩa ũrĩ na ngũgĩ cia cukuru inyiingĩ. Warega kũbangania ĩgiita rĩaku bwega, ũgacumbũka kĩmathũgaanio na kinya ũkanoga mono. Nĩkĩo burĩ ũntũ bwa gĩtũmi mono kũmenyeera ũgima bwaku bwa mwĩrĩ na kinya bwa kĩmathũgaanio.
12. Nĩ mantũ ta jarĩkũ ũbwirĩte kũthithia nĩkenda wonania nũgũtumĩra ĩgiita rĩaku bwega? (Aefeso 5:15, 16)
12 Thoma Aefeso 5:15, 16. No bwĩthĩrwe bũrĩ ũntũ bũbũũmũ ‘gũtumĩra ĩgiita rĩaku bwega.’ Kwou, nũkũbatara kũbangania mantũ bwega. Ngerekano, Kinya kethĩra ũkabatara gwĩta iracine, nũbuĩrĩte gũtumĩra ĩgiita amwe na antũ ba nja na kinya ataana na aarĩ ba baaba. (Zb. 133:1; Nju. 18:1) Ũntũ bwa gĩtũmi nĩ kũthithia mantũ jarĩa jagatũma wĩthĩrwa ũrĩ akuĩ na Jehova nkũrũki. (Mat. 6:33) Kinya ũkabatara gũtetheria ngũgĩ nja, kana ũrite ngũgĩ iria igagũtetheria kwona mbeca. Nkũrũki ũkabatara kũmenyeera ũgima bwaku bwa mwĩrĩ na njĩra ya kũthithia mazoezi na kinya kũnogoka. (Mut. 4:6; 1 Tim. 4:8) Nĩkenda wiingia mantũ jau jonthe, nũkũbatara kũbangania ĩgiita rĩaku bwega.
13. Nĩatĩa ũũmba kũthithia nĩkenda ũtumĩra ĩgiita rĩaku bwega?
13 Mantũ jarĩa ũũmba kũthithia mbere ya wambia kwongeera kĩthomo. Bibiria yugaga kũbangania mantũ, nĩgũtũmaga jageeta bwega. (Nju. 21:5) Ũrĩ na bũũ mathũgaanione, bangania ũrĩa ũgatumĩra ĩgiita rĩaku mbere ya kwambia kwongeera kĩthomo. Biũria bibi no bigũtethie kũthithia ũu: Mĩaka ĩu ĩngĩ rĩrĩa waarĩ cukuru rĩ, nĩatĩa wabanganagia ĩgiita rĩaku? Ũkeeja kwĩthĩrwa ũtathithĩrie mantũ bwega ĩgiita rĩu, nĩatĩa ũũmba kũthithia nandĩ nĩkenda wagĩrithia mantũ? Ciũmie kũthingatĩĩra mũtaratara jũrĩa wĩkĩte.c
14. Nĩ biũria birĩkũ bigagũtethia gwicũnkũũna wengwa?
14 Ĩta na mbere gwicũnkũũna wengwa rĩrĩa ũkwongeera kĩthomo. Ciũrie ũjũ: ‘Rĩ, nĩ nkũũmba kũthithia mazoezi na kũnogoka bwa kũngˈana? Rĩ, nĩnkwona kaanya ga kwĩthĩrwa amwe na ataana na aarĩ ba baaba? Rĩ, nĩ nthiragia ngũgĩ cia mwarimũ kũrĩo? Kethĩra ntĩnthiragia rĩ, ka ndĩ na mantũ jamaingĩ ja kũthithia kana kambetagĩĩra mwanka ndagĩka ya mũthia? Rĩ, aciari na acoore nĩbakwona atĩ nĩnkũbatara kũthithia mogarũrũku?’ Kethĩra kũrĩ o ũkũbatara kũthithia mogarũrũku mantũne jegie gũtumĩra ĩgiita bwega, thithia ũu na mpwĩ. Kinya no waranĩrie na antũ bangĩ barĩa bombaga gũtumĩra ĩgiita rĩao bwega.—Nju. 11:14.
TAARA ACOORE NA NJĨRA YA ŨŨME
15. Nĩ ũgwati bũrĩkũ ũũmba gũcemania nabu rĩrĩa ũkwongeera kĩthomo?
15 Nĩ ũgwati bũrĩkũ bũrĩo? O ũrĩa wĩtĩte na mbere kwongeera kĩthomo, aritwa bangĩ no bende bũtumĩra ĩgiita amwe rĩrĩa kĩraci kĩathira. Kinya gwe no ũkucĩĩrue kwĩthĩrwa amwe nabo. Gĩtũmi nĩ tontũ bũrĩ ba nthũkĩ ĩmwe, na no bwĩthĩrwe bũkĩgwĩragĩrua mantũ jamwe mono mono kethĩra bũrĩ kĩracine kĩmwe. No wĩthĩrwe ũkĩgwĩragĩrua mantũ jamaingĩ na aritwa barĩa bũkũthoma nabo nkũrũki ya ataana na aarĩ ba baaba bamwe. Kinya kethĩra bũrĩ kĩracine kĩmwe aritwa bau bangĩ batĩkũmenya ithimi bia Jehova. Amwe nou, nũkũbatara kwimenyeera. O ũrĩa ũgũtumĩra ĩgiita amwe nabo nou bakagarũra mwonere jwaku. (1 Ako. 15:33) Michael, ũrĩa waathithĩrie kosi ya stima mĩaka ĩna, nacioneere ũmma bwa mantũ jau. Ariuga ũjũ, “Nĩndatumagĩra mathaa 40 o kiumia amwe na ariti ngũgĩ bangĩ barĩa baatumagĩra rwaria rũthũũku, bakathikĩĩra ndwĩmbo irĩa itĩkwagĩra Mũkristũ na batatĩĩaga eekũrũ, kwou nĩndaambĩrĩrie kwona teka mantũ jau baaugaga kana baathithagia jatathũũki.”
16. ‘Gwĩtania na antũ barĩ na ũũme’ nĩ kuuga atĩa? (Njuno 13:20)
16 Thoma Njuno 13:20. Bibiria nĩtwonagia ũgwati bwa kũgwatanĩra na antũ babaaĩ. Ĩndĩ kinya nĩyonanagia atĩ, ‘ũrĩa wĩtanagia na antũ barĩ na ũũme akagĩta ũũme.’ Ũntũ bũrĩa tũkwiritana nĩ atĩ: Antũ barĩa tũgũtumĩra ĩgiita rĩriingĩ amwe nabo, no batũme tũkethĩrwa tũrĩ antũ babeega kana babaaĩ. Kwou, tuma ũcoore amwe na antũ barĩa bendete Jehova na barĩa bamũtumĩkagĩra.—Zb. 101:6, 7; 119:63.
17. Nĩatĩa ũũmba kũthithia nĩkenda ũciebania na mũũrũ jũmũthũũku?
17 Ũrĩa ũũmba kũthithia mbere ya wambia kwongeera kithomo. Thuura nĩ igiita rĩngˈana ũgatumĩra amwe na aritwa bangĩ. Trenton ũrĩa nĩ Mũkũũjĩ wa Jehova ariuga ũjũ: “Nĩmpendete aritwa barĩa tũthomaga nabo, ĩndĩ ntĩtumagĩra ĩgiita amwe nabo twarĩkia mathomo. Mbonaga akĩ barĩ aritwa ĩndĩ tĩ acoore baakwa ba akuĩ.” Nĩ mĩanka ĩrĩkũ ũũmba gũciĩkĩra yegie ĩgiita rĩrĩa ũgatumĩra amwe na aritwa bangĩ? No ũciũrie ũjũ: Nĩ mĩanka ĩrĩkũ ndaciĩkĩrĩte yegie ũntũ bũbũ rĩrĩa rĩngĩ ndaarĩ cukuru? Kethĩra nũkwona teka ũtaathithĩrie bwega, nĩ mogarũrũku jarĩkũ ũkũbatara kũthithia nandĩ? Ciũmie ‘gwĩtania na antũ barĩ na ũũmeʼ na ũciebanie na barĩa batĩendete Jehova.d
18. Nĩ biũria birĩkũ ũũmba gũciũria? (Tega kinya mbica.)
18 Kara ũgiicũnkũũnaga wengwa. Ciũrie ũjũ: ‘Rĩ, ndĩna ũcoore bwa akuĩ amwe na aritwa bangĩ? Rĩ, nĩ mpambĩtie kwaria kana kũthithia tabo? Nĩatĩa Jehova onaga ũcoore bũrĩa ndĩnabu amwe na aritwa bangĩ?’ (Zb. 1:1) Kethĩra nũkwona nũkũbatara kũthithia mogarũrũku, thithia ũu na mpwĩ. Tigĩĩra atĩ acoore baaku nĩ barĩa bendete Jehova o ta ũgwe. Ciũmie gũtũmĩĩrĩria aritwa barĩa bũthomaga nabo. Ũrĩna kaanya gakeega mono ga kũbatetheeria kũmenya ũũma.
Jũkia ĩtagaaria rĩa gũtũmĩrĩria aritwa bangĩ (Tega gĩcuncĩ kĩa 18)e
ITHURANĨRE BWEGA
19. Nĩatĩa ũũmba kwithuranĩra gũciinda mantũ jamoomũ rĩrĩa ũkwongeera kĩthomo? Taarĩĩria.
19 Ũthũgaanĩria ũntũ bũbũ; Muntũ ũrĩa ũkwenda gwitia kĩrĩma aibangaga bwega mbere ya kwambia rũgendo rwawe. Kinya kethĩra atĩkũmenya mantũ jonthe jarĩa agacemania najo, no mwanka ethĩrwe na ũgima bũbwega bwa mwĩrĩ, ekĩrĩte nguũ injega cia gwitia kĩrĩma, akĩmenyaga narĩa etĩte, na arĩ na mworoto. No ũthingate ngerekano ĩu rĩrĩa ũkwenda kwongeera kĩthomo. Ĩkĩra ngwatanĩro yaaku amwe na Jehova inya na njĩra ya ‘gwikundĩka mathaga jonthe ja Mũrungu ja ndwa,ʼ na mworoto jwĩthĩrwe nĩkũretera Jehova ũkumio na tĩ gwicwĩra ĩgweta.—Aef. 6:11-13; 1 Ako. 9:26, 27; 10:31.
20. Nĩatĩa muntũ omba ‘kwigeria ona kethĩra netĩkĩtie bwega’?
20 Bibiria ĩtwĩraga ũjũ: ‘Geragieni mantũ jeenu bwingwa bwone kethĩra nĩbwĩtĩkĩtie bwega; ningĩ bwigitagĩre bwingwa.ʼ (2 Ako. 13:5) No ũthithagie ũu rĩrĩa wĩtĩte na mbere kwongeera kĩthomo. Rĩonthe, ĩcũnkũũne ũgĩtumagĩra mantũ jaja twagweta kĩthomone gĩkĩ. Rĩ, no wĩtĩte na mbere kũthingatĩĩra mantũ ja gĩkĩrundu kana nĩwatiganĩre najo? Rĩ, no ũkarĩtie mathũgaanio jaaku kuumania na maũũme ja nthĩgũrũ ĩjĩ? Rĩ, no ũgũtumĩra ĩgiita rĩaku bwega? Rĩ, nũgũtuma ũcoore na ataana na aarĩ ba baaba na ĩgiita o rĩũ ũgĩciebanagia na mũũrũ jũmũthũũku? Biu nĩbio biũria ũbuĩrĩte gũciũria, kwĩthĩrwe ũrĩ cukuru, ngũgĩne, kana gũntũ kũngĩ. Ciũmie kũrikia ngwatanĩro yaaku amwe na Jehova ĩtĩkũmakania mantũ jarĩa ũgũkũrũkĩĩra. Ĩthĩrwa na mma atĩ Jehova akatharima gũciũmia gwaku.—Nju. 3:5, 6.
RWĨMBO NA. 87 Njũũni Bwĩkĩrwe Inya
a Nĩkenda wona mantũ jarĩa jomba gũgũtethia gwĩta na mbere gũtumĩkĩra Jehova, tega mantũ ja kũthoma kĩrĩ jw.org jarĩ na kĩongo “Vijana Huuliza . . . Nitahitaji Kufanya Nini Baada ya Ubatizo?—Sehemu ya 1: Dumisha Utendaji Wako wa Kiroho.”
b Nĩkenda wona mantũ jarĩa jomba gũgũtethia gũkaria ũũmbi bwaku bwa kũthũgaania, tega gĩcuncĩ kĩrĩ Mnara wa Mlinzi Mei 2019 “Usidanganywe na ‘Hekima ya Ulimwengu Huu’”.
c Nĩkenda wona ũrĩa ũũmba kũbangania mantũ ja o ntukũ o ntukũ, tega mantũ ja kũthoma kĩrĩ jw.org rungu rwa kĩongo “Vijana Huuliza . . . Ninaweza Kutumiaje Vizuri Muda Wangu?”
d Nĩkenda wona ũrĩa ũũmba gũtua matua jameega jegie acoore, tega kĩthomo kĩa 48, “Thuura Acoore Baaku na Njĩra ya Ũũme,” kĩrĩ iuku Gwĩrĩrua Ũtũũro Kenya na Kenya!
e GŨTAARĨĨRIA MBICA: Mwarĩ wa baaba akĩthithagia kosi ya gũsuka mũtundu, na njĩra ya ũũme nagũtũmĩĩrĩria mũritwa ũngĩ.