JUNI 22-28, 2026
RWĨMBO NA. 90 Twĩkanagĩre Inya
Iritane Kuumania na ‘Mũrungu Mwene Mantũ Jonthe ja Kũboranĩria’
‘Kiragia bangĩ . . . nĩ ũntũ bwa ũboreri bũrĩa Mũrungu atũboragĩria nabu.’—2 AKO. 1:4.
JARĨA TŨKAIRITANA
Tũkoona ũrĩa tũũmba kũboreria bangĩ tũkiigerekanagia na Jehova na barĩa baigerekanagia nawe.
1. Nĩkĩ tũbuĩrĩte kũboreria bangĩ?
Twinthe nĩtũkũrũkagĩĩra ‘magerio jamaingĩ,’ na kwou, magiita jamwe nĩtũbataraga kũborerua na gwĩkĩrwa inya. (1 Pet. 1:6) O ta ũrĩa twigagua bwega twaborerua nĩ bangĩ, nĩtũbuĩrĩte kwĩthĩrwa na mpwĩ cia kũboreria barĩa bakũthangĩka. (Mat. 7:12) Jehova, ‘Mũrungu mwene mantũ jonthe ja kũboranĩria’ natũritanaga ũrĩa tũũmba kũboreria ‘barĩa bethĩrĩkua barĩ na thĩĩna kinya ĩrĩkũ.’ Kinya tuĩ no tũthingate ngerekano yaawe na njĩra ya ‘kũboreranagia o muntũ na ũngĩ.’ (2 Ako. 1:3, 4; 1 Athe. 4:18) Tũthithagia ũu, tontũ nĩtwendete ataana na aarĩ ba baaba na tĩ tontũ bwa kũthingata watho. Kĩthomone gĩkĩ tũkaarĩĩria (1) kũboreria nĩ kuuga atĩa o ta ũrĩa gũtaarĩĩtue Bibiriene, (2) ũrĩa tũũmba kũboreria bangĩ, na (3) ũrĩa tũũmba kũthithia rĩrĩa tũkũbatara kũborerua.
KŨRINGANA NA BIBIRIA KŨBORERIA NĨ KUUGA ATĨA?
2. Kũringana na Bibiria, kiugo ‘boreria’ kĩomba kwonania mantũ jarĩkũ?
2 Bibiriene, kiugo gĩa Kĩgiriki kĩrĩa gĩtauragwa “boreria” no kĩonanie mantũ mwanya mwanya kũringana na ũntũ bũrĩa bũkwarĩĩrua. Kĩomba kwonania “gwĩkĩra inya,” “kwigĩka,” kana “kũromba muntũ ajũkia ĩtagaarĩa rĩnna.” (Aro. 12:8; Tega “encourages” kĩrĩ study note.”) Ĩndĩ kamma kiugo kĩu kĩonanagia “kũrũngama akuĩ na muntũ nĩkenda ũmũtethia.” Kwou, no tũthũgaanĩrie muntũ ejĩte na mpwĩ gũtethia mũcoore waawe ũrĩa ũkũthangĩka. Kinya kethĩra no atumĩre njĩra mwanya mwanya kũmũboreria, natigagĩĩra mũcoore waawe akwigua bwega na agwĩkĩrwa inya.
3. Nĩatĩa Baranaba eekĩre ngerekano ĩnjega ya kũboreria bangĩ? (Tega kinya mbica.)
3 Thũgaanĩria ngerekano ĩjĩ ĩrĩ Bibiriene. Mũkristũ ũmwe wetagwa Jusufu noonanĩrie ũũmbi bũbũnene mono bwa gwĩkĩra bangĩ inya na kũbaboreria, nĩkĩo atũmwa baamwĩtĩre Baranaba, riĩtwa rĩrĩa rĩtaũragwa ‘Mũtaana wa Kũboranĩria.’ (Atum. 4:36) Riĩtwa rĩu nĩ rĩamwagĩĩre mono tontũ nĩrĩo rĩetĩre na mbere gũtumĩrwa Bibiriene antũ a Jusufu. Bibiria ĩtwĩraga kaingĩ Baranaba naatethagia Akristũ bangĩ rĩrĩa beethagĩrwa na ũbatu. Ngerekano, ntukũ inkai nyuma ya kwaa mũthingati wa Jesũ, Saũlũ naakinyĩre Jerusalemu na neendaga kwonana na aritwa bangĩ. Ĩndĩ, nĩbaamũkĩraga tontũ mberene aaijĩkeene ta mũthangĩkania. Amwe nou, Baranaba ateethĩrwe na nkanja nawe na aramwigithania nabo.—Atum. 9:26-28.
Baranaba naatũũraga kũringana na riĩtwa rĩawe (Tega gĩcuncĩ kĩa 3)
ŨRĨA TŨŨMBA KŨBORERIA BANGĨ
4. Njĩra ĩmwe ĩrĩa njega ya kũboreria bangĩ nĩ ĩrĩkũ? (Aroma 1:11, 12))
4 Bariũngĩre rĩrĩa gũkũmbĩka. Jehova natumagĩra atumĩkĩri baawe kũboreria bangĩ. Ngerekano, rĩrĩa kĩroria Elija aaunĩki nkoro, Jehova naatũmĩre mũraĩka kũmwĩkĩra inya. (1 An. 19:4-7) Mũtũmwa Paũlũ neendete kũriũngĩra ataana ba baaba nĩkenda abekĩra inya. (Thoma Aroma 1:11, 12.) Rĩrĩa wariũngĩra muntũ nĩkenda ũmũboreria, tumĩra kaanya ga kũngʼana amwe nawe. (1 Ako. 16:7) Ĩndĩ kethĩra gũtĩũmbĩka ũriũngĩra muntũ ũrĩa ũrĩ na ũbatu, no ũmũringĩre thimũ, ũkamwandĩkĩra barũga, kandi, kana ntũmwa ya thimũ nĩkenda ũmwĩkĩra inya. Rĩ, ũgetĩkĩĩria Jehova agũtumĩra kũboreria bangĩ?
5. Nĩ mantũ jarĩkũ jamoomũ tũkwĩrĩgĩĩra gũkũrũkĩĩra?
5 Ũtũũro ntukũne cia mũthiro bũgeeta na mbere kũthũũka, kwou bwomba kwĩthĩrwa bũrĩ bũbũũmũ kũriũngĩra ataana na aarĩ ba baaba rĩrĩa bakũbatara kũborerua. Rĩrĩa Paũlũ aaingĩri nceera narĩa Roma, Onesiforo, ũrĩa waarĩ wa kuuma Efeso, naamũcwĩre kinya kethĩra bũu bũrĩngĩmũtonyia ũgwatine bwa kwingĩrwa nceera kana kũũragwa. (2 Tim. 1:16-18) Akũũjĩ ba Jehova narĩa Russia nĩbonanĩtie nkoro o ta ĩu rĩrĩa ataana na aarĩ ba baaba bakũthangĩkua tontũ bwa wĩtĩkio bwao. Rĩrĩa Mũkũũjĩ wa Jehova aikua kotini, nĩbetaga nĩkenda bamwĩkĩra inya kinya kethĩra kũthithia ũu no kũbatonyithie ũgwatine. Nĩkenda ũgĩta ũcamba tabo, rĩ, to wiritane ũrĩa antũ ba Mũrungu ba karaaja na ba ĩgiita rĩetũ bethĩrĩtwe bagĩtethania, na ũrĩa boonete kũgwĩrua kinya kethĩra nĩ bagũkũrũkĩĩra mĩthangĩko!
6. Nĩatĩa tũũmba kwigerekania na Jehova rĩrĩa tũkũboreria bangĩ? (Tega kinya mbica.)
6 Bathikĩĩre. Rĩrĩa ũtũũro bwa kĩroria Elija bwaarĩ ũgwatine, naamenyithĩrie Jehova jarĩa jaarĩ nkorone. Kinya kethĩra Mũrungu weetũ wa wendo naamenyaga nĩmbi biamũthangĩkagia, naamũthikĩĩrĩre rĩrĩa aaranagĩria nawe. Kinya naamũthikĩĩrĩre na njĩra ya weteeri rĩrĩa aacokagĩra ũntũ bũmwe kaĩrĩ na kaĩrĩ. (1 An. 19:9, 10, 14) Jehova kinya neetĩkĩĩrĩrie kĩroria Habakuki amwĩra mantũ jarĩa jaamũthangĩkagia na nkanja irĩa aarĩ nacio kinya kethĩra aaragia na njĩra ĩkwonania teka atĩgũtĩĩa Mũrungu. (Hab. 1:2, 3) Kinya ntukũne cietũ, Jehova nathikagĩĩra mantũ jonthe jarĩa tũmũrombaga kinya kethĩra naijĩ jarĩa tũkũbatara. Twomba kwigerekania nawe rĩrĩa twathikĩĩra ataana na aarĩ ba baaba bwega na njĩra ya gĩtĩĩo rĩrĩa bakwaranĩria natuĩ. Rĩrĩa bakwaria nagwe, ‘Gĩta mpwĩ cia kũthikĩĩra’ na menya ũbagiitaria kana ũthũũra baaria biugo bitĩthũgaanĩrĩtue bwega kana kinya baaria bagiicokagĩra.—Jak. 1:19; Mut. 7:9.
Igerekanie na Jehova na njĩra ya kũthikĩĩra bwega rĩrĩa ataana na aarĩ ba baaba bakwaranĩria nagwe (Tega gĩcuncĩ kĩa 6)
7. Nĩatĩa tũũmba kũmenya mobatu ja muntũ ũrĩa ũgũkũrũkiĩra mantũ jamoomũ?
7 Menya ũbatu bwawe. Tũtĩũmba kũthoma nkoro ta Jehova, na kwou nĩkenda tũmenya jarĩa muntũ agũkũrũkĩĩra no mwanka tũmũthikĩĩre bwega. Menya wona teka ũkũmenya jarĩa muntũ agũkũrũkĩĩra kinya kethĩra mbuga nũkũmenya ũrĩa ũũmba kũthithia ũntũne ta bũu. Riikana twinthe tũrĩ mwanya. Kwou jũkia kagiita, mũthikĩĩre bwega, na ũmũũrie biũria na njĩra ya ũũme nĩkenda akwĩra jarĩa jarĩ nkorone.—Nju. 20:5.
8. Nĩatĩa Jesũ aaborerie Maritha na Maria rĩrĩa Lazarũ aakuĩre? (Tega kinya mbica.)
8 Thũgaanĩria ũrĩa Jesũ aaboreerie Maria na Maritha nyuma ya gĩkuũ kĩa mũtanongʼina Lazarũ. Kinya kethĩra bobaĩrĩ nĩbaathangĩkĩte mono tontũ bwa gĩkuũ kĩu, Jesũ naababoreerie o ũmwe na njĩra yaawe mwanya. Nyuma ya Maritha kwaranĩria nawe, Jesũ naamũtetherie kwĩthĩrwa na wĩtĩkio bũũriku bwegie wĩrĩgĩĩro bwa kũriũkua. Ĩndĩ rĩrĩa Maria eejĩre akĩrĩraga, Jesũ atamũgweteere mantũ jegie kũriũkua. Mwanya nou, naarĩrĩre amwe nawe na aramũũria nĩkũ beekĩte Lazarũ. (Joh. 11:20-35) Nĩmbi tũkwiritana? Rĩrĩa tũkũboreria barĩa bakũthangĩka, no mwanka tũciũkĩrwe nĩ mobatu jaao antũ a kũgeria gũtumĩra njĩra ĩmwe kũbaboreria bonthe.
Rĩrĩa ũkũboreria bangĩ, ciũmie gũciũkĩrwa nĩmbi bakũbatara (Tega gĩcuncĩ kĩa 8)a
9. Nĩatĩa tũũmba gũtumĩra Bibiria kũboreria bangĩ? (Aroma. 15:4, 5)
9 Tũmĩra Bibiria. Rĩrĩa watumĩra Maandĩko kũboreria muntũ, womba kũmũtetheeria kwĩthĩrwa na wĩrĩgĩĩro. (Thoma Aroma 15:4, 5.) Wĩrĩgĩĩro bũu bũkamũboreria na bũmwĩkĩre inya. (Isa. 40:31) Nĩatĩa ũũmba kũriikana Maandĩko jarĩa ũũmba gũtumĩra gwĩkĩra muntũ inya? Bamwe nĩbandĩkĩte mĩstaarĩ ya Bibiria ĩrĩa bomba gũtumĩra kũboreria bangĩ. Nĩkenda wona maandĩko jagũgũtethia, tega kĩongo “Faraja” kĩrĩ gauku “Maandiko kwa Ajili ya Maisha ya Mkristo.” Romba Jehova agũtethie gũtumĩra Rũteto rwawe bwega nkũrũki nĩkenda wĩkĩra bangĩ inya. Kĩrundu kĩawe gĩgagũtethia kũriikana Maandĩko jarĩa ũkũbatara nĩkenda ũboreria bangĩ.—Joh. 14:26.
10. Nĩkĩ tũbuĩrĩte kwaria na njĩra ya kĩao rĩrĩa tũgwĩkĩra bangĩ inya?
10 Aria na njĩra ya kĩao. Magiita jamwe twomba kũbatara kũboreria acoore beetũ na njĩra ya kũbatethia kũgarũra mwonere jwao kwerekera mĩthangĩko ĩrĩa bagũkũrũkĩĩra. Rĩrĩa ũkũthithia ũu, thũgaanĩria biugo biaku mbere waria nĩkenda bimwĩkĩra inya antũ a kũmwigithia bũbũũĩ. (Nju. 12:18) Jehova naatwĩkĩĩre ngerekano ĩnjega rĩrĩa aaragia na Elija. Kũrĩ na ĩgiita Elija oonaga ta wenka akĩ watumĩkagĩra Jehova na teka ngũgĩ yaawe arĩ kĩroria yaarĩ ya ũtheri. Jehova naamũtetherie na njĩra ya kĩao kũgarũra mwonere jũu atĩkũmũgwetera maatia jaawe ĩmwe kwa ĩmwe. (1 An. 19:15-18) Kinya gwe ũgatethia bangĩ wethĩrwa na kĩao na wathũgaanĩria biugo biaku bwega. Rĩrĩa ũkũrita rwaria kana ũgũcokia mĩcemanione, rĩonthe aria mantũ jameega na njĩra ya kĩao nĩkenda wĩkĩra ataana na aarĩ ba baaba inya.
11. Barĩa bainyĩrĩtue nĩ mĩthangĩko nĩmbi kaingĩ babataraga? (1 Johana 3:18)
11 Baae ũtethio bũrĩa bakũbatara. Rĩrĩa bangĩ bagũkũrũkĩĩra mĩthangĩko, nĩtũkũbatara kũbaboreria na biugo na kinya mathithio. (Thoma 1 Johana 3:18.) Baranaba neekĩre ngerekano ĩnjega rĩrĩa eenderie into bimwe birĩa aarĩ nabio nĩkenda bitetheeria ataana na aarĩ ba baaba barĩa baabatithĩtue rua ĩndĩ baarĩ na ũbatu. (Atum. 4:36, 37) Akristũ babaingĩ ntukũne cietũ nĩbathingatĩte ngerekano yaawe ĩnjega na njĩra ya kwejana ũtethio kĩrĩ barĩa barĩ na ũbatu. Gabriela kuuma Poland naarĩngĩkĩre mono nja yaawe ĩrĩkwinyangua nĩ ĩkondoria rĩĩnene. Arĩtaarĩĩria ũjũ: “Ũũni na aciari bakwa nĩtwamakĩre mono. Nĩndaciũragia, rĩ, nkomba kũũmĩĩria? Ĩndĩ ataana na aarĩ ba baaba nĩbeejĩre ntukũ ĩmwe bararita ngũgĩ ĩnene mono ya gũtũtetheeria. Ũntũ bũu nĩbwandikithĩĩrie nkũrũki atĩ Jehova natumagĩra antũ baawe kũboreria barĩa bakũthangĩka.”
12. Nĩatĩa ũũmba gũtethia Akristũ bangĩ rĩrĩa womĩĩria magerio?
12 Ũmĩĩria magerio jarĩa ũgũkũrũkĩĩra. Mũtũmwa Paũlũ neerĩre Athesalonike atĩ naaboragĩrua na agekĩrwa inya nkũrũki rĩrĩa aaigĩrue bwegie wĩtĩkĩkua na kũũmĩĩria kwao. Naamenyaga atĩ ngũgĩ ĩrĩa aaritaga tontũ bwao ĩtaarĩ ya ũtheri. (1 Athe. 3:5-8) Nkũrũki, Paũlũ naamenyaga atĩ kũũmĩĩria kwawe kũrĩngĩ boreria ataana na aarĩ ba baaba kinya barĩa ataarĩ agũcemania nabo. (Akol. 2:1, 2) O ta ũu, rĩrĩa Akristũ bangĩ boona ũrĩa Jehova agũtũtethia kũũmĩĩria magerio, kinya bo bagekĩrwa inya mono.
13. Nĩatĩa tũbuĩrĩte gwĩta na mbere kũthithia rĩrĩa tũkũboreria bangĩ?
13 Ĩthĩrwa na weteeri. Rĩrĩa tũkũgeria kũboreria ataana na aarĩ ba baaba barĩa baunĩki nkoro, tĩ bũbũũthũ bagunĩka o rĩo. Amwe nou, Maandĩko jatwĩraga ‘ĩkanagĩreni’ inya. Biugo biu bĩrĩonania ũntũ bwa gwĩta na mbere. (1 Athe. 5:11) Kwou, ĩthĩrwa na weteeri rĩrĩa ũgwĩta na mbere kũboreria bangĩ. (1 Athe. 5:14) Amwe nou magiita jamwe, o ũmwe weetũ akabatara kũborerua. Nĩatĩa tũũmba kũthithia rĩrĩa bũu bwakarĩka?
RĨRĨA ŨKŨBATARA KŨBORERUA
14-15. Nĩatĩa tũbuĩrĩte kũthithia rĩrĩa tũkũthangĩka kana tuunĩki nkoro?
14 Romba Jehova. Mũrombe akũborerie rĩrĩa ũgũkũrũkĩĩra mĩthangĩko kana uunĩki nkoro. (Zb. 94:19) Mũgwetere ũntũ bungwa na ũmwonorerie nkoro yaaku. (Zb. 62:8) Ũmma nĩ atĩ Jehova nakũmenya ũrĩa ũkwigua mbere ũmũromba. Ĩndĩ rĩrĩa wamũmenyithia jarĩa jarĩ nkorone gũkũrũkĩĩra maromba, wĩthagĩrwa ũkĩonanagia wĩtĩkio kĩrĩwe. Rĩonthe Jehova agakũthikĩĩra na acokie maromba jaaku rĩrĩa wamũromba ũrĩ na wĩtĩkio. (Mar. 11:24) Afilipi 4:6, 7 ĩtwĩraga: ‘Menyithagieni Mũrungu mantũ jonthe jarĩa bũkwenda; Ũkiri bwa Mũrungu, bũrĩa bũtĩmenyeka ũrĩa bũngˈana, bũrokaragia nkoro cienu, o na mathũgaanio jeenu.’
15 Romba bangĩ ũtethio. Aranĩria na Mũkristũ ũmũgimaru kana mũkũrũ wa kĩũthũrano ũrĩa ũgwĩtĩkia. Ataana na aarĩ ba baaba bomba gũkũboreria, ĩndĩ batĩmenya jarĩa ũgũkũrũkĩĩra kana ũbatu bwaku kethĩra ũtĩbamenyithia. (Nju. 14:10) Barombe bakũthikĩĩre na njĩra ya kĩao kana bakũthomere ĩandĩko kana ũntũ bũngĩ kuuma kĩrĩ mauku jeetũ bũrĩa bũũmba gũkũboreria.
16. Nĩatĩa kũũmba gũkarĩka rĩrĩa bangĩ bagũkũboreria, ĩndĩ nĩmbi ũbuĩrĩte kũriikana?
16 Rekera bangĩ na wĩthĩrwe na weteeri. Ataana na aarĩ ba baaba bomba gũtwaatĩria rĩrĩa bagũtũboreria. Ngerekano, no barie kana bakathithia ũntũ bũũmba gũtwigithia bũbũũĩ nkũrũki, antũ a gũtũboreria. Bũu bũkeeja gũkarĩka boonie weteeri. (1 Ako. 13:4, 7) Jakubu 3:2 yugaga: ‘Gũkeethĩrwa kũrĩ muntũ kinya ũrĩkũ ũrĩa ũtĩkũgiitarua nĩ rwaria rwawe, muntũ ũu nĩ ũmũũjũru.’ Riikana mworoto jwao nĩ gũgũtethia. O ta ũgwe, nĩbendete kũthithia mantũ jameega ĩndĩ magiita jamwe nĩbaatagia.—Mat. 26:41.
17. Nĩatĩa tũbuĩrĩte gũciũmia kũthithia?
17 Twinthe nĩtũbataraga kũborerua na gwĩkĩrwa inya. Tũkaabatara ũntũ bũu nkũrũki o ũrĩa ntukũ iji cia mũthia igwĩta ikĩthũũkaga na anthũ ba Mũrungu bagwĩta na mbere gũtũmena. Rekeni tũciũmie kũthithia jonthe jarĩa tũkũũmba nĩkenda tũboranĩria.
RWĨMBO NA. 130 Ĩthĩrwa ũrĩ Muntũ wa Kũrekanagĩra
a GŨTAARĨĨRIA MBICA: Mũkũrũ wa kĩũthũrano athikĩĩrĩte mũtaana wa baaba ũrĩa ũkuĩri nĩ mwekũrũ waawe. Nyumene, mũkũrũ ũu ariũngĩrĩte mũtaana wa baaba ũrĩa wakuĩrĩĩrwe nĩ mwekũrũ, na bakiirikanagia mantũ jameega jarĩa mwekũrũ waawe aathithĩtie.