Ĩta na Mbere Kũrikia Ũcoore Bwaku na Ũrĩa Bũgũrene Nawe

1. Nĩkĩ acoore babeega barĩ kĩewa kuuma kĩrĩ Jehova?

Acoore babeega nĩ kĩewa kuuma kĩrĩ Jehova. (Jak. 1:17) Nĩbendete Mũrungu na nĩbatwendete. Nĩbagwĩranagĩrua natuĩ na bagatũboreria rĩrĩa tuunĩki nkoro, na bagatwaa motaaro jarĩa jakwagĩra rĩrĩa tũkũjabatara. Nĩbagwĩtĩkĩka na kinya no tũũmbe kũberĩgĩĩra. Acoore tabau kamma nĩbatũmaga ‘nkoro’ ĩkagĩa na ‘nkerũ’!—Nju. 27:9.

2. Nĩkĩ barĩa bagũrene babuĩrĩte gwĩta na mbere gwĩkĩra ũcoore bwao inya? (Mathayo 19:6)

² Nĩ ũntũ bwa gĩtũmi mũkũrũ na mwekũrũowe kwĩthĩrwa na ũcoore bwa akuĩ mono. Nĩbabuĩrĩte kũbũjũkia na ũrito na bageta na mbere kũbwĩkĩra inya. Kethĩra batĩthithia ũu, bomba kwigua ĩoru, bakaunĩka nkoro, na kinya bakaaga kũgwĩrua. Ĩndĩ beta na mbere gwĩkĩra ũcoore bwao inya, bakagwĩrĩrua ngwatanĩro ya akuĩ nkũrũki gatĩgatĩne kaao. (Thoma Mathayo 19:6.) Kĩthomone gĩkĩ, tũkoona ũrĩa barĩa bagũrene bomba gwĩta na mbere gwĩkĩra inya ũcoore bwao. Ĩndĩ mbere, gatũcũnkũũne ũrĩa Akristũ barĩa batĩ ngũranone bomba kũthuura muntũ ũrĩa bakagũrana nawe na batũũre barĩ na ũcoore bwa akuĩ.

ŨRĨA ŨŨMBA KŨTHUURA MŨNYANYA ŨRĨA BŨGATŨŨRA BŨRĨ ACOORE

3-4. Nĩmbi bigatethia muntũ kũthuura mũnyanya ũmwega wa kũgũrana nawe? (Njuno 18:22)

³ Mbere tũtua ĩtua kinya rĩrĩkũ rĩĩrito, nĩtũbuĩrĩte kũthũgaanĩria mogwati na moguni jarĩo. Nĩ ũntũ bwa gĩtũmi kũthũgaanĩria bwega o ĩtua rĩonthe rĩĩrito rĩrĩa tũkathithia tontũ rĩkaringithia ũtũũro bwetũ ĩgiita rĩraaja.

⁴ Ĩtua rĩmwe rĩa gĩtũmi nkũrũki rĩrĩa tũkarothithia ũtũũrone bwetũ nĩ kũthuura mũnyanya ũrĩa tũgatũũrania nawe ngũranone. Tontũ Jehova nĩwe waambĩrĩĩrie mũbango jwa ngũrano, nĩ bwega gũcwaa kĩrĩra kĩrĩwe rĩrĩa tũkũthuura wa kũgũrana nawe. Arĩenda muntũ mũrũme oona mũka ũmwega, na muntũ mũka oona mũkũrũ ũmwega. Rĩonthe Jehova naijĩ kĩrĩa gĩgũtwagĩra nkũrũki. (Thoma Njuno 18:22; Isa. 48:17, 18) Ũritani bũrĩa bũrĩ Rũtetone rwa Mũrungu bwomba gũtethia Mũkristũ kũthuura muntũ ũrĩa ũkũmwagĩra.

5. Nĩkĩ nĩ bwega kũthuura muntũ ũbatithĩtue arĩ mũnyanya waaku?

⁵ Rĩrĩa twabatithua, nĩtwejaga acoore ba Mũrungu. (Zb. 25:14) Kethĩra nũkwenda gũtonya ngũranone, nũbuĩrĩte kũthuura muntũ ũrĩa ũrĩ mũcoore wa Jehova. (1 Ako. 7:39) Wathithia ũu, ũkoonania nũgũtĩĩa ithimi bia Mũrungu, na ũrĩa ũkagũrana nawe akethĩrwa arĩ kĩtharimo kuuma kĩrĩ Jehova. (Nju. 19:14) Kinya ũgaciebania na mathĩĩna jarĩa jaumanagia na ‘kũtheekanua’ na muntũ ũtĩĩtĩkĩtie. (2 Ako. 6:14) Nĩ ũntũ bũtĩ bwa ũũme gũtuma ũnyanya na muntũ ũtĩĩtĩkĩtie tontũ ũtĩroona mũntũ ũgũkwagĩra ũthuranĩrine bwa Jehova. Kinya tĩ bwega gũciaĩria atĩ nkeeja kwambia ũnyanya na muntũ ũtĩĩtĩkĩtie, mũthiene oomba kwiritana ũmma.

6-7. Nĩ biũria ta birĩkũ ũbuĩrĩte gũciũria ĩgiita rĩa ngambanio?

⁶ Nĩ mma, tĩ muntũ wonthe ũrĩa ũbatithĩtue ũũmba kwagĩra kũgũrana nawe. Cũnkũũna bwega ũrĩa ũkwenda aa mũnyanya waaku.a Ciũrie: ‘Nĩatĩa athithagĩria antũ ba nja yaao? Rĩ, nabamakagĩra na kũbatĩĩa? Acoore baawe nĩ baaũ? Nĩatĩa athithagia rĩrĩa kũrega kwiganua kwaumĩra? Rĩ, nakinyagĩĩria maoni jaawe, kana netĩkagĩĩria ja bangĩ bunka jagĩĩtanagĩria na Maandĩko? Mwonere jwawe nĩ jũrĩkũ ũntũne bwegie mbeca?

⁷ Nkũrũki no ũciũrie: ‘Rĩ, mũcoore ũjũ nendete Jehova kuuma nkorone? Nagũciũmia kwonania nkuma ta cia Mũrungu? Rĩ, agantethia gũkuĩĩria Jehova nkũrũki? Mĩoroto yeetũ ya gĩkĩrundu nĩngʼuanene? Rĩ, nĩnkwona teka tũgatuma ũcoore bwa akuĩ?’ (Akol. 3:9, 10) Kethĩra ũrĩ mwarĩ wa baaba rĩ, nũkwona teka mũtaana ũu akaa mũcoore waaku wa akuĩ, na kĩongo gĩkĩega kĩa nja? (1 Ako. 11:3) Kethĩra ũrĩ mũtaana wa baaba rĩ, nũkwona teka mwarĩ ũrĩa ũkũgambia ageetĩkĩĩria ũmũtongeeria ũrĩ kĩongo kĩa nja kinya kethĩra ũrĩ na gũtaũkĩrwa gwaku? Ũkabatara ĩgiita rĩa kũngʼana kwona macokio ja biũria biu. Kwou, tumĩra ĩgiita rĩa ngambanio kũmenya bwega muntũ ũrĩa ũkwenda kũgũrana nawe.

8-9. Nĩmbi biũmba gũtethia muntũ ĩgiita rĩa ngambanio gũtua matua ja ũũme? (Tega kinya mbica.)

⁸ Kethĩra ũkamenya bwega ũrĩa ũkwenda kũgũrana nawe ĩgiita rĩa ngambanio, bũkethĩrwa bũrĩ bũbũũthũ gũtua ĩtua rĩa ũũme. Cũnkũũna ũrĩa bangĩ bamwonaga. No ũborie bwegie nkuma ciawe na mĩtugo yaawe. Rĩ, naijĩkene ta muntũ mwinyiia, ũrĩ na kĩao, na ũngʼanĩĩru? Sarah, mwarĩ wa baaba ũrĩa ũkaraga French Guiana ũrĩa wagũranĩre na mũtaana wa baaba ũgwĩtwa Daniel, ariuga: “Nĩndoorĩrie mantũ jegie Daniel kĩrĩ mũtaana wa baaba ũrĩa baatumĩkaga nawe barĩ mapainia, na baakaraga ngorobene ĩmwe, na kinya kuuma kĩrĩ mũkũrũ wa kĩũthũrano kĩao, na kĩrĩ mũcoore waawe wa akuĩ, na kinya kuuma kĩrĩ aarĩ ba baaba ba kĩũthũrano kĩao. No ũũrie mũnyanya waaku kethĩra kũrĩ ũntũ arĩngĩenda gũkũmenyithia bũrĩa aathithĩtie karaaja kana nandĩ, tontũ mĩtugo kana mantũ jamwe nyumene joomba kũreta mathĩĩna jamarito ngũranone.

⁹ Menya ũrega kũjũkia na ũrito mantũ jarĩa jatĩgũkũgwĩria jegie mũnyanya waaku kana mantũ jangĩ jarĩa acoore baagimaru bagakwĩra jamwegie. Wathithia ũu, ũkoomba gũtua ĩtua rĩa ũũme kethĩra bwĩte na mbere na ngambanio kana bũtigane.b Nandĩ gatwarĩĩrie barĩa barĩ ngũranone gĩcuncĩne kĩrĩa gĩtigeere kĩthomone gĩkĩ.

TUMĨRENI KAANYA BŨRĨ AMWE GWĨKĨRA INYA ŨCOORE BWENU

10. Nĩkĩ bũrĩ ũntũ bwa gĩtũmi mũkũrũ na mwekũrũ gũtumĩra ĩgiita barĩ amwe na kũthikanĩĩra?

¹⁰ Mũkũrũ na mwekũrũ bomba gũtũũria ũcoore na ngũrano yaao ĩriki rĩrĩa batumĩra kagiita barĩ amwe, kinya kethĩra barĩ na mantũ jamaingĩ. Bũu nĩbũbaejaga kaanya ga kwarĩĩria jarĩa jakarĩkĩte ndeene ya ntukũ, kwĩrana jarĩa jarĩ nkorone, ũrĩa bakũthũgaania, kwonania wendo, na kũgwĩranĩrua.

11. Nĩmbi biũmba kũthũũkia ũcoore bwa mũkũrũ na mwekũrũowe?

¹¹ Mũkũrũ na mwekũrũ barĩa bethagĩrwa na ũcoore bwa akuĩ, nĩbagwĩragua gũkara barĩ amwe. Nĩ mma, tĩ rĩonthe boomba kwĩthĩrwa barĩ amwe. Ĩndĩ gũkara kũraaja ĩgiita rĩraaja kwomba kũreta ũgwati. Ngerekano, bamwe nĩ betĩkĩĩrĩtie kũrita ngũgĩ nthĩgũrũ ingĩ na bagatiga nja ciao ĩgiita rĩraaja. Kinya kethĩra bũu no bũtũme bakoona mbeca, kwĩthĩrwa batĩ amwe ĩgiita rĩraaja no gũtonyie ngũrano yaao ũgwatine.

12-13. (a) Nĩatĩa Akristũ bamwe bathithĩtie nĩkenda batumĩra kaanya na ũrĩa bagũrene nawe? (Tega kinya kathandũkũ.) (b) Ũcoore bwakwa na ũrĩa tũgũrene nawe nĩ bwa gĩtũmi bũngʼana? (Tega kathandũkũ, “Mbonaga Mwendwa Waakwa Arĩ wa Gĩtũmi Bũngʼana.”)

¹² Ona ũrĩa antũ bamwe bathithĩtie barĩa barĩ ngũranone nĩkenda bomba gũtumĩra ĩgiita barĩ amwe. Leah, ũrĩa ũkaraga Guam, ariuga: “Ũũni na mũkũrũ wakwa nĩtũgwĩragĩrua kũthithia mantũ tũrĩ amwe. Kaingĩ rĩrĩa twagwatwa ũgeni kana tweta kũriũnga, twendaga gwĩta tũrĩ amwe.” Roxanne, ũrĩa ũkaraga Amerika ariuga: “Tontũ tũrĩ na mantũ jamaingĩ ũtũũrone, nĩ twonete nĩbwega kũbangania ĩgiita rĩa kwĩthĩrwa tũrĩ amwe, o ta ũrĩa tũthithagia rĩrĩa tũrĩ na mantũ jangĩ ja gitũmi.” (Teganĩĩria Amosi 3:3.) Damien, ũrĩa ũkaraga France, ariuga: “Ũũni na mwendwa wakwa nĩtwiritanĩte gũkucĩĩrua nĩ mantũ jarĩa o ũmwe weetũ agwĩragĩrua na kũjeenda.” (Mat. 7:12) Na Katie, ũrĩa ũkaraga Amerika ariuga: “Magiita jamwe nĩtwĩkaga thimũ cietũ kũraaja itĩgatwangaratanie.”

¹³ Nkũrũki ya jonthe, thithieni mantũ ja gĩkĩrundu bũrĩ amwe. Myriam, kuuma France, ariuga: “Twambagia ntukũ na kũthoma Bibiria, rĩu tũkaarĩĩria jarĩa twairitana nĩkenda tũjatumĩra ũtũũrone. Nĩngwĩragĩrua magiita jau mono.” Arĩta na mbere kuuga: “Kinya nĩngwĩragua rĩrĩa twaromba tũrĩ amwe, na nkaigua ũrĩa mũkũrũ wakwa endete Jehova.” Katie, ũrĩa ũkũgweti ariuga: “Magiita jarĩa tũgwĩragĩrua nkũrũki nĩ rĩrĩa tũrĩ ũtungatĩri tũrĩ amwe. Nĩtũgwĩragua kwigua o ũmwe weetũ akĩarĩĩria bwegie wĩtĩkio bwawe, na kwiritana mantũ jameerũ gatĩgatĩne geetũ.”—Nju. 27:17.

GWATANĨRENI KINYA RĨRĨA MATHĨĨNA JAUMĨRA

14-15. Nĩkĩ antũ babuĩrĩte gũciũmia nĩkenda baciinda mantũ jamoomũ jarĩa joomba kuumĩra ngũranone yaao? Ejana ngerekano.

¹⁴ Tontũ barĩa barĩ ngũranone tĩ baboojũru, bagakũrũkĩĩra mantũ jamoomũ. Bibiria nĩyonanagia atĩ barĩa bagũrene bakethĩrwa na ‘mĩthangĩko.’ (1 Ako. 7:28) Nteto irĩa igũtaarĩĩria biugo biu kĩrĩ Study Bible “bionanagia mathĩĩna na magerio jarĩa jarĩ jawĩthĩre kĩrĩ barĩa bagũrene.” Rĩrĩa mathĩĩna ta jau jaumĩra, nĩkĩ babuĩrĩte gũciũmia buru kũgwatanĩra na kũjaciinda?

¹⁵ Thũgaanĩria ngerekano ĩjĩ. Mwako jũmũthongi jũkeeja kwĩnyanga, eene nĩbairitanagĩria buru nĩkenda baagĩrithia narĩa jũthũũkangĩ. Bomba gũtumĩra mbeca, into bibiingĩ, na mĩaka ĩmiingĩ kũjwagĩrithia na kũrĩĩkia ngũgĩ ĩu. Nĩkĩ bairitanagĩria ũu? Nĩ tontũ kĩrĩbo, mwako jũu nĩ jwa gĩtũmi mono. O ta ũu, ngũrano cionthe nĩ cia gĩtũmi mono. Mathĩĩna nĩ jaumagĩra kinya kĩrĩ ngũrano ĩrĩa ĩrĩ ĩnjega nkũrũki. O ta ũrĩa kaingĩ mwako jũrĩa jũthũũkangĩ jwagĩrithagua, ngũrano ĩkeeja kũgĩa na mathĩĩna, nĩbuĩrĩte gũciũmĩrua nĩkenda yonokua. Kinya kethĩra bũu no bũjũkie ĩgiita na kwiritanĩria gũkwingĩ, Jehova nagwĩragua rĩrĩa barĩa bagũrene bairitanĩria gwĩkĩra inya ngũrano yaao na gũkara barĩ amwe. (Mal. 2:16) Bathithia ũu, bakoonania wendo na gĩtĩĩo gatĩgatĩne kaao na kinya kĩrĩ Jehova, Kaumo ka ngũrano.

16. Kũrĩngana na 1 Akorintho 13:4-8a, nĩmbi biũmba gũtethia barĩa bagũkũrũkĩĩra mantũ jamoomũ ngũranone? (Tega kinya mbica na kathandũkũ “Mantũ ja Kũbũtethia Gwĩkĩra Inya Ũcoore Bwenu.”)

¹⁶ Mathĩĩna jakeeja kuumĩra ngũranone yeenu, menya bwĩthĩrwa na mpwĩ cia kwathũkana. (1 Ako. 7:10, 11) Mwanya nou, ciũrie, ‘Nĩatĩa mpũmba kũthithia nĩkenda mbĩkĩra inya ũcoore bwetũ?’ Cũnkũũna mantũ jarĩa Bibiria yugaga jegie kwonania wendo, na wone kethĩra womba kwagĩrithia mantũ mwanya mwanya jarĩa jarĩrĩĩtue kĩrĩ 1 Akorintho 13:4-8a. (Thoma.) Antũ a gũcwa ũrĩa bũgatigana na mwendwa waaku, iritanĩrieni buru nĩkenda bũcokia wendo gatĩgatĩne keenu kaĩrĩ. Thingatĩĩra mantũ jarĩa ũgwe ũũmba kũthithia nĩkenda wagĩrithia ngwatanĩro yeenu. Romba Jehova agũtongeerie. Cwaa ũtethio bũrĩa ũkũbatara kuuma kĩrĩ mauku na vidio cietũ, na kinya kuuma kĩrĩ akũrũ ba kĩũthũrano na Akristũ bangĩ bagimaru. Werĩgĩĩra Jehova arĩ mwĩĩndo jũrĩa jũrĩ na ĩnya nkũrũki kĩrĩ ‘mũkanda jwa mĩĩndo’ ĩthatũ, ngũrano yaaku ‘ĩtĩtuĩka ntũti.’—Mut. 4:12.

17. Nĩatĩa barĩa bakwenda kũgũrana na barĩa barĩ ngũranone boomba kwona kũgwĩrua?

¹⁷ Jehova arĩenda atumĩkĩri baawe bonthe bethĩrwa na kũgwĩrua, kinya barĩa bakwenda gũtonya ngũranone, na barĩa bagũrene. Kwou, kethĩra nũkwenda gũtonya ngũranone, thuura na njĩra ya ũũme mũnyanya ũrĩa ũgatũũrania nawe. Na kethĩra ũrĩ ngũranone, ĩta na mbere gwĩkĩra inya ũcoore bwaku na ũrĩa bũgũrene nawe. Ciũmie gũciinda mathĩĩna jarĩa joomba kuumĩra ngũranone yeenu, ũkĩĩrĩgagĩĩra ũtethio bwa Jehova. Wathithia mantũ jau, ‘ũkagwĩrĩrua’ ũtũũro amwe na mwendwa waaku!—Mut. 9:9.