Ĩthĩrwa na Mwonere Jũmwega Kwerekera Mĩthangĩko

1-2. Nĩmbi tũkũbatara kũthithia nĩkenda tũũmbana rĩrĩa tũgũkũrũkĩĩra mĩthangĩko? (Tega kinya mbica.)

Rĩ, nũgũkũrũkĩĩra wagi bwa ĩota, kũmeneerua nĩ antũ ba nja kana kũthangĩkua tontũ bwa wĩtĩkio bwaku? Rĩ, nwinyĩĩrĩtue nĩ mbajua kana mathĩĩna ja ũkũrũ? Kana ũrĩ na kĩeba mbuga tontũ bwa gũkuĩrwa nĩ mwendwa waaku? O ta atumĩkĩri babaingĩ ba Jehova, ũtũũro bwaku bwomba kwĩthĩrwa bũũjũri ‘mĩnyamaaro na mathĩĩna.’—Zb. 90:10.

² Nĩkenda tũũmbana twakũrũkĩĩra mĩthangĩko, no mwanka twĩthĩrwe na mwonere jũmwega kũmĩerekera. Nĩatĩa tũũmba kũthithia ũu? No tũtaarĩĩrie ũntũ bũu ũjũ: Mĩthangĩko ĩrĩa tũgũkũrũkĩĩra nĩ ta mogwati jarĩa tũcemanagia najo twĩtithĩtie ngarĩ. Rĩrĩa wona ũgwati, no ũmĩĩtithie rũteere rwa ũrĩo kana rwa ũmotho, ũgeeta mpaari kana ũkarũngama bũũkai. Ĩndĩ ũtĩũmba kũjũkia ĩtagaaria rĩrĩa rĩkwagĩra ũtĩonete bwega ũgwati bũrĩa bwaumĩra. Na bioni bikethĩrwa bithiĩki nĩ nduume kana rũko, ũtĩũmba kwona bwega. O ta ũu, nĩkenda tũũmbana rĩrĩa tũgũkũrũkĩĩra mĩthangĩko, nĩtũbuĩrĩte kwĩthĩrwa na mwonere ta jwa Jehova. Kĩthomone gĩkĩ tũkaarĩĩria (1) ũrĩa tũũmba kwĩthĩrwa na mwonere jũmwega kwerekera mĩthangĩko, (2) ũrĩa mwonere jũtĩagĩrĩte jũũmba gũtwinyĩĩria na (3) matagaaria jarĩa tũũmba kũjũkia nĩkenda twĩthĩrwa na mwonere jũmwega mĩthangĩko yaumĩra.

MWONERE JŨMWEGA JWEGIE MĨTHANGĨKO

3. No mwanka twĩtĩkĩĩrie ũntũ bũrĩkũ bwegie ũtũũro nthĩgũrũne ĩjĩ?

³ Tũtĩũmba gũciebania na mĩthangĩko nthĩgũrũne ĩjĩ. Tontũ tũtĩbaboojũru na nthĩgũrũ ĩrĩathwa nĩ Shaitani, tũgakũrũkĩĩra mĩthangĩko. Nkũrũki, o ũrĩa mũthiro jũthengeerete tũgakũrũkĩĩra mĩthangĩko ĩmiingĩ, ĩrĩa yũũmba kuumania na mogwati ja wĩthĩre kana na antũ babathũũku. (Mat. 24:8; 2 Tim. 3:13) Gĩtũmi Jehova atĩkũthiria mĩthangĩko ĩu nandĩ, nĩ tontũ kwomba kwoneka teka agũtetheeria Shaitani kwatha nthĩgũrũ ĩjĩ. Kwou ĩgiita rĩrĩ, no mwanka tũgwatwe nĩ ‘mothũũku.’—Mut. 9:12.

4. Nĩ ũntũ bũrĩkũ bũngĩ bũtũmaga Akristũ bathangĩka?

⁴ Kinya nĩtũthangĩkaga tontũ bwa kwathĩkĩra Jesũ. Kaingĩ Jesũ neeraga athingati baawe barĩngĩthangĩkua tontũ bwa wĩtĩkio bwao. (Mat. 24:9; Joh. 16:2) Kũmenya ũntũ bũu nĩgũtũmaga wĩtĩkio bwetũ bũtĩkaage inya rĩrĩa tũkũthangĩka. (1 Athe. 3:3, 4) Rĩrĩa twomĩĩria magerio tontũ bwa kwĩthĩrwa na wĩtĩkio bũũriku, bũu nĩbũtũrikathĩgĩria atĩ tũrĩ njĩrene ĩrĩa ĩtongagĩĩria mwoyone. Kinya nĩtwonanagia nĩ Jehova tũkũgwata mbaru na tĩ Shaitani. Athũmbagia riĩtwa rĩa Mũrungu akiugaga antũ bamũtumĩkagĩra tontũ bwa into birĩa abaejaga. Akĩgeria kũrikithia nthitango iu, naretagĩra atumĩkĩri ba Jehova magerio jamarito. (Ayu. 1:9-11) Nĩtũgwĩragia Jehova rĩrĩa twomĩĩria tontũ nĩtũmwendete.—Nju. 27:11.

5. Nĩmbi Mutumiiria 7:13, 14 ĩgũturitana? (Tega kinya mbica.)

⁵ Jehova atĩrigagĩĩria mantũ jamathũũku jakarĩka. Gũtĩrio athithagia mantũ jatĩagĩrĩte kana atũgeria na mantũ jamathũũku. (Jak. 1:13) Amwe nou, Mũnene Solomoni naandĩkĩre atĩ ‘muthenya’ jwa mathĩĩna nĩ ‘ngũgĩ ya Mũrungu.’ (Thoma Mutumiiria 7:13, 14.) Atonanagia Jehova nĩwe ũretaga mantũ jamathũũku ĩndĩ neka arekagĩĩria jakarĩka. Solomoni naatwere ũtaaro bũbwega bwa kwĩthĩrwa na mwonere jũmwega jwegie mĩthangĩko. Mbere, nĩtũbuĩrĩte gũciũkĩrwa atĩ tũkethĩrwa na magiita jameega na jamaaĩ nthĩgũrũne ĩjĩ ĩkwathwa nĩ Shaitani. Rĩrĩa twethĩrwa na ntukũ ĩnjega, nĩtũbuĩrĩte kũmĩona ĩrĩ kĩewa kuuma kĩrĩ Mũrungu na tũkamũcokeria nkaatho. Ũntũ bwa jaĩrĩ bũrĩa Solomoni agũtũriikania nĩ atĩ tũtĩũmba ‘kũmenya mantũ jarĩa jagatwĩjĩĩra nyumene’ tontũ tũtijĩ ntukũ ĩkethĩrwa na mantũ jameega kana nĩ jamathũũku. Mothũũku jagwataga barĩa beega na barĩa baaĩ batĩĩrĩgĩĩrĩte.

6. Kwombĩka nĩkĩ Jehova arekagĩĩria tũkũrũkĩĩra mĩthangĩko? (Ahibirania 12:7, 11)

⁶ Twethĩrwa na mwonere jũmwega jwegie mĩthangĩko, tũgaciũkĩrwa atĩ Jehova arĩenda tũmwĩrĩgĩĩra, na tĩ tũciĩrĩgĩĩra. Nonaga mĩthangĩko ĩrĩa tũgũkũrũkĩĩra na agatũmakĩra. Kinya rĩrĩa twakũrũkĩĩra ‘mũguurune jwa mũgundu,’ netaga na mbere gũtũtongeeria, agatũrikithĩria natwendete, na agatwaa inya ĩrĩa tũkũbatara nĩkenda tũũmĩĩria. (Zb. 23:4) Mĩthangĩko yomba gũtũtethia kũmenya gũtaũkĩrwa gwetũ, na Jehova agatũtethia kwagĩrithia mĩĩtĩre yeetũ. (Thoma Ahibirania 12:7, 11.) Ngerekano, Ayubu naabataraga kwagĩrithia nkuma yaawe ya winyiia. Tĩ Jehova wamũgeragia; ĩndĩ neetĩkĩĩrĩrie agerua na aramũtethia kwiritana mantũ ja gĩtũmi. (Ayu. 42:1-6) Kinya twakũrũkĩĩra ũntũ bũrĩkũ, nĩtũkũmenya Jehova atĩrekeeria bũtũretera ũgwati bwa gũtũũra. Na rĩrĩa twomĩĩria magerio mwanka mũthia ‘tũkoombana’ buru.—Aro. 8:35-39.

7. Nĩkĩ ũũmba kwĩthĩrwa na kũgwĩrua kinya rĩrĩa ũkũthangĩkua tontũ bwa wĩtĩkio bwaku?

⁷ Twomba kwĩthĩrwa na kũgwĩrua rĩrĩa tũkũthangĩka. Rĩrĩa wathangĩkua tontũ bwa wĩtĩkio bwaku, menya ũthũgaania ũtĩ na itharimo bia Jehova. Mwanya nou, mĩthangĩko ta ĩu yonanagia nagwĩtĩkĩĩrĩtie. (Mat. 5:10-12) Twethĩrwa na mwonere ta jũu rĩrĩa tũkũthangĩkua, tũkethĩrwa na kũgwĩrua o ta atũmwa ba karine ya mbere. (Atum. 5:40-42) Nkũrũki, womba gũtũma kinya barĩa batĩ Akũũjĩ ba Jehova bairitana ũmma na ‘bakumia Mũrungu.’ (1 Pet. 2:12) O ta Jusufu, ũkombana rĩrĩa ũgũkũrũkĩĩra mĩthangĩko na tĩ rĩrĩa akĩ ĩkathira.—Kia. 39:3, 23.

8. Nĩ ũntũ bũrĩkũ bũngĩ bũũmba gũtũtethia kũũmĩĩria magerio?

⁸ Magerio jeetũ jagakinya mũthia. Rũgono rwa Ayubu nĩrũtũriikanagia atĩ mantũ jamoomũ jagakinya mũthia. Kamma, Jehova ‘naatharimĩre ĩgiita rĩa mũthia rĩa Ayubu nkũrũki ya kĩambĩrĩria.’ (Ayu. 42:12) O ta ũu, Jehova neranĩte akatharima ‘ĩgiita rĩa mũthia’ rĩa ũtũũro bwaku, rĩrĩa rĩgatũũra kenya na kenya, nkũrũki ya ĩgiita rĩĩkuĩ rĩa nandĩ rĩrĩa rĩũjũri mĩthangĩko. Bũu nĩ ũntũ bwa gũtwĩkĩra inya twĩta na mbere kũũmĩĩria mwanka mũthia!—Mat. 24:13.

ŨRĨA MWONERE JŨTĨAGĨRĨTE JŨŨMBA GŨTŨTONYIA ŨGWATINE

9. Nĩatĩa mwonere jũtĩagĩrĩte jwegie mĩthangĩko jũũmba gũtũtonyia ũgwatine?

⁹ Kinya tũkethĩrwa tũgĩkũrũkagĩĩra mantũ kinya jarĩkũ jamoomũ, nĩtũbuĩrĩte kwĩthĩrwa na mwonere jũmwega kenda tũtĩkairetere mathĩĩna nkũrũki. Ngerekano, twomba kũthũgaania nĩ Jehova ũgũtũma tũthangĩka. Ayubu, ĩgiita rĩmwe noonaga ta Jehova watũmaga athangĩka, na bũu bũratũma oona teka ‘aarĩ ũmwagĩru nkũrũki ya Mũrungu.’ (Ayu. 32:2) Kinya Naomi arĩgũkuĩrwa nĩ endwa baawe, naaugĩre nĩ Jehova wamũthangĩkagia. (Rut. 1:13, 20, 21) Ayubu na Naomi barĩngĩĩta na mbere kũgwatĩĩra mwonere jũu, mũthiene barĩngĩtiga gũtumĩkĩra Jehova. (Nju. 19:3) Ĩndĩ, Jehova naabatetherie kwĩthĩrwa na mwonere jũmwega kwerekera mĩthangĩko yaao na arabatharima tontũ bwa wĩtĩkĩkua bwao.

10. Nĩ ũntũ bũrĩkũ tũũmba gũciũria rĩrĩa tũgũkũrũkĩĩra mĩthangĩko?

¹⁰ Kinya kethĩra tũrĩ na mma Jehova atĩtũretagĩra magerio, twomba kwambĩrĩria kwona teka atĩtũmakagĩra rĩrĩa tũkũthangĩka. Mwonere ta jũu jwomba gũtũma twaga inya. (Nju. 24:10) Mũnene Daudi na kĩroria Habakuki nĩbaakũrũkagĩĩra mĩthangĩko na magiita jamwe nĩboonaga teka Jehova atabathikagĩĩra rĩrĩa baamũrombaga ũtethio. (Zb. 10:1; Hab. 1:2) Amwe nou, bataatigĩre kũromba. Jehova naabatetherie na kinya gwe, agagũtethia.—Zb. 10:17.

11. Nĩatĩa kũũmba gũkarĩka twethĩrwa na mwonere jũtĩagĩrĩte jwegie magerio?

¹¹ Twethĩrwa tũtĩ na mwonere jũmwega jwegie magerio, twomba kũmaka rĩrĩa jaumĩra na tũkoona teka jatĩbuĩrĩte gũtũkarĩkĩra. (1 Pet. 4:12) Aritwa ba Jesũ bateetĩkagia atĩ arĩngĩthangĩkua. (Luk. 18:33, 34) Kinya nyuma ya kũbataarĩĩria bwega mantũ jarĩa arĩngĩkũrũkĩĩra, mũtũmwa Petero ataajajũkĩrie na ũrito. Jesũ naagondokeere Petero tontũ naamenyaga mwonere ta jũu jũrĩngĩtũma atĩkathithie wendi bwa Jehova. (Mar. 8:31-33) Kinya nyuma ya Jesũ gũkua, aritwa baawe bataaciũkĩrwe o rĩo nĩkĩ oragĩrwe. Amwe nou, no eetĩre na mbere kũbeenda na kũbatethia. Rĩrĩa aaranagĩria nabo nyuma ya kũriũkua, naabagwũrĩĩre ‘Maandĩko’ nĩkenda aabatethia gũciũkĩrwa bwega nĩkĩ aathangĩkĩrue. (Luk. 24:25-27, 32, 44-48) Kũthũgaanĩria jarĩa Jesũ aabaritanaga kũrĩngĩbatethia kwithuranĩra tontũ bwa mantũ jamoomũ jarĩa barĩngĩkũrũkĩĩra. Twacũnkũũna mma cia Bibiria igatũtethia kwithuranĩra tontũ bwa mĩthangĩko.

12. Nĩatĩa mwonere jũtĩagĩrĩte jwegie ũntũ bũrĩa tũgũkũrũkĩĩra jũũmba gũtũma twigua?

¹² Kwĩthĩrwa na mwonere jũtĩagĩrĩte kwerekera ũntũ bũrĩa tũgũkũrũkĩĩra kwomba gũtũma twona teka mantũ jathũũki mono. Jesũ noonanĩrie ũrĩa bũu bũũmba gũkarĩka kĩrĩ ngerekano ya muunda jwa mĩzabibũ. Ariti ngũgĩ bamwe bataagwĩrĩrue tontũ boonaga teka bataarĩi mbeca cia kũngana, ĩndĩ mwene muunda areera ũmwe waao ũjũ: ‘Mũcoore, ntĩrakũthithĩria bũbũũĩ.’ (Mat. 20:10-13) Ariti ngũgĩ bau baanungʼunaga tĩ tontũ bataathithĩrĩtue na njĩra ya ĩota, ĩndĩ tontũ nĩbaarĩ na mawĩrĩgĩĩro jatĩagĩrĩte. Ntukũne cietũ, ataana na aarĩ ba baaba bamwe nĩbakũrũkĩĩrĩte ũntũ ta bũu monomono rĩrĩa batĩraewa wendeeri bũnna kana rĩrĩa batiga gũtumĩka twanyene tũu. Nĩatĩa tũũmba kũthithia nĩkenda twĩthĩrwa na mwonere jũmwega twakũrũkĩĩra ũntũ bũbũũmũ?

ŨRĨA TŨŨMBA KŨTHITHIA MĨTHANGĨKO YAUMĨRA

13. Nĩatĩa kũũmba gũkarĩka rĩrĩa mĩthangĩko yaumĩra?

¹³ Mbuga nwijĩ ũrĩa Bibiria yugaga bwegie mĩthangĩko. Mbuga kinya ũrathomera bangĩ mĩstaarĩ ĩu nĩkenda ũbatethia kũũmĩĩria. Amwe nou, rĩrĩa wakũrũkĩĩra mĩthangĩko, womba kũremwa kwĩthĩrwa na mwonere jũmwega. Ngerekano, womba kwona teka Jehova agũgũkanũkia kana atĩkũthikĩĩra maromba jaaku. Nĩ matagaaria jarĩkũ ũũmba kũjũkia nĩkenda wĩthĩrwa na mwonere jũmwega?

14. Nĩmbi ũũmba kũromba Jehova rĩrĩa ũkũthangĩka? (Afilipi 4:13)

¹⁴ Romba Jehova agũtethie. Mwĩre mantũ jarĩa ũgũkũrũkĩĩra na ũrĩa jagũtũma wigua. No ũmũgwetere ũrĩa uungwa ũkwenda agũtethia. Kinya no ũmũrombe kĩrundu kĩawe nĩkenda wĩthĩrwa na ũũme na inya ĩrĩa ũkũbatara nĩkenda ũũmĩĩria. Ĩndĩ riikana atĩ Jehova omba gũcokia maromba jaaku na njĩra ĩrĩa ũtĩĩrĩgĩĩrĩte. (Aef. 3:20) Omba gũtumĩra araĩka kana ataana na aarĩ ba baaba gũgũtethia. (Zb. 34:7) Kwou, ĩtĩkĩĩria njĩra ĩrĩa Jehova agatumĩra gũgũtethia. Agakwaa kĩrundu kĩawe gĩkĩtheru, na gĩgagũtethia kũũmbana rĩrĩa ũgũkũrũkĩĩra mantũ jamoomũ.—Thoma Afilipi 4:13.

15. Nĩmbi bigagũtethia kũũmĩĩria mĩthangĩko? (Tega kinya mbica.)

¹⁵ Ĩta na mbere kũthithia mantũ ja gĩkĩrundu. Rĩrĩa ũgũkũrũkĩĩra mantũ jamoomũ, no ũremwe kũthithia mantũ ũrĩa ũrathithagia au mberene. Ĩgiita rĩu rĩa ‘mathĩĩna na mĩnyamaaro’ nĩrĩo ũbuĩrĩte gũciũmia kwĩthĩrwa na mwonere ta jwa Mũrungu. (Zb. 119:143) Ĩta na mbere kũthoma Bibiria na wĩthĩre, na kũthũgaanĩria jarĩa ũkũthoma. Ciũmie gwĩta ũtungatĩrine, mĩcemanione na kinya kũmĩgwata mbaru. Ĩta na mbere kũgwatanĩra na ataana na aarĩ ba baaba. Menya ũciathũra na bangĩ kinya rĩrĩa ũkwigua gũkara gwenka.—Nju. 18:1

16. Nĩ nkaanja ta irĩkũ ũũmba kwĩthĩrwa nacio rĩrĩa mĩthangĩko yaumĩra, na nĩatĩa ũũmba gwiciinda? (2 Akorintho 10:4, 5)

¹⁶ Thiria nkanja irĩa ũrĩ nacio. Rĩrĩa mathĩĩna jaumĩra, womba kũbatara kũgarũra mathũgaanio ‘jarĩ na inya’ ta jarĩa joomba gũtũma wimena kana ũrega gwĩtĩkia Jehova. (Thoma 2 Akorintho 10:4, 5.) Womba kũthiria nkanja iu watumĩra ‘ũmenyo bwa Mũrungu’ bũrĩa bũrĩ Bibiriene na maukune jarĩa twejagwa nĩ ũthuranĩri bwawe. Ngerekano, rĩ, nwĩthagĩrwa na nkanja kethĩra Jehova nagwĩtĩkĩrĩte? Thũgaanĩria ngerekano ya mũtũmwa Paũlũ. Ĩgiita rĩa ũtungatĩri bwawe, naakũrũkĩĩrĩte mantũ jamaingĩ jamoomũ; amwe nou, mantũ jau nĩjamũrikithĩĩrie nkũrũki atĩ naarĩ nthũmba ya Kristũ ĩgwĩtĩkĩrĩka. (2 Ako. 11:23-27) Rĩ, kwĩrĩo wonaga teka Jehova ataakũrekeere meeyia jarĩa waathithĩtie karaaja? Kethĩra nĩu, cwaa Maandĩko jarĩa jarikithagia atĩ Jehova natũrekagĩra. (Isa. 43:25) Thoma mĩstaarĩ ĩu na ũmĩthũgaanĩrie. (Zb. 119:97) Rĩ, ũgwati bũrĩa ũgũkũrũkĩĩra nĩbũtũmĩte wona teka Mũrungu atĩkaragia nthũmba ciawe? Kethĩra nĩu, cũnkũũna nĩkĩ Mũrungu arekereetie mĩthangĩko na ũrĩa atũkaragia gĩkĩrundu kinya twakũrũkĩĩra ũntũ bũrĩkũ. (Zb. 91:9-12) Thoma kinya tũrũgono twegie ataana na aarĩ ba baaba barĩa baciindĩte mantũ jamoomũ.a

17. Nĩatĩa tũbuĩrĩte kũthithia rĩrĩa mantũ jamoomũ jaumĩra?

¹⁷ Rĩ, nandĩ nũkũgwĩrĩrua ĩgiita rĩrĩega rĩtĩ na mantũ jamoomũ? Kethĩra nĩu, cokeria Jehova nkaatho na ũtumĩre kaanya gaka bwega kũthũgaanĩria maweega jaawe. (Mut. 7:14) Ĩndĩ rĩrĩa mantũ jamathũũku jaumĩra, ĩthĩrwa na mwonere jũmwega kũjeerekera, na wĩrĩgĩĩre Jehova buru. Wathithia ũu, Jehova ‘agakwoneeria njĩra ya kwonoka nayo, nĩkenda ũũmba kũũmĩĩria.’ (1 Ako. 10:13) Ĩndĩ rĩ, nĩatĩa tũũmba gũtethia ataana na aarĩ ba baaba rĩrĩa bagũkũrũkĩĩra mantũ jamoomũ? Tũkaarĩĩria ũntũ bũu kĩthomone kĩrĩa kĩthingatĩte.