‘Mũrungu wa Mma’ Nojũragia Mworoto Jwawe Rĩonthe

1. Kũringana na Zaburi 31:2-5, nĩkĩ tũbuĩrĩte kwĩrĩgĩĩra Jehova?

Antũ babaingĩ nthĩgũrũne nĩbaragia ũrongo. Bũu nĩbũtũmaga bwĩthĩrwa bũrĩ bũbũũmũ kũmenya muntũ ũrĩa ũgetĩkia. Abiacara babaingĩ nĩbathithagia mantũ ja wayia. Endia nĩbaĩĩragia agũri nĩkenda bagũra into birĩa barĩ nabio. Na antũ bamwe nĩbonete bũrĩ bũbũũmũ gwĩtĩkia acoore baao ba akuĩ tontũ batĩũjũragia mawĩrane jaao. Amwe nou, nĩ ũntũ bwa gwĩkĩra inya kũmenya no twĩrĩgĩĩre Jehova tontũ nĩwe ‘Mũrungu wa mma.’ (Thoma Zaburi 31:2-5.) Gũtĩrĩo Jehova aragia ũrongo na jonthe jarĩa augaga nĩ ja mma. Kwou tũtĩna nkanja akojũria mawĩrane jonthe jarĩa eranĩte.

2. Nĩmbi tũkaarĩĩria kĩthomone gĩkĩ?

² Kĩrĩ kĩthomo gĩkĩ, mbere tũkaarĩĩria mantũ jarĩa jomba gũtũma twĩrĩgĩĩra Jehova buru. Nyumene, tũgacũnkũũna ũrĩa Mũrungu wa mma akathiria nthĩgũrũ ĩjĩ nthũũku ya Shaitani, na mantũ jarĩa Mũrungu akũthithia nandĩ nĩkenda ojũria mworoto jwawe kĩrĩ antũ. Kĩthomo gĩkĩ gĩgatũtethia kwĩthĩrwa na ũcamba bwa kwĩra bangĩ ũmma bwegie Jehova.

ITŨMI BIA KWĨRĨGĨĨRA MŨRUNGU WA MMA

3. Nĩkĩ tũbuĩrĩte kwĩrĩgĩĩra Jehova buru?

³ Twomba kwĩrĩgĩĩra Jehova tontũ nĩwe Mũũmbi wa bionthe. Nĩwe wombĩre ĩgũrũ na nthĩ na nĩwe Kaumo ka into bionthe birĩa birĩ mwoyo. (Kia. 1:1; Zb. 36:9; Kug. 4:11) Kinya nĩwe Mũmenyeeri wa bionthe birĩa birĩ mwoyo. Nĩwe wombĩre into bionthe birĩa bigwatagĩĩra ũtũũro nthĩgũrũne. Mantũ jonthe jarĩa jetaga na mbere kĩrĩ ũũmbi jarĩ njarene ciawe. Kwou no twĩrĩgĩĩre Jehova buru atongerie ũtũũro bwetũ nandĩ na kinya ĩgiita rĩĩjĩte tontũ nĩwe Mũũmbi weetũ ũrĩa wijĩ mantũ jonthe.

4. Nĩmbi bitũrikithagĩria atĩ Jehova natwendete?

⁴ Twomba kwĩrĩgĩĩra Jehova tontũ natwendete. Oombĩre antũ tontũ neendaga bagwĩrĩrua ũtũũro o tawe. Nagwetere mworoto jwawe rĩrĩa aaugĩre ũjũ: ‘Tũũmbeni muntũ arĩ mũngʼuanano jwetũ, akari ũrĩa tũkari.’ (Kia. 1:26) Naatweere ũũmbi bwa gũtua matua jeetũ twingwa. Naatũũmbĩĩre nthĩgũrũ ĩnthongi. (Zb. 115:16) Naeere aciari beetũ ba mbere ngũgĩ ya kwethia nthĩgũrũ paradiso. (Kia. 1:28; 2:15) Nabaeere biakũrĩa na nyomoo mwanya mwanya nĩkenda bagwĩrĩrua ũtũũro. Kamma, mantũ jau nĩjarikithagia Jehova natwendete mono na wendo bwawe bwa kwĩrĩgĩĩrĩka nĩ bwa ‘kenya na kenya.’—Zb. 103:17.

5. (a) Nĩatĩa Jehova aathithĩrie Adamu na Hawa barĩkwĩyia? (b) Nĩ mawĩrane jarĩkũ jamwe Mũrungu ojũrĩtie? (Tega kathandũkũ “Mantũ Jarĩa Mũrungu Arĩkĩĩtie Kũũjũria.”)

⁵ Twomba kwĩrĩgĩĩra Jehova tontũ rĩonthe nojũragia mawĩrane jaawe. Jehova oombĩre nthĩgũrũ nĩkenda ‘ĩtũũragwa nĩ antũ.’ (Isa. 45:18, 19) Rĩrĩa Adamu na Hawa beeĩrie, nĩbatuĩrĩĩrwe gĩkuũ. Kwou kũrĩngĩoneka teka mworoto jwa Jehova jũtĩngĩũjũra. Ĩndĩ gũtĩ gĩntũ kĩũmba kũmũrigĩĩria oojũria mawĩrane jaawe. (Isa. 46:10, 11) Mworoto jwawe jũtaagarũkĩre jwa kũũjũria nthĩgũrũ antũ babaagĩru. Nĩkĩo gĩtũmi eetĩkĩrĩĩrie Adamu na Hawa bagĩa aana. Naaritĩre Mũtaana Waawe wa mũũmwe arĩ ĩkũũri nĩkenda atwonokia na twĩthĩrwa na wĩrĩgĩĩro bwa gũtũũra kenya na kenya.—Joh. 3:16

MŨRUNGU WA MMA NOJŨRAGIA MWOROTO JWAWE

6. Nĩatĩa Jehova aaugĩre akathithĩria Shaitani arĩkwaĩĩria Adamu na Hawa?

⁶ Njoka ‘ĩrĩa ĩtagwa Nkoma ĩnthũũku na ningĩ ĩgeetwa Shaitani,’a nĩyo yaaĩrĩrie Adamu na Hawa bararega kwathĩkĩra Mũrungu. (Kug. 12:9; Kia. 3:4, 5; Joh. 8:44) Tontũ bwa mantũ jau Shaitani aathithĩrie, Jehova naamũgitĩĩre ĩgamba atĩ akamũthiria buru. (Kia. 3:15) Ĩndĩ mbere athithia ũu, antũ babaingĩ barĩngĩmũthingata na barĩngĩthithia mantũ jamathũũku tawe. Amwe nou, bamwe barĩngĩtumĩkĩra Jehova barĩ etĩkĩkua.

7. Nĩ baaũ bathingataga Nkoma na nĩatĩa mũthiene gũgakarĩka kĩrĩbo?

⁷ Barĩa bathingataga Shaitani nĩ araĩka barĩa baaregere kwathĩkĩra Jehova na antũ barĩa bathithagia mantũ jamathũũku. Tontũ batĩgwataga Jehova mbaru, bethagĩrwa barĩ rũteere rwa Shaitani. Ĩndĩ ĩgiita rĩrĩa Mũrungu ekĩte rĩakinya, akathiria Nkoma buru na barĩa bamĩthingataga.—Dan. 2:44; Aro. 16:20.

8. Nĩ ĩtagaaria rĩrĩkũ Jesũ aajũkĩrie mwakene jwa 1914? (Tega kinya mbica.)

⁸ Nĩmbi bigũtũrikithĩria atĩ Mũrungu akoojũria mworoto jwawe jwa kũthiria Shaitani na athingati baawe? Mwakene jwa 1914, Jesũ naarwĩre na Shaitani na irundu biawe arabeenga ĩgũrũ bareenama nthĩgũrũne. (Kug. 12:7-9) Kinya kethĩra ndwa ĩu yakarĩkĩre ĩgũrũ, antũ nthĩgũrũne nĩbonete maumĩĩra jaayo. Bibiria yugaga ũjũ: ‘Wũi kĩrĩ nthĩgũrũ o na kĩrĩ ĩria rĩrĩa rĩnene! Nĩkwĩthĩrwa Nkoma ĩrĩa nthũũku ĩkũbwĩnamĩĩra na mũthũũro jũrĩa mũnene tontũ bwa ũrĩa ĩkũmenya atĩ no kagiita gaakai ĩrĩ nako.’ (Kug. 12:12) Kuuma mwaka jwa 1914, mathĩĩna nĩjongerekete mono nthĩgũrũne tontũ Shaitani nakucĩĩtie antũ babaingĩ baa athingati baawe. Ĩndĩ ĩgiita rĩtĩ kũraaja, Jesũ agaciinda Shaitani na amũthirie amwe na athingati baawe. (Kug. 6:2) Jesũ akarikithĩria biũmbe bionthe ĩgũrũ na nthĩgũrũ atĩ Shaitani nĩ ũmũũĩ na nĩ mũrongo. (Zb. 45:4-6) Na bonthe ĩgũrũ na nthĩgũrũ bakamenya Jehova nĩ Mũrungu wa mma.—Ezk. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

MŨRUNGU NAKŨŨTHŨRANIA BARĨA BENDETE ŨMMA

9. Nĩ baaũ Jehova akũũthũrania nandĩ?

⁹ Jehova nethĩrĩtwe akĩũthũrania ‘into bionthe ndeene ya Kristũ birĩa birĩ ĩgũrũ o na birĩa birĩ gũkũ nthĩ.’ (Aef. 1:10) ‘Into birĩa birĩ ĩgũrũ’ nĩ etũrĩrua maguta barĩa bathuuri kwathana amwe na Kristũ narĩa ĩgũrũ. Nabo barĩa bagatũũra paradiso nthĩgũrũne nĩbo ‘into birĩa birĩ gũkũ nthĩ.’ Athathayia bau bonthe ba Jehova, nĩbaciũmagia kũguũra ũrongo bwa Shaitani na gũtethia barĩa barĩ na mwerekera jũkwagĩra kũmenya ũmma.

10. Nĩatĩa Jehova agũtethia antũ bauma ũkombone bwa ndini cia ũrongo? (Kugwurirwa 14:6, 7)

¹⁰ Jehova nakũũthũrania antũ barĩa bendete ũmma gũkũrũkĩĩra ngũgĩ ya gũtũmĩĩria ĩrĩa ĩtaathithĩka kaĩrĩ. (Thoma Kugwurirwa 14:6, 7.) Kinya kethĩra Jehova natumagĩra antũ gũtũmĩĩria nkuma ĩnjega, araĩka kinya bo nĩbatũtethagia gũkinyĩra antũ barĩa barĩ na mwerekera jũkwagĩra nĩkenda beeja ũthuranĩrine bwawe. Ngũgĩ ĩjĩ ya gũtũmĩĩria nĩyonanagia mooritani ja ũrongo ja Babiloni Ĩrĩa Nene, tayo ndini cia ũrongo irĩa nkoma ĩtumĩrĩte mĩaka ĩmiingĩ gũtambia ũrongo bwegie Jehova. (Kug. 18:2, 4) Ĩgiita rĩtĩ kũraaja ndini iu ikenyangua na barĩa bonthe bendete Mũrungu wa mma bakamwaa ũkumio bũrĩa bũkũmwagĩra.—Kug. 17:16.

11. Nĩatĩa tũũmba kũmenya athathayia ba mma ba Jehova?

¹¹ Jehova nakucagia antũ kuuma gũntũ mwanya mwanya nthĩgũrũne beeja kĩũthũranone kĩawe. (Kug. 7:9, 10) Rĩrĩa baigua ‘nkuma ĩnjega,’ nĩbaciũkagĩrwa bũbũ nĩbu ũmma na bakambia kũgwatanĩra na antũ ba Jehova. (Mar. 13:10) O ũrĩa ĩgiita rĩgũkũrũka, nou bacionagĩra bwega nkũrũki nĩ baaũ bathathaagia Jehova na njĩra ĩnjega na nĩ baaũ batĩthithagia ũu. Kĩroria Malaki naaroretie ũjũ: ‘Bũkaathũrana antũ barĩa aagĩru na barĩa baaĩ na barĩa bamenyagĩĩra mantũ ja Mũrungu na barĩa bakarega kũmwathĩkagĩra.’ (Mal. 3:18) Atumĩkĩri ba Jehova nĩbonanagia nĩbathathaagia Mũrungu wa mma gũkũrũkĩĩra mĩĩtĩre yaao na ngũgĩ yaao ya gũtũmĩĩria.

12. Nĩatĩa ngũgĩ ya gũtũmĩĩria ĩtethagĩĩria kũũjũria mworoto jwa Jehova?

¹² Nĩtwathĩkagĩra watho bwa Jesũ na kinya tũkoojũria ũroria rĩrĩa twatũmĩĩria ‘nkuma ĩnjega ya Ũnene.’ (Mat. 24:14; 28:18-20) Ta maumĩĩra, antũ babaingĩ kuuma nthĩgũrũ mwanya mwanya nĩbakwaa athingati ba Kristũ barĩ na wĩrĩgĩĩro bwa kũthathayia Mũrungu wa mma kenya na kenya. Nĩ wendeeri bũũnene gũtumĩrwa nĩ Jehova kũũjũria mworoto jwawe!

ĨTHĨRWA NA MMA JEHOVA AKOOJŨRIA WĨRANE BWAWE

13. Nĩbaaũ Shaitani aithũkagĩra mono, na nĩkĩ?

¹³ Shaitani arĩ na mũthũũro mono tontũ nakũmenya arĩ na ‘kagiita gaakai’ mbere ya wathani bwawe bũthirua buru. (Kug. 12:12, 13) Naithũkagĩra etũrĩrua maguta mono tontũ ‘nĩbamenyagĩĩra maathana ja Mũrungu na nĩbarikĩtie ũkũũjĩ bwegie Jesũ.’ (Kug. 12:17; 14:12) Kinya naithũkagĩra bonthe barĩa babagwataga mbaru ngũgĩne yaao.

14. Nĩatĩa gũgakarĩka Shaitani aithũkĩra antũ ba Jehova? (Tega kinya mbica karatacine ka mbere.)

¹⁴ Nyuma ya kwĩnyangua kwa Babiloni Ĩrĩa Nene, Shaitani na athingati baawe bakageria kwithũkĩra antũ ba Jehova. Rĩu nĩrĩo ndwa ya Amagedoni ĩkambĩrĩria. (Kug. 16:13, 14, 16) Jesũ na njũũrĩ yaawe ya ĩgũrũ bakonokia athathayia ba Jehova na benyangie Shaitani buru na barĩa bakeethĩrwa batigeere bakĩmũgwataga mbaru. (Kug. 19:19-21) Antũ barĩa baaĩ na arongo bonthe bakeberua buru. (Kug. 21:8) Na bonthe bakamenya Jehova nathithagia mantũ jarĩa jagĩrĩte rĩonthe na nĩ wa mma.

15. Nĩkĩ tũrĩ na mma atĩ mawĩrane ja Jehova jakojũra? (Isaya 65:16, 17) (Tega kinya mbica.)

¹⁵ Ntukũne cietũ nthĩgũrũ nĩgaũkene nkũrũki ya ĩgiita rĩngĩ rĩonthe. Ĩndĩ Jehova natethetie atumĩkĩri baawe gũtũũria ũrũmwe. Jehova nakũũthũrania bonthe barĩa bendete ũmma beeja kĩrĩ famĩlĩ yaawe. Gũtĩ gĩntũ kĩũmba kũmũrigĩĩria kũtharima antũ baawe na ngũgĩ ĩrĩa baritaga tontũ bwawe. (Thoma Isaya 65:16, 17.) Tũrĩ na mma atĩ mawĩrane ja Jehova jakojũra. Mũtũmwa Paũlũ ariuga ũjũ kĩrĩ Aroma 8:38, 39: ‘Gĩkuũ, kana gũtũũra mwoyo, kana araĩka, kana monene, kana mantũ ja inya, kana mantũ jarĩa maraaja jaitĩtie bwa ĩgũrũ, kana jarĩa jorokerete mono, kana gantũ kinya karĩkũ ka birĩa biombĩrwe, gũtĩ gantũ kinya kamwe kabio bionthe karĩa kombĩkia gũtwathũrana na wendani bwa Mũrungu, bũrĩa bũrĩ ndeene ya Kristũ Jesũ Mwathani weetũ.’

16. Nĩkĩ wĩrĩgagĩĩra Jehova buru?

¹⁶ Tũrĩ na itũmi bibiingĩ bia kwĩrĩgĩĩra Jehova Mũrungu wa mma. Nĩwe Mũũmbi weetũ na natwendete mono. Ntundu ĩrĩa nene nĩgwĩta ĩkĩongerekaga mono, o ũrĩa antũ ba mĩgongo yonthe bakwĩja ũthathayiene bwa mma. (Isa. 60:22; Zek. 8:23) Nĩtwijĩ rĩonthe Jehova nojũragia mworoto jwawe na ĩgiita rĩtĩ kũraaja akathiria Shaitani ũrĩa nĩ mũrongo o amwe na wayia bwawe bunthe. O ta Daudi tũrĩromba ũjũ: ‘Mwathani Mũrungu arokumwa, . . . nĩkwĩthĩrwa no wenka ũgĩtaga mantũ ja kũrigaria. Riĩtwa rĩawe rĩrokumagua kenya na kenya; nthĩgũrũ yonthe ĩroojũrwa nĩ ũkumio bwawe.’—Zb. 72:18, 19.