Jehova Namenyerithĩtie Kuuma Ndĩ Ũmwĩthĩ

Mbere, ka mbwĩre ũrĩa rũgono rwakwa rwambĩrĩĩrie. Ndaciarĩrwe narĩa Calgary Kanada, ĩgiita rĩa Ndwa ya Ijĩrĩ ya Kĩmanthĩgũrũ. Mũthiene jwa mĩaka ya 1940, painia ũmwe ũgwĩtwa Donald Fraser neejĩre gũtũmĩĩria gwetũ, na maami aretĩkĩĩria kwiritana Bibiria. Naagwĩragĩrua kwiritana ũmma, ĩndĩ mathĩĩna jamarito ja ũgima bwa mwĩrĩ nĩjamũrigagĩĩria kũthithia jamaingĩ kĩũthũranone. Amwe nou, neetĩre na mbere mwanka arabatithua mwaka jwa 1950. Ũntũ bwa kĩeba nĩ atĩ, nyuma ya gĩntũ ta mĩaka ĩĩrĩ naakuĩre. Baaba atairitanĩte ũmma ĩgiita rĩu, ĩndĩ neetĩkĩrĩrie Akũũjĩ ba Jehova batongeeria mathiko.

Ntukũ inkai nyuma ya mathiko, Alice, mwarĩ wa baaba ũmũkũrũ na mwĩtũrĩrua maguta, naangwatĩre ũgeni mũcemanione jwa kĩũthũrano. Naambijĩ tontũ nĩtwetanagia mũcemanione na maami mũthia jwa kiumia. Nĩndarombere baaba rũũtha nĩkenda mbĩta. Neetĩkĩrĩĩrie na kinya arenda twĩtania “ĩgiita rĩmwe akĩ” nĩkenda acokeria mũtaana wa baaba nkaatho ũrĩa waaritĩre rwaria ĩgiita rĩa mathiko ja maami. Kinya kethĩra ũtukũ bũu nĩrĩo rĩarĩ rĩa mbere baaba kwĩja mĩcemanio naagwĩrĩrue mono. Naathomerete mantũ jegie kwarĩria mwingĩ, na naagwĩrĩĩrue ndwaria irĩa ciaritĩrwe. Naambĩrĩĩrie kwĩjaga mũcemanione jũu o kiumia. Na nyuma ya kagiita, arambia kwĩja mĩcemanione yonthe.

Ntukũne iu, Cukuru ya Kĩtheokrasi ya Ũtangĩtiri ĩkĩambĩrĩria, mũtaana wa baaba aathomaga mariĩtwa ja barĩa baandĩkithitue, na o muntũ agacokia “Ndĩku.” Ũtukũ bũmwe nĩndabarombere bathome riĩtwa rĩakwa mũcemanione jũrĩa jwathingatĩte. Mũtaana wa baaba naancokerie nkaatho mono ĩndĩ ataamenyithĩrie jarĩa jarĩngĩthingata ndaciandĩkithia.

Gĩtũmi ndaciandĩkithagia nĩkenda riĩtwa rĩakwa rĩthomagwa ĩndĩ ntaijĩ nkaewa kaanya ga kũrĩta rwaria. Kiumia kĩrĩa kĩathingatĩte, riĩtwa rĩakwa rĩrĩkũthomwa nĩndacokerie na kajũ ngwĩrĩtue, “Ndĩku.” Nyuma ya mũcemanio, ataana na aarĩ ba baaba, nĩbaancokeerie nkaatho mono. Biumia bikaai nyumene, nĩndaerwe kaanya ga kũrita rwaria o ta ũrĩa nkũbũgweterete mwambĩrĩrione jwa gĩcuncĩ gĩkĩ.

Nĩndaigĩrue ũguaa mono! Ĩgiita rĩu mũritwa erĩgagĩĩrwa kũthuranĩra rwaria rwa ndagĩka 6-8. Gũtaarĩ na gacuncĩ ga kũthoma Bibiria o ta ũrĩa kũrĩ nandĩ. Baaba naantetherie kũthuranĩra rwaria rũu na ndĩraimenyerithia maita 20 mbere ndũrita. Nyumene, nĩ ndaeere ũtaaro bũbwega mono. Jehova nethĩrĩtwe akĩmenyerithia mĩaka ĩmiingĩ gũkũrũkĩĩra baaba wakwa, ataana na aarĩ ba baaba bagimaru, na ũthuranĩri bwawe.

JEHOVA NEETĨRE NA MBERE KŨMENYERITHIA

Alice, ũrĩa nkũgwetete au mbere, neetĩre na mbere kũmenyirithia ndĩkwambia gũtũmĩĩria. Ntukũne iu, nĩtwekagĩrwa inya kũthomera mwene nyomba Maandĩko jathatũ rĩu tũkamũtigĩra iuku. Ĩgiita rĩakwa rĩa kwaria na mwene nyomba rĩgũkinya, Alice naaimenyithanĩrie na arambĩrĩria rwaria, rĩu arangwata ũgeni nĩkenda mũthomera ĩandĩko rĩa mbere. Kuuma au naampejaga kaanya ngeeta na mbere na rwaria, nkathoma ĩandĩko rĩa jaĩrĩ na rĩa jathatũ na kinya ngatigĩra mwene nyomba iuku. Nyumene, nĩndairitanĩre ũrĩa mpũmba kwimenyithania rĩrĩa twacemania na muntũ rĩa mbere. Nyuma ya baaba kũbatithua mũthiene jwa mwaka jwa 1954, neetĩre na mbere kũmenyirithia ũrĩa ngeeta na mbere gũtũmĩĩria. Baaba naaciũmĩre gũntethia kũmenya Jehova na kũmwenda, kinya kethĩra maami naarĩ agũkua. Naajũkagia na ũrito mono mantũ jegie ũtungatĩri na mĩcemanio. Rĩonthe nĩndamenyaga tũgeeta mĩcemanione yonthe na kinya ũtungatĩrine mũthiene jwa kiumia.

Mĩaka 12 ĩrĩa ndaarĩ cukuru nĩndairitanĩre mantũ jamaingĩ jarĩa jeejĩre gũntethia ũtũũrone. Ngerekano, nĩndairitanĩre ĩthabu bwega mono. Kinya nĩndairitanĩre gĩcũũnkũ o bweega. Kosi ya gĩcũnkũ ĩrĩa ndathomerete na ya mantũ jegie kwandĩka tũrũgono nĩjantethetie mono kĩrĩ ngũgĩ ĩrĩa nditaga nandĩ Rwangʼine rwa Waandĩki.

Kaingĩ antũ nĩbambũragia nĩkĩ mpendete ndwĩmbo. Aciari bakwa bo baĩrĩ nĩbeendete ndwĩmbo mono. Ndĩna mĩaka 7 nĩndaritanĩrwe kũringa piano ĩgiita rĩkaai ĩndĩ mwarimũ wakwa aatagwĩragĩrua, tontũ ntaarĩ na ũũmbi bũũnene bwa kũmĩringa. Kwou, neerĩre baaba ntige kũthomera mũsiki. Gĩtũmi nĩ tontũ ĩgiita rĩu ntakucagĩĩrua nĩ mũsiki.

Nyuma ya mĩeri ĩmĩkai, baaba naancwĩrĩre mwarimũ ũngĩ. Ĩgiita rĩu nĩndairitanĩre kũringa piano na kwina, na ndĩrathithia bwega mono. Rĩrĩa ndaarĩ ũmũniini nĩndaarĩ na kajũ gakathongi mono na nĩndaciindaga rĩrĩa tweta macindanone ya mũsiki. Mworoto jwakwa jwa kũthomera mũsiki jwarĩ mbĩthĩrwe na digirii kenda mpa mwarimũ wa mũsiki na mbĩthĩrwa na mbeca cia gũntethia ũtungatĩrine bwa ĩgiita rĩonthe. Rĩrĩa ndaarĩ akuĩ kũrĩĩkia cukuru, nĩndaciũkĩrwe atĩ ndĩrĩngĩtumĩra ĩgiita rĩriingĩ kũthomera igerio, gũcũnkũũna mantũ jamaingĩ jegie mũsiki, na kinya gũtunga ndwĩmbo. Tontũ bũu, nĩndatiganĩre na mathomo jau na ndĩrajũkia ũpainia bwa wĩthĩre 1963.

ŨPANIA NĨBWANDETEERE KŨGWĨRUA GŨKWINGĨ

Ndĩ kũthithia ũpainia mwaka jũmwe, nĩndaerwe kaanya ka gũtumĩka ndĩ painia wa mwanya narĩa Kapuskasing, Ontario. Twatumĩkaga na Daniel Skinner na aarĩ ũmũkũrũ nkũrũki yakwa. Naanditanĩre mantũ jamaingĩ jegie ũrĩa kĩũthũrano gĩtaga na mbere. Ndĩna mĩaka 20, nĩndaathurĩrwe ndĩ ũmwe wa Kamĩtĩ ya Ũtungatĩri Kĩũthũrano, na nĩndaarĩ na mantũ jamaingĩ ja kwiritana. Ndĩna kũgwĩrua mono tontũ ũthuranĩri bwa Jehova nĩbwĩtĩte na mbere kũmenyerithia antũ babeethĩ. Kethĩra bagatumĩra mantũ jarĩa bakũritanwa, bagatumĩrwa mono nĩ Jehova wĩthĩne bwao!

Magiita jamwe nĩbwethagĩrwa bũrĩ bũbũũmũ gũkara Kapuskasing. Ĩgiita rĩa mpio, mũruutĩra nĩjwenamaga jũgakinya digirii 44 (-47°F) kana magiita jangĩ jũkongereka gũkinyia digirii 33 (-27°F). Ũũni na Dan, kaingĩ nĩtwariũngaga gũntũ gũkwingĩ. Amwe nou, ũntũ bũmwe bwa jarĩa ndagwĩrĩĩrue ũtungatĩrine bũu nĩgũcemania na mwarĩ wa baaba ũgwĩtwa Linda Cole, ũrĩa nyumene eejĩre kwaa mwekũrũ wakwa.

Linda naarĩ na wĩru mono ũtungatĩrine na naarĩ na antũ babaingĩ barĩa acokagĩra. Kinya naarĩ mũtugani, muntũ wa kĩao, na mũcoore wa babaingĩ. Ngʼina waawe eetagwa Goldie, na kinya we aarĩ mwarĩ wa baaba. Ĩthe eetagwa Allen, na mwambĩrĩrione atetĩkagĩĩria ũmma. Kinya kethĩra Allen naamenagĩĩria ũmma, Goldie naaretaga aana baao Linda, John, na Gordon Nyomba ya Ũnene na akabaritana gũtũmĩĩria. Aana bau bonthe nĩbeejĩre gũtumĩka barĩ mapainia. Mĩaka ĩmiingĩ nyumene, Allen naairitanĩre ũmma, na arairitanĩria mono kĩũthuranone.

Mwaka jwa 1965, nĩndagwatĩrwe ũgeni kĩrĩ Shule ya Huduma ya Kitheokrasi narĩa Betheli ya Kanada nĩkenda menyirithua mantũ nkũrũki. Ndĩ cukuru ĩu, nĩndaromberwe mbũjũrĩĩrie fomu ya gwĩta cukuru ya Gileadi. Gũtĩrĩo ndathũgaania nkorotumĩka ndĩ mũmĩsonarĩ na ntoonaga teka ndĩrĩngĩ agĩra ngũgĩne ĩu. Amwe nou, nĩndojũrĩĩrie fomu ĩu, na ndĩragwatwa ũgeni kĩrĩ kĩrasi kĩa 42 kĩa Gileadi. Kaingĩ arimũ barĩa baatũritanaga nĩbaatwejaga ripoti yegie ũrĩa twĩtĩte na mbere. Ripoti ya mbere ĩrĩa ndaeerwe nĩyaambĩkĩĩre inya ndiritane mantũ jonthe jarĩa ndĩrĩngĩũmba jegie ũthuranĩri bwa Jehova. Ũtaaro bũu bwarĩ bũbwega mono tontũ ndaarĩ na mĩaka 21.

Kosi imwe irĩa twaritanagwa Gileadi ciegie ũrĩa tũũmba kũrita ngũgĩ kĩrĩ ituo bia redio, tv, na kinya waandĩki bwa nteto. Nĩndagwĩrĩĩrue ũritani bũu mono. Ntaijĩ atĩ bũrĩngĩntethia mono nyumene o ta ũrĩa ngataarĩĩria.

GŨTUMĨKA SENEGAL

Ntukũ inkai tũrĩkũrĩkia cukuru, ũũni na Michael Höhle nĩtwatũmĩrwe Senegal, Afrika, tũrĩ amĩshonarĩ. Kwarĩ na atũmĩĩria ta 100 akĩ nthĩgũrũne ĩu.

Nyuma ya gũkara nao mĩeri ĩmĩkai, nĩndagwatĩrwe ũgeni kũritaga ngũgĩ kĩrĩ obici ya rwaʼngi ya Senegal o rĩmwe kiumia. “Obici ĩu ya rwangˈi” yaarĩ kanyomba kamwe akĩ arĩa amisonarĩ baakaraga. Kinya kethĩra ĩtaarĩ ĩnene, Emmanuel Paterakis, ũrĩa waarĩ mũtegeeri waayo, naandiikanagia atĩ nĩyo yarũngamĩĩrĩte ũthuranĩri bwa Jehova nthĩgũrũne ĩu. Ĩgiita rĩmwe Mũtaana wa Baaba Paterakis noonere nĩbwega twandĩkĩre amisonarĩ bonthe barũga barĩa baakaraga Senegal ya kũbekĩra inya. Ntukũne iu, bũtaarĩ bũbũũthũ kwandĩka barũga na gwicabĩthia o rĩmwe irĩ inyiingĩ. Kwou nĩtwandĩkĩre barũga ĩmwe ĩmwe na njara tũgĩtumagĩra taĩpuraita. Ĩu yaarĩ ngũgĩ ĩndito, na nĩtwaimenyagĩĩra mono tũtĩgaatie rĩrĩa tũkwandĩka!

Rĩrĩa ndaithuranagĩra gũcoka nyomba yakwa ũgoro bũu, Mũtaana wa Baaba Paterakis naampeere mbaasha arambĩra nĩ ũthuranĩri bwetũ bwantũmĩra. Nyumene ndĩkũmĩrugũra, nĩndonere ĩmwe ya barũga irĩa ndaandĩkĩte! Ũntũ bũu nĩbwandikanĩrie atĩ nĩmbuĩrĩte gũtĩĩa ũtharanĩri bwa Jehova ĩtĩkũmakania ũrĩa obici ya rwangʼi ĩngʼana.

Nĩndatumĩre ũcoore na atũmĩĩria babaingĩ kĩũthũranone na nĩ ndabariũngagĩra Jumamosi mathaa ja ũgoro. Nĩ ndagwĩragĩrua magiita jau mono. Kinya nandĩ no twaragia na bamwe baao. Nĩndairitanĩre Gĩfaransa na mũgambo jũu nĩjũntethetie rĩrĩa nkũriũngĩra obici cia rwangʼi nthĩgũrũne.

Mwaka jwa 1968, ũũni na Linda nĩtwambĩrĩrie kũgambania. Mĩeri ĩrĩa yathingatĩte, nĩndagererie kũmũcwĩra ngũgĩ ĩtĩ ya ĩgiita rĩonthe nĩkenda tũũmba kũthithia ũpainia tũrĩ amwe. Nau Senegal antũ babaingĩ beendaga kwandĩka antũ ba nthĩ ĩu ĩndĩ tĩ ageni. Mũthiene ndĩgũcoka Kanada, nĩtwagũranĩre tũraewa kaanya ka gũtumĩka tũrĩ mapainia ba mwanya Edmundston, New Brunswick, gataũni kaniini karĩa gankeene na Quebec.

GŨTUMĨKA TŨRĨ MAPAINIA NARĨA NEW BRUNSWICK NA QUEBEC

Gũtaarĩ na mũtũmĩĩria kinya ũmwe icigone biu tinga aritwa baakai ba Bibiria. Akari babaingĩ icigone biu baarĩ athingati ba ndini ya Katholeki. Akuĩ nyomba cionthe, nĩtwethagĩra rwano rũkuuga Tũtĩkwenda Akũũjĩ ba Jehova. Mwanya na ũrĩa tũthithagia nandĩ, ĩgiita rĩu nĩtwatonyaga nja cionthe kwĩthĩrwe kũrĩ na rwano rũu kana gũtĩ naru. O kiumia, ndini ya Katholeki nĩyaandĩkithagia nteto ngacĩtine ĩkiugaga ũjũ: “Tũcweni Akũũjĩ ba Jehova na tũbenge nthĩgũrũ yeetũ.” Tontũ gĩcigone kĩu twarĩ ũũni na Linda, Victor na Velda Norberg, nĩtwamenyaga nĩtuĩ bakuugĩra!

Tũtĩkoroorĩrua nĩ ndiũnga ya mbere ya mũtegeeri wa mũthiũrũko. Nyuma ya gũkara natuĩ kiumia kĩmwe, naatwĩrĩre ũjũ: “Mworoto jũrĩa akĩ bũũmba gũciũmia gũkinyĩra gĩcigone gĩkĩ, nĩ bwiritanĩrie nĩkenda batiga kũbũmena.” Kuuma ĩgiita rĩu, jũu nĩju mworoto twaciĩkĩĩre. Na kamma nĩjwaritĩre ngũgĩ! O kaoora antũ nĩbaambĩrĩĩrie kwona atĩ Akũũjĩ nĩ baarĩ mwanya na atongeeria ba Katholeki. Nandĩ kũrĩ na kĩũthũrano gĩkĩniini gĩcigone kĩu.

Nyuma ya gũkara gĩntũ ta mwaka jũmwe gĩcigone kĩu gĩa kũraaja, nĩtwagwatĩrwe ũgeni gũtumĩka na kĩũthũrano kĩmwe gĩkĩnene taũnine ya Quebec. Nĩtwakarĩre nao gĩntũ ta mĩeri ĩtantatũ na tũragwĩrĩrua ũgwatani ũgeni bwa ataana na aarĩ ba baaba. Mũthiene nĩ ndaeere mũtegeeri wa mũthiũrũko.

Nĩndatumĩkĩre mĩaka 14 ĩrĩa yaathingatĩte ndĩ mũtegeeri wa mũthiũrũko narĩa Quebec. Nĩtwagwĩrĩĩrue magiita jau mono! Ngũgĩ ya gũtũmĩĩria narĩa Quebec nĩyaarĩ na maumĩĩra jameega. Kĩrĩ biũthũrano birĩa twariũngaga, nĩtwonaga antũ ba nja inyiingĩ bakiiritana ũmma na bagaciũmagia nĩkenda babatithua.

KŨRIIKANA BARĨA BETHĨRĨTWE BAKIIRITANĨRIA NA WĨRU

Nĩbwarĩ bũbũũthũ gũtuma ũcoore na ataana na aarĩ ba baaba ba Kanada barĩa baaragia Gĩfaransa. Nĩ baarĩ na nkerũ, wĩrũ, na etĩkĩkua. Amwe nou, bũtaarĩ bũbũũthũ kĩrĩbo gwĩtĩkĩĩria ũmma na nja inyiingĩ nĩciaregaga ntũmĩĩri yeetũ. Bamwe ba atũmĩĩria babeethĩ nĩberĩrwe nĩ aciari barĩa batetĩkĩtie bakengwa nja. Beeragwa ũjũ “Tigeni kwiritana Bibiria na Akũũjĩ ba Jehova, kana buumagare nja buru.” Bamwe baao nĩbaatigĩre kwiritana tontũ bwa gwatĩkwa kũu. Jehova nagwĩragua mono tontũ bwa barĩa bombĩte kũũmĩĩria!

Nandĩ, kambarĩĩrie bwegie mapainia ba mwanya na ba wĩthĩre barĩa baatumĩkaga Quebec mĩaka ĩu. Babaingĩ baao baaumĩte icigone bimwe bia Kanada. Nĩ baairitanĩre Gĩfaransa, mĩkariĩ ya antũ bau, na mawĩthĩre jaao, kinya kethĩra jarĩa maingĩ jaajo jaumanĩtie na ndini ya Katholeki.

Mapainia ba mwanya kaingĩ nĩ baatũmagwa gũtumĩka icigone bia kũraaja birĩa bitethagĩrwa na atũmĩĩria. Ĩndĩ tontũ bwa ndũmena cia gũntũ kũu, nĩbwethagĩrwa bũrĩ bũbũũmũ kwona kwa gũkara na kwona ngũgĩ cia ĩgiita rĩĩkai cia kũrita. Kinya barĩa bagũreene nĩbaakaraga barĩ ikundi bia antũ banna, batantatũ, gwĩta banana, nĩkenda bomba gũtethanĩĩria kĩrĩ ngarama cia mobatũ jaao. Batĩngĩũmba gũkara o muntũ na bwawe. Mapainia bau nĩ baarĩ na wĩru mono. Rĩrĩa boonaga muntũ ũkwenda kũritanwa Bibiria, nĩbairitanagĩria buru kũmũritana. Nandĩ tontũ babaingĩ naaja Quebec nĩbairitanĩre ũmma na gũtĩ na ũbatu kaĩrĩ bwa atumĩĩria, mapainia bau nĩbeetĩre icigone bingĩ birĩa birĩ na ũbatu bwa atũmĩĩria.

Rĩrĩa ndatumĩkaga ndĩ mũtegeeri wa mũthiũrũko, nĩndatũmagĩĩria na antũ babeethĩ Jumamosi rũũkĩĩrĩ. Bũu nĩ bwantethagia gũciũkĩrwa ĩmwe kwa ĩmwe nĩ mantũ jamoomũ jarĩa baakũrũkagĩĩra. Nandĩ, bamwe baao nĩbatumĩkaga nthĩgũrũ ingĩ barĩ amĩshonarĩ kana twanyene tũngĩ twa ũtungatĩri.

Matukũne jau, biũthũrano bimwe bitoombaga gũtũcokeria ngarama irĩa twethagĩrwa tũtumĩrĩte rĩrĩa twabariũngagĩra. Bũu nĩbwatũmaga tũthirĩrwa nĩ mbeca irĩa twethagĩrwa nacio mbere mweri jũthira. Ĩgiita rĩmwe nĩtwabatarĩre kwĩrĩgĩĩra Jehova tontũ nĩwe wenka wamenyaga mathĩĩna jarĩa twarĩ najo. Gũtĩrĩo aatũtiganĩria. O na gũkari ũu, rĩonthe naatũmbithagia kũriũngĩra kĩũthũrano kĩmwe gwĩta kĩrĩ kĩngĩ.

MANTŨ JARĨA TWIRITANĨTE KUUMANIA NA ATAANA NA AARĨ BA BAABA ETĨKĨKUA

O ta ũrĩa ngwetere mwabĩrĩrione nĩ ngunĩkĩte mono kuumania na kosi ĩrĩa nadiritanĩre Gileadi. Magiitene jau rĩrĩa ndaarĩ Quebec, nĩtwethagĩrwa na twanya tũtwingĩ twa kũrita ũkũũjĩ gũkũrũkĩĩra redio, TV, na ngazĩtine. Kaingĩ, nĩtwaritanagĩria ngũgĩ na mũtegeeri ũmwe wa mũthiũrũko wetagwa Léonce Crépeault, na naarĩ na ũtea bwa kũrita ngũgĩ na ituo biu. Rĩrĩa twacemanagia na antũ barĩa baathomerete mono mantũ jau ja midia, atageragia kũboonia ũrĩa aijĩ mantũ jamaingĩ, mwanya nou aaberaga ũjũ: “Ũũni na ũjũ tũrĩ nawe tũrĩ atũmĩĩria. Nĩ mantũ jamakai akĩ twijĩ jegie mantũ jaja ja midia. Ĩndĩ neka tũtũmi nĩkenda tũmenyitha antũ bwegie kĩgomano gĩkĩnene gĩa Akũũjĩ ba Jehova kĩrĩa gĩkathithĩka. Tũkagwĩrĩrua mono ũtethio bunthe bũrĩa bũgwatwa.” Kwaranĩria nabo na njĩra ĩu ya winyiia nĩgwatũmaga twewa twanya tũtwingĩ tũrĩa tũtĩngĩũmba kwewa.

Mũthiene, obici ya rwangʼi nĩyatũtũmĩre tũrĩna mũtaana wa baaba Glen How, ũrĩa waarĩ wakili weetũ nĩkenda tũũmba gwĩtĩka ĩgamba rĩmwe rĩrĩa rĩrĩngĩkucĩĩria aandĩki babaingĩ ba nteto. Mantũ jarĩa ndacionerete rĩrĩa twatumĩkaga na mũtaana wa baaba Léonce na jarĩa ndaritani Gileadi nĩjaantetherie mono. Nĩbwarĩ wendeeri bũbũnene mono gũtumĩka na Mũtaana wa baaba How. Ataakĩraga rĩrĩa aatetagĩĩra ũthuranĩri bwa Jehova kĩwaatho. Ĩndĩ ũntũ bwa gĩtũmi nkũrũki, nendete Mũrungu mono.

Mwaka jwa 1985 nĩtwatũmĩrwe gũtumĩka ndĩ mũtegeeri wa mũthiũrũko akuĩ na gĩcigo kĩrĩa baaba aakaraga Kanada. Bũu nĩbwatũũmbithĩrie kũmũmenyeera. Nyuma ya mĩeri ĩthatũ, naakuĩre. Nĩtwetĩre na mbere na ngũgĩ ya mũthiũrũko narĩa Kanada mwanka 1989 rĩrĩa twagwatĩrwe ũgeni tũtĩĩrĩgĩĩrĩte gũtumĩka Betheli ya Amerika. Kwou nĩtwatigĩre ngũgĩ ya mũthiũrũko nyuma ya gũtumĩka akuĩ mĩaka 19. Nĩtũkarĩte gũntũ gũkwingĩ, na twarĩjanĩra na ataana na aarĩ ba baaba babaingĩ. Nĩtũkũbacokeria bonthe nkaatho tontũ bwa ũtugani bwao!

TŨRATHAMĨRA AMERIKA

Tũrĩgũkinya Brooklyn, nĩndambĩrĩĩrie gũtumĩka Rwangʼine rwa Ũtungatĩri. Rĩonthe, nĩncokagia nkaatho tontũ bwa ũrĩa baamenyerithĩrie na njĩra ĩnjega. Ũntũ bũmwe ndairitanĩre nĩ atĩ ntĩbuĩrĩte gũciĩra nĩngũciũkĩrwa nĩ ũntũ ntĩraamba gũcũnkũũna mantũ jonthe bwega. Mwaka jwa 1998, nĩ ndambĩrĩĩrie gũtumĩka Rwangʼine rwa Waandĩki, arĩa kinya nandĩ mbĩthĩrĩtwe nkiiritana mantũ jegie waandĩki. Nĩndaeerwe wendeeri bwa gũtetheeria mũtaana wa baaba John Barr mĩaka ĩmiingĩ, ũrĩa waarĩ Mũbangania wa Kamĩtĩ ya Waandĩki. Rĩonthe nĩngwĩragĩrua ũrĩa aamenyerithagia rĩrĩa twatumĩkaga nawe. Naarĩ na nkuma inthongi mono.

Nĩ wendeeri bũbũnene mono gũtumĩka amwe na Akristũ ainyiyia ba Rwangʼi rwa Waandĩki. Rĩrĩa bakũrita ngũgĩ yaao, nĩ barombaga bakĩriikanaga bwega atĩ nĩ kĩrundu kĩa Jehova kĩbatethagia kĩrĩ jonthe jarĩa baingagia, na tĩ ũũmbi bwao.

Kinya nĩbwĩthĩrĩtwe bũrĩ wendeeri bũbũnene kĩrĩni na mwekũrũ waakwa Linda kũriũngĩra ataana na aarĩ ba baaba kĩrĩ nthĩgũrũ 110. Nĩtũcionerete ĩmwe kwa ĩmwe wendo bũrĩa amĩshonarĩ bethĩrĩtwe nabu, ona kinya amemba ba Kamĩtĩ ya Rwangʼi, na atumĩkĩri bangĩ ba ĩgiita rĩonthe. Nĩ kĩtharimo gĩkĩnene gũcionera wĩru na wĩtĩkĩkua bwa atũmĩĩria icigone biu, barĩa bekĩĩte mantũ ja Ũnene mbere kinya rĩrĩa kwethĩrwa na ndwa, waagi bwa mbeca, kana mĩthangĩko. Jehova nabendeete mono!

Mĩaka ĩu yonthe, Linda nethĩrĩtwe agĩntetheeria mono nĩkenda mpũmba kwiingia twanya tũrĩa mbĩthĩrĩtwe nkĩewa. Kinya nethĩrĩtwe akiiritanĩria mono gũtetheeria antũ bangĩ. Nethagĩrwa na ũũmbi bũbũnene mono bwa kwambĩrĩria rwaria na antũ na kũbatethia kwiritana ũmma, na kinya gũtetheeria barĩa batigĩte gũtumĩkĩra Jehova bamũcokera. Linda nethĩrĩtwe arĩ kĩewa gĩkĩnene mono kuuma kĩrĩ Jehova. O ũrĩa tũgũkũra, nĩtũgwĩragua mono tontũ bwa ataana na aarĩ ba baaba babeethĩ, barĩa batũtethagia mantũne mwanya mwanya.—Mariko 10:29, 30.

Nĩngũcokia nkaatho mono ndatega nyuma mĩaka 80 ĩrĩa ĩkũrũkĩte. Na nĩngwĩtĩkanĩĩria na biugo bibi bia mũtungi wa Zaburi: ‘Gwe Mũrungu, no Gwe ũtwĩre ũnditanaga o kuuma wĩthĩ bwakwa; naani kinya nandĩ no mpumbũraga mantũ jaku, ũrĩa jarĩ ja kũrigarania.ʼ (Zb 71:17) Na nĩnkwenda gwĩta na mbere kũthithia ũu rĩonthe rĩrĩa nkethĩrwa ndĩ mwoyo.