Aana nĩ ‘Rũgai’ Kuuma Kĩrĩ Jehova

NĨMBI biĩjaga mathũgaanione jaaku rĩrĩa waigua kiugo ‘rũgai’? Mbuga ũthũgaanagĩria mbeca, into, kana gĩntũ kĩngĩ kĩa bata kĩrĩa ũtigĩri nĩ muntũ wa nja yeenu. Ũntũ bũu bũrĩonania atĩ rũgai nĩ gĩntũ kĩa bata mono na nũbuĩrĩte gũkĩmenyeera bwega.

Bibiria yugaga aana nĩ ‘rũgai kuuma kĩrĩ Mwathani.’ (Zb. 127:3) Kamma, aciari Akristũ nĩbonaga aana baao barĩ biewa bia gĩtũmi mono kuuma kĩrĩ Baaba waao wa ĩgũrũ, na nĩbaciũmagia kũbamenyeera kĩmathũgaanio, kĩmwĩrĩ, na kinya gĩkĩrundu.

Amwe nou, ũntũ bwa kĩeba nĩ atĩ, ntukũne cietũ aciari bamwe batĩonaga aana baao barĩ kĩewa kuuma kĩrĩ Mũrungu. (Isa. 49:15; 2 Tim. 3:1-3) Bangĩ nĩbethagĩrwa na wendi bwa kũbamenyeera, ĩndĩ bakaremwa tontũ bwa kũũmĩrwa nĩ ũtũũro. Nĩ mantũ ta jarĩkũ jatũmaga bwĩthĩrwa bũrĩ bũbũũmũ aciarĩ kũmenyeera aana baao? Nĩatĩa Jehova endaga aciari bathithĩria aana baao? Na nĩatĩa aciari Akristũ boomba kũrera aana baao na njĩra ĩnjega?

MANTŨ JAMOOMŨ JARĨA BAKŨRŨKAGĨĨRA

Gwatĩkwa nĩ antũ ba nja na atũũri. Icigone bimwe, aciari barĩa barĩ na aana babaingĩ nĩbaejagwa gĩtĩĩo nkũrũki ya bangĩ. Kwou, antũ ba nja na kinya atũũri bomba gũtũma barĩa bagũrene baigua teka babuĩrĩte kwĩthĩrwa na aana babaingĩ nkũrũki ya barĩa bomba kũmenyeera.
Kũmakĩra ĩgiita rĩĩjĩte. Icigone bimwe, narĩa aana bakujaga mono tontũ bwa kwaga biakũrĩa bibiega bia kũngʼana, mĩrimo, na wagi bwa ndawa, antũ bamwe nĩbagĩjaga aana babaingĩ, nĩkenda batigĩĩra no bamwe bagũkũra. Bangĩ nĩbathuuraga kwĩthĩrwa na aana babaingĩ nĩkenda boona wa kũbamenyeera rĩrĩa bagakũra. Bũu nĩbũkarĩkaga monomono nthĩgũrũne irĩa thirikarĩ itĩejaga antũ bakũrũ ũtethio.
Kũbanga ũciari. Icigone bimwe, gũtĩĩthagĩrwa na njĩra cia kũngʼana cia gũtethia barĩa bagũreene kũrigĩĩria ĩu. Bangĩ nĩbakĩraga kwajua batumĩra njĩra irĩa cionekaga icigone biao tontũ tĩ injega mono. Kinya bangĩ batĩũmbaga gũtumĩra njĩra iu tontũ nĩciĩthagĩrwa na goro mono.a

NĨMBI JEHOVA ERĨGAGĨĨRA ACIARI BATHITHIA?

Antũ ba nja ĩmwe barĩ gũntũ gwa kũnogoka bakĩgwĩragĩrua mantũ mwanya mwanya. Mwarĩ tinenja akĩaranagĩria na ĩthe amũthikiirĩte bwega, na ngʼina agĩcethaga na mwana ũngĩ waao. — Tumĩra kaanya na o ũmwe wa aana baaku

Iingia mobatu ja aana baaku. Jehova naete aciari ngũgĩ ya kwiingĩria aana baao mobatu ja kĩmwĩrĩ. Nerĩgagĩĩra bethĩrwa na wĩru bwa kũrita ngũgĩ nĩkenda aana baao boona biakũrĩa, nguũ, na gwa kũmaama. Kinya nendaga babathomithia. Amwe nou, aciari Akristũ batĩbaikagia cukuru cia kũraaja kana cia kũraara. Ĩndĩ nĩbakaraga nabo mwanka bakarĩĩkia cukuru, bakabamenyeera bwega, na bakagĩa ũtea bwa ngũgĩ, mantũ jarĩa jatũmaga baigua barĩ na ũkaria na bendi. Tontũ Jehova nethagĩrwa na ũngʼanĩĩru, atĩĩrĩgagĩĩra bethĩrwa batongi nĩkenda babaingĩria mobatu jau. Ngerekano, aciari barĩa aathurĩre barera Mũtaana waawe ũrĩa endete mono bataarĩ itonga, ĩndĩ nĩbaarĩ na wĩru bwa kũrita ngũgĩ ciao.—Mat. 13:55, 56; Luk. 2:24.

Ũritani bwa Bibiria: ‘Ningĩ atĩrĩ, muntũ akeethĩrwa atĩkũmenyeera antũ baawe, na mono antũ ba njewe rĩ, ũu nĩ ta akaanĩte ũntũ bwa gwĩtĩkia, na nĩ ũmũũĩ nkũrũki ya ũrĩa ũtĩĩtĩkagia.’—1 Tim. 5:8.

Jehova naciũkagĩrwa atĩ aciari no babatare ũtethio o ũrĩa bagũkũra. Njĩra ĩmwe aana bomba kwonania nĩbakũmakĩra aciari baao, nĩkũbangania ũrĩa bakabamenyeera bakũra. (Kum. 20:12; 1 Tim. 5:4.) Amwe nou, Jehova nagwĩragua aciari bathũgaanĩria ũrĩa bakamenyeera aana baao, antũ a kũthũgaanĩria ũrĩa bagatethua nĩbo.—2 Ako. 12:14.

Batethie gĩkĩrundu. Aciari Akristũ kinya nĩbaei kaanya ga kũritana aana baao kwenda Jehova na kũmũthathayia. Bũu nĩbu ũntũ bũrĩa onaga bũrĩ bwa gĩtũmi nkũrũki bwa gũtethia aana baao.—Kur. 6:6, 7

Ũritani bwa Bibiria: ‘Nkũrũki rerageni (aana beenu) na mũrerere jwa kũboneeria ũrĩa bathingatanĩkia na Mwathani.’—Aef. 6:4.

JEHOVA NAKWENDA BŨŨMBANA

Mũkũrũ na mwekũrũowe bakĩaranagĩria nja kwao. Barĩ na Bibiria ĩguũrĩtue. — Arĩĩrieni o mbere nĩ aana bangʼana bwenda kwĩthĩrwa nabo

Bangeni nĩ aana bangʼana bũkwenda. Kethĩra nĩbwirĩragĩĩria kwĩthĩrwa na aana, ithũũjeni bwega. Ngerekano, rĩ bũkethĩrwa na mbeca cia kũngʼana cia kũgũra biakũrĩa, nguũ, na kũthomithia aana babaingĩ? Kethĩra bũtĩũmba, banganieni nĩ aana bangʼana bwenda kwĩthĩrwa nabo nĩkenda bũũmba kũbamenyeera ũrĩa Jehova endaga. Nĩ mma, naciũkagĩrwa atĩ tĩ mantũ jonthe jetaga ũrĩa bũbangĩte. (Mut. 9:11) Ĩndĩ akabũtharima nĩkenda bũũmba kwaa aciari babeega.

Ũritani bwa Bibiria: ‘Mathũgaanio ja antũ barĩ na wĩru ijaretaga nyiro, ĩndĩ muntũ ũrĩa ũthũngũthagĩra mantũ, nou akathũngũthĩrwa nĩ ũkĩa.’—Nju. 21:5.

‘Nĩ muntũ ũrĩkũ kĩrĩ buĩ, akĩenda gwaka nyomba ya ngoroba, ũtĩambaga gũkara nthĩ atara mbia ciawe cia kũmĩakithia amenya kethĩra arĩ na ingʼani cia kũmĩũjũria?’—Luk. 14:28.

Ĩĩkeni Jehova mbere ndeene ya nja yeenu. Tigĩĩreni ũntũ bwa gĩtũmi nkũrũki ndeene ya nja yeenu nĩ kũthathayia Jehova. Kethĩra ũrĩ na aana, ciũmie kũritana o ũmwe waao kwenda Jehova. Batetheerie kũthikĩĩra bwega na kwiritana rĩrĩa barĩ mĩcemanione. Ĩthĩrweni na rũmenyeria rwa kũthithia Ũthathayia bwa Nja o kiumia. Ritana aana baaku gũtũmĩĩria. Menya wĩrĩgĩĩra mwana ũrĩa mũkũrũ kana antũ bangĩ ba nja baiingia kaanya kau tontũ nĩ gaaku ũrĩ mũciari. Kinya kethĩra ũkabatara ĩgiita na kwiritanĩria gũkwingĩ nĩkenda ũritana aana baaku kwenda Jehova, itharimo birĩa ũkoona nĩ bibiingĩ.

Ũritani bwa Bibiria: ‘Ntĩna ũntũ bũngwĩragia gũkũrũka bũu, atĩ kwigua ũrĩa aana bakwa beetaga na njĩra ĩrĩa ĩrĩ ya mma.’—3 Joh. 4.b

Ĩrĩgĩĩra Jehova. Kwĩthĩrwe bũrĩ na aana kana neka bũkũbanga kũgĩa nabo, ĩthĩrwa na mma ithimi bia Jehova nĩbio bia gĩtũmi nkũrũki ya mawĩthĩre kana nkuagaya cia antũ.

Mbica: 1. Aciari bakari nthĩ na mwana waao barĩ mũcemanio jwa kĩũthũrano. Mwana ũu okĩ ĩrĩtie nja nĩkenda acokia kĩũria. 2. Antũ ba nja ĩmwe barĩ ũtungatĩrine. Ĩthe agĩtũmagĩ ĩria na mwarĩ waao tinenja na ngʼina agĩtũmagĩ ĩria na aana bangĩ baĩrĩ. — Nĩkũjũkagia ĩgiita na kwiritanĩria nĩkenda wiingia mobatu ja gĩkĩrundu ja aana baaku

Wathuura kwĩthĩrwa na aana baakai, ĩrĩgĩĩra Jehova agakũmenyeera kinya wakũra. Tigana na mwerekera jwa kwona aana ta ‘mũthithũ’ jwa gũgũkaria nyumene. Menya ũkĩra ũkĩonaga teka Jehova agagũtiganĩria. Neranĩte agakũmenyeera, na rĩonthe nojũragia mawĩrane jaawe.—Jos. 23:14.

Ũritani bwa Bibiria: ‘Ĩtĩkia Mwathani na nkoro yaaku yonthe, na ũkeerĩgĩĩra kĩrĩra gĩaku gwengwa. Mwĩtĩkagĩre njĩrene ciaku cionthe, nawe agakũthongomeria njĩra ciaku.’—Nju. 3:5, 6.

‘Ndaarĩ mwana-munyi, na nandĩ ndĩ mũkũrũ, ĩndĩ ntoona muntũ ũrĩa wagĩrĩte eerũkĩri, kana rũciara rwawe rũgĩcoka kũromba biakũrĩa.’—Zb. 37:25.

‘Ĩndĩ ambeni bũcwe Ũnene bwa Mũrungu, na mantũ jaawe jarĩa jaagĩrĩte, na mantũ jau jangĩ jonthe jakoongeerwa.’—Mat. 6:33.

Aana nĩ kĩewa kĩa gĩtũmi mono kĩrĩa Jehova aete aciari. Kamma, Jehova nagwĩragua mono rĩrĩa bamenyeera aana baao na njĩra ĩrĩa endaga. Nĩbabanganagia nĩ aana bangʼana bakethĩrwa nabo, bakathingatĩĩra ithimi bia Mũrungu antũ a mawĩthĩre ja kwao, na bakabaingĩria mobatu jaao ja kĩmathũgaanio, ja kĩmwĩrĩ, na ja gĩkĩrundu. Rĩrĩa bathithia ũu, nĩbonanagia atĩ aana baao nĩ ‘rũgai’ na kĩewa kĩa gĩtũmi kuuma kĩrĩ Jehova.

Nĩbagwĩragĩrua Matua Jarĩa Baathithĩrie

Rĩ, aciari nĩbagwatagwa nĩ mantũ jamoomũ rĩrĩa bathuura kwĩthĩrwa na aana baakai? Aciari babaingĩ barĩa bakaraga nthĩgũrũ irĩa irĩ ũkĩa mono nĩbaciũragia kĩũria kĩu. Ona mantũ jarĩa jakuugwa bwegie ũntũ bũu nĩ akũrũ bamwe Akristũ ba nthĩgũrũ iu.

Rĩ, nĩbwaatĩkagwa bwĩthĩrwa na aana babaingĩ?

“Ĩĩ, kinya nĩ bamwe kĩũthũranone. Mũkũrũ ũmwe na mwekũrũ waawe nĩbaatũũrĩrie ũjũ, ‘Nĩkĩ bũrĩna mwana ũmwe akĩ? Naja Afrika, ũkethĩrwa na mwana ũmwe, wonagwa teka gũtĩwe ũrĩ nawe. Na kinya ũkethĩrwa na baĩrĩ, wonagwa teka ũrĩ na ũmwe.’ Kinya tũrĩkwona mwana wa baĩrĩ, bataatigĩre gũtwatĩka.”—Jeremias

Rĩ, nĩbũkũrũkĩĩrĩte mantũ jamoomũ ũtũũrone tontũ bwa kwĩthĩrwa bũtĩ na aana babaingĩ?

“Arĩ. Mwanya nou, gatũgunĩkĩte nkũrũki. Tontũ nĩtwathuurĩre kwĩthĩrwa na aana baakai, ũũni na mwekũrũ waakwa nĩ tũũmbĩte kwiingia mobatu jeetũ ja kĩmwĩrĩ na kinya nkũrũki ja gĩkĩrundu. Tontũ ndereri nja ĩrĩ na aana babaingĩ, nĩndoonaga mantũ jamoomũ jarĩa aciari bakwa baakũrũkagĩĩra nĩkenda batũmenyeera na gũtũthomithia.”—Jeremias

Nĩatĩa aana beenu baigagua bwegie ĩtua rĩu?

“Aana beetũ nĩbaigagua bekĩri inya mono tontũ batoona mathĩĩna ta ja aana bangĩ barĩa aciari baao bethĩrĩtwe bakiinyĩrĩka tontũ bwa kwĩthĩrwa na aana babaingĩ.”—Filipe

“Aana beetũ nĩbeethagĩrwa na kũgwĩrua tontũ nĩtwabakaragia na kũboonia wendo. Rĩonthe nĩtwethagĩrwa na ũcoore amwe na ataana na aarĩ ba baaba bagimaru, barĩa baatũtetherie gũciĩkĩra mĩoroto ya gĩkĩrundu. Nandĩ, nĩtwonete aana beetũ bakĩthingata ngerekano iu ciao injega.”—Carlos

Rĩ, nĩbũgunĩkĩte tontũ bwa kwĩthĩrwa na aana baakai?

“Nĩtwombĩre kwiingia mobatu ja nja yeetũ na njĩra ĩnjega tontũ bwa ĩtua rĩu twathithĩrie. Nĩndatiganĩre na ngũgĩ ĩrĩ na mũcaara jũmũnene gĩntũ ta mĩaka ĩthatũ mĩthiru. Tũrĩkũthithia ũgarũrũku bũu, tũtainyĩrĩkĩre mono tontũ aana beetũ nĩ bakaai, na tũtabataraga into bibiingĩ bia kwiingia mobatu jeetũ.”—Jeremias

“Ĩtua rĩu nĩrĩtũtethetie kwiingĩria aana beetũ mobatu ja kĩmwĩrĩ na ja gĩkĩrundu. Nĩtũũmbĩte kũbamenyeera na gũtumĩra ĩgiita na o ũmwe waao. Nandĩ, bonthe nĩbatumĩkagĩra Jehova na nĩbathingatĩĩrĩte mĩoroto ya gĩkĩrundu. Kinya nĩtũũmbĩte gũtumĩka gũntũ mwanya mwanya kũrĩa kũrĩ na ũbatu bũbũnene bwa atũmĩĩria.”—Lenadi

Nĩ ũtaaro bũrĩkũ ũrĩngĩenda kwaa aciari bangĩ?

“Nĩncionerete ũmma bwa Zaburi 34:10b, ĩrĩa yugaga: ‘Barĩa baangagĩra [bacwaga] Mwathani, gũtĩ gantũ gakeega bakaaga.’ Jehova nampingĩrĩtie mobatu jakwa jonthe o amwe na ja nja yakwa.”—Rafael

a Mũkũrũ na mwekũrũowe nĩbo bakathuura nĩrĩ na nĩ aana bangʼana bakethĩrwa nabo, na nĩ njĩra ĩrĩkũ ĩkwagĩra ya kũbanga ũciari bomba gũtumĩra. Matua jau nĩ jaao kĩũmbe, na gũtĩwe ũbuĩrĩte kũbameneeria. (Aro. 14:4, 10-13) Nkũrũki, Akristũ barĩa barĩ ngũranone nĩbabuĩrĩte kũthingatĩĩra ũtaaro bwa 1 Akorintho 7:3-5 rĩrĩa bagũtua matua ta jau.

b Kinya kethĩra mũstaarĩ jũu jwaragĩĩria aritwa bamwe barĩa Johana aaritanĩĩte ũmma, ũu nou aciari baigagua bwegie aana baao barĩa batumĩkagĩra Jehova.