Rĩ, Nwithuranĩrĩte Tontũ bwa Mantũ Jamoomũ Wabatithua?

1-2. Nĩatĩa tũũmba kwithuranĩra tontũ bwa mathĩĩna jarĩa jomba kuumĩra gatĩgatĩne geetũ na Athathayia bangĩ? Ejana ngerekano.

NĨTŨKWĨRĨGĨĨRA kũgwatwa nĩ mantũ jamoomũ nthĩgũrũne ĩjĩ ya Shaitani. Jesũ neerĩre athingati baawe: ‘Gũtĩrĩo mantũ jau jagiitaranagia jatĩkorweja.’ (Mat. 18:7) Tũkĩriikanaga bũu, nĩtũbuĩrĩte kwithuranĩra tontũ bwa mantũ jamoomũ, na jamwe jomba kuumania na barĩa tũthathaagia nabo.

² Thũgaanĩria ngerekano ĩjĩ. Jehova natwĩrĩte twithuranĩre tontũ bwa mogwati ja wĩthĩre. Nĩatĩa tũthithagia ũu? Mbere, nĩtũcũnkũũnaga nĩ mogwati ta jarĩkũ jomba kuumĩra gĩcigone gĩetũ. Nĩ ũntũ bwa gĩtũmi kũthithia ũu monomono kethĩra gatũthamĩrĩte gĩcigone kĩu rua. Nyuma ya kũmenya o ũgwati bũrĩa bũmba kuumĩra, nĩtũbuĩrĩte kũbangania ũrĩa tũkethĩrwa twithuranĩrĩte bwaumĩra. (Nju. 21:5) Na njĩra o ta ĩu, nĩtũbuĩrĩte kũmenya mathĩĩna jarĩa jomba kuumĩra gatĩgatĩne geetũ na Mũkristũ ũngĩ, na matagaaria jarĩa tũkajũkia jaumĩra. Twathithia ũu, jatĩtuuna nkoro nkũrũki ya kĩthimi, na jatĩthũũkia ngwatanĩro yeetũ amwe na Jehova. (Zb. 17:5) Nandĩ, gatwarĩĩrie mathĩĩna jathatũ jarĩa jomba kuumĩra na ũrĩa tũũmba kwithuranĩra kĩrĩ o bũmwe bwajo.a

MŨTAANA KANA MWARĨ WA BAABA AGWAATĨRIA

3. Nĩ ũntũ bũrĩkũ bũbũũmu tũũmba gũkũrũkĩĩra kĩũthũranone?

³ Nũkũriikana ũrĩa waigĩrue ũrĩkwĩja mĩcemanione ya Akũũjĩ ba Jehova rĩa mbere na wona ũrĩa bethagĩrwa bendeene? Mbuga bũu nĩbwakũrikithĩĩrie atĩ ũkwona ũmma? (Joh. 13:35; Akol. 3:12) Ũu nĩu Blancab aaigĩrue. Ĩndĩ arĩkũbatithua, naakũrũkĩĩrĩĩre ũntũ bũrĩa ateerĩgĩĩrĩte. Ariuga: “Mwarĩ wa baaba ũmwe naanthithĩrie bũthũũku mono. Kinya nĩndamenyere naaragia mantũ jatĩagĩrĩte jegie bangĩ. Nterĩgĩĩrĩte ũntũ ta bũu, tontũ ndairitanĩte atĩ Akũũjĩ ba Jehova nĩbaciũmagia kwĩthĩrwa na thĩĩrĩ na wendo.” Nĩ mma, ataana na aarĩ ba baaba nĩbaciũmagia kwonania nkuma cia Gĩkristũ, ĩndĩ tĩ baboojũru. (Aef. 4:23, 24; 1 Joh. 1:8) Kwou magiita jamwe, ũmwe waao oomba kuuga kana akathithia ũntũ bũgakwigithia bũbũũĩ. (Jak. 3:8) Ũntũ bwa kĩeba nĩ atĩ, mathĩĩna ta jau nĩjatũmĩte bamwe batiga gũtumĩkĩra Jehova.

4. Nĩmbi biũmba gũtũtethia kwĩthĩrwa na wendi bwa kũrekera mũtaana kana mwarĩ wa baaba atwatĩria? (Aefeso 4:32)

⁴ Nĩatĩa ũũmba kũthithia nandĩ nĩkenda ũmenya matagaaria jarĩa ũkajũkia bakwigithia bũbũũĩ kana bagwaatĩria? Menyeria gũtumĩra ũtaaro bũrĩa bũrĩ kĩrĩ Aefeso 4:32. (Thoma.) Kethĩra ũgaciũmia kũthũgaanĩria bangĩ na kũbaigĩĩrua kĩao, ũgaciebania na mantũ jarĩa joomba kũbũmenanithia. Ciĩkĩre mworoto jwa kũrekera bangĩ kuuma nkorone bagwaatĩria. Nĩmbi biũmba gũgũtethia kũthithia ũu? Thũgaanĩria ũrĩa kinya gwe ũrombaga Jehova jamaingĩ akũrekera meeyia jaaku na ũrĩa aathithagia ũu atĩkinyĩĩrĩtue. (Mat. 6:12) Wathũgaanĩria ũntũ bũu, kinya gwe ũkoona bũrĩ bũbũũthũ kũrekera bangĩ.

5. Nĩ ũritani bũrĩkũ bwa Bibiria bũũmba gũtũtethia rĩrĩa twaatĩrua? (Njuno 19:11) (Tega kinya mbica.)

⁵ Thoma Njuno 19:11. Bibiria yugaga twaatĩrua, mathũgaanio jameega kana gũciũra mantũc gũgatũtethia kũboorera rĩrĩa tũthũũri. Ũritani bũu nĩbwatetherie Rima, ũrĩa ũbatithĩtue rua. Ariuga: “Rĩrĩa ndona mũtaana kana mwarĩ wa baaba akĩthithia ũntũ bũũmba kũmbigithia bũbũũĩ, nĩndiikanaga Njuno 19:11. Nĩnthũgaanagĩria jarĩa bagũkũrũkĩĩra, na nkageria gũciũkĩrwa nĩkĩ bathithia ũu. Kinya nĩmbarombaga tũtũmĩĩria amwe nabo. Bũu nĩbũntethagia kũbamenya bwega nkũrũki.” Kamma, bũu nĩ ũtaaro bũbwega. Kinya gwe ciũmie kũmenya athathayia bangĩ bwega. O ũrĩa ũkathithia ũu, nou ũkoona bũrĩ bũbũũthũ kũbarekera bagwaatĩria.

6. Nĩmbi biũmba gũtũtethia kwĩthĩrwa na ngwatanĩro ĩnjega na bangĩ kĩũthũranone?

⁶ Nĩatĩa ũũmba kũthithia nĩkenda ũgwĩrĩrua ngwatanĩro ĩnjega na bangĩ kĩũthũranone? Wamenya ataana na aarĩ ba baaba bwega, thingatĩĩra nkuma ciao injega. (Teganĩĩria Njuno 10:12; Aro. 12:10; Afl. 2:2, 3) Thũgaanĩria ũrĩa ũntũ bũu bwatetherie Mark ũrĩa ũtaakarĩte mono arĩkũbatithua. Arĩkwambia gũtumĩra ĩgiita rĩriingĩ na ataana na aarĩ ba baaba ba kĩũthũrano kĩao, naamenyere gũtaũkĩrwa kwao. Nĩmbi biamũtetherie atĩkagitarue nĩ maatĩa jaao? Ariuga: “Nĩndaciũkĩrwe atĩ maatia jaao jataarĩ jamanene jakĩringithanua na jarĩa antũ babaingĩ bakũthithia nthĩgũrũne ĩjĩ. Kwou, nĩndoonere tĩ bwega gũkara nkĩthingatagĩĩra gũtaũkĩrwa kwao. Nkũrũki, nĩ ndaambĩrĩĩrie gũkucĩĩrua nĩ nkuma ciao injega.” Kinya gwe wathithia ũu, ũkagwĩrĩrua ngwatanĩro ĩnjega amwe na bangĩ kĩũthũranone.

RĨRĨA WAMBIA KWIRĨRĨRIA MANTŨ JARĨA WATIGANIRE NAJO

7. Nĩmbi biũmba gũtũma twambia kwirĩrĩĩria mantũ jarĩa twatiganĩre najo?

⁷ Rĩrĩa wambĩrie kwiritana ũmma, gũtĩ nkanja nĩwaigĩrue bwega gũtigana na mantũ ja nthĩgũrũ ĩjĩ ya Shaitani. Womba gũciũria, ‘Rĩ, kwombĩka muntũ akambia kwirĩrĩĩria mantũ jau kaĩrĩ?’ Rĩrĩa ũgũkũrũkĩĩra mantũ jamoomũ, womba kũriikana kana kinya kwirĩrĩĩria mantũ jamwe jarĩa watiganĩre najo ũrĩkwambia gũtumĩkĩra Jehova. (Teganĩĩria Gutara 11:4-6.) Ngerekano, mbuga ataana ba baaba bamwe nĩbaatiganĩre na ngũgĩ ĩrĩ na ĩgweta, ĩrĩa yatumagĩra ĩgiita rĩao rĩriingĩ. Bangĩ barĩkwaa Akũũjĩ ba Jehova, nĩbaatigĩrwe nĩ acoore baao. Kinya bangĩ nĩbaatiganĩre na mĩtugo mĩnna ĩmĩthũũku ĩrĩa yaabagwete ũkombo, kinya kethĩra nĩbaamĩgwĩragĩrua. Rĩ, bũtĩĩthĩrwa bũrĩ ũntũ bwa kĩeba mono Mũkristũ akeeja gwĩtĩkĩĩria ũntũ bũrĩa aathithagia karaaja bũmwathũrana na Jehova! Nĩatĩa ũũmba kũthithia nandĩ nĩkenda ũntũ kinya bũrĩkũ bwakarĩka, ũtĩgacokere mantũ jarĩa watiganĩĩrie?

8. Nĩmbi tũkwiritana kuumania na Iburahimu na Sara?

⁸ Bibiria ĩrĩ na ngerekano cia atumĩkĩri ba Jehova barĩa baambĩrĩĩrie kwirĩrĩria mantũ jarĩa baatiganĩte najo. Ngerekano, Iburahimu na Sara nĩbaathĩkĩĩre Jehova, barauma Uru, bareta gũkara maemene. (Ahi. 11:8, 9) Mbuga magiita jamwe nĩbaariikanaga mantũ jarĩa baagwĩragĩrua narĩa Uru. Ĩndĩ kethĩra nĩbaakarĩre bakĩthũgaanagĩria mantũ jau baatigĩĩte kana bakiirĩragĩĩria jo, bũu bũrĩngĩtũma benda kũjacokera. Mwanya nou, birĩa bathũgaanagĩria nĩ ĩgiita rĩĩjĩte.—Ahi. 11:15, 16.

9. Nĩatĩa Paũlũ oonaga mantũ jarĩa aatigaanĩĩrie? (Afilipi 3:7, 8, 13)

⁹ Kinya mũtũmwa Paũlũ naatiganĩĩrie mantũ manna nĩkenda atumĩkĩra Jehova. Mbere aa Mũkristũ, naaritani Watho bwa Kĩyahudi nĩ Gamalieli ũrĩa waarĩ na ĩgweta mono. (Atum. 22:3) Paũlũ arĩngĩaa mũtongeeria ũmũnene wa ndini ya Kĩyahudi. (Gal. 1:13, 14) Ĩndĩ arĩgwĩtĩkĩĩria nkuma ĩnjega, naatiganĩĩrie mantũ jau jonthe. Arĩkwaa Mũkristũ rĩ, nĩ rĩonthe mantũ jeetaga bwega? Arĩ. Naaũrĩrwe, araingĩrwa nceera, na arathũũrwa nĩ Ayahudi. (2 Ako. 11:23-26) Arĩngĩkara akĩthũgaanagĩria mĩthangĩko ĩu akĩ, na akaringithania na ũtũũro bwawe arĩ Mũkristũ, arĩngĩona teka mantũ jaabuui nkũrũki, mbere agarũka. Antũ a kũthithia ũu, naathũgaanĩĩrie wendeeri bũrĩa aarĩ nabu arĩ mũthingati wa Jesũ na itharimo birĩa arĩngĩona nyumene. Paũlũ naarĩ na mma atĩ itharimo biu nĩ biarĩ bia gĩtũmi nkũrũki ya mantũ jonthe jarĩa aatiganĩrĩtie.—Thoma Afilipi 3:7, 8, 13.

10. Nĩ mantũ jarĩkũ tũbuĩrĩte kũthũgaanagĩria kaingĩ? (Mariko 10:29, 30) (Tega kinya mbica.)

¹⁰ Nĩmbi tũkwiritana? Kethĩra ũkambia kũthũgaanĩria mantũ jarĩa waatiganĩĩrie nĩkenda waa Mũkristũ, ciũmie kinya kũriikana nĩkĩ waatiganĩĩre najo. (Mut. 7:10) Ringithania mantũ jarĩa waatiganĩĩrie na itharimo birĩa wonete kuuma ũrĩkwambia gũtumĩkĩra Jehova. Ngerekano, nandĩ ũrĩ na ũcoore bwa akuĩ amwe nawe. (Nju. 3:32) Kinya ũrĩ na ataana na aarĩ ba baaba nthĩgũrũne yonthe barĩa bakwendete mono. (Thoma Mariko 10:29, 30.) Rĩ, Jehova atĩĩranĩte agakwaa kinya itharimo bingĩ bibiingĩ ĩgiita rĩjĩĩte! (Isa. 65:21-23) Wamenyeria kũthũgaanĩria itharimo birĩa biumanagia na gũtumĩkĩra Jehova, ũtĩambia kwirĩrĩĩria mantũ jarĩa watiganĩĩrie.

11. Nĩatĩa ngerekano ya Rosemary ĩgũkũritana?

¹¹ Rosemary aabatithĩrue arĩ na mĩaka akuĩ 50. Ona ũrĩa aathithĩrie nĩkenda atiga kwirĩrĩĩria mantũ jarĩa aatiganĩte najo. Ariuga: “Mwambĩrĩrione, nĩndairĩragĩĩria thigũnkũ ya Krisimasi, tontũ rĩonthe nĩtwamĩgwĩragĩrua na antũ ba nja. Nĩndagwĩragua kwaa eendwa bakwa biewa. Kinya nĩndaigagua bwega mono ndona aana bakwa na kinya bajũũjũ bacĩgĩĩrĩtie mũtĩ jwa Krisimasi na bagĩkunũra biewa biao.” Nĩmbi biamũtetherie? Ariuga: “Nĩ ndacwĩre mantũ jangĩ ja kũgwĩrĩrua antũ a Krisimasi. O mwaka, nĩncwaga ntukũ ĩngĩ ya kwĩthĩrwa amwe na antũ ba nja, nkabaa biewa, na nkabataarĩĩria nĩkĩ mbendete.” Kinya naakũrũkĩĩrĩre ũntũ bũngĩ bũbũũmũ. Ariuga: “Ndĩkwiritana ũmma, acoore bakwa nĩbaantigĩre. Magiita jamwe nĩmbigagua nkĩbaaga na nkaigua ĩoru.”d Nĩmbi biamũtetherie? Naabangĩre gũtũmĩĩria na aarĩ ba baaba mwanya mwanya. Ariuga: “Ndĩkũthithia ũu, nĩndatumĩre ũcoore nabo, na nĩ mbigagua mbendete na nĩ mbonaga barĩ ba gĩtũmi. Nĩmbi ũkwiritana kuumania nawe? Kinya kethĩra no wigue ũkiirĩrĩĩria mantũ jamwe jarĩa wagwĩragĩrua mbere wiritana ũmma, kũrĩ na mantũ jangĩ jameega ũũmba kũthithia nandĩ na jagakũretera kũgwĩrua kwa mma. (Afl. 4:8, 9) Riikana atĩ rĩonthe Jehova agwakwaa bibiingĩ nkũrũki ya birĩa ũtiganĩrĩtie.

RĨRĨA BAMWE BATIGA JEHOVA

12. Nĩ ũntũ bũrĩkũ bũmba gũkarĩka kĩũthũranone bũgakwinyĩĩria mono?

¹² Rĩrĩa waeere Mũkũũjĩ wa Jehova, nĩwaigĩrue bwega ũrĩkwathũkana na nthĩgũrũ ĩjĩ nthũũku, wambia kũgwatanĩra na antũ bairitanĩte ũmma na bagũciũmia kũthithia jarĩa jagĩrĩte. (Isa. 65:14) Amwe nou, magiita jamwe womba kwigua ũmwe wa Akũũjĩ akũthithia wĩyia bũrito. Kinya bamwe bomba kweberua kĩũthũranone. (1 Ako. 5:13) Ona ũrĩa mwarĩ wa baaba ũgwĩtwa Samar aaigĩrue ũntũ ta bũu bũrĩgũkarĩka. Ariuga: “Ĩgiita rĩĩkai ndĩkũbatithua, mũkũrũ ũmwe wa kĩũthũrano naathithĩrie wĩyia bũrito na areeberua. Nĩndaunĩkĩre nkoro mono tontũ nterĩgagĩĩra mũkũrũ wa kĩũthũrano no athithie wĩyia bũrito ũu kĩrĩ Jehova na kinya kĩrĩ kĩũthũrano.” Nĩ mma, rĩonthe nĩtũbuĩrĩte gwĩtĩkia atĩ ataana na aarĩ ba baaba nĩbendete Jehova na batĩngĩenda kũmũtiga. (1 Ako. 13:4, 7) Ĩndĩ ũmma bwa mantũ nĩ atĩ, o mwaka bamwe baao nĩbeberagua kĩũthũranone. Na womba kwinyĩrĩka mono kethĩra ũrĩa watiga Jehova nĩ muntũ wa nja, mũcoore, kana muntũ ũraete gĩtĩĩo.

13. Nĩatĩa tũũmba kwithuranĩra nandĩ nĩkenda tũtĩkagitare muntũ twendete agatiga Jehova?

¹³ Nĩatĩa ũũmba kwithuranĩra nandĩ nĩkenda ũtĩkagiitare kethĩra muntũ wendete agatiga Jehova? Ĩta na mbere kũrikia ngwatanĩro yaaku amwe nawe. (Jak. 4:8) Riikana atĩ ngwatanĩro yaaku na Mũrungu ĩtĩkwĩrĩgĩĩra wĩtĩkĩkua bwa antũ bangĩ. Ngerekano, kinya kethĩra kaingĩ tũthathaagia tũrĩ amwe ta nja kana ta kĩũthũrano, o muntũ kĩũmbe nakũbatara kwĩthĩrwa na rũmenyeeria rwa kũromba na kũthoma Bibiria.—Zb. 1:2; 62:8.

14. Nĩmbi tũkwiritana kuumania na ngerekano ya mũtũmwa Petero? (Johana 6:66-68)

¹⁴ Twomba kwiritana kuumania na ũrĩa mũtũmwa Petero aathithĩrie rĩrĩa aritwa bangĩ baatigĩre kũthingata Jesũ. Mbuga ĩgiita rĩu kinya we ataciũkagĩrwa bwega nĩ ũntũ bũrĩa Jesũ aarĩ akũbaritana. Amwe nou, ona ũrĩa Petero aaugĩre kĩrĩ Johana 6:66-68. (Thoma.) Antũ a kũthingatĩĩra ũrĩa bangĩ baathithĩrie, naathũgaanĩrie ũmma bũrĩa airitanĩte kuuma kĩrĩ Jesũ. Ta maumĩĩra, ataagitarĩre. O ta ũu, kinya bangĩ bakeeja gũtiga Jehova, riikana atĩ mathithio jaao jatĩũmba kũgarũra ũmma bũrĩa wiritanĩte gũkũrũkĩĩra ũthuranĩri bwawe. Ĩta na mbere kũgwatĩĩra mma iu! Samar, ũrĩa ũkũgweti au mberene ariuga, “Rĩonthe nĩndiriikanagia atĩ maatia ja muntũ ũmwe tĩ ja kĩũthũrano kĩonthe kana ja ũthuranĩri bwa Jehova, na nkuma cia Jehova itĩkorogarũka kinya antũ bakathithia atĩa.”

15. Nĩmbi tũkwiritana kuumania na ngerekano ya Emily?

¹⁵ Thũgaanĩria ngerekano ya Emily. Kiumia kĩmwe arĩkũbatithua, ngʼina naabatiganĩĩrie na kinya areberua kĩũthũranone. Ariuga: “Nteerĩgĩĩrĩte ũntũ ta bũu bũrĩngĩkarĩka. Ntagwatwa nĩ ũntũ bũngĩ bũbũũmũ ta bũu, na nĩmbigagua mwagĩte mono.” Nĩmbi biatetherie Emily? Ariuga: “Ntĩ ninka. Baaba nethĩrĩtwe agĩntethia mono ona kinya ataana na aarĩ ba baaba kĩthũranone, barĩa bethĩrĩtwe barĩ ta antũ ba nja yakwa. Twinthe nĩtũgũkũrũkĩĩra mantũ jamoomũ. Nĩkĩo tũbuĩrĩte kwĩthĩrwa na ngwatanĩro ya akuĩ amwe na bangĩ na tũgĩkanagĩra inya.” (1 Pet. 5:9) Ũtĩbuĩrĩte gweteera mathĩĩna jaumĩra nĩkenda wĩthĩrwa na ũcoore bwa akuĩ na ataana na aarĩ ba baaba. Ambia kũthithia ũu o nandĩ. Na njĩra ĩu, kinya ũntũ bũrĩkũ bwakarĩka, ũtigua teka ũrĩ gwenka.

16. Nĩmbi tũbuĩrĩte kũriikana? (Tega kinya mbica.)

¹⁶ Riikana Jehova akanũkagia barĩa endete. (Ahi. 12:6) Nendaga barĩa bonthe beberetue kĩũthũranone bamũcokera. (2 Pet. 3:9) Kwou, kethĩra mũcoore waaku wa akuĩ neberetue kĩũthũranone, ĩthĩrwa na mma atĩ akũrũ ba kĩũthũrano nĩbakũthithia jonthe jarĩa bakũũmba nĩkenda bamũtethia gũcokera Jehova.—2 Tim. 2:24, 25.

17. Nĩ ũntũ bũrĩkũ tũbuĩrĩte kwĩthĩrwa na mma nabu?

¹⁷ Tũkwarĩĩria mantũ jamwe jamoomũ jarĩa muntũ omba gũkũrũkĩĩra nyuma ya kũbatithua. Nĩ mma jamwe no jethĩrwe jarĩ jamarito mono, ĩndĩ ũtĩkũbatara gũkĩra. Kũrĩ na mantũ jamaingĩ ũũmba kũthithia nĩkenda withuranĩra tontũ bwa mantũ ta jau. Na rĩonthe ũriikanage atĩ Jehova agagũtethia nĩkenda ũtũũria wĩtĩkĩkua bwaku. Nethĩrĩtwe agĩgũtethia na akathithia ũu kenya na kenya! (1 Pet. 5:10) Rĩonthe, agakwaa inya ĩrĩa ũkũbatara nĩkenda ũũmba kũũmĩĩria magerio jarĩa ũgakũrũkĩĩra. Weeta na mbere gwĩtĩkĩĩria ũtethio bwa Jehova, gũtĩ ũntũ kinya bũrĩkũ bũbũũmũ bũgakwathũrana nawe!—Zb. 119:165; Aro. 8:38, 39.