Biũria Kuuma Kĩrĩ Athomi Beetũ

Nĩrĩ thirikarĩ igatũmĩĩria mantũ jegie ‘thĩĩrĩ’ na ũkaria?

O ta ũrĩa tũroonete rua kĩrĩ gĩcuncĩ kĩa “Biũria Kuuma Kĩrĩ Athomi Beetũ” kĩrĩ Kĩrĩngo kĩa Mũkaria,a ĩgiita rĩtĩ kũraaja, Jehova ‘akaatha’ kana ekĩre ĩthũgaanio rĩawe nkorone cia ‘ngoji ĩkũmi’ (tacio thirikarĩ cionthe cia nthĩgũrũ) nĩkenda ciejana inya na wathani bwacio kĩrĩ ‘nyomoo ĩu ntune,’ tayo Ũrũmwe bwa Kĩmanthĩgũrũ. Nyomoo ĩu kinya nĩĩtagwa ‘mũngʼuanano jwa nyomoo’. (Kug. 13:14, 15; 17:3, 16, 17) Nyumene, ‘ngoji iu ĩkũmi’ na nyomoo ĩrĩa ĩkethĩrwa ĩkwewa inya, ĩkathiria ndini ya ũrongo nthĩgũrũne yonthe. Rĩ, thirikarĩ igatũmĩĩria mantũ jegie ‘thĩĩrĩ’ na ũkariab mbere kana nĩ nyuma ya kũthirua kwa ndini ya ũrongo?—1 Athe. 5:3.

Ũmma nĩ atĩ, tũtijĩ ĩgiita rĩongwa rĩrĩa thirikarĩ igatũmĩĩria mantũ jegie ‘thĩĩrĩ’ na ũkaria. Tũrĩngĩĩthĩrwa tũkĩmenyaga mantũ jonthe jegie ũntũ bũu, tũtĩngĩkara twimenyeerete na twithuranĩrĩte. Jesũ neerĩre athingati baawe kaĩrĩ na kaĩrĩ ‘bakarage baigwatĩrĩte’ kana baithuranĩrĩte. (Mat. 24:42; 25:13; 26:41) Nandĩ gatũcũnkũũne kĩndeene ũroria bwa mũtũmwa Paũlũ bũrĩa aandĩkĩĩre Akristũ ba Thesalonike.

Paũlũ aandĩkĩre ũjũ: ‘O rĩrĩa antũ bakeethĩrwa bakiugaga atĩrĩ, kũrĩ na thĩĩrĩ na ũgwati gũtĩbu, ĩndĩu norĩo kũthirua gũkabeejĩĩra na mpwĩ.’ (1 Athe. 5:2, 3) Kaingĩ mauku jeetũ nĩjataarĩĩrĩtie biugo biu bia Paũlũ ũjũ: Ntũmĩĩri ĩu ya ‘thĩĩrĩ’ na ũkaria ĩkaritwa kagiita gagakai mbere ya mwambĩrĩrio jwa thĩĩna ĩrĩa nene, ĩrĩa ĩkambia na kũthirua kwa Babiloni Ĩrĩa Nene, tayo ndini cionthe cia ũrongo nthĩgũrũne. Kinya nĩtwĩthĩrĩtwe tũkiuga atĩ ntũmĩĩrĩ ĩu yarĩtwa, tũkamenya thĩĩna ĩrĩa nene ĩrĩ akuĩ kwambia.

Amwe nou, nyuma ya gũcũnkũũna bwega nkũrũki ũntũ bũu, nĩkwonekanĩte atĩ kwombĩka kũrĩ na njĩra ĩngĩ ya gũcĩura ũntũ bũu. Mbuga ntũmĩĩri ĩu ĩkaritwa nyuma ya kũthirua kwa ndini ya ũrongo. Nĩkĩ tũũmba kuuga ũu? Thũgaanĩria biũria bibi.

Nĩ kaanya karĩkũ ndini ya ũrongo ĩthĩrĩtwe nako kĩrĩ ndwa cia mĩgongo? Bibiria yugaga ũjũ: ‘Ndeene yaawe [“mũmaraya ũrĩa mũnene,” Babiloni Ĩrĩa Nene] nĩkwethĩĩrwe kũrĩ na tharike . . . ya bonthe barĩa booragwa barĩ nthĩgũrũne.’ (Kug. 17:1, 5; 18:24) Mĩakene yonthe, ndini ya ũrongo nĩĩthĩrĩtwe ĩkĩgwata mbaru mantũ ja ndwa na ũgaidi. Kwou, antũ a gwĩkĩĩra mantũ ja thĩĩrĩ na ũkaria, nĩyo ĩthĩrĩtwe ĩgĩtongeeria mantũne ja ndwa na thanga. Kĩũria kĩrĩa gĩkuumĩra nĩ gĩkĩ: Rĩ, thirikarĩ ĩgatũmĩĩria mantũ ja ‘thĩĩrĩ’ na ũkaria nyuma ya kũthiria Babiloni Ĩrĩa Nene? No kũũmbĩke, ĩndĩ tũtĩũmba kũrikithia ũntũ bũu.

Nĩmbi bikathingata ntũmĩĩri ya ‘thĩĩrĩ’ na ũkaria? Paũlũ aaugĩre ũjũ: ‘Kũthirua gũkabeejĩĩra na mpwĩ.’ (1 Athe. 5:3) Kĩrĩ Study Bible, nteto irĩa igũtaarĩĩria mũstaarĩ jũu iriuga: “Aja Paũlũ arĩonania gũkethĩrwa na kagiita kaniini kana kwĩthĩrwe gũtĩ nako gatĩgatĩ ka gũtũmĩĩrua kwa ‘thĩĩrĩ’ na ũkaria na kũthirua kwa barĩa bakamĩtũmĩĩria. Ũntũ bũu bũkathithĩka na mpwĩ na batĩonoka.” Kethĩra thirikarĩ cia nthĩgũrũ nĩcio igatũmĩĩria thĩĩrĩ na ũkaria nyuma ya kũthirua kwa ndini ya ũrongo, kũthirua kwa thirikarĩ iu cionthe kinya ku gũkathingata na mpwĩ mono, itĩĩrĩgĩĩrĩte.

Nĩatĩa athathayia ba Jehova bakathithia mantũ jau jakarĩka? Paũlũ aaugĩre ũjũ: ‘Ataana ba baaba buĩ bũtĩ mũgundune, ĩndĩ mũthenya jũu jwĩja kũbũkirimania ta ũrĩa mwamba akirimanagia muntũ.’ (1 Athe. 5:4) Thũgaanĩria ũntũ bũbũ: Kethĩra ntũmĩĩri ya thĩĩrĩ na ũkaria ĩkaritwa nyuma ya kũthirua kwa ndini ya ũrongo, rĩu antũ ba Jehova bakamenya kũthirua kwa thirikarĩ cia nthĩgũrũ gũgũkinya. Amwe nou, thirikarĩ iu itĩĩthĩrwa ikĩmenyaga mũthiro jwacio ijwĩjĩte o ta mwamba, nĩkĩo igakirimanua ntũti, ĩtĩĩrĩgĩĩrĩte.

Kwou rĩ, nĩmbi twĩrĩgĩĩrĩte? Ĩgiita rĩtĩ kũraaja, ‘ngoji irĩa ĩkũmi’ na nyomoo ĩrĩa ĩrĩ na inya mono ĩkathiria ndini ya ũrongo. Jũu jũkethĩrwa jũrĩ mwambĩrĩrio jwa thĩĩna ĩrĩa nene. Kinya nĩtũkũmenya atĩ ĩgiita rĩnna, thirikarĩ igatũmĩĩria mantũ ja ‘thĩĩrĩ’ na ũkaria. Nĩrĩ mantũ jau jagakarĩka? Tũkwaarĩĩria njĩra ijĩrĩ ũrĩa bũu bũũmba gũkarĩka. Ya mbere: Ntũmĩĩri ĩu ĩkaritwa mbere ya kũthirua kwa ndini ya ũrongo. Ya ijĩrĩ: Ntũmĩĩri ĩu ĩkaritwa nyuma ya thirikarĩ kũthiria ndini ya ũrongo buru. Tũkabatara gweteera nĩkenda twona ũrĩa gũgakarĩka. Kaingĩ, tũciũkagĩrwa bwega nkũrũki nĩ ũroria bwa Bibiria rĩrĩa bwĩtĩte na mbere kũũjũrua kana bwarĩĩkia kũũjũrua.—Teganĩria Johana 12:16.

O tweteerete ĩgiita rĩu, ũntũ bwa gĩtũmi nkũrũki nĩkwĩthĩrwa na ngwatanĩro ĩnjega amwe na Jehova na tĩkũmenya rĩrĩa ntũmĩĩri ya ‘thĩĩrĩ’ na ũkaria ĩkaritwa. No mwanka ‘tũkare tũciũki toro, na tũrĩ na ũũme bwetũ,’ nĩkenda twĩthĩrwa twithuranĩrĩte bwa kũngʼana ĩtĩkũmakania ũrĩa mantũ jagakara.—1 Athe. 5:6.