Jehova’n A Mite A En Reng

1. Engvângin nge Isua’n a hnungzuitute humhim tûra Jehova hnêna a ngen?

A THIH hma zân khân, Isua’n a Pa vâna mi hnênah a bîk taka dîlna a nei a. A hnungzuitute humhim tûrin a ngên a ni. (Joh. 17:15, 20) Ni e, Jehova chuan a mite chu a en—a ngaihsakin a humhim—reng a. Mahse, Isua chuan a hnungzuitute’n tûn hma aia nasain Setana beihna an hmachhawn dâwn tih a hria a ni. Setana beihna suaksual takte do hneh tûrin Jehova ṭanpuina an mamawh dâwn tih a hre bawk.

2. Sâm 33:18-20-nain a sawi angin, engvângin nge harsatnate kan hmachhawn huna kan hlauh a ngaih loh?

² Tûn laia Kristian dikte chungah Setana thunun khawvêl hian harsatna tam tak a thlen a. Min tilunghnual theitu leh Jehova chunga kan rinawmna fiahtu harsatnate kan hmachhawn a ni. Mahse, he thuziaka kan la hriat tûr angin, eng mah kan hlauh a ngai lo. Jehova’n min en reng a—kan hmachhawn harsatnate chu a hmuin, min ṭanpui tûrin a inpeih reng a ni. Jehova mit chu “amah ṭihtute chungah a fu reng,” tih târ langtu Bible-a entîrna pahnih i lo ngaihtuahho vang u.—Sâm 33:18-20 chhiar rawh.

MAL NIA KAN INHRIAT HUNAH

3. Eng hunah nge mal nia kan inhriat mai theih?

³ Kohhranah unau tam tak nei mah ila, mal nia inhriat châng kan nei mai thei. Entîr nân, ṭhalaite chuan school-a an classmate-te hnêna an rinna chungchâng an hrilhfiah a ngaih hunah, a nih loh leh kohhran thara an insawn hunah mal niin an inhre mai thei. Kan zînga ṭhenkhat chuan chutianga kan inhriatnate chu mahni chauhva hmachhawn tûra an inngaih avângin hrehawm an tiin, an lunghnual pawh a ni thei. Min hriatthiampui loh kan hlauh avângin mi dangte hnêna hrilh chu kan hreh pawh a ni thei a. A châng chuan, min ngaisaktu an awm tak tak leh tak tak loh kan ngaihtuah pawh a ni thei bawk. A chhan chu eng pawh ni se, mal nia inhriatna chuan ṭanpuitu nei lo nia inhriatna leh lungkhamna min neihtîr thei a ni. Jehova’n chutianga rilru put hmang kan neih chu a duh ngai lo. Engvângin nge chutianga kan sawi theih?

4. Engvângin nge zâwlnei Elija’n: “A la awm chu keimah chauh ka ni,” tia a sawi?

⁴ Mi rinawm Elija entawn tûr siam hi han ngaihtuah teh. Jezebeli’n thah a tum avângin ni 40 chuang a tlan chhia a. (1 Lal. 19:1-9) A tâwpah, pûkah amah chauhva awmin Pathian Jehova hnênah: “[Zâwlnei] la awm chu keimah chauh ka ni,” tiin a sawi a. (1 Lal. 19:10) Dik tak chuan, ram chhûngah zâwlnei dangte pawh an la awm a; Obadia chuan Jezebeli’n thah a tumna lakah zâwlnei 100-te chu a hum a ni. (1 Lal. 18:7, 13) A nih leh, engvângin nge Elija chu mal nia a inhriat? Obadia humhim zâwlneite chu thi vek tawh nia a ngaih vâng a ni em? Carmel Tlângah Jehova chu Pathian dik a nihzia finfiah a nih hnu pawha tu man Jehova rawng an bâwl loh vâng a ni em? A nih loh leh, a hmêlmate’n thah an tum thu chu tu man an hriatpui lo emaw, tu man amah an ngaihsak lo emaw nia a ngaih vâng a ni thei ang em? Bible chuan Elija rilru put hmang chu chiang takin a sawi lo. Mahse, Pathian Jehova’n mal nia a inhriatna chhante chu a hriatthiampui tih leh amah ṭanpui dân tûr dik tak pawh a hria tih erawh kan chiang a ni.

5. Engtin nge Jehova’n Elija chu a mal lo tih a hriat chiantîr?

⁵ Jehova’n Elija chu kawng tam takin a ṭanpui a. A rilrua awmte a sawi chhuah theih nân ṭum hnih lai: “Hetah hian eng nge i tih?” tiin a zâwt a ni. (1 Lal. 19:9, 13) Chutianga a zawh apiangin, Elija’n a rilrua awm a sawichhuahte chu Jehova’n a ngaithlâksak a. A awmpui tih leh a thiltihtheihnate chu a hmuhtîr a ni. Chu bâkah, amah betu tam tak an la awm thu a hriat chiantîr bawk. (1 Lal. 19:11, 12, 18) Jehova hnêna a thinlunga awmte a sawichhuah a, A chhân lêtna a hriat chuan Elija rilru chu a hahdam hle ang tih rinhlelh rual a ni lo. Jehova’n ani chu chanvo pawimawh tak takte a pe a. Suria lal atâna Hazaela hriak thih tûr te, Israel lal atâna Jehua hriak thih tûr te, leh zâwlnei atâna Elisa hriak thih tûrtein a hrilh a ni. (1 Lal. 19:15, 16) Elija hnêna chûng chanvote a pêkna hmangin, Jehova chuan a ṭha zâwnga thil ngaihtuah tlat tûrin a ṭanpui a. Ṭhian ṭha tak Elisa a pe bawk a ni. Mal nia i inhriat hunah, engtin nge Jehova ṭanpuina chu i dawn ve theih?

6. Mal nia i inhriat hunah eng chungchângahte nge i ṭawngṭai theih? (Sâm 62:8)

⁶ Jehova chuan a hnêna ṭawngṭai tûrin a sâwm che a. I hmachhawn harsatnate chu a hmuin, i ṭawngṭai hun pianga ngaihthlâksak tûr chein a tiam che a ni. (1 Thes. 5:17) Amah betute ṭawngṭaina ngaihthlâk chu a lâwm zâwng tak a ni si a. (Thuf. 15:8) Mal nia i inhriat hunah eng chungchângte nge i ṭawngṭainaah i telh theih? Elija angin i rilrua awmte chu Jehova hnênah hrilh ang che. (Sâm 62:8 chhiar rawh.) I lungkhamnate leh chumiin a nghawng dân che chu hrilh la. Mal nia i inhriat huna tih tûrte i hriat theih nân Jehova hnênah ṭanpuina dîl ang che. Entîr nân, school-a thu hrilhna i neih hunah mal nia inhriatna leh hlauhna i nei a nih chuan, i hrilh thei nâna i mamawh huaisenna pe tûr chein Jehova hnênah ṭanpuina dîl bawk ang che. Thiam taka i rinna chungchâng i hrilhfiah theih nân finna pawh i dîl thei bawk a ni. (Lk. 21:14, 15) Rilru hahna nasa tak, a nih loh leh lunghnualna i nei a nih chuan, thlarau lama puitling tu emaw hnêna i sawi chhuah theih nân Jehova hnênah ṭanpuina dîl la. Chu Kristian unau chuan i rilru awm dânte a hriatthiampui theih nân che Jehova hnênah ṭanpuina i dîl thei bawk. Jehova hnênah i thinlunga awmte chu sawichhuakin, i ṭawngṭaina a chhân dân chu hmuh tum la, mi dangte ṭanpuina chu pawm ang che. Chutianga i tih chuan, mal nia inhriatna i nei tlêm ngei ang.

7. Mauricio-a thiltawn aṭangin eng nge i zir?

⁷ Jehova chuan hna awmze nei tak thawh tûr min pe ṭheuh va. Kohhranah leh thlawhhma rawngbâwlnaa i chanvote hlen thei tûra theih tâwp i chhuahnate chu a hmuin a ngaihlu hle tih i chiang thei a ni. (Sâm 110:3) Engtin nge chu hnathawhnaa buai rengna chuan mal nia i inhriat huna a ṭanpui theih che? Ṭhalai unaupa Mauricio-ab thiltawn hi han ngaihtuah teh. Baptisma a chan hnu rei vak lovah a ṭhian ṭhate zînga pakhatin zawi zawiin thutak a kal bosan a. Mauricio-a chuan: “Ka ṭhianpain thutak a chhuahsan tih ka hriat chuan inrintâwkna ka hloh va. Ka inpumpêkna thutiam ka hlen theih loh leh Jehova chhûngkuaa ka awm reng theih loh ka hlau a ni. Mal nia ka inhriat bâkah, tu man ka rilru awm dânte min hriatthiampui lo ni hian ka hria,” tiin a sawi. Engin nge ani chu ṭanpui? “Rawngbâwlnaah tam lehzualin ka tel a. Chu chuan mahni chauh inngaihtuah lo tûr leh ka hlauhnate ngaihtuah reng lo tûrin min ṭanpui a ni. Unaute ruala rawngbâwlnaa telna chuan min tihlim a, mal nia inhriatna min neih tlêmtîr lehzual a ni,” tiin a sawi. Ni e, rawngbâwlnaah unaute nêna mi mal taka kan thawh dun theih loh pawhin, lehkhathawn leh telephone hmanga thu hrilhnaa thawhhona chuan min tichak a ni. Mauricio-a ṭanpuitu dang leh chu eng nge ni? Ani chuan: “Kohhranah ka inhmang tam lehzual a. Ka chanvo dawnte chu ka theih ang tâwka ṭhaa inbuatsaihin ka ti ṭhîn a. Chûng ka chanvo dawnte chuan Jehova leh unaute’n min ngaihlu nia inhriatna min neihtîr a ni,” tiin a sawi.

FIAHNA KHIRH TAKTE KAN TAWH HUNAH

8. Engtin nge fiahna khirh takte chuan min nghawng theih?

⁸ He ni hnuhnûng chhûng hian fiahnate kan tâwk ang tih kan beisei a. (2 Tim. 3:1) Chu bâkah, fiahna kan tawh hun leh chûng kan tawh fiahnate chuan min ti tilunghnual thei bawk. Rin loh takin sum leh pai lamah harsatna kan tâwk thut emaw, natna khirh tak kan vei emaw, a nih loh leh thihnaah hmangaih tak kan chân emaw pawh a ni thei. Chutiang hunah chuan, kan lunghnual hle pawh a ni thei a; a bîk takin, harsatnate chu a indawtin kan hmachhawn emaw, ṭum khatah harsatna chi hrang hrang kan hmachhawn emaw a nih chuan chutiang chu a thleng thei a ni. Mahse, Jehova chuan min en reng tih leh eng ang fiahna pawh tâwk mah ila, a ṭanpuina nên chuan inrintâwkna neiin kan hmachhawn thei tih hre reng ang che.

9. Joba fiahna tawh ṭhenkhat chu sawi rawh.

⁹ Jehova’n mi rinawm Joba a ṭanpui dân hi han ngaihtuah teh. Hun rei lo te chhûngin fiahna chi hrang hrang a hmachhawn a ni. Ni khat chhûngin, a ran rual zawng zawng lâksak a nih thu te, a chhiahhlawhte thah an nih thu te, leh chu aia râpthlâk zâwk a fa duh takte an thih chungchâng thin tiṭhawng tak thute a hria a. (Job. 1:13-19) Chumi hnu lawkah, a lu sûnna pawh a la reh hmain, natna hrehawm tak leh ṭihbaiawm tak a vei bawk. (Job. 2:7) A dinhmun tawh chu hrehawm a tih êm avângin Joba chuan: “Nun hi ka ning tak zet a, dam rei ka duh tawh lo,” tiin a sawi chhuak hial a ni.—Job. 7:16, C.L. Re-edited.

10. Engtin nge Jehova’n Joba chu fiahna a tawhte chhel taka tuar chhuak thei tûra a mamawhte a pêk? (A kâwma milem en rawh.)

¹⁰ Jehova chuan Joba chu a en reng a. Joba a hmangaih avângin, a fiahna tawhte chhel taka tuar chhuak thei tûra a mamawhte chu a pe a ni. Jehova’n Joba chu biain, tâwp chin nei lo a finna leh a thil siamte a ngaihsakzia chu a hriatnawntîr a. Ramsa mak tak takte pawh a hrilh bawk a ni. (Job. 38:1, 2; 39:9, 13, 19, 27; 40:15; 41:1, 2) Joba tichaka thlamuan tûrin mi rinawm ṭhalai Elihua chu a hmang bawk. Ani chuan Joba hnênah Jehova’n amah betute chu an chhelna avângin mal a sâwm ṭhîn tih a hriat chiantîr a ni. Chu bâkah, Jehova chuan Elihua chu Joba hnêna hmangaihna nei taka zilhna pe tûrin a chêttîr bawk. Elihua chuan lei leh vân Siamtu nêna khaikhin chuan eng tham mah kan nih lohzia hriatnawntîrin, Joba chu mahni chauh inngaihtuah tawh lo tûrin a ṭanpui a ni. (Job. 37:14) Jehova chuan Joba chu tih tûr a pe bawk a; thil sual titu a ṭhian pathumte tâna ṭawngṭaisak tûrin a hrilh a ni. (Job. 42:8-10) A nih leh, tûn laiah fiahna khirh takte kan tawh hian Jehova’n engtin nge min ṭanpui?

11. Fiahnate kan tawh hian Bible-in eng thlamuannate nge min pêk?

¹¹ Jehova chuan Joba angin tlang takin min be lo mah se, a Thu, Bible hmangin min bia a. (Rom 15:4) Nakin hun atâna beiseina min pein min thlamuan a ni. Fiahna kan hmachhawn huna min thlamuan theitu Bible-a thu ṭhenkhat hi han ngaihtuah teh. Jehova chuan a Thu, Bible-ah eng mahin—fiahna khirh takte pawh tiamin—“[a] hmangaihna ata chu mi ṭhen thei lo vang,” tih min tiam a. (Rom 8:38, 39) Ṭawngṭaia amah “kotu zawng zawngte chu a hnaih ṭhîn,” tih min hrilh bawk. (Sâm 145:18) Ani chuan amah kan rinchhan phawt chuan, eng ang fiahna pawh chhel takin kan tuar chhuak thei tih leh hrehawm kan tawrh lai pawhin hlimna kan nei thei tih min hrilh a ni. (1 Kor. 10:13; Jak. 1:2, 3, 12) Pathian Thu chuan fiahna kan tawhte chu chatuan daih malsâwmna min pêk tûr nêna khaikhin chuan rei lo tê, mit khap kâr ang lek a nih thu min hriatnawntîr a. (2 Kor. 4:16-18) Jehova chuan fiahna kan tawh zawng zawngte thlentîrtu—Diabol-Setana leh a thiltih dân suaksual tak entawntute—chu a ti boral vek ang tih beiseina chiang tak min pe a ni. (Sâm 37:10) Nakina fiahna lo thleng tûrte chhel taka tuar chhuak thei tûra ṭanpui theitu che Bible châng ṭhenkhat i by-heart tawh em?

12. Jehova chuan a Thu kan hlâwkpui pumhlûm theih nân eng ti tûrin nge min beisei?

¹² Jehova chuan Bible zir ziah nân leh kan thu chhiarte ngun taka ngaihtuah nâna hun insiam tûrin min beisei a. Kan thu zirte kan nunpui hian, kan rinna a nghet lehzualin, kan Pa vâna mi kan hnaih lehzual a. Chu chuan fiahnate chhel taka tuar chhuak thei tûrin min tichak a ni. Ani chuan a Thu rinchhantute chu a thlarau thianghlim a pe bawk. Chu thlarau chuan fiahnate chhel taka tuar chhuak thei tûrin ‘thiltihtheihna nasa tak’ min pe thei a ni.—2 Kor. 4:7-10.

13. Engtin nge “bawih rinawm, fing tak” buatsaih thlarau lam chawte chuan fiahnate chhel taka tuar chhuak tûra min ṭanpui?

¹³ Jehova ṭanpuinain, “bawih rinawm, fing tak” chuan rinna nghet tak nei tûr leh thlarau lama harhvâng taka kan awm reng theih nâna min ṭanpui theitu thuziak te, video te, leh rimawi tam takte a buatsaih a. (Mt. 24:45) A hun taka min pêk chûng thlarau lam chawte chu a ṭangkai thei ang bera kan hman a ngai a ni. Tûn hnai mai khân United States-a awm unaunu pakhat chuan thlarau lam chaw kan dawn zawng zawngte avânga a lâwmzia a sawi chhuak a. Ani chuan: “Kum 40 chhûng Jehova rawng ka lo bâwl tawhnaahte khân vawi eng emaw zât ka rinawmna fiah a ni,” tiin a sawi. Chûng a fiahna tawhte chu—zu rui chunga motor khalh pa pakhatin a pu a su hlum a, a nu leh pate’n natna khirh tak veiin an boralsan a, amah ngei pawhin ṭum hnih lai cancer natna a vei a ni. Engin nge tuar chhuak thei tûra ṭanpui? Unaunu chuan: “Jehova’n eng lai pawhin min ngaihsak reng a. Bawih rinawm, fing tak hmanga min pêk thlarau lam chawte hian tuar chhuak thei tûrin min ṭanpui a ni. Chûngte avâng chuan, ‘Ka thih thlengin ka dikna [“ka rinawmna,” NWT] ka dah bo lo vang,’ tia sawitu Joba rilru put hmang ang chu ka nei ve a ni,” tiin a sawi a ni.—Job. 27:5.

14. Engtin nge Jehova’n fiahna kan tawh huna min ṭanpui tûrin kan Kristian unaute chu a hman? (1 Thessalonika 4:9)

¹⁴ Jehova chuan a mite chu hun harsa kârah inhmangaih tawn tûr leh inthlamuan tawn tûrin a zirtîr a. (2 Kor. 1:3, 4; 1 Thessalonika 4:9 chhiar rawh.) Elihua entawnin, kan unaute chuan harsatnate kan hmachhawn hunah rinawm reng thei tûra min ṭanpui chu an duh hle a ni. (Tirh. 14:22) Entîr nân, Unaunu Diane-i chu a pasalin natna khirh tak a vei hnua a lawina kohhranin thlarau lama chak reng tûra an ṭanpui dân leh an fuih dân hi han ngaihtuah teh. Ani chuan: “Hun harsa tak a ni. Mahse, harsatna kan tawh chhûng zawngin Jehova hmangaihna bân chak takin min kai ni hian kan hria a. Kan kohhran chuan nasa takin min ṭanpui a. Unaute chuan min rawn tlawhin, phone-in min rawn be ṭhîn a, hmangaihna nei takin min kuah ṭhîn bawk, chûngte chuan tuar chhuak thei tûrin min ṭanpui a ni. Motor ka khalh thiam loh avângin, unaute chuan inkhâwma ka tel theih nân leh ka theih hun apianga rawngbâwlnaa ka tel theih nân min rawn hruai ṭhîn bawk a ni,” tiin a sawi. Hmangaihna nei tak thlarau lam chhûngkuaa kan tel thei hi malsâwmna a va ni tak êm!

HMANGAIHNA NEI TAKA JEHOVA MIN NGAIHSAKNA AVANGIN LAWM RAWH

15. Engvângin nge fiahnate kan tuar chhuak theih tih kan rin tlat?

¹⁵ Kan zavai hian fiahna eng emaw chu kan hmachhawn ṭheuh vang. Mahse, kan hriat tâk ang khân, fiahna chu mahni chauhva kan hmachhawn a ngai lo. Hmangaihna nei tak pa angin, Jehova chuan eng lai pawhin min thlîr reng a. Ani chuan min hnaih rengin, ṭanpui kan dîlnate chu ngaihthlâk a inpeih reng a, min ṭanpui a châk hle bawk a ni. (Is. 43:2) Fiahna tuar chhuak thei tûra kan mamawh engkim phal taka min pêk avângin, fiahnate chu kan hneh thei tih kan ring tlat a. Ani chuan ṭawngṭai theihna te, Bible te, leh thlarau lam chaw hnianghnâr tak min pêk bâkah, kan mamawh huna min ṭanpui tûrin hmangaihna nei tak unaute min pe bawk a ni.

16. Engtin nge Jehova ngaihsakna kan dawn reng theih?

¹⁶ Min en rengtu kan Pa vâna mi kan nei chu kan va lâwm tak êm! “Amahah chuan kan thinlung hi a hlim . . . a ni.” (Sâm 33:21) Hmangaihna nei taka min ngaihsaknate avânga Jehova chunga kan lâwmzia chu min ṭanpui nâna a thil min pêk zawng zawngte ṭha taka hman ṭangkaina hmangin kan lantîr thei a. A ngaihsakna dawn reng kan duh chuan, keimahni lama tih tûrte a awm bawk. Thu danga sawi chuan, Jehova thu awih tûr leh a mithmuha thil dik ti tûra theih tâwp kan chhuah zawm zêl chuan, kumkhuain min en reng, a nih loh leh min ngaihsak reng ang!—1 Pet. 3:12.