Halloween Lo Inṭan Dân Chu Eng Nge Ni?
Bible chhânna
Mi tam takin kum tin October 31 apianga an hman ṭhin Halloween kût nî chu Bible-ah hian târ lan a ni lo va. Halloween kût nî lo inṭan dân leh a hman dânte chu Bible zirtîrnate nên a inkalh a ni.
He thuziakah hian
Milem bia sakhua aṭanga lo chhuak Halloween chu a pawimawh em?
Engvângin nge Halloween tia koh a nih? tih thute hi kan hmu ang.
Halloween chanchin leh a hman dânte
Samhain kût nî: Halloween chu “kum 2,000 chuang kal taa Celtic mite hman ṭhin hmân lai milem biate kût nî” aṭanga inṭan anga sawi theih a ni. “Celtic mite chuan chutih hun lai chuan mitthite chu mi nungte zînga chêng thei niin an ring a. Samhain kût nî hman chhûngin, mi nung damte chuan mitthite chu an va tlawh thei a ni,” tiin The World Book Encyclopedia chuan a sawi.—“Engvângin Nge Halloween Tia Koh A Nih?” tih chu en rawh.
Halloween thuam, thilthlum, bumna, a nih loh leh intihṭheihna: Lehkhabu pakhat sawi dân chuan, Celtic mi ṭhenkhat chu thlaraute’n “an zînga mi emaw tia ngaia” an kalsan theih nân anmahni angin an inthuam ṭhîn a. Mi dangte chuan chûng thlaraute chu an tihlâwm theih nân thilthlumte an hlân ṭhîn.a
Kum 1,500 hma lam khân, Europe rama Catholic sakhaw hruaitute chuan an chhehvêla milem betute thil chîn dânte chu zîrin, an kohhran mi leh sate chu thawmhnaw maksak tak tak hâktîrin in tinah thilpêk an khawntîr ṭhîn a ni.
Ramhuai te, thisen zûk hmang te, dawithiam te, leh tulûm (zombie) te: Chûngte chu hmân lai aṭang tawhin ramhuaite nêna inzawmna nei a ni a. Halloween Trivia tih lehkhabu chuan chutiang mite chu “thlarau thil siam ṭihbaiawm takte,” tia sawiin, an chungchângah “mitthi tawhte, a nih loh leh hnuk chat mai tûrte hlauhna nêna inzawmna thûk tak nei” an nih thu a sawi.
Halloween-a hman mai: Kum 1,500 hma lamah khân, Britain rama mite chu “in tinah kalin, in neitute hnênah thi tawh an chhûngte tâna an ṭawngṭaisak theih nân ei tûrte an dîl ṭhîn a,” chutianga an kalnaah “anṭam bulbâwk lian tak kher kuak chhûnga mawmbati chhit chu an keng a, chu mawmbati chuan sual kan faina hremhmun tênau (purgatory)-a tâng thlarau a entîr a ni.” (Halloween—From Pagan Ritual to Party Night) Mi ṭhenkhat erawh chuan chûng mamawbati chhit emaw, lalṭîn emaw chu thlarau sualte hnawh bo nâna hman a nih thu an sawi. Kum 1800 chhûng khân, North America ramah chuan mai a tam êm avâng leh kher kuak a awlsam bawk avângin, anṭam bulbâwk aiah an hmang ta zâwk a ni.
Milem bia sakhua aṭanga inṭan Halloween chungchâng hriat chian chu a pawimawh em?
Pawimawh e. Mi ṭhenkhatin Halloween chu intihhlimna pawi lo angin ngai mah se, chumi nêna inkûngkaih thiltihte chu Bible zirtîrnate nên chiang takin a inkalh tlat a. Halloween chu mitthite leh hmuh theih loh thlarau thil siamte emaw, ramhuaite emaw chungchâng thurin dik lo taka innghat a ni.
Halloween nêna inkûngkaih thurinte chungchânga Pathian thlîr dân târ langtu hêng Bible chângte hi lo chhinchhiah ang che:
“Ramhuai zâwl rawih te, dawithiam te, mitthi biak chîng mi te in zîngah an awm tûr a ni lo.”—Deuteronomy 18:10-12.
A awmzia: Pathian chuan mitthi biakpawh tumna, a nih loh leh mitthite bepawh thei nia inlantîr ringawt pawh a duh lo.
“Mitthi erawh chuan eng mah an hre lo.”—Thuhriltu 9:5.
A awmzia: Mitthite chuan eng mah an hriat loh avângin mi nung damte nên an inbe thei lo.
“Ramhuai nêna inkûngkaihna in neih ka duh lo . . . Lalpa no leh ramhuai no in in kawp thei lo vang.”—1 Korinth 10:20, 21, C.L. Re-edited.
A awmzia: Pathian duhsakna dawng duhte chuan ramhuaite nêna inzawmna nei eng pawh chu an hnâwl tûr a ni.
“Diabola ngamthlêmnate chu [do rawh u] . . . Kan buante hi . . . thlarau sualho awmte an ni.”—Ephesi 6:11, 12.
A awmzia: Kristiante chuan thlarau sualte chu an do tûr a ni a, anni chu a der pawhin an chawimawi tûr a ni lo.
a Halloween: An American Holiday, an American History, tih lehkhabu phêk 4-na en rawh.