Bible-in Daniela Chungchâng Eng Nge A Sawi?

Bible chhânna

Daniela chu B.C.E. kum zabi parukna leh pasarihna chhûnga Juda zâwlnei hming thang tak a ni a. Pathianin ani chu mumang hrilhfiah theihna a pe a, nakin huna thilthleng tûrte inlârnaah a hmuhtîr a, ama hming chawi Bible bu ziak tûrin thlarauvin a thâwk khum bawk a ni.—Daniela 1:17; 2:19.

Daniela chu tu nge ni?

Daniela chu Judai lalram, Jerusalem khawpui leh Juda te biak in awmnaah a seilian a. B.C.E. 617-ah Babulon lal, Nebukadnezzara chuan Jerusalem a la a, “chu mi rama mi chakte” chu Babulon salah a hruai a ni. (2 Lalte 24:15; Daniela 1:1) Chutih hun laia tleirâwl ni mai thei Daniela pawh an ruala hruai a ni ve bawk.

Daniela leh tleirâwl dangte chu lal in vêngtute’n Babulon lal inah an hruai.

Daniela leh tleirâwl ṭhenkhatte (Sadraka, Mesaka, leh Abednegoa te pawh telin) chu Babulon lal inah sawrkâr hna thawk tûra a bîk taka zirtîrna dawng tûra hruai an ni a. An rinna phatsan tûra nêksâwrna tâwk mah se, Daniela leh a ṭhian pathumte chu an Pathian, Jehova lakah an rinawm reng a ni. (Daniela 1:3-8) Kum thum zirtîrna an dawn hnuah, Lal Nebukadnezzara chuan an finna leh an thiamnate avânga fakin, “ram pum puia dâwivaihthiam leh aikaihthiam zawng zawngte ai chuan a lêt sâwmin an ṭha zâwk” tiin ngaih dân a siam a. Daniela leh a ṭhiante chu lal rorêlna ina rawngbâwl tûrin a ruat ta a ni.—Daniela 1:18-20.

Kum sawmbi engemaw zât a liam hnu, kum 90 chho bâwr vêl a nih laiin, Daniela chu lal ina rawngbâwl tûra sâwm a ni a. Chutih laia Babulona rorêltu lal Belsazzara chuan banga mak tak maia kutziak lo lang chu hrilhfiah tûrin a ti a ni. Pathian kaihhruainain Daniela chuan Babulon chu Medo-Persia Lalram lakah a tlâwm dâwn tih a puang a. Babulon chu chumi zân vêk chuan lâk a ni ta a ni.—Daniela 5:1, 13-31.

Tûnah chuan, Medo-Persia rorêlna hnuaiah Daniela chu hotu ni tûra ruat a ni a, Lal Daria chuan ani chu kaisântîr a rilrûk bawk. (Daniela 6:1-3) Amah thîktu hotute chuan Daniela chu sakeibaknei pûka paiha tihhlum tumin an phiarru a, mahse Jehova’n a chhanchhuak a ni. (Daniela 6:4-23) A nun tâwp lamah Daniela hnênah vântirhkoh pakhat a rawn inlâr a, ṭum hnih lai “mi duhawm tak” a nih thu a hrilh a ni.—Daniela 10:11, 19.

Hêng thilthlengte nung taka târ lanna ṭhen hnih nei Bible lemchan Daniela—Dam Chhûnga Rinna Lantîrtu tih chu en rawh.

Thilthleng chanchinin Daniela bu chungchâng eng nge a târ lan?

Daniela sawi: Nebukadnezzara chuan milim lian tak a din a, a khua leh tuite chu, chumi be tûr chuan thu a pe a, a thuâwih lote chu rawhtuina meipuiah an paih lût a ni.—Daniela 3:1-6.

Thilthleng chanchinin a târ lan chu: Encyclopædia Britannica sawi dânin Nebukadnezzara chuan Babulon-ah “ama ropuina atân chauh ni lo, pathiante chawimawi nân” in ropui tak a sa a. “Ani chuan ‘mite’n pathian ropui takte an biakna tûrin’ tiin a sawi a ni.”

Rawhtuina meipuia intihhlumna chungchâng hi hmân lai Babulon chanchinah vawi tam tak a lang a, chûng zîngah chuan rorêltuin hâl tûra ro a rêlsakte pawh a tel a ni. Nebukadnezzara rorêl laia hmân lai thuziak pakhat chuan Babulon pathiante zah lotua puh hotute hremna chungchâng a sawi a. Heti hian a târ lang a ni: “Meipuiah . . . tiboral rawh u, hâl rawh u, rawh rawh u, . . . mei kha tisa lehzual ula, hâl ral vek rawh u,” atiin.

Daniela ziak: Lal Nebukadnezzara chuan a khawpui din chu a chapopui hle.—Daniela 4:29, 30.

Babulona leirawhchan laih chhuahah Nebukadnezzara hming a chuang

Thilthleng chanchinin a târ lan chu: “Nebukadnezzara’n a chungchâng a ziah thute chuan ani chu dikna leh thiltihtheihna nei lal ropui tak nia a inngaih thu min hrilh a ni.”b Entîr nân, in pakhat banga thu inziakah chuan Nebukadnezzara chapozia tihian a lang a ni: “Alkatra leh leirawhchanin tlâng ang maia nghet, tihchêt rual loh kulh bang nghet tak ka sa a . . . Mite’n ka rorêlna an hriatrengna tûrin Esagila leh Babulon kulhte chu ka tinghet a ni,”ctiin. Babulona leirawhchan laih chhuah tam takahte chuan Nebukadnezzara hming a chuang bawk.

Daniela ziak: Lal Belsazzara chuan Daniela chu Babulon “rama rorêltu pathumte zînga pakhat” ni tûrin a sâwm a ni.—Daniela 5:1, 13-16.

B.C.E. 550-a mi, he hlum mûm sâwl hian Lal Nabonidu-a leh a fapa Belsazzara te chungchâng a târ lang

Thilthleng chanchinin a târ lan chu: Daniela bung 5-a chhinchhiah thilte thlen laia lal chu Nabonidu-a a ni a. Mahse, Nabonidu-a chuan a lal hun chhûng tam tak chu Babulon-ah ni lovin, Arabia-ah a hmang a ni. A nih leh, a awm loh chhûngin tuin nge Babulon-ah rorêl? Hmânlai chanchin ziaktu Raymond Philip Dougherty-a’n a lehkhabu Nabonidus and Belshazzar tihah, “hluma thuziak chuan Nabonidu-a’n a lalna chu a fapa upa ber, Belsazzara hnênah a kawltîr ṭhîn tih a târ lang,” tiin a hrilhfiah a ni. “Belsazzara chuan lalber a pa awm loh chhûngin lal aiawhin ro a rêl ṭhîn a ni.” Nabonidu-a leh Belsazzara-te’n lalrama dinhmun sâng ber leh a dawttu an luah tawh avângin, Belsazzara’n Daniela chu dinhmun pathumna luah tûrin a sâwm a ni.

a Journal of Biblical Literature, Volume 128, Number 2, phêk 279, 284.

b Babylon—City of Wonders, by Irving Finkel and Michael Seymour, phêk 17.

c Archæology and the Bible, by George Barton, phêk 479.