Mi Dangte Zirtîrna Pêk A Ngaihzia I Hria Em?

1, 2. Engvângin nge mi dangte chu theocratic chanvote chelh tûra kan zirtîr ang?

ISUA chu Lalram chanchin hrilin a thawkrim hle a. A zirtîrte zirtîr nân hun tam tak a hmang bawk. Anni chu zirtîr dân leh Pathian mite enkawl dân a hmuhtîr a. Zirtîrte chuan berâmte ngaihsak ṭhîn berâm vêngtu nih chu an zir a ni. (Matthaia 10:5-7) Philipa chu thu hrilin buai hle mah se, a fanute pawh chutianga hril ve tûrin a zirtîr a. (Tirhkohte 21:8, 9) Tûn laiah, keini pawhin mi dangte kan zirtîr ve a ngai a ni. Engvângin nge?

² Khawvêl pum huapa kohhranahte chuan, baptisma la chang lo mi thar tam tak an awm a. Chûng mi tharte chuan zirtîrna an mamawh a ni. Anni chu mahnia Bible chhiar leh zir a ṭhat chhante hre thiam tûrin kan ṭanpui tûr a ni a. Chu bâkah, chanchin ṭha hril a, mite zirtîr tûrin kan zirtîr an ngai bawk. Baptisma channa la rei lo unaupate chu, kohhranho rawngbâwltu leh kohhran upa nia rawngbâwl thei tûrin zirtîr an ngai a. Kohhrana mi zawng zawng chuan mi tharte chu nasa takin an ṭanpui thei a ni.—Thufingte 4:2.

MI THARTE CHU BIBLE ZIR DAN ZIRTIR RAWH

3, 4. (a) Engtin nge Paula chuan Bible zirna chu rawngbâwlna hlawhtlinna nên a thlunzawm? (b) Kan Bible zirpuite chu mahnia Bible zirna nei tûra kan fuih hmain, eng nge kan tih ang?

³ Jehova chhiahhlawh zawng zawngte chuan Pathian duhzâwngte hre tûrin Bible an chhiar a, an zir a ngai a. Tirhkoh Paula chuan Kolossa khuaa a unaute hnênah: ‘A duhzâwng hriat famkimnaa in lo khah theih nân, . . . keini pawhin ṭawngṭai leh dîlsak che u kan bâng lo,’ tiin a hrilh a ni. Engvângin nge Bible chhiar leh zir chu an tân thil pawimawh tak a nih? Finna leh ‘kawng tinrênga a mah tilungawi tûr leh Lalpa an zui tlat’ theih dân hre thiam tûra a ṭanpui vâng a ni a. Chu chuan, anni chu Jehova’n ti tûra a duh ‘hnathawh tinrêng’ thawk tûrin a ṭanpui ang a, a bîk takin chanchin ṭha hrilhnaah a ni lehzual a ni. (Kolossa 1:9, 10-12) Chuvângin, tuemaw Bible kan zirpui hunah, Bible chhiar ziahna leh zir ziahnain Jehova rawngbâwl tûrin a ṭanpui thei tih hre thiam tûra kan ṭanpui a ngai a ni.

⁴ Mahnia Bible zirna kan neih loh chuan, kan Bible zirpuite chu mi mala Bible zir hlutna hre thiam tûrin kan ṭanpui thei lo vang. Bible kan chhiar ziah a, kan chhût ngun chuan, kan nunah leh rawngbâwlnaah min ṭanpui ang. Entîr nân, tuemawin kan rawngbâwlnaa zawhna harsa tak min zawh hunah, Bible hmangin kan chhâng thei a. Isua, Paula, leh mi dangte’n beidawng lova rawng an bâwl dân chungchâng kan chhiar hian, chu chuan min tiphûrin, harsatna kârah pawh rawngbâwl zawm zêl thei tûrin min ṭanpui a ni. Chu bâkah, kan zirna aṭanga kan thu hriatte leh chu miin min ṭanpui dânte mi dangte kan hrilh hian, anni chu keimahni ang bawka hlâwkna nasa tak nei tûra Bible zir tûrin kan fuih thei a ni.

5. Hunbi neia mahnia Bible zirna nei tûra mi thar ṭanpui dân rawtna pe rawh.

⁵ Heti hian i inzâwt mai thei a, ‘Engtin nge ka zirpui chu Bible zir ziah tûra ka zirtîr theih?’ tiin. In zirlai thu leh hla chhuaha thute chu i inbuatsaihpui thei a. Bible Zirtîrna Dik Tak Chu Eng Nge Ni? tih lehkhabu-a thubelhnaa thute leh chuta Bible chângte chu chhiar tûrin i hrilh thei a ni. A dawtah, chhânna a pêk theih nân inkhâwm atâna inbuatsaih dân chu i hmuhtîr thei a. Vênnainsâng chhuak apiang chhiar tûrin fuih bawk ang che. Entîr nân, Watchtower Library, a nih loh leh Watchtower ONLINE LIBRARY hmangin Bible zawhnate chhânna zawn hmuh dân i hmuhtîr thei bawk a ni. Chûng mi mala inzirna kawng hrang hrangte a hman chhin chuan, nuam a tiin, hriat belh zêl a duh ngei ang.

6. (a) Engtin nge i Bible zirpui chu thinlung taka Bible duhna nei tûra i ṭanpui theih? (b) Bible zirpui chuan thinlung taka Bible duhna a nei zawm zêl a nih chuan, eng tih nge a duh mai theih?

⁶ Mi tuemaw Bible kan zirpui hian, chu chuan Jehova hre chiang lehzual tûra a ṭanpui avângin Bible chu a hlu tih hriattîr kan duh a. Bible zir tûra nawrluih aiin, Bible zir dân chu kan hmuhtîr thei a ni. Bible a zir tam poh leh: “Pathian hnaih hi a ṭha a ni: Lalpa PATHIAN chu ka inhumhimnaah ka hmang a,” tia fakna hla satu angin a inngai lehzual ang a. (Sâm 73:28) Jehova thlarau chuan amah hnaih duhtu chu a ṭanpui ngei ang.

MI THARTE CHU THU HRIL TUR LEH ZIRTIR TURIN ZIRTIR RAWH

7. Engtin nge Isua chuan chanchin ṭha puang chhuaktute chu a zirtîr? (A thupui chunga milem en rawh.)

⁷ Isua’n a tirhkohte a zirtîr dân aṭangin thil tam tak kan zir thei a. Mite a zirtîr dân hmuhtîr tûrin anni chu a thu hrilhnaah a hruai a. An thu hrilh dân tûr chungchângah kaihhruaina chiang tak a pe bawk. (Matthaia, bung 10)^[1] (Endnote en rawh.) Rei lote chhûngin, tirhkohte chuan mite thutak zirtîr dân chu Isua hnên aṭangin an zir a. (Matthaia 11:1) Mi tharte chu rawngbâwlnaa an tel huna kan zirtîr theih thil pahnih i lo en ang u.

8, 9. (a) Engtin nge Isua’n a rawngbâwlnaah mite a biak? (b) Engtin nge thuchhuahtu tharte chu Isua tih anga mite tîtîpui tûra kan ṭanpui theih?

⁸ Mite chu tîtîpui rawh. Isua chuan mite chu a huhovin a be reng lo va. Nêlawm takin a mi malin a be ṭhîn a ni. Entîr nân, Sukar khaw bula tuichhun chhuaha tui chawi hmeichhia chu tîtîna ngaihvenawm tak a neihpui a. (Johana 4:5-30) Isua chuan chhiah khawntu Levia mi Matthaia chu biain, a zirtîr ni tûrin a sâwm bawk. Chu sâwmna chu pawmin, Matthaia chuan a hnuah Isua leh mi dangte chu a ina chaw ei tûrin a sâwm a. Chutah chuan, Isua chuan mi tam tak a bia a ni.—Matthaia 9:9; Luka 5:27-39.

⁹ Nathanaela chuan Nazaret mite chungchâng a ṭha lozâwngin sawi mah se, Isua’n ani chu nêlawm takin a bia a. Chutianga nêlawm taka a biak avângin, Nathanaela chuan Nazaret aṭanga lo kal Isua chungchânga a ngaih dân chu a thlâk ta a ni. Tichuan, Isua hnên aṭang thil tam tak hriat a duh a. (Johana 1:46-51) Isua entawn tûr siam aṭangin, nêlawm tak leh ngilnei taka mite kan biak hian, kan thusawi ngaihthlâk an duh lehzual ang tih kan hre thei a ni.^[2] [Endnote en rawh.] Chutianga thusawi tûra mi tharte kan zirtîr chuan, rawngbâwlnaa tel nuam an ti lehzual ang.

10-12. (a) Engtin nge Isua chuan mi dangte’n chanchin ṭha an ngaihvenna chu a chhawmnunsak? (b) Engtin nge thuchhuahtu tharte chu Bible thutak zirtîrtu nia an thiamna tihmasâwn tûra kan ṭanpui theih?

¹⁰ Ngaithla duhtute chu zirtîr rawh. Isua chu a buai hle a. Mahse, mite’n a thusawi ngaihthlâk an duh chuan, anni chu hun hmanpuiin, thil tam tak a zirtîr a ni. Entîr nân, ni khat chu a thusawi ngaithla tûrin mipui tam tak vaukamah an kal khâwm a. Chuvângin, Isua chu Petera nên lawngah chuangin, mite a zirtîr ta a ni. Chu mi hnu chuan, Petera pawh zirtîr a duh a. Petera chu sangha tam tak mantîrin Isua’n thil mak a ti a ni. Tichuan, Petera hnênah: “Tûn hnuah zawng mihring i man tawh ang,” a ti a. Petera leh a hnêna awmte chuan, “an lawngte chu vaukamah an hruai kai a, engkim kalsanin amah chu an zui ta,” nghâl a ni.—Luka 5:1-11.

¹¹ Nikodema pawhin Isua hnên aṭanga tam lehzuala hriat a duh a. Mahse, Sanhedrin zînga mi a nih avângin, mi dangte’n Isua a be lai an hmuha an sawi dân tûr a hlauvin, zânah Isua hnênah a kal a. Isua’n ani chu hnar lovin, hun a hmanpui zâwk a, atâna thudik pawimawh takte a hrilhfiah a ni. (Johana 3:1, 2) Isua chuan, mite thutak zirtîr nân leh an rinna tihngheh nân hun hman a inhuam reng a. Chutiang bawkin, mite remchân huna tlawh kan inhuam a ngai a, Bible hre thiam tûra ṭanpui nân hun kan pêk a ngai bawk.

¹² Mi tharte chu rawngbâwlnaa kan thawhpui hian, tlawhkîr leh thei tûr âwmte chu tlawhkîr leh tûrin kan zirtîr thei a. Tlawhkîrnaah leh Bible zirtîrnaa min zui tûrin kan sâwm thei bawk. Chutiang chuan, mi dangte zirtîr dân an hria ang a, Jehova chungchâng thutak mite zirtîr tûra ṭanpui ṭhatzia pawh an hria ang. Tichuan, mite tlawhkîr leh Bible zirpui chu an phûr ang a. Mite chu ina an hmuh theih loh hunah pawh dawhtheihna nei tûr leh beidawng mai lo tûrin an zir bawk ang.—Galatia 5:22; “A Beidawng Lo,” tih bâwm chu en rawh.

MI THARTE CHU AN UNAUTE RAWNGBAWLSAK TURIN ZIRTIR RAWH

13, 14. (a) Mi dangte tâna nasa taka inpe, Bible-a entawn tûr siamte engtin nge i ngaih? (b) Eng kawngin nge thuchhuahtu tharte leh ṭhalaite chu an unaute chunga hmangaihna lantîr tûra i zirtîr theih?

¹³ Jehova chuan a chhiahhlawhte chu unau anga inhmangaih tawn tûr leh rawng inbâwlsak tawn tûrin a duh a. (Luka 22:24-27; 1 Petera 1:22 chhiar rawh.) Isua chuan a nunna pawh tiamin, mi dangte ṭanpui nân thil engkim a pe tih Bible-in a sawi a. (Matthaia 20:28) Dorki chuan “thil tih ṭhat leh thilpêk a ngah hle a.” (Tirhkohte 9:36, 39) Mari chu Rom khuaa a unaupate leh unaunute tân a ‘thawk rim’ hle bawk. (Rom 16:6) Engtin nge mi tharte chu an unaute tâna thil ṭha tih a pawimawhzia hre thiam tûra kan ṭanpui theih?

¹⁴ Mi tharte chu kum upate leh dam lote kan tlawh huna min zui tûrin kan sâwm thei a. Nu leh pate’n chutiang mite an tlawh hunah, a rem chuan an fate an hruai thei a ni. Kohhran upate chuan, kum upate chu ei tûr an pêk a ngai emaw, an inte an siamṭhatsak a ngai emaw a nih chuan ṭhalaite leh mi tharte chu an ruala tel ve tûrin an sâwm thei a. Ṭhalaite leh mi tharte chuan unaupate leh unaunute inngaihsak tawn dân an hmuh chuan, chûng chu an zir ve thei ang. Entîr nân, kohhran upa pakhat chuan thing tlânga thu a hrilh hian, chuta awm unaute chu an dinhmunte hre tûrin a tlawh ziah a. Amah zui ṭhîntu ṭhalai unaupa pakhat chuan, he upa entawn tûr siam aṭangin a unaute ṭanpui nâna a tih theihte ngaihtuah dân a zir a ni.—Rom 12:10.

15. Engvângin nge upate’n kohhrana unaupate hmasâwn dân an ngaihsak chu a pawimawh?

¹⁵ Jehova chuan unaupate chu kohhrana Pathian Thu zirtîr tûrin mawhphurhna a pe a. Chuvângin, an tân chuan kohhrana thu an sawi huna ṭha taka an zirtîr theih dân tûr hriat chu a pawimawh hle. Upa i nih chuan, kohhran rawngbâwltu pakhatin thusawi a inzir hunah hmasâwn tûra ṭanpui tûrin i ngaihthlâksak thei a ni. (Nehemia 8:8)^[3]—Endnote en rawh.

16, 17. (a) Paula chuan Timothea hmasâwn dân chu engtin nge a ngaihsak? (b) Engtin nge upate chuan kohhrana berâm vêngtu ni thei tûrte chu hlawhtling taka an zirtîr theih?

¹⁶ Kohhrana berâm vêngtu ni tûrin unaupa tam tak chuan zirtîrna an mamawh a. Paula chuan Timothea chu a zirtîr a, mi dangte zirtîr chhâwng leh tûrin a fuih a ni. Ani chuan: “Krista Isuaa khawngaihna awmah hian thiltihtheihna neiin awm ang che. Tin, hretu tam takte zînga ka kaa thu i hriatte kha, chûng chu mi rinawm, mi dangte zirtîr chhâwng thei tûr angte hnênah chuan kawltîr rawh,” tiin a sawi a. (2 Timothea 2:1, 2) Upa leh tirkoh ni kawp Paula hnên aṭangin Timothea chuan a thu hrilhna tihhmasâwn dân leh kohhrana mi dangte ṭanpui dân ang chi thil tam tak a zir a ni.—2 Timothea 3:10-12.

¹⁷ Paula chuan Timothea chu ṭha taka zirtîr a duh avângin hun tam tak a hmanpui a. (Tirhkohte 16:1-5) Upate chuan an berâm ṭhenkhat an tlawh hunah kohhranho rawngbâwltu tling takte chu hruaiin, Paula an entawn thei a ni. Chutiang chuan, kohhranho rawngbâwltute chuan upate’n mi dangte an zirtîr dân te, an dawhtheih dân te, an hmangaih dân te, leh a berâmte enkawl huna Jehova an rinchhan dânte an zir thei ang.—1 Petera 5:2.

ZIRTIRNA CHU PAWIMAWH TAK A NI

18. Engvângin nge Jehova rawngbâwlnaa mi dangte zirtîr chu kan tân pawimawh tak a nih?

¹⁸ He tâwpna hunah hian, mi thar tam tak chuan thu hrilhnaa an thiamna tihmasâwn thei tûrin zirtîr an mamawh a. Unaupate chuan kohhran enkawl dân an zir a ngai bawk. Jehova chuan a chhiahhlawh zawng zawngte chu ṭha taka zirtîr a duh a, tichuan, mi tharte ṭanpui tûrin chanvo hlu tak min pe a ni. Chuvângin, Isua leh Paula tih ang bawkin, mi dangte zirtîr tûra theih tâwp kan chhuah a pawimawh hle. Tâwpna a lo thlen hma hian, thu hrilh rawngbâwlnaah thawh tûr tam tak a la awm avângin a tam thei ang bera kan zirtîr a ngai a ni.

19. Jehova rawngbâwlnaa mi dangte zirtîr tûra taihmâk i chhuah chuan i hlawhtling ngei ang tih engvângin nge i rin tlat theih?

¹⁹ Mi tharte zirtîr tûr chuan hun leh tha pêk a ngai a. Mahse, Jehova leh Isua chuan a ṭha thei ang bera mi dangte zirtîr dân hre tûrin min ṭanpui ang tih kan chiang thei a ni. Kan zirpuite chu kohhranah emaw, thu hrilh rawngbâwlnaah emaw ‘thawk rimin, an bei hrâm hrâm’ tih kan hmuh hian kan hlim hle ngei ang. (1 Timothea 4:10) Chutih rual chuan, thlarau lama hmasâwn tûr te, kan Kristian mizia tihmasâwn tûr te, leh Jehova hnaih tûrtein theih tâwp kan chhuah reng tûr a ni. (ws16.08-E)