Thlarau Lama Hmasâwn Ngai Niin I Inhria Em?
“Chhiar te, thu hrilh te, zirtîr te bei uar rawh.”—1 TIMOTHEA 4:13.
1, 2. (a) Engtin nge he tâwpna hunah hian Isaia 60:22-a thute hi a thlen famkim? (b) Tûn laia Jehova inawpna pâwl lei lam pêngah eng mamawhna nge awm?
“IN zînga hnam tê ber pawh hnam ropui tak an ni ang a, hnam tlêmte pawh hnam chak tak an ni ang.” (Isaia 60:22) Hêng thute hi he tâwpna hunah hian a thleng famkim tawh a. Dik takin, kum 2015 chhûng khân, khawvêl puma Lalram chanchin ṭha puangtu Jehova chhiahhlawh mi 82,20,105 an awm a! Pathianin a mite pun chhohna chungchâng chu: “Kei LALPA hian a hun hunah chuan ka thlentîr thuai ang,” tiin a sawi a. Chuvângin, hun a liam zêl rualin, kan zavai tân hnathawh tûr a tam tawlh tawlh dâwn a ni. Tûn laiah, chanchin ṭha hrilhnaah leh zirtîrnaah theih tâwp kan chhuah em? Unau tam tak chuan regular pioneer emaw, auxilliary pioneer emaw an thawk a. Ṭhenkhat chu thu hrilh rawngbâwlnaa ṭanpui tûrin hmun dangah an insawn a, mi dangte chu Kingdom Hall sain an thawk rim hle bawk a ni.
2 Kum tin hian, kohhran 2,000 vêl din thar a ni a. Chûng kohhrante chuan upate leh kohhranho rawngbâwltute an mamawh a ni. Kum tin hian, kohhranho rawngbâwltu a sâng têl chu upa an nih a ngai a, unaupa a sâng têlte chu kohhranho rawngbâwltu an nih a ngai bawk. Unaupate chauh ni lovin, unaunute tân pawh “Lalpa hna ṭhahnemngai taka” thawh tûr tam tak a awm tih a chiang hle.—1 Korinth 15:58.
THLARAU LAMA HMASAWN TURIN ENG NGE NGAI?
3, 4. Thlarau lama hmasâwnna chuan i tân eng awmzia nge a neih?
3 1 Timothea 3:1 chhiar rawh. Tirhkoh Paula chuan kohhran upaa “ṭan duh” unaupate chu a fak a. Tuemaw chuan a bulhnaia mi ni lo thil engemaw a la duh a nih chuan theih tâwp chhuaha ṭan lain, a ban hram hrâm pawh a ngai mai thei a ni. Kohhranho rawngbâwltu nih duh unaupa pakhat chu han mitthla teh. Ani chuan, a Kristian miziate tihhmasâwn nân theih tâwp a chhuah a ngai tih a hria a. Tichuan, kohhranho rawngbâwltu nia rawng a bâwl hnu chuan, upa ni tûra a tlin theih nân a thawkrim zawm zêl a ni.
4 Unaupa leh unaunu ṭhenkhat chuan tam lehzuala Jehova rawngbâwl an duh avângin, an nun an siamrem a. Entîr nân, pioneer thawh te, Bethel-a rawngbâwl te, a nih loh leh Kingdom Hall saknaa ṭanpuite an duh thei a. Bible-in hmasâwn zêl tûra kan vaia min ṭanpui theih dân i lo en ang u.
THLARAU LAMAH HMA SAWN ZEL RAWH
5. Ṭhalaite chuan Lalram rawngbâwlnaah engtin nge an chakna an hman?
5 Ṭhalaite chu an chak a, an hrisêl ṭhat avângin Jehova rawngbâwlnaah thawh theih tam tak an nei a. (Thufingte 20:29 chhiar rawh.) Ṭhalai unaupa ṭhenkhat chu Bethel-ah rawngbâwlin lehkhabute leh Bible-te siamnaah an ṭanpui a ni. Ṭhalai unaupa leh unaunu tam tak chuan Kingdom Hall sakna, a nih loh leh thawm ṭhatnaah an ṭanpui a. Mi ṭhenkhat chu leilung chhiatnate a thlen hian ṭanpui tûrin, tlâwmngaiin an inpe a ni. Pioneer ṭhalai tam tak chu ṭawng dang zirin, chanchin ṭha hril tûrin hmun dangah an zin chhuak bawk.
6-8. (a) Engtin nge ṭhalai pakhat chuan Pathian rawngbâwlna a thlîr dân chu a thlâk a, chu chuan eng nge a rah chhuah? (b) Engtin nge ‘LALPA ṭhatzia chu kan tem chhin’ theih?
6 Jehova kan hmangaihin, kan thil neih ṭhat ber pêk kan duh a. Chuti chung pawhin, unau Aaron-a angin kan ngaihtuah mai thei a ni. Ani chuan hlim taka Pathian rawngbâwl duh mah se, a hlim lo va. A naupan lai aṭangin inkhâwmnaah leh thlawhhma rawngbâwlnaah tel ṭhîn mah se, “inkhâwm leh thlawhhma rawngbâwlnaa tel hi ninawm ka ti,” tiin a sawi a. Eng nge a tih tâk?
7 Aaron-a chuan Bible chhiar ziah tûrin ṭan a la a, inkhâwmna atân inbuatsaihin, inkhâwmnaah chhânnate a pe a. Tûn hma aiin a ṭawngṭai nasa lehzual bawk. Chûng zawng zawngte chuan thlarau lama hmasâwn tûrin a ṭanpui a ni. Jehova a hre chiang lehzualin, a hmangaihna pawh a nasa lehzual ṭan ta a. Chu chuan, a tihlim ta hle a ni. Pioneer a thawk a, leilung chhiatna a thlen hian mi dangte a ṭanpui a, thu hril tûrin ram dangah a kal bawk. Tûnah chuan, upa niin Bethel-ah rawng a bâwl a ni. Engtin nge a nun kawng chu a ngaih? Ani chuan: “‘Jehova ṭhatzia chu ka tem chhin a.’ A malsâwmna avângin, a chungah bat nei niin ka inhria a, tam lehzuala a rawngbâwl tûra min chêttîrin, chu chuan malsâwmna min thlen nasa lehzual a ni,” tiin a sawi.
8 Fakna hla phuahtu chuan: “Aw, LALPA ṭhatzia chu tem chhin teh rêng u,” tiin a sawi a. “LALPA zawngtute erawh chuan thil ṭha rêng rêng an tlachham lo vang,” tiin a sawi belh bawk. (Sâm 34:8-10 chhiar rawh.) Jehova chu kan neih ṭhat ber kan pêk hian, chu chuan a tilâwm tih kan hriat avângin kan hlim tak zet a. Ani chuan min enkawl tûra a thutiam chu a hlen ngei ang.
BEIDAWNG SUH
9, 10. Engvângin nge i tân ‘nghah’ chu a pawimawh?
9 Jehova rawngbâwlnaah tam lehzuala thawh kan duh mai thei a. Mahse, kohhrana chanvo engemaw chelh tûr leh kan dinhmun thlâk danglam tûrin hun rei tak kan nghâk tawh a nih chuan engtin nge ni ang? Dawhtheihna kan neih a ngai thei a. (Mika 7:7) Jehova chuan, chutiang dinhmuna kan awm zawm zêl chu a remti a nih pawhin, min ṭanpui reng ang tih kan chiang thei a ni. Abrahama entawn tûr siam aṭangin kan inzir thei a. Jehova chuan Abrahama chu fapa a nei ang tih a tiam a; mahse, a fapa Isaaka pian hma chu kum tam tak a nghah a ngai a ni. Chu mi hun chhûng chuan Abrahama chu a dawhthei hle a, Jehova a rinna chu a hloh ngai lo.—Genesis 15:3, 4; 21:5; Hebrai 6:12-15.
10 Nghah hi thil awlsam a ni lo tih chu a dik ngei mai. (Thufingte 13:12) Mahse, kan dinhmun leh kan lunghnualnate kan ngaihtuah reng chuan kan beidawng hle thei a. Chuvângin, kan nghah hun chhûng chu kohhran mawhphurhna ṭhenkhatte chelh thei tûra kan mamawh miziate tihhmasâwn nân kan hmang thei a ni.
11. Engtin nge thlarau lam miziate kan tihhmasâwn theih a, engvângin nge chûng chu thil pawimawh tak a nih?
11 I mamawh miziate leh theihnate chu tihmasâwn rawh. Bible chhiar a, chhût ngunna hmangin, finna te, chiang taka chhûta ngaihtuah te, leh thu tlûkna ṭha siamte i zir thei a. Dik takin, kohhran enkawl tûr chuan unaupate’n chûng miziate leh theihnate chu an mamawh a ni. (Thufingte 1:1-4; Tita 1:7-9) Bible kan zir hian, thil tam tak chungchânga Jehova ngaihtuah dân kan hre thei a. Nî tin hian, Jehova tilâwm tûrzâwnga thu tlûkna siam tûrin kan zirte chu kan nunpui thei a ni. Entîr nân, mi dangte cheibâwl dân te, sum leh pai hman dân te, leh intihhlimna leh thawmhnaw hâk tûr thlan dânte chu kan hre thiam thei a ni.
Bible kan chhiarte chhût ngunna hmangin, finna leh thu tlûkna ṭha siam kan zir thei
12. Engtin nge kohhrana mite chuan rintlâk an nihzia an târ lan theih?
12 I chanvo dawn apiangah theih tâwp chhuah rawh. Pathian mite’n biak in an sak ṭhat khân, Nehemia chuan mawhphurhna chi hrang hrang latu tûr mipa a mamawh a. Ani chuan hming ṭhatna neite a thlang a ni. Chûng mipate chuan Pathian an hmangaihin, thawh tûr an dawn engpawh chu theih tâwp chhuahin an thawk ang tih a hria a. (Nehemia 7:2; 13:12, 13) Chutiang bawkin tûn laiah pawh, mi rinawm leh mi taima nia hming ṭhate chu mawhphurhna tam lehzual pêk an ni thei a ni. (1 Korinth 4:2) Chuvângin, unaupa kan ni emaw, unaunu kan ni emaw thawh tûr min pêk apiang chu a ṭha thei ang berin kan thawk ṭhîn tûr a ni.—1 Timothea 5:25 chhiar rawh.
13. Mi dangte’n dik lo taka an cheibâwl che chuan, engtin nge Josefa entawn tûr siam chu i zui theih?
13 Jehova rinchhan rawh. Mi dangte’n dik lo takin an cheibâwl che chuan eng nge i tih theih? I ngaih dân chu an hnênah i hrilh thei a. Mahse, dik nia i inngaih a, thiam chan i tum tlat chuan buaina chu i tizual thei a ni. Josefa entawn tûr siam aṭang hian thil tam tak kan zir thei a. A unaute chuan ṭha lo takin an cheibâwl a. Mite chuan a chungchângah dâwt an sawi a, a tih loh thil tia puhin tân inah an khung hial a ni. Mahse, Josefa chuan Jehova a rinchhan a. Jehova thutiamte chu ngaihtuahin, a rinawm tlat a ni. (Sâm 105:19) Chûng dinhmun harsa tak kârah chuan mize ṭha tam tak a nei chho va, chu chuan a hnua hna pawimawh tak a dawn chu thawk thei tûrin a ṭanpui a ni. (Genesis 41:37-44; 45:4-8) Mi dangte’n dik lo taka an cheibâwl che chuan Jehova hnênah finna dîl rawh. Ani chuan thlamuang taka awm tûr leh anni chu ngilnei taka be tûrin a ṭanpui ang che.—1 Petera 5:10 chhiar rawh.
RAWNGBAWLNAAH HMA SAWN RAWH
14, 15. (a) Engvângin nge kan thu hrilh dânah kan “fîmkhur” ang? (b) Engtin nge dinhmun thlâk danglam tûra i insiamrem theih? (A thupui chunga milem leh “Tih Dân Dang I Hmang Chhin Duh Em?” tih bâwm chu en rawh.)
14 Paula chuan Timothea chu Pathian Lehkha Thu hrilhfiah dân kawnga hmasâwn zawm zêl tûrin a hrilh a. Ani chuan: “Nangmah leh i zirtîrnaah chuan fîmkhur la,” tiin a hrilh a ni. (1 Timothea 4:13, 16) Timothea chuan kum tam tak chhûng thu a hril tawh a. Chuti a nih chuan, engvânga hmasâwn ngai nge a nih? Ani chuan mite leh an dinhmunte chu a inthlâk danglam tih a hria a. Mite chu a thusawi ngaithla tura a duh avângin, hma a sâwn zawm zêl a, a zirtîr dân kawng a thlâk danglam a ngai a ni. Tûn laia kan thu hrilhnaah pawh chutiang bawka kan tih chu a ngai a ni.
15 Hmun ṭhenkhatah chuan, in tina thu kan hrilh hian mi tam tak chu inah an awm lo tih kan hmu a. Hmun dangah chuan, mite chu inah an awm pawh a ni thei; mahse, an chênna apartment chhûnga kan luh theih loh avângin anni chu kan be pawh thei lo a ni. In rawngbâwlna bialah pawh chutiang a nih chuan, mite hmuh theih dân kawng dang i zawng thei ang em?
16. Engtin nge vântlâng hmuna thu hrilhna chu hlawhtling tak a nih theih?
16 Unaunu leh unaupa tam tak chu vântlâng hmuna thu hrilhnaah an tel a. Entîr nân, mite an biak pawh theih nân rêl chawlh hmunah te, bus chawlh hmunah te, bazârah te, leh vântlâng lênvahna park-ahte an kal a ni. Thuhretu pakhat chuan tuemaw chu chanchin thar hrilhin a tîtîpui ṭan thei a. A nih loh leh, a fate ṭhatna engemaw a sawi theiin, a hna chungchângte a zâwt thei bawk. Tîtîpui theih tûr âwma a lan chuan, thuchhuahtu chuan Bible aṭangin a sawipui thei a, a ngaih dânte pawh a zâwt thei bawk. Mite chuan Bible chungchâng hriat belh an duh fo ṭhîn.
17, 18. (a) Engtin nge vântlâng hmuna thu hrilhnaah inrin tâwkna i neih lehzual theih? (b) Rawngbawlnaa i tel laiin Jehova faktu Davida rilru put hmang chu engvângin nge hlu i tih?
17 I mi hriat ngai lohte nêna kalkawnga han tîtî nghal mai chu harsa i ti mai thei a. New York Khawpuia pioneer thawk Eddie-a chuan, chutiang chu a tawng a ni. Mahse, inrin tâwkna nei lehzual tûra amah ṭanpuitu engemaw a hmu chhuak a. Ani chuan: “Chhûngkuaa Pathian biakna kan neih hian, mite hnialna chhâng thei tûr leh an ngaih dân sawichhuahte chhâng thei tûrin ka nupui nên zir bingna kan nei a. Thuhretu dangte hnênah pawh thurâwn kan la bawk,” tiin a sawi. Tûnah, Eddie-a chuan vântlâng hmuna thu hrilhna chu a nghâkhlel tawh hle.
18 Kan rawngbâwlna nuam kan tih a, mite hnêna chanchin ṭha hrilh dân kawnga hma kan sâwn hian, mi dangte’n kan thlarau lam hmasâwnna chu an hmu ngei ang. (1 Timothea 4:15 chhiar rawh.) Tuemaw chu Jehova chhiahhlawh ni tûrin kan ṭanpui pawh a ni thei. Davida chuan: “Englai pawhin LALPA chu ka fak ang a: amah fakna chu ka kâah a chhuak fo vang. Ka nunna hian LALPA chu a chhuang ang a: thuhnuairawlhte chuan chu chu an hria ang a, an lâwm ang,” tiin a sawi a ni.—Sâm 34:1, 2.
THLARAU LAMA HMASAWNNA HMANGIN JEHOVA FAK ZEL RAWH
19. Engvângin nge Jehova chhiahhlawh rinawm tak chu dinhmun khirh tak kârah pawh a hlim theih?
19 Davida chuan: “Aw LALPA, i thilsiam zawng zawng chuan i hnênah lâwm thu an hril ang a; mi thianghlimte pawhin an fak ang che. I ram ropuizia thu sawiin, i thiltihtheihna thu chu tîtîah an la hmang ang; mihring fate hnênah a thiltih ropui takte leh, a ram mawina ropuizia hriattîr tûrin,” tiin a ziak bawk a. (Sâm 145:10-12) Jehova hmangaih a, a chunga rinawmtu zawng zawngte chuan mi dangte hnênah a chanchin hrilh duhna nasa tak an nei a. Mahse, dam lohna emaw, kum upatna emaw avânga, in tin kalnaah i duh angin i tel thei tawh lo a nih chuan engtin nge ni ang? I bul hnaia awm nurse-te leh doctor-te hnêna Jehova chungchâng i sawi apiang hian amah i fak tih hre reng ang che. I rinna avânga lung ina tântîr i nih chuan, mi dangte hnênah Jehova chungchâng i hrilh thei a, chu chuan a thinlung a tilâwm a ni. (Thufingte 27:11) I chhûngte’n Pathian rawng an bâwl lo chung pawha, a rawng i bâwl a nih chuan ani chu a hlim hle bawk. (1 Petera 3:1-4) Dinhmun harsa takah pawh Jehova i fak theiin, i hnaih reng thei a, thlarau lamah pawh hma i sâwn thei a ni.
20, 21. Jehova inawpna pâwla hna tam lehzual pêk i nih chuan, engtin nge mi dangte tân malsâwmna i nih theih?
20 Jehova chu i hnaih reng a, a rawngbâwlnaa theih tâwp i chhuah chuan mal a sâwm ngei ang che. I hun duan emaw, i nun dân emaw thlâk danglamna ṭhenkhat i neih chuan Pathian thutiam duhawm tak chungchâng hre tûra mite ṭanpui nân hun remchâng tam lehzual i nei ang a. I unaute i ṭanpui tam lehzual thei bawk ang. Kohhrana i thawhrimna an hmuh hian i unaute’n an hmangaih dân tûr che chu han ngaihtuah teh!
21 Eng anga rei pawh Jehova rawng lo bâwl tawh mah ila, kan vai hian amah kan hnaih zêl theiin, thlarau lamah hma kan sâwn zêl thei a. A dawta thuziakah chuan chutianga hmasâwn tûra mi dangte kan ṭanpui theih dân kan sawiho vang. (ws16.08-E)