Kristian Inneihna Tihhlawhtlinna

1. Inneihna chu hlimnaa ṭan ni ṭhîn mah se, inneite chuan engte nge tawn an inbeisei theih? (A thupui chunga milem en rawh.)

MOPA chuan an inneih nîa monu hmêl ṭha tak a han hmuh chuan, an pahnih chuan an hlim dûn hle a. An inngaihzâwn lai chuan an inhmangaih tawlh tawlh a, tichuan, inneih an duh ta a, rinawm tawn tûrin an intiam ta a ni. An inneih nî a liam a, an khawsak dun chuan inpumkhat tlat tûrin an inthlâk danglam a ngai ngei ang. Inneihna Dintu Jehova chuan nupate chu nun hlim tak leh hlawhtling tak nei tûra a duh avângin a Thu, Bible hmangin thurâwn fing takte a pe a. (Thufingte 18:22) Chuti chung pawhin, mihring ṭha famkim lo inneite chuan buainate an neiin, “tisaah chuan hrehawm an tuar ang,” tih Bible chuan min hrilh bawk a ni. (1 Korinth 7:28) Engtin nge nupate chuan chûng harsatnate chu an tihnêp theih? Engtin nge Kristiante chuan inneihna hlawhtling an neih theih?

2. Eng ang hmangaihna nge nupate chuan an lantîr ang?

² Bible chuan hmangaihna hi mize pawimawh tak niin a zirtîr a. Mahse, nupate’n an nunah an lantîr tûr hmangaihna chi hrang hrang a awm a. Entîr nân, anni chuan nula tlangvâl inhmangaihna mai bâkah, hmangaih taka inlainatna an lantîr a ngai a. Fate an nei a nih chuan, chhûngkaw inkârah hmangaihna chu a pawimawh lehzual a ni. Mahse, inneihna hlawhtling tak siamtu chu thu bul-a innghat hmangaihna hi a ni a. Tirhkoh Paula chuan chutiang hmangaihna chu heti hian a sawi: “Tupawhin mahni a inhmangaih angin mahni nupui hmangaih ṭheuh sela, nupui pawhin a pasal hlau thiam rawh se,” tiin.—Ephesi 5:33.

NUPATE MAWHPHURHNA CHU BIH CHIANG RAWH

3. Nupa inkâra hmangaihna chu eng anga nghet tûr nge a nih?

³ Paula chuan: “Pasalte u, in nupuite hmangaih rawh u, Kristan kohhranho a hmangaih a, an aia mahni a inpe ang khân,” tiin a ziak a. (Ephesi 5:25) Isua’n a zirtîrte a hmangaih angin, tûn laia Kristiante chuan inhmangaih tawnna hmangin Isua entawn tûr siam chu an entawn a ni. (Johana 13:34, 35; 15:12, 13 chhiar rawh.) Kristian nupate chu an kawppuite tân thih pawh huamin, an inhmangaih tawn hle tûr a ni a. Mahse, nupa inkâra buaina lian tham tak a awm hian, ṭhenkhat chuan an inhmangaihna chu nghet tawk lo niin an ngai mai thei. Engin nge anni chu ṭanpui thei? Thu bula innghat hmangaihna chuan, “engkim a tuar hrâm hrâm a, engkim a ring a, engkim a beisei a, engkim a tuar chhuak ṭhîn,” a ni. Chutiang hmangaihna chu “engtikah mah a reh lo vang.” (1 Korinth 13:7, 8) Nupate chuan an thutiam chu an hre reng tûr a ni. Inhmangaih tawn a, rinawm tawn tûrin an intiam si a. Chu mi hriatrengna chuan Kristian nupate chu Jehova ṭanpuina zawng tûr leh buaina engpawh chingfel dûn tûrin a chêttîr ang.

4, 5. (a) Chhûngkaw lû a nih angin, pasal mawhphurhna chu eng nge ni? (b) Engtin nge nupui chuan lû nihna chu a thlîr ang? (c) Nupa tuakkhat chuan eng insiamremna nge an neih ngai?

⁴ Paula chuan nupate mawhphurhna chu târ langin heti hian a sawi a: “Nupuite u, Lalpa hnêna in intulût ang hian mahni pasalte hnênah intulût rawh u. Krista chu . . . kohhranho lû a ni ang bawk hian, pasal chu nupui lû a ni si a,” tiin. (Ephesi 5:22, 23) Chu chuan pasal chu a nupui aiin a ṭha zâwk a tihna a ni lo. Jehova chuan: “Mihring amah chauhva awm hi a ṭha lo ve: amah ṭanpuitu tûr a kawppui âwm mi ka siamsak teh ang,” tia a sawi khân, nupuite chanvo hlutna a sawi a ni. (Genesis 2:18) Nupui chuan a pasal chu chhûngkaw lû ṭha tak ni thei tûrin a ṭanpui tûr a ni a. Chu bâkah, pasal chuan “kohhranho lû” Isua entawn tûr siam duhawm tak chu a entawn tûr a ni bawk. Chutianga pasalin a tih chuan, nupui chuan him nia inhriatna neiin, chu chuan a pasal zah leh thlâwp chu a tiawlsam ang.

⁵ Fred-a nupui Cathy-i chuan: “Pasal ka neih hma chuan, ka zalênin mahni chauh ka inngaihsak a. Inneihna chu ka tân insiamremna pakhat a ni a, ka pasal rinchhan ka zir a ni. Chu chu awlsam ṭhîn lo mah se, Pathian duhzâwng mila thil kan tih avângin kan nupain kan inhnaih lehzual a ni,” tiin a sawi.^[1] (Endnote en rawh.) Fred-a chuan: “Thu tlûkna siam chu kan tân a awlsam ṭhîn lo va. Inneihnaah hian mi pahnih tâna ngaihtuahna chuan harsatna a tizual a ni. Mahse, ṭawngṭaia Jehova kaihhruaina zawnna leh ka nupui thurâwn ka ngaihthlâksakna chuan nî tin thu tlûkna siam a tiawlsam a. Kan lungrual ta hle niin ka hria,” tiin a sawi bawk.

6. Nupa inkâra buaina a awm hian engtin nge hmangaihna chu “phuar famkimna” a nih?

⁶ Nupate chuan ‘indawh tawn a, inngaidam tawnin’ an inneihna an tinghet thei a. An ṭhat famkim loh avângin, thil an tisual thei ve ve a ni. Chutiang thil a thlen chuan, an thil tihsualte aṭangin ngaihdamna leh Bible thu bula innghat hmangaihna lantîr chu an zir thei a. Chu hmangaihna chu “phuar famkimna a ni.” (Kolossa 3:13, 14) Nupate chuan dawhtheihna leh ngilneihna nei a, ‘sual lam ngaihtuah lohna’ hmangin chu hmangaihna chu an lantîr thei a. (1 Korinth 13:4, 5) Inlungrual lohna a lo awm chuan, ni tlâk hmain, a rang thei ang bera chinfel an tum tûr a ni. (Ephesi 4:26, 27) “I rilru ka tina a, pawi ka tingawt mai,” tia sawi tûr chuan inngaihtlâwmna leh huaisenna neih a ngai a, chu chuan nupate chu buaina chingfel tûr leh inhnaih lehzual tûrin a ṭanpui thei a ni.

LAINATNA A ṬUL LEHZUAL

7, 8. (a) Inneihnaa nupa nun hman chungchângah Bible-in eng thurâwn nge a pêk? (b) Engvângin nge nupate chuan an kawppuite chungah lainatna an lantîr ang?

⁷ Bible chuan nupate chu mipat hmeichhiatna kawnga thlîr dân dik tak nei tûrin thurâwn ṭha tak a pe a. (1 Korinth 7:3-5 chhiar rawh.) Nupate tân kawppuite rilru veizâwng leh mamawhte hriatsak chu pawimawh tak a ni. Pasalin a nupui chu lainatna a neih loh chuan, chu chuan a nupui tân nupa nun hman a tiharsa thei a. Pasalte chuan an nupuite chu ‘hriatthiamna’ nei takin an cheibâwl tûr a ni. (1 Petera 3:7) Nupa nun hman dunna chu tihluihna, a nih loh leh phûtluihna ni lovin, dân pângngaia hman tûr a ni. Mipa chu hmeichhia aiin a châkna a chhuak hma thei ṭhîn a. Mahse, nupate chuan duhna an neih ve ve hunah chauh nupa nun an hmang dûn tûr a ni.

⁸ Bible chuan nupa inkâra inhmangaihna lantîr dân tûr leh lantîr chen tûr chungchâng chipchiar takin a sawi lo va. Mahse, chutiang inhmangaihna chungchâng chu a sawi a. (Hla Thlan 1:2; 2:6) Kristian nupate chu lainatna nei takin an incheibâwl tûr a ni.

9. Engvângin nge kawppui ni lo tuemaw îtna neih chu pawm theih a nih loh?

⁹ Pathian leh vêngte hmangaihna nasa tak kan neih chuan mi tuemaw, a nih loh leh thil engemawin kan inneihna a tihderthâwn chu kan phal lo vang. Mi ṭhenkhat chuan saruak lem leh thuziakte an en ṭhin avângin an inneihna chu an tiderthâwng, a nih loh leh an tichhe hial a. Saruak lem leh thuziakte, a nih loh leh mipat hmeichhiatna âwm lo taka hman ang chî thil dang eng pawh en châkna chu kan do tûr a ni. Kan kawppui ni lo tuemaw nêna inchhai derna anga lang thiltih eng pawh chu hmangaihna a neih loh thlâk avângin kan pumpelh tûr a ni bawk. Kan ngaihtuahna leh thiltihte chu Pathianin a hre vek tih kan hre reng tûr a ni a. Chu chuan Pathian tihlâwm kan duhna tinghet tûr leh kan kawppuite chunga rinawm reng tûrin min ṭanpui ang.—Matthaia 5:27, 28; Hebrai 4:13 chhiar rawh.

NUPA INKARA BUAINA A AWM HUNAH

10, 11. (a) In ṭhenna chu eng anga hluar nge ni? (b) Awm hranna chungchângah Bible-in eng nge a sawi? (c) Nupate chu awm hrang nghâl mai lo tûrin engin nge ṭanpui ang?

¹⁰ Buaina khirh takte chinfel loh a nih hian, nupa ṭhenkhat chuan awm hran emaw, inṭhen emaw an tum thei a. Ram ṭhenkhatah chuan, nupa tam zâwk chu an inṭhen a ni. Chûng chu Kristian kohhranah a thleng khât hle a. Mahse, nupa inkâra buaina khirh tak nei Kristian nupa an tam chho tawlh tawlh a ni.

¹¹ Bible chuan hêng kaihhruaihnate hi min pe a: “Nupui chuan a pasal ṭhen suh se; a ṭhen vêk chuanin pasal nei tawh lovin awm law law rawh se, a nih loh leh a pasal nên vêk innei leh rawh se; tin, pasal chuan a nupui ma suh se,” tiin. (1 Korinth 7:10, 11) Nupa ṭhenkhat chuan buaina an ngah êm avângin awm hran ngai niin an inhre mai thei a. Mahse, Isua chuan inneih chungchânga a tîra Pathian thiltum chu sawi nawnin: “Pathianin a zawm tawh chu mihringin ṭhen suh se,” tiin awm hran a pawizia a târ lang a ni. (Matthaia 19:3-6; Genesis 2:24) Chuvângin, Jehova chuan nupate chu chêng dûn reng tûrin a duh a. (1 Korinth 7:39) Kan thiltih mawhphurhna chu Jehova hnênah kan sawi leh dâwn tih kan hre ṭheuh tûr a ni. Chu chuan buaina chu a pawithui hmaa chingfel vat tûrin min ṭanpui thei a ni.

12. Engin nge nupate chu awm hran duhna neihtîr mai thei?

¹² Engvângin nge nupa ṭhenkhat chuan buaina khirh takte an tawh? Ṭhenkhat chu, an inneihnaah an beisei ang a nih loh hian an lunghnualin, an thinrim a. Mite seilen dân leh an ngaihtuah dânte a inan loh avângin buaina a awm ṭhîn a ni. Kawppui nu leh pate nêna inrem lohna te, sum leh pai hman dân chungchânga inlungrual lohna te, leh fate enkawlnate chuan buaina a awmtîr thei bawk. Mahse, Kristian nupa tam takin Pathian an inkaihhruaitîr avânga buainate an chingfel thei tih hriat chu a lâwmawm hle.

13. Awm hranna tûr chhan ṭha takte chu eng nge ni?

¹³ Nupate tân awm hranna tûr chhan ṭha tak a awm thei a. Mi ṭhenkhatin awm hran an thlan chhan chu, chhûngkaw enkawl duh lohna te, nasa taka tharum thawhna te, leh Kristian chu a thlarau lam nun atâna hlauthâwn awm thei dinhmun khirh taka a awm vângte a ni. Buaina khirh tak an tawh hunah, nupate chuan upate ṭanpuina an dîl tûr a ni. Anni chuan thiltawn tam tak an nei a, Pathian fuihnate nunpui tûrin nupate chu an ṭanpui thei a ni. Nupate’n Jehova thlarau thianghlim an dîl hian, chu chuan Bible thu bulte nunpui tûr leh Kristian miziate lantîr tûrin a ṭanpui thei a ni. (Galatia 5:22, 23)^[2]—Endnote en rawh.

14. Bible chuan Jehova be lotu kawppui nei Kristiante tân eng nge a sawi?

¹⁴ Kawppui tuemaw zâwk chu Jehova be lotu ni mah se, nupate tâna chên dun reng a ṭhat chhan chu Bible chuan a târ lang a. (1 Korinth 7:12-14 chhiar rawh.) Ring lotu kawppui chu, Pathian chhiahhlawh a neih avângin “tihthianghlim” a ni. An fate chu ‘thianghlima’ ngaih an ni a, Pathian vênhimna hnuaiah an awm a ni. Paula chuan Kristian nupate chu: “Aw nupui, i pasal i chhandam dâwn leh dâwn loh engtin nge i hriat ni? Aw pasal, i nupui i chhandam dâwn leh dâwn loh engtin nge i hriat ni?” tiin a fuih a. (1 Korinth 7:16) Jehova chhiahhlawh ni tûra an kawppuite ṭanpuitu, Kristian nupuite leh pasalte entawn tûr ṭha siam tam tak a awm a ni.

15, 16. (a) Bible chuan ring lotu pasal nei Kristian nupuite hnênah eng fuihnate nge a pêk? (b) ‘A ring lo zâwkin inṭhen a duh chuan,’ Kristian dinhmun chu eng nge ni ang?

¹⁵ Tirhkoh Petera chuan Kristian nupuite chu an pasalte thu hnuaia intulût tûrin a fuih a, chutiang chuan ‘an zînga tupawhin thu chu âwih lo mah sela, thu lovin an nupuite chêtziaa hnehin an awm thei ang, ṭih dêk chunga an chêtze thianghlim enin.’ Nupui chuan engtik lai pawha a rinna chungchâng sawi ai chuan, ‘rilru thuhnuairawlh leh nunnêm . . . Pathian mithmuha hlu tak’ chu lantîrin a pasal chu thutak pawm tûrin a ṭanpui thei zâwk a ni.—1 Petera 3:1-4.

¹⁶ A ring lo zâwk kawppuiin awm hran duh ta se, engtin nge ni ang? Bible chuan: “A ring lo zâwk chuan ṭhen sela, ṭhen mai rawh se, chutiangah zawng unaupa emaw, farnu emaw hrên an ni tawh lo ve; Pathian erawh chuan inrem taka awm tûrin min ko a ni,” tiin a sawi a. (1 Korinth 7:15) Awm hranna chuan inremna engemaw chu thlen thei mah se, Bible sawi angin kawppui Kristian chuan mi dang a nei thei lo a ni. Mahse, ani chuan awm dûn tûrin a kawppui chu a tilui tûr a ni lo. A hnuah, ring lotu kawppui chuan awm dûn leh tûrin kîr leh a duh mai thei a. Nakin hunah pawh, ring lotu kawppui chu Jehova chhiahhlawh a rawn ni hial thei bawk.

INNEIHNAA KAN DAH PAWIMAWH HMASAK BER TUR CHU ENG NGE NI?

17. Kristian nupate dah pawimawh hmasak ber tûr chu eng nge ni?

¹⁷ ‘Ni hnuhnûng’ tâwp lama kan awm avângin, “hun khirh takte” kan tawng a. (2 Timothea 3:1-5) Chuvângin, Jehova nêna kan inlaichînna nghet tak chu kan vênhim a ngai a ni. Paula chuan: “Tûn achinah chuan nupui neite chu nei lo anga an awm theihna tûr leh, . . . khawvêl hmangtute chu hmang lutuk lova an awm theihna tûrin hun hi tihtawiin a awm a ni,” tiin a ziak a. (1 Korinth 7:29-31) Nupate’n an kawppuite an thlahthlam tûr a ni a tihna a ni lo. Chu ai chuan, ni hnuhnûnga kan awm avângin Jehova kan biakna chu kan dah pawimawh zâwk tûr a ni.—Matthaia 6:33.

18. Engvângin nge Kristiante tân inneihna hlimawm leh hlawhtling chu neih theih a nih?

¹⁸ Hêng hun khirh takahte hian, inneihna tam tak chu a hlawhchham tih kan hmu a. A nih leh, inneihna hlimawm leh hlawhtling neih theih a ni em? Jehova leh a mite kan hnaih reng a, Bible thu bulte zâwm a, Jehova thlarau thianghlim kaihhruaina kan pawm chuan kan nei thei a ni. Chutianga kan tih chuan, “Pathianin a zawm tawh chu” kan chawimawi a ni ang.—Marka 10:9. (ws16.08-E)