Mi Dangte Thu Tlûkna Siam Chu Zah Rawh

1-2. Engvângin nge kan mi mal thu tlûkna siamte chu kan Kristian unaute thu tlûkna siamte nêna inan loh châng a awm?

I THU tlûkna siam avângin dik lo taka sawisêl i tâwk tawh ngai em? I Kristian unau tu emaw chu a thu tlûkna siam avângin i sawisêl tawh ngai em? Kan zain chûng dinhmunte chu kan tawng tawh ṭheuh ngei ang.

² Kan thu tlûkna siamte chu kan Kristian unau mi rinawmte thu tlûkna siamte nêna inan loh châng a awm hunah mak kan ti tûr a ni lo. Engvângin nge? Kan danglam ṭheuh vâng a ni. Mi tin hian mi mal thlîr dân kan nei ṭheuh va. Kan ngaihtuah dânte chu kan hnam dân te, chhûngkaw ṭobul te leh, mi mal thiltawnte’n a thunun ṭhîn a ni. Mahse, kan ngaih dân inan lohnain kohhran inpumkhatna leh lungrualna a tihderthâwn chu kan phal tûr a ni lo.—Eph. 4:3.

3. Engin nge kan Kristian unau tu emaw thu tlûkna siam chu sawisêl duhna min neihtîr mai thei?

³ Kan Kristian unau tu emawin kan ṭâwmpui loh thu tlûkna a siam hunah, a rilru thlâk tûra hmin emaw, kan hlauhthâwnpui thu mi dangte hrilh hriat emaw ṭûl niin kan ngai thei a. Rilru dik tak pua chutianga ti chu kan ni ngei ang. Kan unaute chu kan hmangaih a, an tâna ṭha ber tûr chu kan duhsak a. (Thuf. 17:17) Chuvângin, a hnua an inchhîr lehna tûr, a nih loh leh an thlarau lam tichhe thei tûr thu tlûkna an siam chu kan duhpui lo a ni.

4-5. Kan Kristian unau tu emawin kan ṭâwmpui loh thu tlûkna a siam a nih chuan eng nge kan tih ngai?

⁴ Kan unaute thu tlûkna siam kan ṭâwmpui lo a nih chuan, kan hlauhthâwnpui thu kan sawipui tûr a ni em? Chu chu dinhmun azir a ni. Entîr nân, Bible thupêk kalha thil eng emaw tih a tum nia kan hriat chuan, hmangaihna avângin, a ngaihtuahna siam ṭha tûrin ṭanpui kan tum tûr a ni. (Thuf. 27:5, 6) A nih leh, Pathian dân kalh zâwng ni lo va, kan ṭâwmpui loh zâwng thu tlûkna a siam mai a nih chuan eng nge kan tih ang? A chhânna chu kan thuziak ṭanchhan Bible chângah kan hmu thei a ni. ‘A thlîr dân chu kan sawisêl’ tûr a ni lo.—Rom 14:1.

⁵ Chuti chung pawhin, a thu tlûkna siam zahsak chu harsa kan ti mai thei a. He thuziakah hian mi dangte thu tlûkna siam kan zah a ngaih chhan leh chutianga kan tih theih dânte sawiho a ni ang. Mahse, a hmasain, kan unaute min sawisêltîr theitu mi mal thu tlûkna siam theihna dinhmun ṭhenkhat i lo ngaihtuahho vang u.

ENG ANG MI MAL THU TLUKNA SIAMTE’N NGE MI DANGTE MIN SAWISELTIR THEI?

6-7. Mi dangte thu tlûkna siam kan sawisêl duh mai theihna dinhmunte târ lang rawh.

⁶ Kan târ lan tawh angin, kan ṭobul leh thiltawnte avângin thil eng emaw chungchângah ngaih dân nghet tak kan nei thei a. Kan thlîr dân chu mi dangte’n min ṭâwmpui tûrah kan ngai thei a ni. Mahse, chutiang chu a ni reng lo. Hêng dinhmun ṭhenkhat hi han ngaihtuah teh. Dinhmun 1: Thutak a hriat hmain, unaupa pakhat chu zu ngawlvei a pa enkawlna hnuaia seilian a ni a. Unaute nêna inkawm khâwmnaah, ani chuan a Kristian unaute’n zû an in chu a hmu a. A lungnih loh avângin, an thil tih chu a dik lo tih a hrilh a ni. Dinhmun 2: Unaunu pakhat chu natna khirh tak a tawrh hnuah a rawn dam ṭha leh a. A hnuah, unaunu dang pakhatin a natna ang a nei tih a hria a. Unaunu hmasa zâwk chuan a ṭhiannu chu ṭanpui a duh avângin, ei leh in emaw, damdawi inenkawl dân chi khat emaw hmanga a lo inenkawl dân anga inenkawl ve tûrin a nawr a ni. Dinhmun 3: Unaupa pakhat chu sakhaw dik lovah a lo awm tawh ṭhîn a. A tûn hma nun chu a hua a ni. A Kristian unau pakhat chu church-a neih mitthi vuinaah a tel tih a hriat chuan a lungni lo hle.a

⁷ Hêng dinhmun dang pawh hi han ngaihtuah leh teh. Dinhmun 4: Unaupa pakhat chu mipate tân khabe hmul zuah a inâwm lo tih leh hmeichhiate tân Pathian biakna lam thil tihnaa kekawrtlâwn hâk a mawi lo tih mi tam takin ngaih dân an neih hun laia seilian a ni a. Unaupa chuan hemi chungchânga kan thlîr dân chu tûn hnaiah siam ṭhat a ni tih hre reng chungin, Kristian mipate tân khabe hmul zuah chu a inâwm lovin, unaunute tân theocratic thil tihnaa kekawrtlâwn hâk chu a inâwm loh thu mi dangte a hrilh châmchi a ni. Dinhmun 5: Kohhran upa pakhat chuan unaupa pakhatin zir belhna a neih hnuah thutak a chhuahsan tih a hria a. Tûnah, a kohhrana ṭhalai unaupa pakhat chuan zir belhna neih a tum a. Kohhran upa chuan a hlauhthâwnpui avângin ṭhalai unaupa leh a nu leh pate chu an rilru thlâk tûra hmin a tum ta a ni.

8. (a) Engin nge nu leh pa chu nu leh pa dangte sawisêl duhna neihtîr mai thei? (b) Engtin nge mi dangte sawisêl duhna rilru put hmang kan neihna chuan kohhran a nghawng theih?

⁸ Nu leh pate hmachhawn theih dinhmun hi han ngaihtuah teh. Dinhmun 6: Nu leh pa in nih angin, in fate chu “Jehova thununna leh zilhna” kawngah theih tâwp chhuahin in enkawl a. (Eph. 6:4) Mahse, Kristian nu leh pa dangte chu nangmahni anga fate thunun lutuk lo angin an lang thei a ni. Entîr nân, an fate chu zân rei tak lên chhuah te, nunrâwnna tel lo video game khelh te leh, kum naupang tê an nih aṭanga phone hmante an phalsak a. Chuvângin, in fate chuan khirh lutuk angin an ngai che u a. “Engvângin nge ka ṭhiante nu leh pa ang in nih ve theih loh?” tihtein an zâwt che u a. Chutiang dinhmunte chuan nu leh pa dangte sawisêl duhna a neihtîr thei che u a ni. Ni e, kan Kristianpuite mi mal thu tlûkna siam kan ṭâwmpui loh hian lungni lova awm leh sawisêl duhna neih chu thil pângngai tak a ni a. Entîr nân, sum an hman dân te, chawlh an lâk zin dân te leh, intihhlimna an thlan dânte chu kan ringhlel ṭan thei a ni. Mahse, kan rilru vei zâwngte chu kohhran inpumkhatna aiin kan ngai pawimawh zâwk tûr a ni lo.

9. Eng nge kan hriat reng ang? (Milem en bawk rawh.)

⁹ Kristian tu emaw thu tlûkna siam chu a Kristian unau dangte siam nêna a inan loh avângin, ani chu a dikin, mi dangte chu an dik lo tihna a ni lo. (Rom 14:5) Kristiante chu Jehova tehna chungchângah ‘rilru hmun khat pua awm’ tûra tih kan nih avâng maiin, mi mal thilahte pawh rilru hmun khat kan pu vek tûr tihna a ni hek lo. (2 Kor. 13:11) Kan mi mal thu tlûkna siamte chu hmun pakhat pana kan zin huna duh thlanna kan siam nên kan khaikhin thei a. Chu hmun thleng tûrin kawng hrang hrang kan zawh thei a. Kan duh zâwng leh kan tâna ṭha ber tûr nia kan hriat kawng chu kan thlang a ni. Chutiang bawkin, Kristiante chuan mi mal thilahte duh thlanna hrang hrang kan siam thei a; mahse, kan thiltum chu a inang a, chu chu Pathian Jehova tihlâwm a ni. Chuvângin, mi mal thu tlûkna siamah mi dangte chu kan sawisêl lo a ni.—Mt. 7:1; 1 Thes. 4:11.

ENGVANGIN NGE MI DANGTE MI MAL THU TLUKNA SIAM CHU KAN ZAH ANG?

10. Jakoba 4:12-a sawi angin, eng ti tûrin nge thuneihna kan neih lo va, engvângin nge?

¹⁰ Bible chuan mi dangte mi mal thu tlûkna siam kan zah a ngaih nachhan tam tak a sawi a. Chûng zînga ṭhenkhat chu han ngaihtuah teh. Mi mal thila mi dangte sawisêl tûrin thuneihna kan nei lo. (Jakoba 4:12 chhiar rawh.) Jehova chu Dân Petu leh Rorêltu fel tak a ni a. Amah chauhvin kan nun kaihruaitu tûr tehnate leh dânte min pe tûrin dikna a nei a ni. Chuvângin, kan Kristian unaute chuan an thu tlûkna siamah kan chungah ni lovin, Jehova chungah mawhphurhna an nei a. (Rom 14:10) Kan mi mal tehnate leh ngaih dânte ṭanchhana mi dangte thu tlûkna siam sawisêl tûrin dikna kan nei lo a ni.b

11. Kohhranah inpumkhatna awm tûrin eng nge kan tih theih? (Milem en bawk rawh.)

¹¹ Jehova’n amah betute chu inang vek tûr ni lovin, inpumkhat tûrin a beisei. Dik tak chuan, Pathianin kan inan lohna chu a lâwm a ni! Chumi finfiahna chu thil siamah kan hmu thei a. Entîr nan, thingkûng pakhata hnah zîngah inang chiah chiah pahnih a awm thei lo. Mihringte pawh hi han ngaihtuah teh. He leia mi tlûklehdingâwn riat chuang zîngah hian hmêl leh mize inang chiah mi pahnih an awm thei lo. Jehova chuan inang lo ṭheuhvin min siam a ni. Ani chuan inang khat vek tûrin min duh lo va. Mahse, kan inpumkhat erawh a duh. Chuvângin, kan inan lohnate avânga inṭhen hran aiin, kan inkâra remna awmtîr chu kan tum a. Kan ngaih dânte leh duh zâwngte aiin, kohhran inpumkhatna chu kan ngai pawimawh zâwk a ni.—Rom 14:19.

MI DANGTE NGAIH DAN ZAHSAK DAN TUR

12-13. Tu emawin “sual kawng a zawh” nia kan hria a nih chuan eng nge kan tih ang? (Galatia 6:1; “I Ṭâwmpui Loh Hunah,” tih bâwm chu en bawk rawh.)

¹² Mi dangin mi mal thila thu tlûknate an siam hunah. Heti hian inzâwt rawh, ‘Ani hian “sual kawng a zawh” mêk nge ni a, a thil tih dân hi ka tih dân nên a inang lo mai zâwk?’ tiin. Bible thupêk kalha sual kawng a zawh mêk a nih chuan, heti hian inzâwt rawh, ‘A ngaihtuah dân siam rem tûra ṭanpui thei dinhmuna awm Kristian mi puitling ka ni em? Nge ni a, kohhran upate ang chi mi dangin hrilh se ṭha zâwk ang?’ tiin. Ṭanpui tûra i tling tâwk a nih chuan, zaidam takin chhûtpui tum ang che. (Galatia 6:1 chhiar rawh.) Mahse, dinhmun tam takah chuan, thil a tih sual vâng ni lovin, i ngaih dân nêna inang lo duh thlanna dang a siam mai a ni tih i hmuh a rinawm. Chutiang a nih chuan, ringhlel lo la, a thu tlûkna siam chu a chhe zâwngin sawi hek suh. Mahnia thu tlûkna siam tûra dikna a neih chu zahsak la, sawisêl suh ang che.—Rom 14:2-4.

¹³ He tehkhin thu hi han ngaihtuah teh: I ṭhian tu emaw nên dâwra in kal hunah, ei tûr i chah ang chiah chah ve tûrin i nawr lui ang em? Nawr lui lo vang. A duh zâwng chah tûra dikna a neih chu i zahsak ngei ang. A ei tûr chah chu eng pawh ni se, a eitu tûr i nih loh avângin, ṭûl lo taka i lo buai a ngai lo a ni. Nang pawh a dinhmunah awm ta la, i duh zâwng ni lo va, a ngainat zâwng a chahsak che chu i duh bîk lo ngei ang. Chutiang bawkin, mi dangte chu kan ngaih dânte pawmtîr tum lo va, mahnia thu tlûkna siamtîrin, an chungah zahna kan lantîr thei a ni.

14. Engtin nge mi mal thu tlûkna i siam hunah inpumkhatna i awmtîr theih? (1 Korinth 8:12, 13)

¹⁴ Mi mal thila thu tlûknate i siam hunah. Mi dangte chunga lungnih lohna thlen lo tûra theih tâwp chhuahna hmangin inpumkhatna i awmtîr thei a. (1 Korinth 8:12, 13 chhiar rawh.) A châng chuan, i thu tlûkna siam tûr chu “a thiang,” a nih loh leh a sualna a awm lo tih chu i hria. Mahse, chu chuan i unau a tilung ni dâwn lo a nih chuan, i thu tlûkna chu a “ṭha kher” ang em?c (1 Kor. 10:23, 24) Chutiang dinhmunahte chuan, ti tûra dikna i neihte vawn ngheh bur aiin, mi dangte rilru awm dân tûr ngaihtuah chu a ṭha zâwk ngei ang. (Rom 15:1) Mahse, mi mal thila kan thu tlûkna siamte chu mi dangte’n min zahsak tûr a ni tih kan sawi zo chiah a ni lâwm ni? A dik a ni. An duh thlanna siam kan zahsak ang bawkin, kan duh thlanna siam pawh min zahsak tûr an ni. Mahse, Rom 12:18-a kan hmuh: “A theih phawt chuan, mi zawng zawng nên inremin awm tum hrâm hrâm rawh u,” tih Bible thurâwn hi kan hriat reng a ngai a. Chuvângin, ṭûl lo taka mi dangte lungni lova siam aiin, inrem taka awm tûrin theih tâwp kan chhuah tûr a ni.

15. Engtin nge upate chuan kohhranah inpumkhatna an awmtîr theih? (1 Korinth 4:6)

¹⁵ Upate chuan mi dangte thu tlûkna siam chu an zahsak. Mi mal thilah mahni thua dânte siam lovin leh, Bible-a ‘inziakte pêla’ kal lo vin, kohhranah inpumkhatna an awmtîr thei a ni. (1 Korinth 4:6 chhiar rawh.) Chu bâkah, kan thu leh hla chhuahtea Bible ṭanchhan thurâwnte pêlin an kal lo bawk. An Kristian unaute’n ṭanpuina an dîl hunah pawh, an mi mal thiltawnte chauh ṭanchhana thurâwn pe lo tûrin an fîmkhur a. Chu aiin, Pathian Thu an ṭanchhan zâwk a ni.—Is. 48:17, 18.

16. Engtin nge upa tu emaw chuan upate’n a huhova thu tlûkna an siam tawh chu a zah tih a lantîr theih?

¹⁶ Upa tu emaw chuan upate’n a huhova thu tlûkna an siam tawh chu a zah bawk a. Upate chuan a huhova thlarau thianghlim dîla an ṭawngṭai hnuah leh, Bible-a kaihhruainate ngaihtuahhova an zawm hnuah thu tlûkna an siam ṭhîn a. Chutianga thu tlûkna an siam tawh chuan, upa tute pawhin a huhova thu tlûkna siam tawh chu mi mal takin a ṭawmpui lo a nih pawhin, a thlâwp tûr a ni. (Eph. 5:17) Chu bâkah, upate chuan theocratic kaihhruainate chu a nihna aiin an belhchhah tûr a ni lo. Entîr nân, upa tu emaw chuan thuziaka a chung leh a hnuaia thute ngaihtuah lovin, thu hlâwm khat chauh la chhuakin, chu chu a mi mal ngaih dân ṭâwmpuitu atân a hmang tûr a ni lo.

17. Mi dangte thu tlûkna kan zah hian engtin nge kan hlâwkpui?

¹⁷ Kan hriat tawh angin, kan inang lo ṭheuh va. Mi tinte hian mi mal ngaih dân leh duh zâwng kan nei ṭheuh a ni. Mahse, chu kan inan lohna chu thil ṭha tak a ni a. Kan ṭobul leh mize hrang hrangte chuan Kohhran chu hmun nuam leh ngainatawm tak a nihtîr a ni. Chuvângin, kan inan lohnate avânga inṭhen hran aiin, remna kan awmtîr a. Mi dangte lungni lova siam lo tûrin kan fîmkhur a. Mi mal thila mi dangte thu tlûkna siam chu kan zahsak a ni. Chutianga kan tih chuan, kan ṭan lâkna chu malsâwmin a awm ang a. Kohhran inpumkhat tak leh nuam tak kan nei thei ang.—Sâm 133:1; Mt. 5:9.