Rawngbâwlnaa I ‘Zirtîr Thiamna’ Ti Hmasâwn Rawh

1. Eng thiamna nge neih kan duh ang a, engvângin nge? (2 Timothea 4:2) (Milem en bawk rawh.)

ISUA chuan a hnungzuitute hnênah: “Zirtîrahte siam ula. . . , thu ka pêk zawng zawng che u hi pawma zâwm tûrin zirtîr ang che u,” tiin a hrilh a. (Mt. 28:19, 20) He kaihhruaina hian Kristian zawng zawngte chu zirtîrtu an ni tûr a ni tih a târ lang a ni. Ni e, Jehova’n ‘thinlunga thutak pawm duhna neite’ chu a lamah a hîp a, chutiang mite zawng hmu tûra min ṭanpui tûrin vântirhkohte chuan chanvo pawimawh tak an chelh bawk. (Tirh. 13:48; Joh. 6:44; Thup. 14:6) Chutih rualin, kan chanvo kan hlen a ngai a ni. Tirhkoh Paula leh Barnaba entawn tûr siam hi han ngaihtuah teh. Ikonion khuaa inkhâwmna ina thu an hrilh khân, “thiam taka thu an sawi avângin Juda mi leh Grik mi tam tak ringtu an lo” nih thu Bible-in a sawi a. (Tirh. 14:1) Paula leh Barnaba chu mite ‘zirtîr thiam tak’ an ni tih a chiang hle. (2 Timothea 4:2 chhiar rawh.) Kristian zawng zawngte pawhin chu zirtîr thiamna chu kan neih a ngai a ni.

2. Engvângin nge Kristian ṭhenkhatin an zirtîr thiamna ti hmasâwn thei lo nia an inhriat mai theih?

² Mi ṭhenkhat chuan an zîr sân tâwk loh avâng leh pianpui thiamna an neih tâwk loh avângin an zirtîr thiamna ti hmasâwn tûra theihna nei lo niin an inngai mai thei a. Bible-a târ lan mi ṭhenkhat pawhin tling tâwk lo nia inhriatna an nei a ni. (Ex. 4:10; Jer. 1:6) Ṭhenkhat lehte chuan mi dangte anga thiltawn ṭha nei lo nia an inhriat avângin an zirtîr thiamna chungchângah an lunghnual mai thei bawk. Ni e, kan mi biakte leh kan mi tawh apiangte’n chanchin ṭha chu ṭha takin an chhâng lêt vek kher lo vang. Chu bâkah, mi dangte chhân lêt dân chu kan ṭan lâknaah a innghat reng lo bawk. Târ lan tawh angin, Jehova leh vântirhkohte chu thinlung ṭha pu mite zawng hmu tûra min ṭanpuitu ber an ni. Chutih rualin, kan thuchah kenin mite rilru a hneh theih nâna theih tâwp chhuah chu kan duh a. Chutianga ti thei tûra min ṭanpui tûrin, he thuziakah hian rawngbâwlnaa kan zirtîr thiamna tih hmasâwn theih dân kawng thum sawiho a ni ang.

I THU NGAITHLATUTE CHU NGAIHSAK RAWH

3. Engvângin nge Isua’n a thu ngaithlatute thinlung a hneh theih?

³ Bible chuan Isua’n ‘mihring thinlunga awm a hria’ tih a sawi a. (Joh. 2:25) Chumi awmzia chu Isua’n mite ngaihtuah dân leh anmahni chêttîrtu chu a hre thei tihna a ni. An mamawhte a hriatthiam avângin an thinlung a hneh thei a. Mite chu thlarau lam chaw an tlachhamin, hnam dân leh mihringte zam dân leh dûn tam tak hnehchhiahna hnuaiah an awm tih a hmu a ni. (Mt. 9:36; 23:4) Chuvângin, Tlâng Chunga a Thusawiah an hlâwkpui tûr thu tam tak zirtîrin anni chu a ṭanpui a. Mi mal taka an chunga nghawng neitu thilte a sawi avângin, mi tam tak chu Isua lama hîpin an awm a ni.

4. Engtin nge mite kan ngaihsakzia kan lantîr theih? (Milem en bawk rawh.)

⁴ Kan mi tawhte chu an lungkhamnate hriatthiampui tumin kan ngaihsakzia kan lantîr thei a. Thu hrilhnaa kan tawh mi tinte hian he Setana kalhmang chhe tawh tak sawhkhâwk chu kawng eng emawti takin an tuar ṭheuh va. Chumi hriat rengna chuan kan rawngbâwlna biala mite chungah lainatna lantîr tûrin min chêttîr thei a ni. Entîr nân, tûn hnaiah, kan rawngbâwlna biala mite lungkhamna neihtîrtu thil thleng a awm em? Nu leh pate chuan school-a an fate himna chungchângah hlauhthâwnna an nei em? Mi tam tak chu hna nei lovin an awm em? Mite’n Bible-in min pêk beiseina nei lova he “hun khirh takte” an hmachhawn huna an nun awm dân tûr chu mitthla tum ang che.—2 Tim. 3:1; Is. 65:13, 14.

5. Engtin nge Isua chu a zirtîrna kawngah Pharisaite laka a danglam? (Matthaia 11:28-30)

⁵ Isua’n a thu ngaithlatute chu a ngaihsak a, anni chuan anmahni a cheibâwl dânah chu chu an hre thei a ni. Mi nâwlpuite ngainêptu leh hmusittu Pharisaite lakah a va danglam tak êm! (Mt. 23:13; Joh. 7:49) Isua chuan mite chu ngilnei tak leh zah takin a cheibâwl a. Ani chu “thuhnuairawlh leh rilrua inngaitlâwm tak” a ni a, chu chu zirtîrtu thiam tak a nihna chhan pakhat a ni bawk. (Matthaia 11:28-30 chhiar rawh.) Keini pawh kan thu ngaithlatute chu ngilnei tak leh zah takin kan cheibâwl tûr a ni.

6. Engtin nge kan thuchah ken hnâwltute leh dodâltute chungah ngilneihna leh zahna kan lantîr theih ang?

⁶ Mi ṭhenkhat chuan kan thuchah ken chu an hnâwl emaw, an dodâl emaw hial thei a. Engtin nge kan chhân lêt ang? Isua chuan dodâlna tawrh satliah mai aia tam ti tûrin min hrilh a ni. Ani chuan, “nangmahni hawtute chungah thil ṭha ti zêl ula, ânchhia lawhtu che u chu malsâwm zêl ula, hmusittu che u chu ṭawngṭaisak zawm zêl ang che u,” tiin a sawi a. (Lk. 6:27, 28) Mite chu a ṭha zâwnga thlîr kan tum tlat a nih chuan chutianga tih chu kan tân a awlsam lehzual ngei ang. Ni e, kan thuchah ken dodâl duh hrim hrimtute chu an awm ngei mai. Mahse, mi ṭhenkhat chu chhûngkaw buaina an neih avâng leh lungkhamna eng emaw an neih avânga min chhâng lêt ṭha duh lo an ni thei a. An rilru ipik lai tak kan va tawng palh a ni thei bawk. Eng dinhmunah pawh nise, “Mi tin engtia chhân tûr nge tih in hriat theih nân, in thusawite chu chîa al, khawngaihna tel ni reng rawh se,” tih fuihna hi kan zâwm tûr a ni. (Kol. 4:6) Mite kan lainat a, an mamawhte hriatthiampui kan tum tlat a nih chuan, an chhân lêtna ṭha lo avângin lung ni lovin kan awm mai lo vang a, zirtîrtu ṭha zâwk kan ni thei ang.

PATHIAN THU RINCHHAN RAWH

7. Engtin nge Isua’n a zirtîr hunah Pathian Thu a rinchhan tih a târ lan? (Johana 7:14-16)

⁷ Isua chu ama hriatnaah a innghat lo va. Pathian Thu ṭanchhana a zirtîr avângin a thu ngaithlatute chuan awlsam taka hre thiamin, an chhinchhiah thei a ni. Isua chuan ‘dân hre mite ang ni lovin, thunei takin a zirtîr,’ tih Bible-in min hrilh a. Chuvângin, mite chuan a zirtîr dân chu “mak an ti hle.” (Mk. 1:22) Isua hun laia dân hre mite chuan an thu zirtîrte ṭanchhan atân mite ngaihsân tak sakhaw zirtîrtu dangte thusawi chu an sawi chhâwng ṭhîn a. Anni nêna inang lovin, Isua chuan thlarauva thâwk khum Pathian Thu chu zalên takin a hmang a ni. Vâna lo awm ṭhîn tawh Pathian Fapa a nih angin, a duh chuan a thu ngaithlatute ngaih sân tûr leh mak tih tûr zâwngin a finna nasa tak chu a hmang thei a. Mahse, chutiang chuan a ti lo. Chu aiin, ani chuan Pathian duh zâwng leh Pathian Thu ṭanchhanin a zirtîr zâwk a. (Johana 7:14-16 chhiar rawh.) Chutiang chuan, Isua’n a hnungzuitute tân entawn tûr ṭha tak a siam a ni.

8. Engtin nge tirhkoh Petera chuan Isua entawn tûr siam chu a zui?

⁸ Isua zirtîrte pawhin an zirtîrnaah Pathian Thu an rinchhan tlat a. Entîr nân, C.E. 33 Pentikost nîa tirhkoh Petera thusawi kha han ngaihtuah teh. Petera chu lehkha zir sâng a ni lo. Chuti chung chuan, ani chuan Isua thlen famkimtîr hrilh lâwknate chu Bible aṭanga hrilh fiahin, a thu ngaithlatute thinlung a hneh a ni. (Tirh. 2:14-37) Chu chuan eng rah ṭha nge a chhuah? “Lâwm taka a thusawi pawmtu apiangin baptisma an chang a, chumi nî chuan mi 3,000 vêl laiin an lo pung ta” a ni.—Tirh. 2:41.

9. Mite kan zirtîr hunah, engvângin nge Pathian Thu kan rinchhan tlat ang?

⁹ Kan thusawi ngaithlatute thinlung thlen tûrin Pathian Thu aia hmanraw ṭha zâwk a awm lo. (Heb. 4:12) Chuvângin, kan zirtîr hunah Bible kan hmang tûr a ni. Mahni ngaih dân ni lovin, ‘Thu chu kan hril tûr a ni a.’ (2 Tim. 4:2) Thufingte 2:6-na chuan: “LALPA chuan finna a pe ṭhîn a, a kâ aṭang chuan finna leh hriat thiamna a lo chhuak ṭhîn,” tiin a sawi. Chuvângin, Bible ṭanchhana mite kan zirtîr hian, a nihna takah chuan, Jehova chu thu kan sawitîr ang a ni. (Mal. 2:7) Bible-ah hian mihringte finna aia finna sâng zâwk a chuang tih mite hriattîr chu kan duh a. Chu bâkah, Pathian thlarau thianghlim thâwk khuma ziah niin, Siamtu kan tih lâwm theih nân leh nun hlimawm leh lungawithlâk kan neih theih nâna kan neih ngai thutak a chuang a ni.—2 Tim. 3:16, 17.

10. Engtin nge kan Bible zirpui chu Pathian Thu kan ngaihventîr theih ang?

¹⁰ Bible zirna kaihruai tûra i inbuatsaih hunah, i zirpuiin Bible zirtîrnate a ngaihven theih dân tûr kawngte zawng ang che. Milemte leh video-te chuan kan thu zirte hre thiam tûra min ṭanpui theih rualin, Bible hi kan thu zirte ṭanchhan ber a ni tih i Bible zirpui chuan a hre thiam tûr a ni. Chuvângin, Bible châng pawimawh zualte chu hriat tum la, i zirpui chu chûng Bible chângte chhût ngun tûrin ṭanpui ang che. Milemte leh video-te i entîr hunah, chuta târ lan Bible thu bul pawimawhnate a hre thiam tih chian ang che. Chutianga ti tûrin thu tam tak i sawi emaw, Bible châng tam tak i chhiar emaw a ngai lo. Chu aiin, i Bible zirpui chu a Bible châng chhiarte a awmzia hre thiam tûr leh a ṭûl a nih chuan Bible chângte chu chhiar nawntîr lehin a hriatthiam theih nân hun pe ang che. Chutiang chuan, lehkhabu emaw, milem emaw, video emaw zirpui ni lovin, Bible zirna kan kaihruai tak tak a ni ang.—1 Kor. 2:13.

11-12. (a) Engtin nge kan Bible zirpuite chungah dawhtheihna kan lantîr theih? (Tirhkohte 17:1-4) (Milem en bawk rawh.) (b) Mi ṭhenkhatin Bible chungchângah eng nge an hriat loh mai theih a, engtin nge anni chu kan ṭanpui theih?

¹¹ I Bible zirpuiin thu eng emaw hriatthiam harsa tih a neih chuan, ‘thu chu hril rawh, dawhthei tak chungin,’ tih fuihna chu hre reng ang che. Mi tinte hmasâwn dân a inang vek lo va. Zirtîrna ṭhenkhat chu kan tân hriatthiam awlsam mah se, mi ṭhenkhat tân erawh hre thiam tûra hun pêk a ngai thei a. Paula chuan Thessalonika khuaa Juda mi ṭhenkhat chu a thusawi an hriatthiam theih nân vawi tam tak Bible aṭanga a chhûtpui a ngai a ni.—Tirhkohte 17:1-4 chhiar rawh.

¹² Dawhtheihna kan lantîr theih dân kawng dang leh chu kan Bible zirpuite chu zawhnate zâwt a, an chhân theih nâna hun pêk hi a ni a. Ngun taka ngaihthlâksakin, an ngaihtuahnate chu hriatthiam tum ang che. Tichuan, chumi chungchânga Pathian ngaihtuah dân hre thiam tûra ṭanpui theitu Bible chângte chhiarin sawipui ang che. Chu bâkah, hei pawh hi chinchhiah rawh: Mi ṭhenkhat chuan Bible chungchâng an hriat ngai hauh loh avângin, a chhûng thute pawh eng mah hriat an nei lo. Bible, a bua hmuhtîr chu an ṭangkaipui ang em? Bible-ah hian thu tam tak zir tûr a awm tih hriattîr nân, Khawvêl Thar Lehlin bu tîr lama awm “Pathian Thu Hmêlhriattîrna,” tih chu i entîr thei a. Tichuan, hlimna dik tak hmu tûra Bible-in min ṭanpui theih dân a hriat theih nân zawhna 15-na hnuaia Bible châng pahnih khat chhiarsakin, Bible chhûnga thu awmte hlutzia entîrna i pe thei a ni. A tâwi zâwnga sawi chuan, i Bible zirpuite chu Pathian Thu thiltihtheihzia hre thiam tûra i ṭanpui a nih chuan, i zirtîrna chu a hlawhtling lehzual ang.

JEHOVA NGAIHVENTIR TLAT RAWH

13. Mite Bible kan zirtîr hunah tu chungchâng nge kan sawi tam ber ang a, engvângin nge?

¹³ Kan tum ber chu kan thu ngaithlatute’n Jehova an hriat a, amah an rawn hnaih theih nâna ṭanpui hi a ni a. (Jak. 4:8) Mite Bible kan zirtîr hian Bible kan hriat tamzia ngaihventîr aiin, anmahni zirtîrtu chu Jehova a ni tih leh, a ngaihtuah dân chu a pawimawh ber tih an hriatthiam kan duh a. Chuvângin, Jehova thusawite leh a ngaihtuahnate chungchâng sawi uar chu kan duh a ni.

14. Engtin nge kan Bible zirpui chu Jehova ngaihven tûra kan ṭanpui theih?

¹⁴ Bible zirna i kaihhruai hunah, i Bible zirpui chu Jehova tih lâwm duhna nei tûrin ṭanpui ang che. (Thuf. 27:11) Jehova Thuhretu pakhat rawn ni tûra thil dik ti tûr leh thil ṭha lote pumpelh tûra zirtîr mai i ni lo va. Chu aiin, ani chu Jehova ti lâwm tûra inthlâk danglamnate siam tûrin i duh zâwk a ni. Entîr nân, chîn dân ṭha lo bânsan ngai a nei a nih chuan, hêng zawhnate hi zâwt ang che: “Engvângin nge Jehova’n he chîn dân hi a huat? Engvângin nge Jehova’n i thil ngainat tak bânsan tûra a phût che? Engtin nge he a thil phût hian a hmangaihzia che a lantîr?” tiin. I Bible zirpui chu Jehova chungchâng ngaihtuah tûra i ṭanpui poh leh, Jehova chu Pa ṭha tak a nihzia a hmu thiam lehzual ang a. Chu chuan ani chu Jehova tih lâwm duhna a neihtîr dâwn a ni.

I ZIRTIR THIAMNA TI HMASAWN ZEL RAWH

15. I zirtîr thiamna ti hmasâwn tûrin eng nge i tih theih?

¹⁵ I zirtîr thiamna tih hmasâwn a ngaihna laite hmu thei tûrin Jehova hnênah ṭawngṭaiin ṭanpuina i dîl thei a. (1 Joh. 5:14) I ṭawngṭainate nêna inmilin, kohhran inkhâwmtea Jehova min zirtîrte chu tih tak zeta ngaithlain i zâwm tûr a ni. In Bible zirnaah zirtîrtu thiam takte chu i hruai thei a. A hnuah, an ngaih dânte chu zâwt ang che. In thu zirte chu hre bel hle mah la, i Bible zirpui chuan a la hre ve lo tih rilru-ah dah tlat rawh. In thu zirte chu a thlîr dân aṭanga hmuh thiam tum bawk la; tichuan, kan thuchah ken chu chanchin ṭha a ni tak meuh tih hre thiam tûrin ṭanpui ang che. Chu chuan i Bible zirpui chu Jehova nêna inṭhian ṭhatna nei tûra chêttîrin, hlimna dik tak nei tûrin a ṭanpui ang.—Sâm 1:1-3.

16. Kan zirtîr thiamna tih hmasâwn zêl chu engtin nge kan hlâwkpui ang?

¹⁶ Jehova chungchâng mi dangte zirtîr hi hlimna kan neih theih azawnga hlimna nasa berte zînga mi a ni a. He zirtîrna hna hlimawm tak hi khawvêl thar lo awm tûrah chuan tam lehzuala thawh a la ngai dâwn a. Chuvângin, kan thu ngaithlatute chu ngaihsak tlat a, Pathian Thu rinchhan tlat a, chanchin ṭha kan hrilh huna Jehova ngaihventîr tlat chu i tum zawm zêl ang u. Chutianga kan tih chuan, rawngbâwlnaa kan zirtîr thiamna chu kan ti hmasâwn thei dâwn a ni.