Lei leh Vâna Rorêltu Chungnungber Chu Rinchhan Tlat Rawh

1. Joba’n eng thil thleng râpthlâk takte nge a hmachhawn?

HMAN lai mi rinawm Joba chuan a neih zawng zawng deuhthaw, a fa te, a hrisêlna te leh, a hausaknate chu a chân a. Chu bâkah, a hming ṭhatna pawh a chân a ni. A “ṭhiante” thusawi tam takin ani chu a ti lunghnual hle bawk a. A hmangaih tak a nupui pawh a beidawn êm avângin Joba chu ‘Pathian sawichhia a, thi’ tûrin a fuih hial a ni. (Job. 2:9; 15:4, 5; 19:1-3) Chûng thil thleng râpthlâk takte chuan Pathian dik chunga Joba rinna a tih chhiat theih mai bâkah, Jehova’n amah hmangaihtu leh a rawngbâwltute chu a vênghim thei lo tih ngaih dân a neihtîr thei a ni.

2-3. Hrehawm kan tawrh hunah, eng nge kan ngaihtuah mai theih a, Joba bu aṭangin eng nge kan hriat ang?

² Keini pawh Jehova chunga kan rinna nasa taka fiahtu dinhmun khirh tak takte hmachhawn châng kan nei a. Tûn kan chênna hun hi “hmachhawn harsa êm êm hun khirh takte” a ni rêng a ni. (2 Tim. 3:1) Fiahnate a zâwna kan hmachhawn hian, tih ngaihna hre lovin, tuar chhuak thei lo tûrin kan inngai thei a. Chûng thiltawnte chuan mi ṭhenkhat chu Jehova’n a ngaihsak tak tak lo tih ngaih dân a neihtîr hial a ni.

³ Chutiang ngaih dânte i nei a nih chuan, lunghnual mai suh ang che. Joba chuan Jehova’n a chunga rinawmte chu a chhan chhuak thei tih a hria a. Keini pawh kan Pa vâna mi chungah tih chêt rual loh rinna kan nei ve thei a ni. Chutianga rinnghehna kan neih theih nân, Joba bua thu pawimawh pahnih hi i lo bih chiang ang u: Pakhatna, Jehova chauh chu Lei leh Vâna Rorêltu Chungnungber a ni tih leh, pahnihna, engkimtithei kan Pathian chuan a thiltumte thlen famkimtîr tûrin khawvêla thil thlengte a thunun theiin, a mite chu thlarau lam leh tisa lama chhiat hlenna lakah a vênghim thei tih hi.

SETANA CHU AN ZINGAH A LO TEL VE

4. Joba bua târ lan vâna inhmuh khâwmnaah tu nge tel ve?

⁴ Ni khat chu, vânah “Pathian fapate” Jehova hmaah an inlan a. Bible chuan heti hian a târ lang a ni: “Setana pawh an zîngah a lo tel ve a,” tiin. (Job. 1:6) Hei hi Bible-in Jehova dodâltu ber chu “Setana,” a nih loh leh “Dodâltu,” tia a târ lanna hmasa ber a ni. Hetih hun lai hian, Setana chu Pathian fapa rinawm a ni tawh lo va. Ani chu Jehova leh lei leh vâna Pathian chhûngkuate hmêlma a ni tawh a. Jehova’n Genesis 3:15-a chhinchhiah thute a sawi khân, Setana chu A vân lam chhûngkaw zîngah a tel tawh lo tih a târ lang a ni. Chuvângin, Setana chu “thlah” hringtu tûr “hmeichhia,” Jehova vân lam thlarau thil siamte zînga mi a ni tawh lo.

5. Vâna inhmuh khâwmnaa an thusawite zir chianna aṭangin eng nge kan hriat theih?

⁵ Jehova chuan, chu vân lam inhmuh khâwmnaa thusawite chu kan hriat a duh avângin Bible-ah a chhinchhiah a. Setana thusawite chuan ani chu rilru sual tak pû sawichhetu a nihzia a ti chiang hle. (Job. 1:9; Thu Puan 12:10 nên khaikhin rawh.) Jehova’n chûng thil thlengte Bible-a a chhinchhiahna aṭangin a thuneihna nasa tak chu dik tak leh fel takin a hmang tih min rinnghehtîr a ni. Chu bâkah, Engkimtithei a nih angin, Jehova chuan mi dangte tih theih tûr leh tih theih loh tûr chungchângah chin tâwk a siamsak tih min hriattîr bawk.

JEHOVA’N CHIN TAWK A SIAM

6. Engtin nge Jehova’n vâna inhmuh khâwmna chu a thunun tlat tih a lantîr? (Joba 1:7, 8)

⁶ Joba 1:7, 8 chhiar rawh. Jehova chuan chu inhmuh khâwmna chu a thunun tlat a. Setana hnênah: “Ka chhiahhlawh Joba hi i ngaihtuah ngai em?” tiin a zâwt a. Ni e, Setana’n mi rinawm Joba beih a tum tih chu Jehova’n a hre chiang hle a ni. Tûnah, Jehova’n Joba ṭanpui nâna a thiltihtheihna nasa tak a hman dân i lo ngaihtuahho vang u.

7. Joba 1:10, 11-a sawi angin, Setana’n Jehova rawngbâwltute chungchângah eng nge a sawi?

⁷ Joba 1:10, 11 chhiar rawh. Jehova chu lei leh vâna Chungnungber engkimtithei Pathian a ni a, a thuneihna leh thiltihtheihna chu ṭha a tih dânin a hmang a ni. (Jer. 32:17; Dan. 4:35) Mahse, Setana’n Jehova chu a thiltihtheihna dik lo taka hmang niin a puh a. Dik tak chuan, Pathianin Joba ang mihringte chu a rawngbâwl tûrin a tham tia puh ang a ni. Chu bâkah, Jehova rawngbâwltute chu mahni hmasialna avâng chauhva rawngbâwl an ni tiin a puh bawk. Engtin nge Jehova’n a chhân lêt?

8-9. Jehova’n Setana tân eng chin tâwk nge a siamsak a, engvângin nge? (Joba 1:12) (Milem en bawk rawh.)

⁸ Joba 1:12 chhiar rawh. Jehova’n Diabola chu a thusawi a dik leh dik loh finfiah theihna hun remchâng a pe a; mahse, chin tâwk a siamsak a ni. Pathianin Setana chu: “Amah tak [Joba] erawh chu khawih suh ang che!” tiin inhmuh khâwmnaa tel zawng zawngte hmaah, tlang takin thu a pe a. Setana chuan Pathian phalsak chin bâk chu eng mah tih theih a nei lo. Chu chu tûn laiah pawh a la dik reng a. Chutiang chuan, Jehova’n a thuneihna leh thiltihtheihna chu Joba vênghim tûr leh Ama hming ṭhatna humhim nân a hmang a ni.

⁹ Setana beihna hmasa ber chu a hlawhchham hulhual a. Joba chu a Pa vâna mi chungah a rinawm zawm zêl a ni. (Job. 1:22) Mahse, Dodâltu chuan Joba a beihna chu a duh tâwk mai lo.

10. Setana’n Joba a fiah chhunzawm chu engvângin nge Jehova’n a phalsak? (Joba 2:2-6)

¹⁰ Joba 2:2-6 chhiar rawh. Tûn ṭumah chuan Setana’n Joba a beihnaah ṭan a la lehzual sauh va. Joba’n a nun chhanhim nân Pathian a sawichhe ngei ang tiin a puh a ni. Chu puhna chu chingfel tûrin, Jehova’n Diabola chu mi rinawm Joba beih a phalsak ta a. Mahse, Jehova’n: “A nunna erawh chu zuah ang che!” tia sawiin chin tâwk a siamsak leh a ni. Setana chuan chu thupêk zawm mai loh chu duh thlan tûr dang a nei lo. Jehova phal chin bâk eng mah tih theih a neih loh avângin, Joba’n fiahna a tawh lai khân Chungnungbera chuan engkim a thunun tih kan hmu leh a ni.

JEHOVA’N JOBA HREHAWM TAWRHNA A TIH TAWPSAK

11. Jehova’n Joba fiahna tawhte a tih tâwpsak hnuah, ani chu engtin nge lâwmman a pêk? (Joba 42:10-13)

¹¹ Joba 42:10-13 chhiar rawh. Jehova chuan Joba’n rinawmna a vawng reng dâwn tih a chian tawh avângin, Setana beihna chu ti tâwpin, a chhiahhlawh rinawm chu a hrehawm tawrhna ata chhan chhuak tûrin hma a la a ni. Ṭum hmasa ang bawkin, Dodâltu chuan Jehova thu tlûkna dang turin eng mah tih theih a nei lo va. Setana chu Jehova ngaihhlut tak a chhiahhlawh Joba beih chhunzawm phalsak a ni tawh lo.

12. Jehova’n amah rinchhantu a chhiahhlawh ṭhenkhatte tâna a thil tihsak chungchâng entîrna pe rawh.

¹² Hun hnuhnûng chhûng hian, Jehova’n a chhiahhlawh mi tam takte ṭanpui tûrin a thiltihtheihna a hmang fo va. Entîr nân, kum 1945-a Nazi concentration camp aṭanga tih hlum ni tûra kal chhuak Jehova Thuhretu mi 230 te chu an dam khaw chhuak a ni. Chu an thiltawn rapthlâk tak chungchângah heti hian an ziak a: “Hun rei tak chhûng fiahna namên lo kan tâwk a, dam khawchhuakte chu rawhtuina meipui aṭanga chhan chhuah Hebrai mi pathumte ang mai khân, mei rim nam rêng rêng kan awm hauh lo. . . . Jehova chakna leh thiltihtheihnaa thuamin kan awm zâwk a ni,” tiin. Heti hian an ziah belh bawk: “Sakeibaknei pûka kan awm [hnu] chuan . . . chatuana Jehova rawngbâwl phalsak tih loh chu thil dang eng mah thlâkhlelh kan nei lo. Chu chu kan tân lâwmman ropui ber a ni ang,” tiin.—Daniela 3:27; 6:22 nên khaikhin rawh.

13. Fiahnate i hmachhawn hunah eng nge i rinngheh tlat theih? (Milem en bawk rawh.)

¹³ Keini pawh sakeibaknei pûka paih luh ang maiin kan nunah fiahna khirh takte kan hmachhawn thei a. (1 Pet. 5:8-10) Tih ngaihna hre lovin, kan fiahna tawhte chu tâwp thei ngai lo tûr angin kan ring thei a ni. Chutiang dinhmunah chuan, Joba thiltawn hriat rengnain min ṭanpui thei a. Jehova’n kan hrehawm tawrhte chu tûnah, a nih loh leh khawvêl tharah ti tâwp tûrin thiltihtheihna a nei tih kan ringnghet thei a ni. A hun ruat pêlin he kal hmang hi awm zawmtîr a phal ngai lo vang!

JEHOVA’N A CHHIAHHLAWH RINAWMTE A HMANGAIH

14-15. Jehova’n a chhiahhlawh rinawmte tân eng nge tihsak a duh a, engvângin nge? (Joba 14:15) ( milem en bawk rawh.)

¹⁴ Joba 14:15 chhiar rawh. Kan Pa vâna mi chu amah betu mi rinawmte chungah a rinawm tlat a. Anni chu a ngaihhlut êm avângin, an thih pawhin, nunna a pe leh dâwn a. Thihna avânga rilru natna kan tawrh zawng zawngte chu a ti dam leh ang.—Is. 65:17.

¹⁵ Joba chu Setana rorêlna khawvêlah la nung chhunzawm mah se, Jehova’n hrisêlna ṭha a pe lehin, fiahna a tawh hmaa a thil neihte aia tam zâwk malsâwmna a pe tih Bible-a chhinchhiah thu rintlâk takte aṭangin kan hria a ni. Chûng malsâwmnate chu Jehova’n nakina Joba tâna a tihsak tûr thlîr lâwkna ang mai a ni a. Jehova’n a chhiahhlawh rinawmte chu hlimna tluantling an neih a, nun nuam tak an chen a duh tih a lantîr a ni. Dik tak chuan, Jehova’n a chunga rinawm zawng zawngte chu lei paradis-a nun ṭha famkim chen theihna hun remchâng a pe ang. (Thup. 21:3, 4) Lei leh vâna Rorêltu Chungnungber a nih angin, chutianga tih chu a duh tak meuh a ni. Chumi ngaihtuahna chuan fiahnate kan tawh a ngaih hunah min va thlamuan tak êm!

16. Jehova chu Rorêltu Chungnungber a ni tih rinna tûr chhan dang eng nge kan neih?

¹⁶ Kum tam tak a liam hnu chuan, Joba chu a thi ta a. Mahse, Jehova chu thihna chungah pawh thuneitu Rorêltu Chungnungber leh Engkimtithei a ni. (Deut. 32:39) Chuvângin, ani chuan a hmangaih takte chu a hun ruatah a kai tho vang a, chu chu tu mahin an dang thei lo vang.—Rom 8:38, 39.

JEHOVA CHU RINCHHAN PUMHLUM RAWH

17. Jehova mite chunga chhiatna thlentîr tuma Setana ṭan lâknate a hlawhchham tih engin nge lantîr?

¹⁷ Bible-a Joba chanchin chuan Jehova rinchhan pumhlûm tûrin chhan ṭha tak min pe a. Jehova mite chunga chhiatna thlentîr tuma Setana ṭan lâknate a hlawhchham chu kan va lâwm tak êm! Tûn laia Jehova chhiahhlawh rinawm mi maktaduai kua vêlte chu Rorêltu Chungnungber thiltihtheihzia nemnghettute an ni a. Jehova chhiahhlawhte beihna tûr ralthuam rêng rêng a sâwt lo tih kan hmu fo a ni. (Is. 54:17) Sawrkâr thiltithei takte leh sakhaw pâwlte chuan humhimtu nei lo anga lang Pathian mite chu an ti chhe thei ngai lo vang. A chungchânga thutak kan theh darhna leh Setana chu bum hmang leh tualthattu a ni tih kan pho lanna chu eng mahin a dang thei lo. Jehova’n a chunga rinawm thi tawhte chu nunna a pêk leh dâwn avângin, thihna pawhin min dang thei ngai dâwn lo a ni.—Hos. 13:14.

18. Engvângin nge hma lam hun chu rinnghehna nêna kan hmachhawn theih?

¹⁸ Joba nuna chûng thil thleng dik takte chhût ngunna chuan hma lam hun chu rinnghehna nên kan hmachhawn thei tih kan rinna a ti nghet a. Hrehawm nasa tak chhûngin, Pathian mite chu humhimtu nei lo angin an lang ang a. Chutih rualin, Setana leh a ṭhuihhruaite chu hnehna chang tawh angin an lang ang. Mahse, Joba hun lai ang khân, Jehova chuan thuneihna pumhlûm a nei ang a, Setana chu eng chhiat hlenna mah thlentîr a phal lo vang. Mihringte chunga Setana thlentîr hrehawm tawrhna zawng zawng Jehova’n a tih tâwp hun tûr chu a lo thleng thuai ang a. Diabola leh a ramhuaite chu kum 1,000 chhûng leilâwtah khâr khum an ni ang. (Lk. 8:31; Thup. 20:1-3) A tâwpah, Setana leh a lama ṭang zawng zawngte chuan an chhiat hlenna tûr chu an hmachhawn tawh dâwn a ni. (Thup. 20:10) Jehova sawi lâwk angin, Setana lû chu rah perhsak a ni ang a. Chatuan atân tih boral a ni tawh ang.—Gen. 3:15; Rom 16:20.

19. Jehova ring pumhlûmtute chu eng lâwmmanin nge hmuak? (Milem en bawk rawh.)

¹⁹ Betu dikte chuan nakin lawka lo awm tûr khawvêl thara nun ṭha famkim leh hlimna tluantling an neih hun tûr chu nghâkhlel takin kan thlîr a. Kan nun awm dân tûr chu kan suangtuah phâk bâkin a ṭha dâwn a ni. “Ngai teh! Thil engkim ka siam thar e,” tiin Jehova’n min tiam a. (Thup. 21:5) Chu a thutiamah chuan engte nge tel? Kum sâng tam tak chhûnga a vawi khatna atân mihringte chu Setana leh a ramhuaite thununna avânga lo awm suahsualna, huatna leh chhiatna zawng zawng lakah an fihlîm tawh dâwn a ni. A va hahdamthlâk dâwn tak êm! He khawvêl hlui chhe tawh taka kan tawh lungkhamnate avânga mut theih lohte a awm tawh lo vang. Armageddon-a dam khawchhuakte chuan thil mak tam tak an hmu ang a, dam lote chu tih dam an ni tawh ang. Chu bâkah, kan hmangaih tak thi tate thawhlehna chu a inṭan tawh dâwn a ni. Chutiang chuan, kan Pa vâna mi duh dân ang chiahin nun kan hmang tawh ang!

20. Eng nge tih i tum tlat?

²⁰ Hêng hun hnuhnûng chhûnga fiahnate huaisen taka kan hmachhawn rual hian, Jehova ring pumhlûmin, a lalchungnunna chu i thlâwp tlat ang u. Kan Pa vâna mi kan hmangaihzia leh Setana chu bum hmang a nihzia i lantîr bawk ang u. Ni e, a mi rinawmte nasa taka lâwmman pêk châk êm êm kan Lalchungnungber, Jehova rorêlna hnuaia nakina nun kan hman hun tûr chu rinnghehna nên kan thlîr tlat thei a ni.