“Thutak Pawm Duhna” Neite’n An Chhâng Lêt Ang

1. Engtin nge mite chuan chanchin ṭha chu an chhân lêt mai theih? (Tirhkohte 13:47, 48; 16:14, 15)

KUM zabi khatnaa mi tam tak chuan Lalram thuchah chu an hriat veleh an pawm nghâl a. (Tirhkohte 13:47, 48; 16:14, 15 chhiar rawh.) Tûn laiah pawh, mi tam tak chuan chanchin ṭha chu hlim takin an dawngsawng a. A tîra ngaihven lote pawhin, a hnuah thutak chu an rawn pawm a ni. A nih leh, rawngbâwlnaa “thutak pawm duhna” neite kan hmuh hunah eng nge kan tih ang?

2. Eng kawngtein nge zirtîr siamna hna chu huan enkawltu hna nêna kan tehkhin theih?

² Kan zirtîr siamna hna chu huan enkawltu hna nên kan tehkhin thei a. A huana thlai pakhat a hmin chuan, a seng a ngai a. Chutih rualin, thlai dang la hmin lote pawh a enkawl chhunzawm a ngai a ni. Chutiang bawkin, kan thuchah pawmtu tu emaw kan hmuh hunah, a theih anga rangin Krista hnungzuitu ni tûra ṭanpui kan duh a. Chutih rualin, an thil hriatte hlutna hre thiam tûra ṭanpuina la mamawhte chu ṭanpui zawm zêl kan duh bawk. (Joh. 4:35, 36) An dinhmun kan hriatthiam chuan, anmahni ṭanpui dân ṭha ber kan hre thei dâwn a ni. He thuziakah hian, ngaihvenna lantîrtute kan tawh huna kan tih theihte kan ngaihtuahho vang a. Hmasâwn zêl tûra kan ṭanpui theih dân pawh kan ngaihtuahho bawk ang.

MITE’N NGAIHVENNA AN LANTIR HUNAH

3. Rawngbâwlnaa ngaihventu kan hmuh hunah eng nge kan tih ang? (1 Korinth 9:26)

³ Rawngbâwlnaa ngaihventu kan hmuh hian, nunna kawnga kal ve nghâl tûra ṭanpui chu kan duh a. Chuvângin, kan inbiak ṭan aṭangin, Bible zir tûr leh inkhâwma tel tûra sâwm chu kan hreh tûr a ni lo.—1 Korinth 9:26 chhiar rawh.

4. Bible zirna pawm nghâl mi pakhat chungchâng entîrna pe rawh.

⁴ Bible zir tûrin sâwm rawh. Mi ṭhenkhat chuan Bible zir chu an duh nghâl a. Entîr nân, Nilaithawhṭan tûk khat chu, Canada-a chêng ṭhalai hmeichhe pakhat chuan kan thu leh hla chhuah dahna nawrlirh chu rawn panin Chatuanin I Hlim Thei! tih brochure chu a la a. Chuta ding unaunu chuan chu brochure hmanga a thlâwna Bible zirna a neih theih thu a lo hrilh a. Chu ṭhalai hmeichhia chuan a ngaihven êm avângin, an inbiak pawh theihna tûr phone number a pe a ni. Chumi nî vêk chuan, Bible an zir theih hun tûr zâwtin message a thawn a. Unaunu chuan kâr tâwpa zir a rawt chuan, ani chuan: “Naktûk a rem ang em?” tiin a lo chhâng a. A tûkah zirna chu an nei ta nghâl a. An inhmuh kâr tâwp inkhâwmah pawh rawn telin hma a sâwn chak hle a ni.

5. Mite Bible zir tûra kan sâwm hunah engtin nge remhriatna kan lantîr theih? (Milem en bawk rawh.)

⁵ Dik tak chuan, kan thuchah ken ngaithlatu zawng zawngte’n chu ṭhalai hmeichhia anga an chhân lêt vek chu kan beisei thei lo va. Ṭhenkhat chuan hun an mamawh thei a ni. An ngaihven zâwng thute hmanga tîtîna kan neihpui hmasak a ngai pawh a ni thei a. Chutih rualin, an dinhmun a êng zâwnga kan thlîra, mi mal ngaihsakna kan lantîr zawm zêl a nih chuan, kâr lovah, Bible zirna kan neihpui ṭan pawh a ni thei a ni. A nih leh, Bible zir tûra kan sâwm hunah eng nge kan sawi theih? Hemi kawnga hlawhtling tawn hriat ngah unau ṭhenkhatte thurâwn hi i lo ngaihtuahho vang u.

6. Ngaihvenna lantîrtu tu emaw chu Bible zirna a hlâwkpui thei tih hmu thiam tûrin eng nge kan hrilh theih?

⁶ Thu chhuahtu leh pioneer ṭhenkhatte’n hmun ṭhenkhatah chuan, mite Bible zirpui tûra kan sâwm hunah “zir,” “Bible zirna,” a nih loh leh “zirtîr” tih ang chi ṭawngkamte chu pumpelh a ṭhat ber thu an sawi a. Chu aiin, “tîtîna,” “sawihona,” a nih loh leh “Bible hriat belh nân” tih ang chi ṭawngkamte hman chu a ṭhat zâwk thu an sawi a ni. Mite kan biak hunah, “Nuna zawhna pawimawh takte Bible-in a chhân dân hi ngaihvenawm tak a ni,” a nih loh leh, “Bible hi sakhaw lehkhabu mai ni lovin; kan nî tin khawsak phunga min ṭanpuitu a ni,” tia sawiin sawihona neih chhunzawm leh duhna nei tûrin kan ṭanpui thei a. “Hun tam tak a ngai lo; minute 10 emaw, 15 emaw chhûngin i hlâwkpui theih tûr thu zir i nei ngei ang,” tiin kan sawi belh thei bawk. Chutianga kan sawi hunah, “hun bi ruat” emaw, “chawlhkâr tin” emaw ang chi a tih ngei ngei tûr thil anga ngaihtîr theitu ṭawngkamte chu kan pumpelh thei a ni.

7. Eng hunah nge mi ṭhenkhatte’n Bible thutak an hriatte chu an pawm ṭan? (1 Korinth 14:23-25)

⁷ Inkhâwma tel tûrin sâwm rawh. Tirhkoh Paula hun laiin, mi ṭhenkhat chuan inkhâwma an tel hmasak ber ṭuma an thu hriatte chu thutak a ni tih an pawm nghâl a. (1 Korinth 14:23-25 chhiar rawh.) Tûn laiah pawh, chutiang chu a ni a. Mi a tam zâwkte chuan inkhâwma an rawn tel ṭan aṭangin hma an sâwn chak hle ṭhîn a ni. A nih leh, eng hunah nge inkhâwma tel tûra kan sâwm ṭan ang? Chatuanin I Hlim thei! tih lehkhabua zirlai 10-naah chuan chumi chungchâng chu târ lan a ni a. Mahse, chumi zirlai in thlen hun i nghah kher a ngai lo. Vântlâng thusawi thupui emaw, Vênnainsâng Zir Tûr thuziak aṭanga thu pakhat emaw târ langin, in inbiak hmasak berna aṭangin kâr tâwpa inkhâwma tel tûrin i sâwm ṭan thei a ni.

8. Mi tu emaw inkhâwma kan sâwm hunah eng nge kan hrilh theih? (Isaia 54:13)

⁸ Ngaihventu tu emaw i sâwm hunah, kan inkhâwmte chu a lo tel fo ṭhinna ni thei sakhaw dang biakna thiltihte nêna a inan loh dân hrilhfiah ang che. Ṭum khat chu, Bible zirlai pakhat chuan Vênnainsâng Zirnaa a tel hmasak ber ṭumin, a zirpuitu unaunu hnênah, “Kaihruaitu hian inkhâwma telte hming hi a hre vek em?” tiin a zâwt a. Unaunu chuan, kan chhûngte hming kan hre vek ang hian, kohhrana mite hming chu hriat kan tum ṭheuh thu a hrilh a. Chutah, zirlai chuan an church nêna a inan lohzia a sawi a ni. Chutiang bawkin, inkhâwma kan rawn kal chhante chu mi tam tak tân thil thar a ni thei a. (Isaia 54:13 chhiar rawh.) Pathian Jehova be tûr te, a hnên aṭanga inzir tûr te leh, inti chak tawn tûrtea inhmu khâwm kan ni a. (Heb. 2:12; 10:24, 25) Chuvângin, kan inkhâwmte chu tih dân pângngai ang mai ni lovin, kan hlâwkpui theih nâna fel taka ruahman a ni. (1 Kor. 14:40) Kan inkhâwmna hmunte pawh rilru pe taka kan zir theih nâna duan a ni bawk. Chu bâkah, kan tualdâwihna avângin politics lam thilte kan sawi ngai lo va; mi mal ngaihdân leh hmuh dânte chungchângah pawh kan inhnial buai ngai lo. Kan mi sâwmte chu Kingdom Hall-ah Eng Nge Thleng Ṭhîn? tih video lo en lâwktîrin an beisei theih tûr thilte hre tûrin kan ṭanpui thei bawk a ni.

9-10. Tu emaw inkhâwma kan sâwm hunah, hrehna nei lo tûrin eng nge kan hrilh theih? (Milem en bawk rawh.)

⁹ Mi ṭhenkhat chuan “Jehova Thuhretu rawn ni tûra” kan phût an hlauh avângin inkhâwma rawn tel chu an hreh thei a. Chuvângin, anni chu mi tharte kan lawm reng thu leh inkhâwm chhûngin kan tih ang an tih ve kher a ngaih loh thu kan hrilh thei a ni. Chhûngkuate pawh kan sâwm vek a. Naupangte leh an nu leh pate chuan zirtîrna thuhmun an dawng a. Chutiang chuan, nu leh pate chuan an fate’n tute nge an kawm a, eng nge zirtîr an nih an hre thei a ni. (Deut. 31:12) Thawhlâwm khawn a awm lo bawk. Chutiang chuan: “a thlâwnin in dawng a, a thlâwnin pe ang che u,” tia Isua thupêk chu kan zâwm a ni. (Mt. 10:8, NWT) Pathianin pâwn lam lan dân ni lovin, thinlung a en zâwk avângin, thawmhnaw man to tak an inbel a ngai lo tih kan hrilh thei bawk a ni.—1 Sam. 16:7.

¹⁰ An rawn inkhâwm hunah pawh, lawm hlawh nia inhriatna nei tûrin i tih theih apiang ti la. Upate leh thuchhuahtu dangte pawh hmêlhriattîr ang che. A tlângnêl poh leh inkhâwma rawn tel leh chu a phûr lehzual dâwn a. Bible en tûr a nei lo a nih chuan, i Bible chu enpui la. A ṭûl a nih chuan, kan thu zir mêkte pawh enpui ang che.

BIBLE ZIRNA I ṬAN HUNAH

11. Engtin nge i Bible zirpui hun neih chu i zahsak tih i lantîr theih?

¹¹ In lama Bible zirna i neihpui ṭan hunah eng nge i hriat ngai? I zirpuiin hun a neih chu zahsak la. Entîr nân, in chhehvêla mite hun thlîr dân chu eng pawh ni se, inhmu tûra in hun tiam chu vawng dik ang che. Chu bâkah, Bible zirna in neih hmasak ber, a âwm tâwka tawia kaihhruai chu a ṭha ber thei a. Bible zirlaiin hriat belh a duh a nih pawhin, chutianga tih chu a ṭhat ber thu tawn hriat ngah thuchhuahtu ṭhenkhatte’n an sawi a ni. Ṭawng tam lutuk lo la. A rilrua awmte a sawi chhuah theih nân hun tam tak pe ang che.—Thuf. 10:19.

12. In lama Bible zirna in neih ṭan aṭangin, eng nge thiltumah i neih ang?

¹² Bible in zir ṭan aṭangin, Jehova leh Isua hre chiang tûr leh anmahni hmangaih chho tûra ṭanpui chu thiltumah i nei tûr a ni a. Chutianga ti thei tûr chuan, kan thil hriatte leh ngaih dânte ni lovin, Bible thute ṭanchhana kan zirtîr a ngai a ni. (Tirh. 10:25, 26) Jehova’n amah kan hriata kan hmangaih theih nâna min ṭanpui tûra a tirh Isua Krista chungchâng chu tirhkoh Paula chuan a zirtîr ṭhîn a. (1 Kor. 2:1, 2) Chu bâkah, rangkachak, tangkarua leh, lung man tamte nêna khaikhin theih mize duhawm tak takte nei chho tûra Bible zirlaite ṭanpui a pawimawhzia a sawi uar bawk. (1 Kor. 3:11-15) Chûng mize duhawm tak takahte chuan rinna, finna, hriatthiamna leh, Jehova ṭihnate a tel a ni. (Sâm 19:9, 10; Thuf. 3:13-15; 1 Pet. 1:7) I Bible zirpuite chu rinna nghet tak leh, hmangaihna ngah tak an Pa vâna mi nêna mi mal inlaichînna ṭha nei chho tûra ṭanpuiin, zirtîrna kawnga Paula entawn tûr siam chu zui ang che.—2 Kor. 1:24.

13. Engtin nge ngaihventute kan ṭanpui hunah dawhtheihna leh hriatthiamna kan lantîr theih? (2 Korinth 10:4, 5) (Milem en bawk rawh.)

¹³ Dawhtheihna leh hriatthiamna lantîrin Isua zirtir dân chu kan zui thei a. An awm ti nuam lo tûr zawhnate zawh chu pumpelhin, a tûl a nih chuan, hriatthiam harsa an tih thute chu a hnua sawiho leh atân i hnutchhiah thei a. Zirtîrna tharte chu an inpeih hmaa pawm tûra nawrlui lovin, thutak chu an thinlunga zung a kaih hun nghâk zâwk ang che. (Joh. 16:12; Kol. 2:6, 7) Bible chuan zirtîrna dik lote chu kan ‘tih chhiat’ ngai “kulhpui nghet takte” nên a khaikhin a. (2 Korinth 10:4, 5, chhiar rawh.) Bible zirlaite tân hun rei tak an lo vawn tawh an rinna chu thlah a harsat theih avângin, Jehova nêna inlaichînna nghet tak nei tûra kan ṭanpui hmasak a ngai a. Chu chuan thurin nghet tak an lo vawn tawhte chu thlah a ti awlsawm lehzual dâwn a ni.

MI THAR AN RAWN INKHAWM HUNAH

14. Mi thar an rawn inkhâwm hunah engtin nge kan lo chhâwn ang?

¹⁴ An hnam, an chhûngkaw dinhmun leh, an ṭobulte chu eng pawh ni se, mi thar rawn inkhawmte chu ngilnei taka cheibâwl tûrin Jehova’n min beisei a. (Jak. 2:1-4, 9) A nih leh, engtin nge an chungah hmangaihna kan lantîr theih ang?

15-16. Mi thar rawn inkhâwmte chu lawm hlawh nia inhre tûrin engtin nge kan ṭanpui theih?

¹⁵ Mi ṭhenkhat chu hriat châk an neih avâng emaw, mi dang tu emawin a fuih avâng emawa rawn inkhâwm an ni thei a. Chuvângin, anni chu biak kan hreh tûr a ni lo. Nêlawm takin bia la; mahse, an awm ti nuam lo tûr zâwngin siam lo vang che. I bula ṭhu tûrin sâwm la. I Bible leh thu leh hla chhuah kan zir mêkte chu i enpui thei a; a nih loh leh, an hman tûr i pe thei bawk. Chu bâkah, an rilru awm dân tûrte chu ngaihtuah tel bawk ang che. Kingdom Hall-a rawn kal pa pakhat chuan amah rawn chhâwntu unaupa hnênah pângngai taka a inchei loh avânga a rilru a nawm loh thu a hrilh chuan, unaupa chuan Jehova Thuhretute chu mi pângngai ve mai kan nih thu hrilhin a thlamuan a. Ani chuan baptisma a chan hnu thleng pawhin, unaupa thusawi chu a hre reng a ni. Chutih rualin, kan hriat reng tûr chu mi thar rawn inkhâwmte chunga ngaihsakna kan lantîr hunah, an awm ti nuam lo thei zawhnate zâwt lo tûrin kan fîmkhur tûr a ni.—1 Pet. 4:15.

¹⁶ Kan inbiaknaah emaw, chhânna kan pêk hunah emaw, a nih loh leh chanvo kan thawhnaah Thuhretu ni lote rinna chungchâng kan sawi lan a ngai a nih chuan, zahna lantîrin anmahni ti tlu thei leh ti lungni lo thei ṭawngkamte chu pumpelh kan duh a ni. (Tit. 2:8; 3:2) Entîr nân, an rinna chungchângte chu zah lo takin kan sawisak lo va. (2 Kor. 6:3) Hemi kawngah hian, a bîk takin, vântlâng thusawitu unaupate an fîmkhur a ngai lehzual a. Thuhretu ni lo ngaithlatute tâna hriatthiam harsa thei thute hrilhfiahin anni chu an ngaihsakzia an lantîr thei bawk a ni.

17. Rawngbâwlnaa “thutak pawm duhna neite” kan hmuh hunah eng nge tih kan tum ber ang?

¹⁷ A ni têlin, zirtîr siamna hna chu a hmanhmawh thlâk telh telh a. Chuvângin, ‘an thinlunga chatuan nunna petu thutak pawm duhna neite’ chu kan zawng chhunzawm zêl a ni. (Tirh. 13:48, NWT) Chutianga kan tih hunah, Bible zirna nei tûr leh kan inkhâwma rawn tel tûrin sâwm kan hreh ngai tûr a ni lo. Chutianga tiin, ‘nunnaa hruaitu kawng’ zawh ṭan tûrin kan ṭanpui thei dâwn a ni —Mt. 7:14, NWT.