Jehova’n ‘Phun Kan Nihnaah Pâr Vul’ Tûrin Min Ṭanpui

Kassholm-a te nupa chu kum 1979 khân Gilead School an kal a. A hnuah, Iran, Mauritius, Myanmar, Tanzania, Uganda, leh Zaire-ah te rawngbâwl tûra “phun,” a nih loh leh, tirh an ni. Gilead School zirtîrtu Jack Redford-a thurâwn pêk chuan vawi tam tak “phun”, “phawi” leh, “phun sawn” an nih hunahte a ṭanpui a ni. An chanchin chu i han sawitîr ang u.

Mats, a hmasain, thutak i hmuh dân, khawngaihin, min hrilh thei ang em?

Mats-a: Khawvêl Indopui II-na chhûnga Poland-a a awm laiin, ka pa chuan Catholic sakhuaah dik loh taka thiltih tam tak a hmu a. Chuti chung chuan, “Sakhaw dik chu khawiah emaw a awm tûr a ni!” tiin a sawi ṭhîn a. A hnuah, a thusawi chu a dik tih ka hmu a ni. Lehkhabu hlui tam tak ka lei a. Ka lei zînga pakhat chu The Truth That Leads to Eternal Life tih lehkhabu pâwl hi a ni a. Lehkhabu hming chu ka ngaihven zâwng tak a nih avângin, a zân la laah chuan a bu pumin ka chhiar chhuak nghâl vek a ni. A tûk zîngah chuan, thutak ka hmu tih ka hre ta a!

Kum 1972, April thla aṭang chuan, Jehova Thuhretute thu leh hla chhuah tam tak chu ka chhiar belh a; Bible chungchânga zawhna tam tak ka neihte chhânna chu ka hmu a ni. Isua tehkhinthua tuikeplung hlu tak a zawn hmuh hnua chumi lei tûra a neih zawng zawng hralhtu sumdâwng mi ang mai kha niin ka inhria. “Tuikeplung” anga hlu thutak ka hmuh chu lei tûrin, university kala doctor ni tûra ka thiltum chu ka “hralh” a. (Mt. 13:45, 46, NWT) Kum 1972, December 10-ah baptisma ka chang ta a ni.

Chumi kum vêk chuan, ka nu leh pa te leh ka nau chuan thutak chu pawmin baptisma an chang ve leh a. Kum 1973, July thlaah chuan hunbi kimin rawng ka bâwl ṭan a ni. Kan kohhrana pioneer ṭhahnemngai leh thlarau mi tak unaunu Ann-Catrin-i chuan ka mit a la hle a. Kan induh chho va; kum 1975-ah inneiin, a hnu kum li chhûng chu Sweden rama rawngbâwlna bial nuam leh ṭhangduang tak Strömsund khuaah kan chêng a ni.

Ann-Catrin-i: Ka pa chuan Stockholm-a university a kal laiin thutak a hmu a. Chutih lai chuan thla thum mi chauh ka la ni a; mahse, inkhâwmnaah leh rawngbâwlnaahte min hruai ṭhîn a ni. Ka nu chuan a duh loh avângin, Thuhretute dik lohna chu a zawng ṭhîn a. Mahse, a hmuh loh avângin, a hnuah baptisma a chang ve ta a ni. Kum 13 ka nihin, baptisma ka chang a, kum 16 ka tlin chuan pioneer ka thawk ṭan a. Lalram thuchhuahtu mamawh zualna hmun Umeå-a rawng ka bâwl hnuah, special pioneer ka thawk ṭan a ni.

Mats-a nêna kan inneih hnu chuan, mi tam tak thutak zirtîr theihna chanvo hlu kan nei a. An zînga pakhat chu Maivor-i a ni a; ani chuan infiamna lama a thiltum ûm chu bânsanin ka nau nên pioneer an thawk dûn a. Kum 1984-ah Gilead kal dûnin, tûnah chuan Ecuador-ah missonary niin rawng an bâwl mêk a ni.

Missionary in thawhnaah “phun i nihnaah pâr vul rawh,” tih thurâwn chu engtin nge in nunpui?

Mats-a: Chanvo tharahte vawi tam tak “phun sawn” kan ni a. Mahse, a ṭha thei ang bera Isua entawna amaha ‘zung kaih’ tlat kan tum a; a bîk takin a inngaihtlâwmna entawn kan tum a ni. (Kol. 2:6, 7) Entîr nân, tualchhûnga unaute chu keimahni mila inthlâk danglamtîr tum aiin, kan tih dân nêna inang lo thil ṭhenkhat an tih chhante chu hriatthiam kan tum zâwk a. An ngaihtuah dân leh hnam dânte chu hriatthiam kan duh a ni. Isua kan entawn tam poh leh, chanvo pêk kan nihna hmun apianga pâr vul tûra “tuiluang kianga thing phun” ang maiin kan inhre lehzual a ni.—Sâm 1:2, 3.

Ann-Catrin-i: Thingkûng chuan phun sawn a nih huna ṭhang thei tûrin ni zung a mamawh a. Chutiang bawkin, Jehova chuan min hmangaiha min ngaihsaktu thlarau lam unaute pein kan tân “nî” a nihzia a lantîr reng ṭhîn. (Sâm 84:11) Entîr nân, Iran ram Tehran khawpuia kan awmna kohhran pakhata unaute chuan, Bible hun laia khualchhâwn thiamna ang kha kan chungah an lantîr a. Irana awm zawm chu kan châk a; mahse, kum 1980, July thlaah chuan Jehova Thuhretute rawngbâwlna chu khap beh a ni a. Chuvângin, dârkâr 48 chhûnga ram chhuahsan tûra tih kan ni a. Africa khawmuala ram pakhat (tûna Congo tia hriat) Zaire-ah tirh kan ni.

Africa-a tirh kan ni tih kan inhriat chuan ka ṭap a. Chuta rûl leh hri lêng te chungchânga ka thil hriatte chuan min ti hlau a ni. Mahse, chuta rei tak chhûng rawng lo bâwl tawh ka ṭhian kawm ngeih takte nupa chuan: “I la thlen ngai loh kha! Han ti chhin la, Africa chu nuam i ti chho mai ang,” tiin min hrilh a. An sawi ang ngei chu a lo ni a. Unaute chu an ngainatawm hle a ni. Dik tak chuan, kum ruk hnua khap behna avânga Africa kan chhuahsan dâwn khân, Jehova hnênah: “Khawngaihin, Africa-ah min awm zawmtîr rawh,” tiin ka ṭawngṭai a. Africa chungchânga ka rilru put hmang a inthlâk tawh tih ka hriat avângin ka lâwm hle a ni.

Eng thiltawn hlimawm takte nge in neih?

Mats-a: Hnam hrang hrang leh ṭobul hrang hrang aṭanga lo kal missonary ṭhian duhawm takte kan chhar chu ka sawi duh pakhat a ni a. Chu bâkah, hmun ṭhenkhatah chuan Bible zirpui tam tak kan nei a, a hlimawm thei hle—zirpui 20 vêl ve ve kan neih chângte pawh a awm! African unaute hmangaihna leh khualchhâwn thiamna chu ka theihnghilh thei ngai lo vang. Zaire-a kohhrante kan tlawh lai chuan, kan “bedroom”—Volkswagen Kombi—chu unaute in bulah kan dah ṭhîn a, anni chuan ‘an theih tâwk aia nasain’ kan chungah khualchhâwn thiamna an lantîr a ni. (2 Kor. 8:3, NWT) Kan tâna hlu tak pakhat chu thawnthu inhrilh hun tia kan koh hi a ni a. Kan mut hmain, Ann-Catrin-i nên ni lênga kan thiltawnte inhrilh tawnin, Jehova’n min awmpui avângin lâwmthu kan sawi ṭhîn a ni.

Ann-Catrin-i: Nasa taka hlimna min petu chu khawvêl hmun hrang hranga kan unaute hmêlhriat chhoh hi a ni a. Farsi, French, Luganda leh, Swahili ṭawng pawh tiamin, ṭawng tharte kan zir bâkah, hnam dân hrang hrang kan hriat phah bawk. Zirtîr tharte ṭanpuiin ṭhian ṭha takte kan chhar a, ‘thu khat vuain’ Jehova rawngbâwlnaah kan thawkho a ni.—Zep. 3:9.

Jehova thil siam mawi tak chi hrang hrangte pawh kan hmu bawk a. Rawngbâwlnaa chanvo thar kan dawn apiang hian, Pathian Jehova chuan Kawng Kawh Hmuhtu angin hma min hruai ni hian kan hre ṭhîn a. Mahnia kan zir chhuah ngai loh tûr thil tam tak min zirtîr a ni.

Eng chonate nge in tawh a, engtin nge in hmachhawn?

Mats-a: Malaria ang chi natna chi hrang hrang kan tuar ve a. Kan nu hian hrisêl lohna avângin beisei loh takin inzainate a hmachhawn bawk a. Chu bâkah, kan nu leh pa kum upa tawh takte chu kan ngaihtuah êm êm bawk. Chuvângin, kan pianpui unaute’n ṭha taka an lo enkawl ṭhin avângin an chungah kan lâwm hle. Anni chuan dawhthei tak, hlim tak leh, hmangaihna nei takin an lo enkawl a. (1 Tim. 5:4) Chuti chung chuan, hmun hla aṭang chauhva kan nu leh pate kan ngaihsak theih avângin lunghnual châng kan nei fo a ni.

Ann-Catrin-i: Kum 1983-a Zaire-a rawng kan bâwl laiin, tuihri natna avângin nasa takin ka dam lo va. Doctor chuan Mats-a chu, “Vawiinah he ram aṭang hian chhuahpui nghâl rawh!” tiin a hrilh a. A tûkah chuan, thlawhna awm chhun bungraw phurhna thlawhna hmangin Sweden lam kan pan ta a ni.

Mats-a: Missionary rawngbâwlna chu kan chawlhsan a ngai dâwn nia kan rin avângin lungchhe takin kan ṭap a. Mahse, doctor rin loh ang takin Ann-Catrin-i chu a rawn ṭha chho va. Kum khat hnuah, Zaire-ah kan lêt leh thei a; hemi ṭum hi chuan Lubumbashi-a Swahili kohhran têa tirh kan ni.

Ann-Catrin-i: Lubumbashi-a kan awm lai chuan nau ka chhiat a. Fa neih tum lo mah ila, kan nautê chu ka sûn hle a ni. Mahse, chutia lungchhe taka kan awm lai chuan Jehova hnên aṭangin beisei loh thilpêk kan dawng a. Tûn hma zawng aia tamin Bible zirpui kan nei a ni. Kum khat pawh a vei hmain, kohhrana thuchhuahtu awm zât chu 35 aṭang 70-in kan pung a; inkhâwm zât pawh 40 aṭang 220-in kan pung bawk. Rawngbâwlnaah nasa takin kan inhmang a, Jehova malsâwmna avângin thlamuanna nasa tak kan hmu a ni. Tûn thlengin kan nautê chanchin chu kan la sawi fo va, Pathianin kan thinlung a tih dam pumhlûm hun tûr chu kan nghâkhlel tak zet a ni.

Mats-a: Engtik emaw aṭang khân, Ann-Catrin-i hi a chauvin a hah thei hle a. Kei pawh rîl cancer stage-four ka neih avângin inzaipui ka hmachhawn a. Mahse, tûnah chuan kei ṭhat lam ka pan a, Ann-Catrin-i pawhin rawngbâwlnaah theih tâwp a chhuah a ni.

Fiahnate tâwktu awm chhun kan ni lo tih kan hria a. Kum 1994-a Rwanda-a chi insâmna a thlen hnu khân refugee camp-a awm unau tam tak chu kan tlawh a. An rinna, chhelna leh, harsa tak chunga khualchhâwn thiamna an lantîrna te chuan, Jehova’n a mite chu eng fiahna hnuaiah pawh chakna a pe thei tih min hriat chiantîr a ni.—Sâm 55:22.

Ann-Catrin-i: Kum 2007-a Uganda-a branch hlannaa kan tel laiin chona dang kan hmachhawn leh a. Program a zawh chuan, missionary leh bethel-a rawngbâwl mi 25 vêlte nên Kenya rama Nairobi lam panin kan kal a. Kenya kan luh hmain, lorry (bungraw phurhna motor) pakhat hi kan lama rawn tlânin min rawn su thut a. A khalhtu leh kan ṭhian pangate chu kâ pawh chhawn lovin an thi a; a hnuah, unaunu pakhat pawh damdawi inah a thi ve leh a ni. Kan ṭhiante hmuh leh hlân kan nghâkhlel khawp mai!—Job. 14:13-15.

Zawi zawiin ka taksa hliamte chu a rawn dam chho va. Mahse, kan nupa leh kan chuanpui ṭhenkhat chuan thiltawn ṭha lo takte avânga lo awm rilru lama buaina (PTSD) kan nei a ni. Thlaphân avânga zâna ṭhang harhin, lungphu ṭha lo an neiha an awm ang mai hian ka awm ṭhîn a. A thlabârthlâk thei hle a ni. Mahse, Jehova hnêna ṭawngṭai fan fanna leh kan Bible châng duh takte chhût ngunna chuan thlamuanna min pe ṭhîn. Mi thiamte pawh kan râwn a, kan ṭangkaipui hle. Tûnah chuan, chutiang thlaphânna chu kan nei lutuk tawh lo va, kan dinhmun ang hmachhawn ve mi dangte tân Jehova thlamuanna kan dîlsak reng a ni.

Dinhmun khirh takte in hmachhawn theih dân i sawi lai khân, Jehova’n “artui hel angin” min dawm tih khân i sawi a. Min hrilhfiah thei ang em?

Mats-a: Kha ṭawngkam kha Swahili thufing “Tumebebwa kama mayai mabichi,” a nih loh leh “Artui hel angin min dawm,” tih aṭanga lo chhuak a ni a. Tu emawin artui hel a tih keh loh nâna fîmkhur taka a dawm ang mai hian, Jehova chuan kan chanvo dawn apiangah duat takin min chhawmdâwl a ni. Kan mamawhte chu kan mamawh ai bâkin min pe ṭhîn a. A hmangaihna leh chhawmdâwlna kan dawn dân kawng khat chu Governing Body-in kan chunga lainatna an lantîrna hmangin a ni.

Ann-Catrin-i: Duat taka Jehova min chhawmdâwl dân pakhat târ lan ka duh a. Ni khat chu, Sweden-a damdawi in pakhata ka pa hruai luh a nih thu phone call ka dawng a. Mats-a chu Malaria avângin a la dam kawr a, thlawhna ticket leina tûr pawh kan nei lo. Kan motor hralh mai kan tum a. Chu veleh, phone call pahnih kan dawng leh a; Pakhat chu kan chanchin lo hretu nupa tuak khat hnên aṭangin a ni a, mi pakhat tân ticket min leisak an duh thu an sawi a ni. Call dang chu kum upa lam unaunu hnên aṭang a ni a; ani chuan “A mamawh tân,” tia hming a pêk bâwmah pawisa a lo khâwl ṭhîn hi a ni a. Minute rei lo te chhûngin Jehova’n ticket lei tûra kan mamawh chu min pe a ni. —Heb. 13:6.

Kum 50 chuang hunbi kima rawng in lo bâwl tawhna in han thlîr lêt hian, engte nge in zir?

Ann-Catrin-i: ‘Muang taka awmna leh ring taka awmna’ aṭangin chakna kan hmu tih ka zir a. Jehova kan rinchhan hian kan indona chu a indonaah a chantîr a. (Is. 30:15; 2 Chro. 20:15, 17) Kan chanvo dawn apianga a ṭha thei ang bera thawhna aṭangin kawng danga kan dawn theih ngai loh tûr malsâwmnate chu kan dawng a ni.

Mats-a: Ka thil zir chhuah pawimawh ber chu dinhmun engkima Jehova rinchhan leh ka tâna hma a lâk dân tûr ngaihchân hi a ni. (Sâm 37:5) Chutianga min tihsak tûra a thutiam chu hlen lovin a awm ngai lo. Chumi dikzia chu tûna Myanmar Bethel-a kan rawngbâwlnaah pawh kan la hmu reng a ni.

An rawngbâwlna zauh duh ṭhalai tam tak pawhin Jehova hmangaihna rinawm kan dawn ang hi an dawn ve kan duhsak hle a. Phun an nihna apianga pâr vul tûra Jehova ṭanpuina an pawm phawt chuan, a hmangaihna rinawm chu an dawng ve ang tih kan chiang a ni.