Jehova Ngaihdamna—Engtin Nge I Entawn Theih?

1-2. (a) A bîk takin, eng hunah nge tu emaw ngaihdam chu harsa kan tih mai theih? (b) Engtin nge Denise-i’n ngaihdamna a lantîr?

MI DANGTE ngaihdam harsa i ti em? A bîk takin, tu emawin a thiltih emaw, a thusawi emawa rilru na taka min siam hian a tam zâwk chuan ngaihdam harsa kan ti ṭhîn. Amaherawhchu, rilru naa awm tawh lo tûr leh mi dangte ngaidam tûrin tih theih kan nei a ni. Entîr nân, ngaihdamna nasa tak lantîrtu unaunu Denise-i a chungchâng hi lo ngaihtuah ta ila. Kum 2017 khân unaunu Denise-i leh a chhûngte chuan Jehova Thuhretute World Headquarters hawn thar chu an tlawh a. An haw kawngah, motor dang khalhtu chuan a khalh lai chu thunun zo lovin an motor chu a rawn su a. Chu chêtsualna avâng chuan Denise-i chu nikhaw hre lovin a awm a, a rawn harh chhuah chuan a fate chu na takin an inhliam tih leh a pasal Brian-a chu a boral tih a hre ta a. Chu hun chu ngaihtuah lêtin Denise-i chuan: “Ka rilru a hahin awm ngaihna ka hre lo,” tiin a sawi. A hnuah chu motor khalhtu chu chian lohna nei emaw, rilru lâk pêna awm emaw a ni lo tih a hria a. Tichuan, Jehova hnênah thlamuanna dîlin a ṭawngṭai a ni.

² Anmahni sutu chu tualthahna thubuai awrhtîr a ni a. Thiam loh chantîr a nih chuan lung ina tântîr a ni dâwn a ni. Mahse, court chuan Denise-i’n thil thlen dân chanchin a sawi dân ṭanchhana chu pa chu rorêlsak a nih tûr thu a hrilh a. Unaunu chuan: “Ka nuna hun hrehawm ber chungchâng ka sawi nawn leh a ngaih avângin, chu chu tu emawin ka hliam ṭhuinate phelh a, chi rawn phul hnan ang mai hian a na a ni,” tiin a sawi. Chawlhkâr rei lo te hnuah Denise-i chu a chhûngkaw chunga chhiatna nasa tak thlentu hmaa thil thlen dân sawi tûrin court-ah a ṭhu a. Eng nge a sawi? Rorêltu hnênah chuan chu pa chunga zahngaihna lantîr tûrin a ngên a ni.b Unaunuin thu a sawi zawh chuan rorêltu chu a ṭap ta a. Ani chuan: “Kum 25 lai rorêltu ka nih chhûng hian a tuartu chhûngte’n hetianga hmangaihna leh ngaihdamnaa khat ṭawngkamte hmanga thubuai neitu tâna zahngaihna an ngensak hi ka la tawng ngai lo,” tiin a sawi.

3. Engin nge Denise-i chu ngaihdamna lantîr tûra chêttîr?

³ Engin nge ngaihdamna lantîr tûrin Denise-i chu ṭanpui? Jehova ngaihdamna chu a chhût ngun a ni. (Mik. 7:18) Kan chunga Jehova lantîr ngaihdamna kan ngaihhlut hian, mi dangte pawh ngaidam tûra chêttîrin kan awm ang.

4. Jehova’n eng ti tûrin nge min duh? (Ephesi 4:32)

⁴ Jehova’n kan chunga ngaihdamna a lantîr ang bawkin, mi dangte chungah pawh ngaihdamna lantîr ve tûrin min duh a. (Ephesi 4:32 chhiar rawh.) Min tinatute chu ngaihdam inpeih tûrin min beisei a ni. (Sâm 86:5; Lk. 17:4) He thuziakah hian ngaihdamna lantîr lehzual tûra kan tih theih thil pathumte kan sawiho vang.

I RILRU AWM DANTE CHU NGAIHTHAH SUH

5. Thufingte 12:18-in a sawi angin, tu emawin rilru naa min siam hian engtin nge kan awm mai theih?

⁵ Tu emaw thiltih leh thusawite chuan rilru na takin min siam thei a; a bîk takin, kan ṭhian ṭha tak emaw, kan chhungkaw zînga mi emaw a nih hian a ni lehzual a ni. (Sâm 55:12-14) A châng chuan, kan rilru chu chema vih ang maia nain a awm thei a. (Thufingte 12:18 chhiar rawh.) Chu chu ngaihthah kan tum lui pawh a ni thei. Mahse, chutianga tihna chu kan hliama chem te hnutchhiah ang a ni. Chutiang bawkin, kan rilru natnate chu kan ngaihthah avâng maia lo ṭha chho tûrin kan beisei thei lo.

6. Tu emawin rilru naa min siam hian engtin nge kan chhân lêt mai theih?

⁶ Tu emawin kan rilru a tihnat hian kan thinrim nghâl mai thei a. Bible chuan thinrim châng kan nei thei tih hre mah se, chumiin min thununna tûr lakah min vaukhân a ni. (Sâm 4:4; Eph. 4:26) Engvângin nge? Kan rilru awm dânte chuan a taka thil ti tûra min chêttîr ṭhin vâng a ni. Chu bâkah, thinrimna chuan nghawng ṭha lo a nei fo va. (Jak. 1:20) Thinrimna chu chhân lêt dân kawng khat a ni a; mahse, thinrim renga awm chu duh thlanna a ni tih hre reng ang che.

7. Tu emawin kan rilru a tihnat hian eng rilru natna dangte nge kan neih theih?

⁷ Ṭha lo taka cheibâwl kan nih hian rilru natna dangte pawh kan nei thei a. Entîr nân, unaunu Ann-i chuan, “Ka naupan laiin ka pa chuan ka nu chu kalsanin min awmtunu chu a nei a. Thlahthlama awm niin ka inhria a. Fate an neih hnu phei chuan hnâwl niin ka inhre bawk. Duh loh nia inhriatna neiin ka seilian a ni,” tiin a sawi. Unaunu Georgette-i chuan a pasalin a rinawm lohsan hnua a awm dân chu heti hian a sawi a ni: “Naupan lai aṭanga inkâwm kan ni a. Pioneer pawh kan thawk dûn a. Ka rilru a na ngawih ngawih,” tiin. Unaunu Naomi pawhin: “Ka pasalin rilru naa min siam hi ka ring ngai lo. Chuvângin, saruak lem leh thuziakte a en ṭhîn tih min hrilh chuan bum leh phatsana awm niin ka inhria,” tiin a sawi.

8. (a) Mi dangte kan ngaihdam nachhan tûr ṭhenkhat chu eng nge ni? (b) Mi dangte ngaihdam chu engtin nge kan hlâwkpui? (“Tu Emawin Hun Rei Tak Chhûng Rilru Nain Min Siam Ta Se . . . ,” tih bâwm chu en rawh.)

⁸ Mi dangte thusawi leh thiltihte chu thunun thei lo mah ila, chûngte kan chhân lêt dân erawh chu thunun kan tum thei a. Ngaihdam chu chhân lêt dân ṭha ber a ni fo a ni. Engvângin nge? A chhan chu Jehova kan hmangaih a, ani chuan ngaihdamna lantîr tûrin min duh a ni. Chu bâkah, thinrim renga kan awm a, kan ngaihdam loh chuan âtthlâk taka thil tiin kan hrisêlna hial pawhin a tuar thei a ni. (Thuf. 14:17, 29, 30) Unaunu Christine-i thiltawn hi lo chhinchhiah ang che. Ani chuan: “Ka rilru natnain min thunun hnu chuan ka nui tlêm ta hle a. Hrisêlna pawh ngaihtuah lovin ka eiin ka in a, mut pawh ka mu ṭha thei lo va, ka rilru awm dânte chu thunun a harsa lehzual ṭhîn. Chu chuan kan inneihna leh mi dangte nêna kan inlaichînna chu a nghawng a ni,” tiin a sawi.

9. Engvângin nge lung nih lohna kan paih bo vang?

⁹ Tu emawin min tihnat hnuah ngaihdam min dîl lo a nih pawhin, a thiltihin kan chunga nghawng a neih dân chu kan tinêp thei a ni. Engtin nge? A chunga kan târ lân tâk Georgette-i chuan: “Hun eng emaw chen hnuah ka pasal hlui chunga ka lungnih lohna leh thinrimna chu ka paih bo va. Chuvângin, rilru thlamuanna nasa tak ka nei a ni,” tiin a sawi. Lungnih lohna kan paih bo hian kan thinlung chu khâkna lakah kan vêng thei a. Chu bâkah, chutianga tihna chu nasa takin kan hlâwkpui bâwk a ni; thil ṭha lote ngaihtuah reng tawh lovin, nun hlimawm tak kan chên leh thei a ni. (Thuf. 11:17) Mahse, ngaidam tûrin la inpeih lo ta la, engtin nge ni ang?

THINRIM RENG LOH DAN

10. Engvângin nge rilru dam thlenga hun kan inpêk a ngaih? (Milem en bawk rawh.)

¹⁰ Thinrim reng lo tûrin engin nge ṭanpui ang che? Kawng khat chu, thinrimna a daih thlenga hun pêk hi a ni. Hliam na tak tuar, tu emaw chuan damdawi lama inenkawlna a dawn hnuah pawh a hliamte dam tûrin hun a mamawh a. Chutiang bawkin, tu emaw thinlung taka ngaidam tûra kan inpeih hmain, rilru dam nân hun kan mamawh thei a ni.—Thur. 3:3; 1 Pet. 1:22.

11. Engtin nge ṭawngṭaina chuan mi dangte ngaidam tûra a ṭanpui theih che?

¹¹ I ngaihdam theih nân ṭawngṭaiin Jehova hnênah ṭanpuina dîl rawh. Kan târ lan tâk Ann-i chuan ṭawngṭainain a ṭanpui dân chu heti hian a sawi a ni: “Kan chhûngkuaa mi tinte tih dik loh chu ngaidam tûrin Jehova hnênah ka dîl a. Tichuan, ka pa leh a nupui thar hnênah anni chu ka ngaihdam thu lehkha ziakin ka thawn a ni,” tiin. Ann-i chuan chutianga tih chu awlsam a tih loh thu a sawi a. Mahse, “Jehova ngaihdamna entawnna hmangin ka pa leh a nupui chu Jehova chungchâng tam lehzuala zir duhna ka neihtîr theih ka beisei,” tiin a sawi a ni.

12. Engvângin nge kan rilru vei zâwngte aiin Jehova kan rinchhan zâwk ang? (Thufingte 3:5, 6)

¹² I rilru vei zâwngte ni lovin, Jehova rinchhan zâwk ang che. (Thufingte 3:5, 6 chhiar rawh.) Ani chuan kan tâna ṭha ber tûr chu a hria a. (Is. 55:8, 9) Min tina thei thilte min tihtîr ngai lo vang. Chuvângin, mi dangte ngaidam tûra min fuih hian, chutianga tihna chuan hlâwkna min thlen ang tih kan chiang a ni. (Sâm 40:4; Is. 48:17, 18) Chutih rualin, kan rilru vei zâwngte kan rinchhan anih chuan, mi dangte chu kan ngaidam thei ngai lo pawh a ni thei. (Thuf. 14:12; Jer. 17:9) A tîra târ lan tâk Naomi chuan heti hian a sawi: “A tîr chuan, saruak lem leh thuziakte a en avânga ka pasal ka ngaidam thei lo chu thil âwm lo niin ka hre lo va. Ani chuan ka rilru a tihnat nawn leh, a nih loh leh rilru natna min thlen nasatzia a theihnghilh chu ka hlau va. Chuvângin, Jehova’n ka rilru vei zâwngte a hre thiam tho tiin ka inhnêm chawp a. Mahse, min hriatthiam avâng maiin ka rilru vei zâwngte chu a pawm tihna a ni lo tih ka hre thiam ta a. Thinrim tawh lo tûrin hun ka mamawh tih leh, ka rilru awm dânte chu hre mah se, ngaidam tûrin min duh bawk tih ka hria a ni,” tiin a sawi.c

I RILRU PUT DAN THLAK RAWH

13. Rom 12:18-21-in a sawi angin, eng nge kan tih ngai?

¹³ Rilru na taka min siamtu tu emaw kan ngaihdam hian, thilthleng tawhte sawi chhuah loh mai aia tam kan tih a ngai a. Ani chu kan Kristian unaute zînga mi a nih chuan, kan thiltum chu remna siam a ni a. (Mt. 5:23, 24) Kan thinrimna chu zahngaihna, kan lungnih lohna chu ngaihdamnaa thlâk kan duh a ni. (Rom 12:18-21 chhiar rawh; 1 Pet. 3:9) Engin nge chutianga ti tûra min ṭanpui thei?

14. Eng nge tih kan tum ang a, engvângin nge?

¹⁴ Kan rilru tinatu chu Jehova’n a thlîr anga thlîr kan tum tûr a ni a. Jehova chuan mite ṭhatna lai hmuh a tum a ni. (2 Chro. 16:9; Sâm 130:3) A ṭha lam emaw, ṭha lo lam emaw pawh ni se, mite miziaa hmuh kan tum ber chu kan hmu tlângpui ṭhîn a. Mite ṭhatna lai kan hmuh chuan, anmahni ngaihdam chu awlsam kan ti lehzual ang. Entîr nân, unau Jarrod-a chuan; “Unau tu emawin ka rilru a tihnat hian a mize ṭha tam tak leh ka chunga a thil tihsual khaikhinna chuan amah ngaihdam a tiawlsam lehzual a ni,” tiin a sawi.

15. Engvângin nge tu emaw hnêna i ngaihdam thu hrilh chu a ṭangkai mai theih?

¹⁵ Thil pawimawh tak dang tih kan tum theih chu, ani chu kan ngaidam tawh tih hrilh hi a ni. Engvângin nge? Kan târ lan tâk Naomi sawi hi lo chhinchhiah ang che. Ani chuan: “Ka pasal chuan ‘Min ngaidam tawh em?’ tiin min zâwt a, ‘Ka ngaidam che,’ tia sawi ka tum chuan ka sawi thei ta tlat lo mai a. Ani chu thinlung takin ka la ngaidam lo tih ka hre chhuak ta a. Mahse, a hnuah chuan chûng thu mal pathum thiltithei tak ‘Ka ngaidam che,’ tih chu ka sawi thei ta a. Chutianga ka ngaihdam thu ka hrilh chuan a mittui a tla a, chu chuan rilru nuam taka a awmtîr dân leh thlamuanna min pêk dân chu mak ka ti hle. Chumi hnu aṭang chuan amaha rinna nei leh tûrin theih tâwp ka chhuah a, ṭhian ṭha ber kan ni leh thei a ni,” tiin a sawi.

16. Ngaihdamna chungchângah eng nge i zir?

¹⁶ Jehova chuan ngaidam tûrin min duh a. (Kol. 3:13) Chuti chung pawhin, mi dangte ngaihdam chu harsa kan la ti hle thei a ni. Mahse, kan rilru vei zâwngte ngaihthah lova, thinrim tawh loh kan tum chuan kan ti thei ang. Chutianga tihna hmang chuan kan rilru put dân chu kan thlâk thei bawk ang.—“Ngaidam Tûra Kan Tih Theih Thil Pathumte,” tih bâwm chu en rawh.

NGAIHDAMNAIN A THLEN HLAWKNATE CHU NGAIHVEN RAWH

17. Engtin nge ngaihdamna chuan hlâwkna min thlen?

¹⁷ Mite ngaihdam nachhan tûr tam tak kan nei a. Chûng zînga ṭhenkhat chu lo ngaihtuah ta ila. Pakhatnaah, mite kan ngaihdam hian khawngaihna ngah tak kan Pa Jehova chu kan entawnin kan tilâwm a. (Lk. 6:36) Pahnihnaah, Jehova’n min ngaihdam avângin kan lâwm tak zet tih kan lantîr a. (Mt. 6:12) Tichuan, pathumnaah, hrisêlna ṭha neiin inṭhian ṭhatna kan vawng reng thei bawk a ni.

18-19. Mite kan ngaihdam chuan eng hlâwknate nge kan têl ang?

¹⁸ Mi dangte kan ngaihdam hian beisei loh malsâwmnate kan dawng thei a. Entîr nân, kan târ lan tâk unaunu Denise-i chunga thilthleng hi lo chhinchhiah ang che. Chutih lai chuan unaunu chuan hre lo mah se, chu pa chuan a chung thu rêl a nih zawha intihhlum chu a lo tum a. Mahse, unaunu ngaihdamna chuan a rilru a khawih êm avângin, Jehova Thuhretute nên Bible a zir ṭan ta a ni.

¹⁹ Mite ngaihdam chu kan tih theih azawnga thil harsa ber angin kan ngai mai thei a. Mahse, chutianga tihna chuan hlimna nasa tak min thlen thei a ni. (Mt. 5:7) Chuvângin, Jehova ngaihdamna chu theih tâwp chhuahin i entawn ṭheuh vang u.