Indonate Kâra Thlamuanna Hmuh Dân
Sipai lo ni tawh ṭhîn Gary-a chuan: “Bible ka zir hma chuan, khawvêla nunrâwnna, rorêl dik lohna leh, buaina tam tak a awm chhan ka hre thiam ngai lo va. Mahse, Pathian Jehova’n khawvêl hi hmun him takah a chantîr dâwn tih ka hriat avângin rilru thlamuanna ka nei tawh a ni,” tiin a sawi.
Gary-a chu chutianga thlamuanna hmutu awm chhun a ni lo. Mi dangte pawh Bible-in a lo ṭanpui tawh dân lo ngaihtuah ta ila.
BIBLE SAWI DAN: “Lalpa, nang chu i ṭha a, ngaihdam i peih a.”—Sâm 86:5.
A ṬANPUI DAN: “He châng hian Jehova chu zahngaihnaa khat a ni tih min hriat chiantîr a. Tûn hmaa indonaa ka tel laia ka thiltih zawng zawngte avângin min ngaihdam a inhuam tih ka hria.”—Wilmar-a, Colombia.
BIBLE SAWI DAN: “Ngai teh u, vân tharte leh lei thar ka siam a nih hi; tûn hma thilte chu hriat rengin a awm tawh lo vang a, rilruah pawh a lût tawh hek lo vang.”—Isaia 65:17.
A ṬANPUI DAN: “Sipaia ka ṭan laia ka thiltawnte avângin, thiltawn ṭha lo takte avânga lo awm rilru lama buaina (PTSD) leh rilru hahna nasa tak ka nei a. Mahse, he châng hian nakin lawkah ka rilru buainate leh mangchhiate chu Jehova’n min tih rehsak dâwn tih min hriat nawntîr a ni. Ka rilru leh thinlung ata an bo hlen tawh ang. Chu chu thilpêk hlu tak a va ni dâwn êm!”—Zafirah-i, United States.
BIBLE SAWI DAN: “A dam lai chuan mi felte chu an duah hluah hluah ang a, thlamuanna nasa tak chu a duah hluah hluah bawk ang, thla awm loh hma loh chuan.”—Sâm 72:7.
A ṬANPUI DAN: “Chûng thute chu ka ngaihtuah fo va. Nakin lawkah indona leh a sawhkhâwk ṭha lo takte chu a awm tawh lo vang a; kan hmangaih takte himna tûr kan lungkham a ngai tawh lo bawk ang.”—Oleksandra-i, Ukraine.
BIBLE SAWI DAN: “I mitthite chu an nung leh ang a. . . . Vaivuta awmte u, harh ula, hlim takin zai rawh u.”—Isaia 26:19.
A ṬANPUI DAN: “Tutsi hnam sâmnaah khân ka chhûngte zawng zawng deuh thaw ka chân a. Mahse, he châng hian anni chu ka hmu leh ang tih min tiam a. Kaihthawh an nih huna an hlim thâwmte hriat hlân ka nghâkhlel tawh lutuk!”—Marie-i, Rwanda.
BIBLE SAWI DAN: “Rei lo tê achinah mi suaksual chu a awm tawh dâwn si lo . . . Thuhnuairawlhte erawh chuan ram hi an luah ang a, remna chênin an hmuingîl ang.”—Sâm 37:10, 11.
A ṬANPUI DAN: “Indona chu tâwp tawh mah se, rorêl dik lohna leh mi sualte chu an la awm reng a. Mahse, hêng chângte hian min ṭanpui nasa hle a ni. Jehova’n engkim a hmuin ka dinhmun chu a hre thiam a. Hrehawm tawrhna zawng zawng a tâwp thuai dâwn tih leh theihnghilh a ni tawh dâwn tih min tiam a ni.”—Daler-a, Tajikistan.
He magazine-a târ lante hi Bible-in thlamuanna hmu tûra a ṭanpui Jehova Thuhretu maktaduai têl zînga mite an ni a. Hnam, ram, chi leh, mi mal inhuatna hneh dân an zir tawh a ni. (Ephesi 4:31, 32) Jehova Thuhretute chu politics thilah an tualdawih a, tharum thawhnaah an inhnamhnawih lo.—Johana 18:36.
Jehova Thuhretute chuan khawvêl puma an unaute hnên aṭangin an mamawh ṭanpuina an hmu bawk a. (Johana 13:35) Entîr nân, kan târ lan tâk Oleksandra-i chu indona avângin a unaunu nên ram danga an tlânchhiat a ngai a. Ani chuan: “Ram rî kan kân fel chuan, min lo lâwmtu tualchhûnga Thuhretute chu kan hmu nghâl a. An mi chhawmdâwlnate chuan chuta râl tlân anga kan awmnaah nasa takin min ṭanpui a ni,” tiin a sawi.
Bible-a thlamuanna thuchah leh chumi nunpui dân kan zirna hmun, kan inkhâwmnaahte lo tel tûrin lâwm takin kan sâwm a che. Inkhâwmna hmun hnai ber zawng tûrin, a nih loh leh Chatuanin I hlim Thei! tih lehkhabu hmanga Jehova Thuhretute nêna a thlâwna Bible sawihona phûrawm tak neih dîl tûrin jw.org tlawh ang che.