Kan La Hria Em?

Tûn kum chhuak Vênnainsâng-te chu ngun takin i chhiar tawh em? A hnuaia zawhnate hi i chhân theih leh theih loh hriat i tum dâwn nia:

Jehova bia a, a thusawi ngaithla a, a chungchâng ngaihtuah nâna hun kan hman chuan engtin nge malsâwm kan nih ang?

Thu tlûkna ṭha zâwkte kan siam thei ang a, zirtîrtu thiam zâwk kan lo ni ang a, kan rinna a nghet lehzualin, Jehova kan hmangaihna a thûk lehzual bawk ang.—w22.01, p. 30-31.

Jehova leh a aiawh tûra a mi ruatte rin kan zir a nih chuan, chu chuan engtin nge min ṭanpui ang?

Tûn hi kohhran upate kaihhruaina leh thu tlûkna siamte ringhlel lova zawmna hmanga, Pathianin thil dik a tireng ṭhîn tih rin kan zir hun a ni. Chutianga kan tih chuan, hrehawm nasa tak a lo thlen hunah kaihhruaina danglam tak, a nih loh leh inâwm lo tak anga lang kan dawng a nih pawhin zâwm tûrin kan inpeih ang.—w22.02, p. 4-6.

Vântirhkohvin Zakaria hnêna “[Ram awptu] Zerubabela kuta dâr mûm khai” chungchâng a hrilh khân a sawi tum chu eng nge ni? (Zak. 4:8-10)

He inlârna hian Pathian mite chu biak in tlâwm tak chu Pathian tehnate mila sak zawh a ni dâwn tih a hriat chiantîr a ni.—w22.03, p. 16-17.

Engtin nge “thusawi kawngah . . . tihhmuhtu” kan nih theih? (1 Tim. 4:12)

Kan rawngbâwlnaah ngilnei tak leh mite zah thiam takin thu kan sawi a, inkhâwmahte phûr taka hla sain, chhânna kan pe ziah a, thu dik tak sawiin, mi dangte kan tichak a, sawichhiatnate kan pumpelh a ni.—w22.04, p. 6-9.

Engvângin nge Daniela bung 7-naa sakawlh palite (lalramte) hmêlhmang chu Thu Puan 13:1, 2-naa târ lan sakawlh pakhata a infinkhâwm vek?

Thu Puan 13-a târ lan sakawlh hian Rom ang chi lalram pakhat chauh a entîr lo va. Chu aiin, chu chuan mihringte chunga rorêltu politics thuneihna zawng zawng a entîr zâwk a ni.—w22.05, p. 9.

Pathian rorêlna a dik tih kan rinzia târ lan dân kawng pawimawh tak chu eng nge ni?

Mi tu emawin min hmusit a, min tilung ni lo va, a nih loh leh kan chungah thil sual a ti a nih chuan, dinhmunte chu Jehova kutah nghatin thinrimna leh lungnih lohna chu pai reng loh kan tum a. Ani chuan sualnain a thlen chhiatna zawng zawng chu a sût lêt vek ang.—w22.06, p. 10-11.

Inkhâwma ṭawngṭaina hlântu unaupa chuan eng nge a hriat reng ngai?

Ṭawngṭaina chu kohhran unaute zilh nân emaw, thu puan chhuah nân emawa hman tûr a ni lo va. A bîk takin, inkhâwm ṭanna ṭawngṭai hunah “ṭawng tam” a ngai lo. (Mt. 6:7)—w22.07, p. 24-25.

Eng kawngin nge “thil sual titute chu thiam loh changin” an thawh leh dâwn? (Joh. 5:29)

An nun hlui ṭanchhanin na taka rorêlna an hmachhawn lo vang a. Chu aiin, an thawh leh hnua an rilru put hmang leh thiltihte ang zêla fiah an ni ang.—w22.09, p. 18.

Kum 1922, September thlaa inkhâwmpuiah J. F. Rutherford-a’n eng fuihna phûrawm tak nge a pêk?

Ani chuan U.S.A. rama Ohio state, Cedar Point khawpuia neih inkhâwmpuiah: “Lalin ro a rêl e! Nang hi chu mi puang chhuaktu tûr chu i ni. Chuvângin, Lal leh a Lalram chanchin chu puang chhuak rawh, puang chhuak rawh, puang rawh!” tiin a sawi a ni.—w22.10, p. 3-5.

Isaia bung 30 hian Pathianin tuar chhuak tûra min ṭanpui dân eng kawng thum nge a târ lan?

He bung hian Pathianin (1) kan ṭawngṭainate a ngaithlain, min chhâng a, (2) kaihhruaina min pein leh, (3) tûnah mal min sâwm a, hma lam hunah pawh mal min sâwm bawk ang tih a târ lang a ni.—w22.11, p. 9.

Sâm 37:10, 11, 29-a thute hian hmân lai hunah thlen fimkimna a nei tawh a, engvângin nge hma lam hunah pawh a thleng famkim leh ang tia thu tâwp kan siam theih?

Davida thute chuan Solomona rorêl hun chhûng ang chi, Israel rama chêngte dinhmun ṭha tak chu inâwm takin a târ lang a. Isua chuan paradis lo awm tûr chungchâng sawiin châng 11-na hi a la chhâwng a ni. (Mt. 5:5; Lk. 23:43)—w22.12, p. 8-10, 14.