Krista Tlanna Pathian Chhandamna Kawng
“Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân.”—JOHANA 3:16.
1, 2. Mihring thlahte chunga lo awm dinhmun khirh tak han hrilhfiah teh?
ZAI i nih loh chuan i nun la ngei tûr natna neiah inngai la. Inzaina man tûr chu i pêk theih bâka sâng ni se, engtin nge i ngaih ang? I chhûngte leh i ṭhiante ro sum neihte pawhin chu chu tlin ta lo se engtin nge ni ang? Chutiang nun atâna hlauhawm buaina hmachhawn chu a beidawn thlâk ngawt ang!
2 Hei hian mihring thlahte chunga lo awm dinhmun chungchâng a entîr a ni. Kan nu leh pa hmasa ber, Adama leh Evi chu ṭha famkima siam an ni a. (Deuteronomy 32:4) Anni chuan chatuana nun beiseina leh Pathian thil tum: “Chi tam tak thlah a lo pungin, leilung hi luah khat ula, in thu thuin awmtîr rawh u,” tih tihfamkimna chanvo an nei a ni. (Genesis 1:28) Amaherawhchu, Adama leh Evi chu an Siamtu lakah an hel a. (Genesis 3:1-6) An thu âwih lohna chuan Adama leh Evi chauh ni lovin, an thlah la piang lote chungah pawh sualna a thlen a ni. A hnuah mi rinawm Joba’n: “Tunge thianghlim lo ata thianghlim la chhuak thei le? Tumahin,” a ti a.—Joba 14:4.
3. Engtin nge thihna chu mi zawng zawng chungah a thlen?
3 Tichuan, sual chu kan zavaia mi kai natna chi khat ang a ni; Bible-in “mi zawng zawngin thil an tisual tawh vek a,” a tih avângin. He dinhmun chuan nun atâna hlauhawm sawhkhâwk a nei a. Dik tak chuan, “sual man chu thihna a ni si a.” (Rom 3:23; 6:23) Chu chu tumahin an pumpelh thei lo. Mihring zawng zawng an suala, chuvângin an vaiin an thi a ni. Adama thlah kan nih angin, kan vaiin he dinhmun khirhah kan piang a. (Sâm 51:5) Paula chuan: “Mi pakhat avângin sual khawvêlah a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a,” tiin, a ziak a ni. (Rom 5:12) Mahse, hei hi chhandamna atân beiseina nei lovin kan awm tihna a ni lo.
Sualna leh Thihna Nuai Bona
4. Engvângin nge mihringte hian anmahniin natna leh thihna an paih bo theih loh?
4 Sual leh a sawhkhâwk thihna nuai bo nân eng nge ngai? Chiang takin, mihringte tih theih bâk engemaw a ngai a ni. Sâm ziaktu chuan pawiti êm êm chungin: “Mihring nun leina tûr chu nasa tak a ni a. Thlâna kal lo va, chatuana a nun theih nân a pêk theih zawng pawh pe mah se a daih ngai lo vang,” a ti a. (Sâm 49:8, 9, Today’s English Version) Kan nunna chu chaw ṭha leh damdawia inenkawlna hmangin kum tlêm tê chu tihsei theih nia rin a ni a, chutichung pawhin, kan ro chun dinhmun sual tak chu tuman kan tidam thei lo. Tumahin tarna avânga ṭâwmkai lohnate kan sût thei lo va, kan taksa chu atîra Pathianin a lo tum anga ṭhat famkimna kan pe kîr thei lo bawk. Paula chuan Adama sualin thil siam mihringte chu “thil lawilo thu thua awmtîrin an awm”—a nih loh leh Jerusalem Bible-in a sawi angin “thil tum thleng lo va siam”—a tih khân a sawi uar a ni lo. (Rom 8:20) Mahsela, hlimawm takin, Siamtu chuan min thlahthlam lo va. Kan vai atân sualna leh thihna tihbo nân ruahmanna a siam a ni. Engtin nge?
5. Israel-te hnêna pêk Dân chuan rorêlna fel ngaihsakna nasa tak a neihzia engtin nge a lantîr?
5 Jehova chu ‘felna leh rorêlna fel ngaina mi’ a ni. (Sâm 33:5) Dân leh hrai Israel-te hnêna pêkah chuan inbûktâwkna leh thleibîk nei lo rorêlna fel ngaihsakna nasa takin a lang a ni. Entîr nân, he dânah hian ‘nun aia nun pêk tûr a ni,’ tih kan chhiar a. Thu danga sawi chuan, Israel pakhatin tual a thah chuan, a lâksaka nun aiah a nun ngei a chân tûr a ni. (Exodus 21:23; Numbers 35:21) Chutichuan chunglam rorêlna fel bûkna chu inbûktâwktîr a ni ang.—Exodus 21:30, khaikhin rawh.
6. (a) Eng kawngin nge Adama chu tualthattu tia koh theih a nih? (b) Eng ang nunna nge Adama’n a hlauh a, eng ang inthawina nge rorêlna fel bûkna inbûktâwktîr nân a mamawh ang?
6 Adama a sualin, tual that a lo ni a. Engti kawngin maw? Sual dinhmun—leh thihna—chu a thlahte zawng zawng hnêna a hlan chhawnna hmangin a ni. Adama thu âwih lohna avângin tûnah ngei pawh kan taksa hian chhiat lam a panin, thlân lam panin tluang takin a kal zêl a ni. (Sâm 90:10) Adama sual chuan kaihhnawih nasa zâwk a nei cheu va. Adama’n amah leh a thlahte tâna a chân nunna chu kum 70 emaw, 80 emaw nunna pângngai lek a ni lo tih hre reng ang che. Nun ṭha famkim—dik takin, chatuana nunna—chu a hlauh a ni. Chuvângin ‘nun aia nun pêk tûr’ a nih chuan he mi chungchângah rorêlna fel tihlungawi nân eng ang nunna nge pêk ngai ang? Inâwm takin, hring nun ṭha famkim a nih a ngai ang—Adama neih ang nunna chuan ṭha famkim hring nun a siam thei ang. Inthawina anga hring nun ṭha famkim hlanna chuan rorêlna fel bûkna a inbûktâwktîr mai bâkah, sual leh a sawhkhâwk thihna nuai bo vekna a awmtîr ang.
Sual Man Rulhna
7. “Tlanna” tih thu awmzia hrilfiah rawh.
7 Sual ata zalêntîr nâna pêk ngai a man chu Bible chuan “tlanna” a ti a. (Sâm 49:7) Sâp ṭawngah chuan he thumal hian mihring rutuin a mi rûk tuemaw nêna inthleng nâna a pawisa dîl hi a kâwk thei a. Dik takin, tlanna Jehova pêkah chuan rûk bona engemaw a tel lo. Nimahsela, man pêkna ngaih dân chu a awm reng a. “Tlanna” tia lehlin Hebrai verb (thiltih) thumal hi a awmzia tak chu “khuh” tihna a ni. Sual thawi nân, tlanna chu a khuh tûr nên a inbûktâwk chiah chiah ngei tûr a ni—Adama mihring ṭhat famkimna nun nên chuan.
8. (a) Tlanna thu bul hrilhfiah rawh. (b) Mi sual kan nih angin, engtin nge tlanna thu bul nên kan inlaichîn?
8 Hei hi Mosia Dâna thu bul—tlanna thu bul—nên a inmil chiah a ni. Israel zînga mi pakhat retheihna khurah a tla ang a, Israel mi ni lo bawihah a inhralh chuan, a chhûngte pakhatin chu bawihin a tlukpui ni tûra chhût aman pein, a tlan thei ang. (Leviticus 25:24-49) Bible chuan mihring ṭha famkim lote chu “sual bawiha” tang angin a sawi a ni. (Rom 6:6; 7:14, 25) Min tlan nân eng nge ngai ang? Kan hmuh tawh angin, chân tawh hring nun ṭha famkim lei nân hring nun ṭha famkim bawk pêk a ngai a ni—chuang awm lo, ṭûl awm lovin.
9. Sual khuh nân Jehova’n engtin nge ruahmanna a siam?
9 Dik takin, keini mihringte chu ṭha famkim lo va piang kan ni a. Adama tluk tumah kan awm lo va; rorêlna felin a phût tlanna pe thei tumah kan awm hek lo. A ṭannaa a sawi angin, hei hi tihdam nâna zai man pêk theih loh nun atâna hlauhawm natna nei ang kan ni. Chutiang dinhmunah kan tân tuemaw lo inrawlhin a man min pêksak ta se kan lâwm dâwn lo vem ni? Hetiang chiah chiah hi Jehova’n a lo ti a ni! Sual ata chatuana min zalêntîr nân ruahmanna a lo siam tawh a ni. Ni e, keimahnia kan pêk theih ngai loh tûr min pêk sak a duh a ni. Engtin nge min pêk? Paula chuan: “Pathian thilthlâwnpêk erawh chu kan Lalpa Krista Isua zârah chuan chatuana nunna a ni,” tiin, a ziak a ni. (Rom 6:23) Johana chuan Isua chu, “Pathian Berâm No, khawvêl sual kalpuitu tûr saw,” tiin, a lo sawi bawk. (Johana 1:29) Jehova’n a Fapa a hmangaih êm êm chu tlanna man atâna a hman dân i lo en ang u.
“A Tlukpui Tlanna”
10. Engtin nge “thlah” chungchâng hrilh lâwkna chu Josefa leh Mari chungah a innghah?
10 Eden huana helna a awm zawh veleh Jehova’n mihringte sual ata tlantu tûr “thlah,” emaw, fa emaw piantîr a tum thu a puang nghâl a. (Genesis 3:15) Chung lam thu puan inzawm kal tlangin, Jehova chuan chi thlah lo pianna tûr chhûng inthlah châwng chu a lai lang a ni. A hun takah hêng thu puante hi Palestina rama chêng, nupa tûra inhual tawh Josefa leh Mari te chungah a innghat ta a. Josefa chu a mumang lamah Mari chuan thlarau thianghlimin fa a pai thu hriattîr a ni a. Vântirhkoh chuan: “Fapa a hring ang a, a hmingah Isua i sa ang: ani chuan a mite an thiltihsual lakah a chhandam dâwn si a,” a ti a.—Matthaia 1:20, 21.
11. (a) Jehova’n a Fapa chu mihring ṭha famkima lo piang tûrin engtin nge a buatsaih? (b) Engvângin nge Isua’n “a tlukpui tlanna” a pêk theih?
11 Isua chuan vânah mihring a nih hmain awmna a neih avângin hei hi naupaina naran a ni thei lo rêng rêng a ni. (Thufingte 8:22-31; Kolossa 1:15) A nunna chu Jehova thiltihtheihna mak tak hmangin Mari chhûla sawn a ni a, chu chuan, he Pathian Fapa mal hi mihring angin a piantîr thei ta a ni. (Johana 1:1-3, 14; Philippi 2:6, 7) Jehova chuan Isua chu Adama suala tihbawlhhlawh ni lo tûrin thil awm dân a kaihruai a. Tichuan, Isua chu Adama suala tihbawlhhlawh ni lovin, ṭha famkimin a lo piang ta a ni. Chutichuan, ani chuan Adama hloh tawh chu a nei ta a ni—hring nun ṭha famkim chu. A tâwp a tâwpah chuan, sual man khuh bo theitu a lo awm ta! Chu chiah chu Nisan ni 14, C.E. 33-a Isua tih chu a ni. Chu mi nî chhinchhiah tlâk takah chuan, Isua’n a hmêlmate kuta thih a inphal a, chutichuan “a tlukpui tlanna” chu a pe ta a ni.—1 Timothea 2:6, NW.
Hring Nun Ṭha Famkim Hlutna Chu
12. (a) Isua thihna leh Adama thihna inkâr danglamna pawimawh tak han hrilhfiah teh. (b) Engtin nge Isua chu mihring thu awihte “Chatuan Pa” a lo nih?
12 Isua thihna leh Adama thihna chuan danglamna a nei a—tlanna hlutna tilangsârtu chu. Adama chuan a Siamtu thu chu a duh thu renga awih lo a nih avângin thih a phû hle a. (Genesis 2:16, 17) Kawng lehlamah chuan, Isua chuan thih a phû lo hulhual a, ‘ani chuan thil reng a tihsual loh’ avângin. (1 Petera 2:22) Chuvângin Isua’n a thihin, mi sual Adama’n a thiha a neih loh hlutna nasa tak engemaw a nei a—hring nun ṭha famkim siam nâna dikna chu. Chutichuan, Isua thihna chuan inthawina hlutna a nei a ni. Vânah thlarau mi anga a lâwn khân, a inthawina hlutna chu Jehova hnênah a hlan a ni. (Hebrai 9:24) Chu mi a tih avângin, Isua’n sual mihringte a tlan a, Adama thlâkna an Pa thar, a lo ni ta a ni. (1 Korinth 15:45) Chhan ṭha tak neiin, Isua chu “Chatuan Pa” tia koh a ni. (Isaia 9:6) A awmzia han ngaihtuah teh! Pa sual, Adama chuan a thlah zawng zawngte hnênah thihna a theh darh a. Pa ṭha famkim, Isua chuan a inthawina hlutna chu mihring thuâwihte’n chatuan nunna an neihna tûrin a hmang a ni.
13. (a) Adama bâ Isua’n a nuai bo dân han tehkhin teh. (b) Engvângin nge Isua inthawina khân kan nu leh pa hmasa berte sual a khuh tel loh?
13 Nimahsela, engtin nge mi pakhat thihna chuan mi tam takte sual a khuh theih ang? (Matthaia 20:28) Kum engemaw zât kaltaa thu ziakah khân, tlanna chu heti hian kan tehkhin a: “Hna thawktu za tam tak awmna thil siamna hmun pui han ngaihtuah teh. Mi rinawm lo an hotupa chuan leibâ rulh nân an sumdâwnna a hralh a; chu thil siamna chu khâr a ni ta a. Tûnah chuan mi za tam takte chuan hna thawh tûr an nei lo va, an bill-te pawh an pe thei lo va. An nupui pasal te, an fa te, a ni, leibattîrtute thlengin mi pakhat ei rûkna avângin an tuar vek a nih hi maw! Tichuan thilṭha titu mi hausa pakhatin company bâ zawng zawng chu a rulh sak a; tin, thil siamna hmun pawh chu a hawng leh ta a. Chu ba rulhna chuan hnathawktu tam tak te, an chhûngte, leh leibattîrtute hnênah inchhâwk zângkhaina a thlen a ni. Mahse, a tîra hotupa chuan neihnunna tharah chanvo a nei em? Nei lo ve, tân ina khung a nih avângin hna a nei thei lo hlen tawh a ni! Chutiang bawkin, Adama bâ pakhat rulhna chuan a thlah mi maktaduai tam takte tân hlâwkna a thlen a—mahse Adama chuan a hlâwkpui ve lo,” tiin.
14, 15. Engvângin nge Adama leh Evi kha duh vâng renga sual titu tih theih an nih a, engtin nge kan dinhmun chu a danglam?
14 Hei hi a fel a ni. Adama leh Evi chu duh vâng renga sual an ni tih hre chhuak ang che. Anni chuan Pathian thu awih loh an thlang a ni. Kawng leh lamah chuan keini chu suala piang kan ni a, duh thlan theihna reng kan nei lo. Nasa takin bei mah ila, sual kan pumpelh ṭhak thei lo. (1 Johana 1:8) A châng chângin: “Thil ṭha tih ka duh laiin sualna ka hnênah a lo awm ṭhîn a ni. Ka rilru tak takin Pathian dân chuangah ka lâwm si ṭhîn a; nimahsela ka taksa pêngahte hian dân danglam a awm tih ka hria, chu chuan ka rilru dân a do va, ka taksa pêngtea sualna dân awm hnênah chuan salah mi hruai ṭhîn a. Mi rethei ka va ni teh lul êm!” tia ziaktu Paula angin kan ngaihtuah mai thei a ni.—Rom 7:21-24.
15 Chutichung pawhin, tlanna avângin beiseina kan nei a ni! Isua chu chi thlah a ni a, Pathian tiam angin chu chi thlah hmangin “khawvêla chi tin an la thawveng ang.” (Genesis 22:18; Rom 8:20) Isua inthawina chuan amaha rinna tilangtute tân chanvo hlu, mak ropui tak thlentu kawng a hawnsak a ni. Chu mi zînga ṭhenkhat lo ngaihtuah ila.
Krista Tlanna Aṭanga Hlâwkna
16. Sual dinhmuna ding nimah ila, Isua tlanna avângin eng hlâwkna nge kan chên theih?
16 Bible ziaktu Jakoba chuan hetiang hian a lo nemnghet a, “kan zain thil tam tak kan tisual fo ṭhîn,” tiin. (Jakoba 3:2) Amaherawhchu, Krista tlanna zârah kan sualte ngaihdam theih a ni. Johana chuan: “Tupawhin thil a tihsual chuan Pa hnêna mi sawipuitu, Isua Krista mi fel chu kan nei e; ani chu kan sualte thupha chawina a ni,” tiin, a lo ziak a. (1 Johana 2:1, 2) Dik takin, sual chu kan ngaizam mai mai tûr a ni lo. (Juda 4; 1 Korinth 9:27 khaikhin rawh.) Nimahsela, thil kan tihsual chuan ani chu ‘ngaihdam a peih’ tih ringngamin kan thinlung chu Jehova hnênah kan leih baw thei a ni. (Sâm 86:5; 130:3, 4; Isaia 1:18; 55:7; Tirhkohte 3:19) Tichuan tlanna chuan chhia leh ṭha hriatna thianghlim tak nên Pathian rawng min bâwltîr thei a, Isua Krista hminga ṭawngṭaina hmangin amah min pantîr thei bawk a ni.—Johana 14:13, 14; Hebrai 9:14.
17. Tlanna avângin eng hmabâk malsâwmnate nge lo awm thei?
17 Krista tlanna chuan Pathian thil tum tihhlawhtlinna kawng a hawng a ni—thu awih mihringte lei Paradis-a chatuana nung tûrin. (Sâm 37:29) Paula’n: “Pathian thutiamte chu engzât pawh ni se, amahah [Isua] chuan . . . a awm a ni” tiin, a lo ziak a. (2 Korinth 1:20) Dik takin, thihnain ‘ro a rêl’ a ni. (Rom 5:17) Tlanna chuan Pathian tân “hmelma hnuhnung ber” tihbo nân a bulṭhut a pe a ni. (1 Korinth 15:26; Thu Puan 21:4) Isua tlanna chu thi tawhte pawhin an hlâwkpui thei a. Isua chuan: “A hun a thleng dâwn ta, chutih hunah chuan thlâna awm zawng zawngin a [Isua] aw an hria ang a, an chhuak vek ang,” tiin, a sawi a ni.—Johana 5:28; 1 Korinth 15:20-22.
18. Sual chuan eng thil pawi tak nge mihringte chungah a nghah a, engtin nge hêngte hi Pathian khawvêl tharah thlâk a nih ang?
18 Kan tawn tûr nun hi a hlimawm dân tûr han ngaihtuah teh—tûn laia mi chîmbuaitu lungkhamna ata zalênna nun chu! Sual chuan Pathian nêna inrem lohnaah min dah mai ni lovin kan rilru, kan thinlung, leh kan taksa nên pawh min inrem lohtîr a ni. Amaherawhchu, Bible-in Pathian khawvêl tharah chuan, “chu mi khuaa awm chuan ‘Ka dam lo ve,’ an ti lo vang,” tiin, min tiam a ni. Ni e, tisa leh thinlung natnate chuan mihring nun a tichhe tawh lo vang. Engvângin maw? Isaia chuan a chhâng a: “Chu mi khuaa . . . mi awmte chu sual ngaihdamin an awm ang,” tiin.—Isaia 33:24.
Tlanna—Hmangaihna Lantîrna
19. Krista tlanna chu mimal takin engtin nge kan chhânlêt ang?
19 Hmangaihna chuan Jehova chu a hmangaih a Fapa rawntîr tûrin a chêttîr a. (Rom 5:8; 1 Johana 4:9) Hmangaihna chuan Isua chu “thihna chu mi tin a temsakna tûrin,” a chêttîr leh a ni. (Hebrai 2:9; Johana 15:13) Chhan ṭha tak neiin Paula chuan: “Kristia hmangaihna chuan min tîr lui a ni . . . A nungte chu anmahni tân an nun tawh loh va, an thih aia thia tholeha tân chuan an nun tawh zâwkna tûrin a ni, mi zawng zawng thih aiin a thih ni,” tiin, a ziak a ni. (2 Korinth 5:14, 15) Kan tâna Isua thiltih kan ngaihsân chuan, kan chhânglêt ngei ang. A tâwpah chuan, tlanna chuan thihna ata chhanchhuahna a awmtîr thei a ni! Isua inthawina chu kan chêtzia hmangin, thil narâna ruat anga lan chu kan duh lo ngei ang.—Hebrai 10:29.
20. Isua “thu” kan zawmna kawng ṭhenkhat chu engte nge ni?
20 Tlanna kan ngaihsân tak zetzia engtin nge kan lantîr ang? Man a nih hma lawkin Isua’n: “Miin mi hmangaih chuan ka thu a zâwm ang,” tiin, a lo sawi a. (Johana 14:23) Isua ‘thuah’ chuan a thupêk: “Chutichuan kal ula, hnam tina mite zirtîrahte siam ula, . . . baptis ula,” tih ṭhahnem ngai taka tihhlawhtlin hi a tel a ni. (Matthaia 28:19) Isua thu zawmnaah chuan kan thlarau lam unaute laka hmangaihna lantîr hi a tel bawk a ni.—Johana 13:34, 35.
21. Engvângin nge April ni 1, Hriatrengna hun serhah kan tel ve ang?
21 Tlanna kan ngaihsânzia lantîr theihna kawng ṭha berte zînga pakhat chu tûn kum April ni 1-a hman tûr Krista thih Hriatrengnaa tel vena hi a ni.a Hei pawh hi Isua “thu” zînga tel a ni, a chhan chu he hun serh a lo ṭan khân a hnungzuitute hnênah: “Mi hriatreng nân hei hi ti ṭhîn rawh u,” tia thu a lo pêk avângin. (Luka 22:19) He thil thleng pawimawh bera kan telna leh Krista thupêkte kan ngaihsak tak zetna hmangin, Isua tlanna hi Pathian chhandamna kawng a ni tih kan rinna nghet tak kan lantîr ang. Dik takin, “mi dang tuma hnênah chhandamna a awm lo” a ni.—Tirhkohte 4:12.
[Footnote-te]
a Tûn kumah April ni 1 chu Isua thih nî Nisan ni 14, C.E. 33 tlukpui a ni a. Tualchhûng Jehova Hriatpuitute hnênah he Hriatrengna hun serh hmanna tûr a hmun leh a hun zâwt fiah ang che.
I Hre Chhuak Thei Em?
◻ Engvângin nge mihringte chu an sual dinhmun ata an intlan theih loh?
◻ Eng kawngin nge Isua chu “a tlukpui tlanna” a nih?
◻ Engtin nge Isua’n hring nun ṭha famkim siam nâna dikna a neih chu kan hlâwkna atân a hman?
◻ Krista tlanna avângin eng malsâwmna nge mihringte chungah lo thleng?
[Phêk 15-naa milem]
Mihring ṭha famkim pakhat—Adama tlukpui—chauhvin rorêlna fel bûkna a inbûktâwktîr thei
[Phêk 16-naa milem]
Isua’n hring nun ṭha famkim siam nâna dikna a neih avângin, a thihna chuan inthawina hlutna a nei