A KAWM THU | ISUA’N MIN CHHANDAM—KHAWI AṬANGIN NGET?
Chhandam Kan Ngaih Chhan
“Hmeichhe hrin tawh mihring phawt chu rei lo tê dam, buainaa khat a ni. Pangpâr angin a lo chhuak a, a vuai leh a, hlimthla angin a thlâwk bo va, a awm hlen lo.”—Joba 14:1, 2.
Hmân lai ata tawh khân, mite chuan ṭhalai renga hrisêl taka chatuana nun a nawm dân tûr chu an lo suangtuah ṭhîn a. Mahse, a tak ram lungchhiatthlâk tak chu hei hi a ni: Kan thi thei, tih hi. Kum sângthum chuang kaltaa, Joba thusawi a chunga târ lan chu vawiin nî thlengin a la dik reng a ni.
Chatuana nun châkna kan neih chu a nasa hle a, mi tinte neih a ni bawk. Bible chuan Pathianin kan rilruah chatuan a dah bâkah, chu mi hriatthiam duhna pawh a dah tih min hrilh a ni. (Thuhriltu 3:11) Chutiang a nih chuan, hmangaihna Pathianin kan neih theih loh tûr neih châkna min pêk hi thil inâwm niin i hria em? I hre lo a nih chuan i tidik a ni ang. Pathian Thu chuan thihna chu hmêlma tiin a ko va, chu chu ‘tihbovin a awm dâwn’ tih min tiam a ni.—1 Korinth 15:26.
Thihna hi hmêlma a ni tih rinhlelhrual a ni lo. Mi pângngai tân chuan thihna hi duh chi a ni lo rêng rêng. Thil hlauhawm kan tawn hian pumpelh kan tumin, kan bihrûksan, a nih loh leh kan tlânchhiatsan a. Kan dam loh hian dam theih dân kawng kan dap a. Thihna min thlen thei thilte pumpelh tûrin theih tâwp kan chhuah ṭhîn a ni.
Hun rei tak ata lo awm tawh he hmêlma hi tihbo a ni ang tih rin theih chhan tûr kan nei em? Aw, nei e. Siamtu, Pathian Jehova chuan mihringte chu rei lo tê dama thi leh mai tûrin a siam lo va. Mihringte thihna chu atîra a thiltumah a tel lo. Mihringte chu leiah chatuana nung tûrin a siam a, chu a thiltum chu a tihlawhtling ngei ang.—Isaia 55:11.
Chuti chu, thihna chu engtin nge tihbo a nih ang? Hun kal tawh zawng zawngah, mihringte chuan thihna chu hneh tumin theih tâwp an chhuah a; mahse, an hlawhtling lo. Tûn laiah pawh, chu chu an bei chhunzawm zêl a. Mi thiamte chuan natna laka invênna lamah leh inenkawlna lamah hma an sâwn a, natna ṭhenkhat chu an hneh thei a ni. Anni chuan thilnungte inthlahchhâwn dân ziarângte thlengin an zir thiam tawh a. Hmun tam takah chuan chawhrualin, kum zabi kaltaa mite aiin tûn lai mite chu an dam rei tawh zâwk a ni. Mahse, thihna chu tihbo a ni lo rêng rêng. Bible chuan, “an zain vaivutah an chang leh vek” tiin a sawi a ni.—Thuhriltu 3:20.
He buaina rei tak awh hi chingfel tûrin mihring finna kan rinchhan a ngai lo hi thu lâwmawm tak a ni a. Pathian Jehova’n min chhandam tûr, a nih loh leh thihna ata min chhan chhuak tûrin ruahmanna a siam tawh a, chuta pawimawh ber chu Isua Krista a ni. (w15-E 03/01)