Chatuanin Kan Nung Thei

1. Engtin nge Jehova thutiam chatuana nunna chhût ngunnain min nghawng?

JEHOVA chuan a thu awihtute chu “chatuana nunna” a tiam a. (Rom 6:23) Jehova thil min tiamte ngun taka kan chhût chuan, amah kan hmangaihna a nasa lehzual ngei ang. Hei hi han ngaihtuah teh: Kan Pa vâna mi chuan min hmangaih êm avângin a hnên ata lâk hran kan ni ngai lo vang.

2. Engtin nge chatuan nunna thutiam chuan min ṭanpui?

² Pathian thutiam chatuana nunna chuan fiahna kan tawh mêkte tuar chhuak tûrin min ṭanpui a. Kan hmêlmate’n thahah min vau mah se, kan tlâwm lo vang. Engvângin nge? Jehova tâna rinawm taka kan thi a nih chuan, thih theih tawh lohna nun beiseina neiin min kai tho dâwn tih kan hriat vâng a ni. (Joh. 5:28, 29; 1 Kor. 15:55-58; Heb. 2:15) Engvângin nge kan tân chatuana nun chu thil theih a ni tih kan chian theih? A chhan ṭhenkhat lo ngaihtuah ta ila.

JEHOVA CHU CHATUANIN A NUNG

3. Engvângin nge Jehova’n chatuanin min nuntîr thei tih kan chian theih? (Sâm 102:12, 24, 27)

³ Jehova chu nunna Tuikhur leh chatuana nung reng a nih avângin, chatuanin min nuntîr thei tih kan hria a ni. (Sâm 36:9) Ani chu a awm reng a, a awm reng bawk ang tih tichiangtu Bible thu ṭhenkhat hi lo chhinchhiah ang che. Sâm 90:2-na chuan Jehova chu “chatuan ata chatuan thleng pawhin” a awm tih a sawi a. Sâm 102-na pawhin chutiang tho chuan a sawi a ni. (Sâm 102:12, 24, 27 chhiar rawh.) Zâwlnei Habakuka pawhin kan Pa vâna mi chungchângah: “Aw LALPA ka Pathian, ka Mi Thianghlim, chatuan mi i ni lo vem ni? I thi ngai lo,” tiin a ziak a ni.—Hab. 1:12.

4. Jehova chu engtik lai pawhin a awm tih ngaih dân chu hriatthiam harsa kan ti a nih chuan mak kan ti tûr a ni em? Hrilhfiah rawh.

⁴ Jehova chu ‘kumkhuain’ a awm tih ngaih dân chu hriatthiam harsa i ti em? (Is. 40:28) Chu chu thil mak a ni lo. Elihua chuan Pathian chungchângah: “A kum zâtte chu zawn chhuah rual a ni lo,” tiin a sawi a ni. (Job. 36:26) Amaherawhchu, thil eng emaw kan hriatthiam loh avâng maiin chu chu a dik lo tihna a ni lo. Entîr nân, êng hnathawh dân hi kan hre thiam vek lo pawh a ni thei a; mahse, chu chu êng a awm lo tihna a ni em? Ni lo ve! Chutiang bawkin, keini mihringte hian Jehova lo awm tawh dân leh a la awm zêl dân tûr chu kan hre thiam vek ngai lo pawh a ni thei a. Mahse, hei hi Pathian chu chatuanin a nung lo tihna a ni lo. Siamtu chungchânga thu dik chu kan hriatthiam leh thiam lovah a innghat lo. (Rom 11:33-36) Ani chu êng lo chhuahna hnâr nî angte pawh tiamin, lei leh vâna thilte awm hma daih aṭangin a awm tawh a ni. Jehova chuan “a thiltihtheihnain lei a siam” tih kan chiang a. Ni e, ani chu ‘vân a tihparh’ hma pawhin a awm tawh a ni. (Jer. 51:15; Tirh. 17:24) Chatuanin kan nung thei tih kan chian theih chhan dang chu eng nge ni?

CHATUANA NUNG TURA SIAM KAN NI

5. Mihring nupa tuak hmasa berte khân eng beiseina nge an neih?

⁵ Jehova chuan mihringte tiam lohvin, leia thil nungte chu dam chin tûr neiin a siam a. Mihringte chu thi ngai lo tûra inbeiseina a pe a ni. Mahse, Jehova’n Adama chu: “A chhia leh a ṭha hriatna thing rah erawh hi chu i ei tûr a ni lo, i ei chuan i ei nî la lain i thi ngei tûr a ni,” tiin a vaukhân a. (Gen. 2:17) Evi leh Adama’n Jehova thu awih se chuan an thi lo vang. Chuvângin, engtik nîah emaw Jehova’n anni chu “nunna thing” rah ei a phalsak ang tia thutâwp siam chu thil inâwm tak a ni a. Chu chu ‘kumkhuain an nung’ ang tih a tiamna ang a ni.b—Gen. 3:22.

6-7. (a) Eng thil dangin nge mihringte hi thi tûra siam an ni lo tih târ lang? (b) Eng thil nge tih i châk? (Milem en rawh.)

⁶ Scientist ṭhenkhat chuan tûna kan dam chhûnga kan thil hriat zawng zawngte aia tam zâwk kan thluakin a khâwl khâwm thei tih finfiahna an hmu chhuak a, chu chu thil ngaihvenawm tak a ni. Kum 2010 khân Scientific American Mind tih chanchinbua thuziak pakhat chuan kan thluak hian kum 300 chhûnga TV-a pêk chhuah ang hû vêla tam a khâwl khâwm thei nia a chhût thu a sawi a. Mahse, kan thluak hian chu aia tam daih chu a khâwl khâwm theih a rinawm. Chu chuan kum 70 emaw, 80 emaw chhûnga kan thil hriatte aia tam daih khâwl khâwm thei tûrin Jehova’n kan thluak hi a siam tih a târ lang a ni.—Sâm 90:10.

⁷ Pathian Jehova chuan nun chhunzawm zêl duhna nasa tak neiin min siam bawk a. Bible chuan mihringte chungchângah Pathian chuan an “rilruah chuan chatuan a dah” tiin a sawi a ni. (Thur. 3:11) Hei hi thihna hmêlma anga kan thlîr chhan pakhat a ni. (1 Kor. 15:26) Nasa taka kan dam loh hian kan dinhmun chu pawmin kan tlâwm mai em? Tlâwm mai lo. A tlângpuiin doctor kan pan a, natna do lêt tûrin damdawi kan ei pawh a ni thei bawk. A nihna takah chuan, thihna kan pumpelh theih nân kan tih theih apiang kan ti a ni. Kan hmangaih tak tu emaw a thih hian ani chu a upa emaw, a naupang emaw pawh ni se, lungngai leh rilru nain kan awm ṭhîn a ni lâwm ni? (Joh. 11:32, 33) Hmangaihna nei tak min Siamtu chuan mihringte hi nun chhunzawmtîr zêl tum lo se chuan, nun chhunzawm zêl châkna leh theihna min pe lovang tih a chiang a ni. Mahse, tâwp thei lo nun kan nei thei tih, loh theih lova min rintîrtu chhan dang kan nei bawk. Jehova’n a tîra a thiltum a thlâk lohzia tilang chiangtu hun kal tawh leh tûn huna a thiltih ṭhenkhat i lo ngaihtuahho vang u.

JEHOVA THILTUM CHU A INTHLAK DANGLAM LO

8. Kan tâna Jehova thiltum chungchângah, Isaia 55:11 aṭangin eng nge kan hriat chian theih?

⁸ Evi leh Adama-te an suala an thlahte thihna an rochun chung pawhin, Jehova chuan a thiltum chungchângah a rilru a thlâk chuang lo va. (Isaia 55:11 chhiar rawh.) A thiltum chu chatuana kan nun theih nâna hun remchâng min pêk a la ni reng a. A thiltum tihlawhtling tûra Jehova thusawi leh thiltihte kan ngaihtuah hian chu chu a dik tiin thutâwp kan siam thei a ni.

9. Pathianin eng thu nge a tiam? (Daniela 12:2, 13)

⁹ Jehova chuan mitthite a kaitho dâwn tih leh an tân chatuana nun theihna hun remchâng a siamsak ang tih a tiam a. (Tirh. 24:15; Tit. 1:1, 2) Mi rinawm Joba chuan Jehova’n mitthite kaihthawh leh a châk tih a hre chiang hle. (Job. 14:14, 15) Zâwlnei Daniela pawhin mihringte’n chatuana nun theihna hun remchâng neiin, thawhleh beiseina an nei tih a hre bawk. (Sâm 37:29; Daniela 12:2, 13 chhiar rawh.) Isua hun laia Juda mite pawhin Jehova’n a chhiahhlawh rinawmte “chatuana nunna” a pe thei tih an hria a. (Lk. 10:25; 18:18) Isua pawhin he thutiam hi a sawi nawn fo ṭhîn a, amah ngei pawh a Pain a kaitho a ni.—Mt. 19:29; 22:31, 32; Lk. 18:30; Joh. 11:25.

10. Hun kal tawha thawhlehnate chuan eng nge a finfiah? (Milem en rawh.)

¹⁰ Jehova chu Nunna Petu a ni a, mite nunna pekîr leh tûrin thiltihtheihna a nei a ni. Ani chuan zâwlnei Elija chu Zarephath khuaa hmeithai fapa kaitho leh tûrin thiltihtheihna a pe a. (1 Lal. 17:21-23) A hnuah, Pathian ṭanpuinain zâwlnei Elisa pawhin Sunam nu fapa thi tawh a kaitho ve bawk. (2 Lal. 4:18-20, 34-37) Chûngte leh thawhlehna dangte chuan Jehova’n mite nunna pekîr leh tûrin thiltihtheihna a nei tih a tichiang hle. Isua chuan leia a awm lai khân, chu thiltihtheihna chu a Pain a pe tih a lantîr a. (Joh. 11:23-25, 43, 44) Tûnah Isua chu vânah a awm tawh a, a hnênah “lei leh vâna thuneihna zawng zawng” pêk a ni tawh bawk. Chuvângin, ani chuan ‘thlâna awm zawng zawngte’ chatuana nun beiseina neiin kaihthawh an ni ang tih thutiam chu a thlen famkimtîr thei a ni.—Mt. 28:18; Joh. 5:25-29.

11. Engtin nge tlannain chatuana kan nun theihna kawng a hawn?

¹¹ Engvângin nge Jehova’n a Fapa hmangaih tak chu hrehawm tuara a thih a phal? Isua chuan a chhan heti hian a sawi a ni: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tu pawh a ring apiang an boral loh va, chatuana nunna an neih zâwk nân,” tiin. (Joh. 3:16) Kan sualte khuh bo nân Pathian chuan tlanna atân a Fapa pein chatuana nunna kan neih leh theihna kawng a hawng a. (Mt. 20:28) Tirhkoh Paula chuan Pathian thiltum zînga he thil pawimawh tak hi hrilhfiahin heti hian a ziak a ni: “Mihring vânga thihna a lo awm avângin mihring avâng vêkin mitthi thawhlehna a lo awm ta bawk a. Adama-ah chuan mi zawng zawng an thi ṭhîn ang hian Krista-ah chuan mi zawng zawng tihnunin an awm bawk ang,” tiin.—1 Kor. 15:21, 22.

12. Kan tâna Jehova thiltum hlen chhuahnaah Lalramin engtin nge a ṭanpui ang?

¹² Isua chuan a hnungzuitute chu Pathian Ram lo thleng tûr leh leia Pathian duh zâwng tih ni tûra dîl tûrin a zirtîr a. (Mt. 6:9, 10) Pathian thiltum zîngah chuan mihringte he leia chatuana an nun pawh a tel a ni. Chumi hlen chhuak tûr chuan Jehova’n a Fapa chu Messia Lalrama Lal ni tûrin a ruat tawh a. Chu bâkah, Pathian chuan a duh zâwng tih famkimnaa Isua thawhpui tûrin lei ata mi 1,44,000 a la khâwm mêk a ni.—Thup. 5:9, 10.

13. Jehova’n eng nge a tih mêk a, chutah chuan engtin nge kan tel ve?

¹³ Tûnah hian Jehova chuan “mipui tam tak” la khâwmin, a Lalram khua leh tui ni tûrin a zirtîr mêk a. (Thup. 7:9, 10; Jak. 2:8) Hlauhna leh indona avânga inṭhen hranna khawvêla nung chung pawhin he pâwla mite hi chuan ram te, hnam te, leh mi mal inhuatnate chu hneh tumin theih tâwp an chhuah a ni. Anni chuan entîr neiin an khandaihte chu leilehna hmâwr zumahte an chher tawh. (Mik. 4:3) Mi tam takte thihna thlentu indonatea tel aiin, anni chuan Pathian dik leh a thiltumte chungchâng mi dangte zirtîrin “nunna tak tak” hmu tûrin mite chu an ṭanpui a ni. (1 Tim. 6:19) Pathian Ram an thlâwp avângin chhûngte dodâlna, a nih loh leh sum leh pai lama harsatna an tâwk pawh a ni thei. Mahse, Jehova chuan an mamawhte a pe a ni. (Mt. 6:25, 30-33; Lk. 18:29, 30) Chûng thu dikte chuan Pathian Ram chu a tak a ni tih leh Jehova thiltum chu a thlen famkimtîr zawm zêl ang tih min rinnghehtîr bawk.

HMA LAM HUN DUHAWM TAK

14-15. Engtin nge chatuan atâna thihna nuaibo tûra Jehova thutiam chu a thlen famkim ang?

¹⁴ Tûnah hian Isua chu vânah a awm a, Jehova thutiam zawng zawngte chu a thlen famkimtîr ang. (2 Kor. 1:20) Kum 1914 aṭang khân, Isua chuan a hmêlmate chu a hneh chho zêl a. (Sâm 110:1, 2) Nakin lawkah a rorêlpuite nên hnehna pumhlûm changin mi suaksualte chu an tiboral ang.—Thup. 6:2.

¹⁵ Isua Kum Sâng Rorêl chhûngin mitthite kaihthawh an ni ang a, thuawih mihringte chu ṭhat famkimnaa hlân kai an ni ang. Fiahna hnuhnûng ber zawhah, Jehova’n mi felte anga ro a rêlsakte chuan “ram hi an luah ang a, a chhûngah hian kumkhuain an awm ang.” (Sâm 37:10, 11, 29) “Hmêlma hnuhnûng ber . . . thihna” “tihbova” a awm tûr chu a va hlimawm dâwn êm!—1 Kor. 15:26.

16. Jehova rawngbâwl tûra min chêttîrtu ber tûr chu eng nge ni?

¹⁶ Kan hmuh tâk angin, chatuana nung tûra kan beiseina chuan Pathian Thu a ṭanchhan tlat a. Chu beiseina chuan he ni hnuhnûng hun khirh tak chhûng hian rinawm reng tûrin min ṭanpui thei a ni. Mahse, Jehova tilâwm tûr chuan chatuana nun châkna mai aia tamin min chêttîr tûr a ni a. Jehova leh Isua tâna kan rinawm reng nachhan bul ber chu anmahni kan hmangaihna thûk tak vâng a ni. (2 Kor. 5:14, 15) Chu hmangaihna chuan anmahni entawn tûr leh mi dangte hnênah kan beiseina neih hrilh tûrin min chêttîr a ni. (Rom 10:13-15) Mahni hmasial lo leh thilphal tak nih kan zir hian, chatuana a ṭhian ni tûra Jehova duh zâwng mi kan lo ni ang.—Heb. 13:16.

17. A mi mal takin eng mawhphurhna nge kan neih? (Matthaia 7:13, 14)

¹⁷ Chatuana nunna nei tûrte zîngah kan tel ve ang em? Jehova chuan an zînga tel theihna hun remchâng min pe a. Tûnah hian nunna kawnga kal reng chu kan thlan a ngai a ni. (Matthaia 7:13, 14 chhiar rawh.) Chatuana kan nun hunah nun chu eng ang nge ni ang? Chumi zawhna chhânna chu a dawta thuziakah kan sawiho vang.