Tûn Laia ‘Tihdam Rawngbâwlna’ Pathian Hnêna Mi A Ni Em?

RAM ṭhenkhatah chuan, mi tam takin “tihdam theih loh” nia an hriat natnate tihdam theihna nia an ngaih hmun thianghlimte tlawhtu tam tak hmuh tûr an awm a. Ram dangah chuan, dawithiamte chuan hmuh theih loh ramhuai thiltihtheihna hmangin mite chu an tidam thei niin an insawi thung a. Hmun dang lehah chuan, tihdamna inkhâwmte neih huai huai a ni a; chutah chuan dam lote chu an ṭhutna lîr thei (wheelchair) aṭanga zuang chhuakin emaw, an zak dona tiangte chu paihin emaw dam niin an inchhâl a ni.

Chutiang tihdam rawngbâwlna neite chu sakhaw dang dang vuantute an ni deuh vek a; chûng mite chu phatsantu, dik lo, a nih loh leh ramhuai betu angin an inpuh tawn ṭhîn a ni. Chuvângin, zawhna lo awm thei ta chu, Pathianin pâwl inkalh tak takte hmangin thilmak a ti em? tih hi a ni. Tihah chuan, Bible-in: “Pathian chu buaina Pathian a ni lo va, remna Pathian a ni zâwk,” a ti si a. (1 Korinth 14:33) A nih chuan, chutiang ‘tihdam rawngbâwlna’ chu Pathian hnêna mi a ni tak zet em? Tidamtu ṭhenkhat chuan Isua hminga tidam niin an inchhâl a ni. Isua’n mite a tihdam dân chu i lo bih chiang ang u.

Isua’n Mite A Tihdam Dân

Isua dam lo tihdam dân chu tûn laia tihdam rawngbâwlna neitute tih dân nên a inang lo hle. Entîr nân, Isua chuan ṭanpui dîla lo kal apiangte chu a lo tidam zêl a. Mipui zînga mi tu tuemaw thlang chhuaka tidamin, mi dangte chu tihdam lohvin a kîrtîr ngai lo. Tin, Isua tihdamte chu an dam chiangin, vawilehkhatah an dam nghâl deuh vek a ni. Bible chuan: “A hnên ata thiltihtheihna a chhuak a, mi tin a tihdam avângin mipui zawng zawng chuan amah deh an tum a,” a ti.​—Luka 6:19.

An tihdam theih lohte chu rinna an tlâkchham vâng nia puh ṭhîntu, tûn laia tihdam rawngbâwlna neitute nêna inkalh takin, Isua chuan amah la ring lo mi ṭhenkhat pawh a tidam a ni. Entîr nân, ṭum khat chu Isua’n tihdamna pawh ngên lo midel pakhat chu panin, a tidam a. A hnuah Isua chuan: “Pathian Fapa i ring em?” tiin a zâwt a. Chu pa chuan: “Ka pu, ani chu tunge ni, ka rin theih nân?” tiin a chhâng a. Isua chuan: “A betu mêk che hi a ni alâwm,” tiin a hrilh a ni.​—Johana 9:​1-7, 35-38.

Heti hian i ngaihtuah mai thei, ‘Rinna chu Isua tihdam nih nâna thil ṭûl a nih loh chuan, engvângin nge Isua’n a tihdamte hnênah: “I rinna hi i dampui,” a tih ṭhin?’ tiin. (Lk. 8:48; 17:19; 18:42) Chu chu, Isua chuan amah pan duh lotute chuan tihdam nih theihna hun remchâng an hmaih laiin, rinnain a chêttîr avânga amah zawngtute chuan tihdamna an chang tih a sawina a ni. Chutianga tihdama awmte chu an rinna avânga dam ni lovin, Pathian thiltihtheihna avânga dam an ni. Bible chuan Isua chungchângah: “Khatia Pathianin ani chu thlarau thianghlim leh thiltihtheihnaa a vûrzia kha; ani chuan mi chunga tiṭha leh diabola tihduhdah zawng zawng tidamin a fang vêl ṭhîn a, Pathian a hnênah a awm avângin,” tiin a sawi a ni.​—Tirhkohte 10:38.

A tlângpui thuin, tûn laia tihdamnaah hian pawisa hian hmun pawimawh tak a chang niin a lang a. Tihdam rawngbâwltute chu pawisa khawn thiam tak an ni hlawm ṭhîn. Chûng zînga pakhat chuan khawvêl pum huapa thlîrtute hnên aṭangin kum khatah Dollar maktaduai 89 (U.S.) vêl a hui lût nia sawi a ni. Tin, tihdam beiseia hmun thianghlim tlawhtute hnên aṭangin sakhaw pâwlte chuan hlâwkna an têl ve bawk. Chu mi nêna inkalhin, Isua chuan a tihdamte hnên aṭangin pawisa a khawn ngai lo va. Ṭum khat phei chu an tân ei tûr a pe hial zâwk a ni. (Matthaia 15:​30-38) Isua’n a zirtîrte thu hril tûra a tirh chhuah khân, an hnênah: “Dam lote tidam ula, mitthite kaitho ula, phârte tithianghlim ula, ramhuaite hnawt chhuak ang che u; a thlawnin in hmu a, a thlawnin pe ang che u,” tiin a hrilh a ni. (Matthaia 10:8) Engvângin nge tûn laia tihdam rawngbâwltute tih dân leh Isua tih dân a inan loh êm êm le?

“Tihdamna” ​—Khawi Aṭang Nge?

Kum kal taahte khân, damdawi lama mi thiam ṭhenkhat chuan tihdam rawngbâwltute inchhâlna chu an zir chiang a. Eng nge an hmuh chhuah? London-a Daily Telegraph chanchinbu sawi dânin, chu mi chungchâng kum 20 chhûng chhuitu England-a doctor pakhat chuan: “Tihdamna chanchin bengverh tak takte zîngah damdawi lama finfiahna dâwl pakhat mah a awm lo,” a ti. Mahse, mi tam takte chu mi thianghlimte thil neihte, hmun thianghlimte, a nih loh leh tihdam rawngbâwlna neitute thiltihtheihna avânga dam niin an inhre tak zet a ni. Anni chuan bum an tâwk a ni thei ang em?

Isua chuan Tlâng Chunga A Thusawi lâr takah, sakhaw hruaitu derte chuan a hnênah: “Lalpa, Lalpa, . . . i hmingin thil mak tam takte kan ti ṭhîn lo vem ni,” an la ti ang a. Mahse, ani chuan: “Nangni thil sual tite u, ka hre ngai lo va che u, ka hnên ata kal bo rawh u,” tiin a la chhâng ang tih a sawi a ni. (Matthaia 7:​22, 23) Chutianga tidamtute’n an thiltihtheihna lo chhuahna nia an sawite chungchângah, tirhkoh Paula chuan: “Chu Dân Bawhchhepa chu Setana chakna nên a lo kal ang a, thiltihtheihna tinrêng te, chhinchhiahna tinrêng te, dâwt thilmak tinrêng te nên a lo thawk ang, . . . fel lohna bumna tinrêng nên,” tiin a vaukhân a ni.​—2 Thessalonika 2:​9, 10.

Chu bâkah, mi thianghlimte thil neihte, milem te, leh milim te nêna inkûngkaihna nei “tihdamna” chu Pathian hnêna mi a ni thei lo. Engvângin nge a nih theih loh? Pathian Lehkha Thu chuan: “Milem biak hi tlânsan rawh u,” tiin leh “Milem lakah inthiarfihlîm rawh u,” tia chiang taka a sawi avângin. (1 Korinth 10:14; 1 Johana 5:21) Chutiang chi “tihdamna” chu biakna dik ata mite la pêng tûra Diabola ngamthlêmnate zînga mi a ni. Bible chuan: “Setana meuh pawh êng tirhkohvah a insiam chawp si ṭhîn,” a ti si a.​—2 Korinth 11:14.

Isua leh Tirhkohte’n Mite An Tihdam Chhan

Tihdamna chanchin dik tak Thuthlung Thara chhinchhiahte chuan Isua leh tirhkohte chu Pathian hnêna mi an nihzia chiang takin a târ lang a. (Johana 3:2; Hebrai 2:​3, 4) Isua tihdam rawngbâwlna chuan a thuchhah ken chu a thlâwp a ni: “Isuan an inkhâwmna inahte zirtîrin, ram chanchin ṭha chu hrilin . . . natna tinrêng . . . tidamin Galili ram zawng zawng a fang vêl a.” (Matthaia 4:23) Dam lote tihdam mai ni lovin, mipui hrai puar te, thlipui hau reh te, leh mitthi kaihthawh te hial pawh tiamin, Isua thilmak tihte chuan a Lalram hnuaia thuâwih mihringte tâna a tihsak tûrte chu a târ lang a ni. Chanchin ṭha a va ni tak êm!

Isua leh tirhkohte leh chutiang thilpêk an pêk chhâwnte an thih hnu chuan, chutiang thilmak tih theihna, a nih loh leh thlarau thilpêkte chu a tâwp tawh niin a lang. Tirhkoh Paula chuan: “Thu hrilhnate hi awm mah sela tihbân a la ni ang a, ṭawng hriat lohte hi awm mah sela a la bâng ang a, [Pathian târ lan] hriatna hi awm mah sela tihbân a la ni ang,” tiin a ziak si a. (1 Korinth 13:8) Engvângin nge? Tihdamna pawh tiama chutiang thilmak tihnate’n a thiltum​—Isua chu thutiam Messia a nihzia leh Kristian kohhran chuan Pathian duhsakna a hlawhzia târ lanna​—chu a hlen tawh avângin, mamawh a ni tawh lo va; “tihbân” a ni.

Chutichung pawhin, Isua tihdam rawngbâwlna chuan tûn laiah kan tân thu pawimawh tak a la pai cheu va. Isua zirtîr Pathian Ram chanchin chu kan ngaihsak a, kan rin bawk chuan, thlarau lam leh tisa lama Pathian thâwk khum hrilh lâwkna thu: “Chu mi khuaa awm chuan ‘Ka dam lo ve,’ a ti lo vang,” tih a thlen famkim hun chu nghâkhlel takin kan thlîr thei a ni.​—Isaia 33:24; 35:​5, 6; Thu Puan 21:4. (w08 12/1)