Retheihna—A Tihven Hlenna Hmu Chhuakin

KHAWVEL hmun tinah retheihna chanchin duhawm lo tak awm mah se, engemaw tih theih awm nia beisei nei an awm tlat a ni. Entîr nân, Manila Bulletin chanchin bu thupuiin a sawi angin, Asian Development Bank chuan, “Asia khawmual chuan kum 25 chhûngin retheihna a nuai bo thei” dâwn tih a sawi a. Chu bank chuan mite chu retheihna khûr ata kai chhuak tûrin sumdâwnna lama hmasâwn chu a rawt a ni.

Pâwl dangte leh sawrkâr dangte chuan retheihna tihven nân thurâwn leh ruahmanna tam tak an siam chhuak a. Chûng zîngah chuan: khawtlâng hnêna ṭanpuina pêk te, zirna lam tihhmasâwn te, ram hausate hnêna ram retheite pawisa bat ngaihdam te, rethei an tamna ramin an thil siam chhuahte awlsam taka an hralh theihna tûra ram dang thil lâkluh khapna dân paih bo te, leh retheite awmna tûr in saksak te” a tel a ni.

Kum 2000 khân, United Nations General Assembly chuan kum 2015-a tihhlawhtlin tûr thiltum a insiam a. Chûng thiltumah chuan retheih luatnate leh, ṭâmnate bâkah, ram pakhat chhûnga hlawh lâkluh zât inthlauh lutuknate nuai bo pawh a tel a ni. Chûng thiltumte chu eng tikhawpa ṭha pawh ni se, mi tam tak chuan he inpumkhat lohna khawvêlah hian a hlawhtlin theih an ring lo a ni.

Retheihna Hmachhawn Nâna Rahbi Chhawr Tlâkte

Khawvêl pum puia hmasâwn tak tak chu a beisei awm vak loh avângin, miin ṭanpuina chu khawi aṭangin nge a hmuh ang? A hmaa târ lan tawh angin, finna chhawr tlâk tak a awm a, chu chuan tûnah ngei pawh mite chu a ṭanpui thei a ni. Chu chu eng nge ni? Chu chu Pathian Thu, Bible hi a ni.

Engin nge Bible hi chanchin hmuh theihna zawng zawngte laka danglam tak nihtîr? Thuneihna sâng ber, min Siamtu hnêna mi a ni a. Ani chuan chu lehkhabu phêk tinah chuan finna hlu tak a dah a ni​—mi zawng zawng tâna hmun tin leh eng lai pawha hman tlâk thu bul ṭangkai tak takte chu. Hêng thu bulte nunpui a nih chuan, retheite chu tûnah ngei pawh nun lungâwithlâk nei tûrin a ṭanpui thei a. Entîrna ṭhenkhat lo en ila.

Tangka sum thlîr dân dik nei rawh. Bible chuan: “Finna hi himna a ni si, tangka sum himna a ni bawk; hriatna ṭangkaizia erawh chu, a neitu nun chu finnain a tiharh [“humhim,” NW] ṭhîn,” a ti a. (Thuhriltu 7:12) He châng hian eng nge min hrilh? Tangka sum hi engkim a ni lo. Himna engemaw chen chu min pe thei ngei a. Kan thil mamawhte min leitîr thei a ni; mahse, chu chuan chin tâwk a nei a. Thil hlu tak, tangka sumin a lei theih loh thil a awm a ni. He thu dik hriatna hian khawvêl thil hauhsakna chu a hmun tûr dik takah min dahtîr thei ang a; chuti chuan, nuna tangka sum neih tum rengte beidawnnate chu kan pumpelh ang. Tangka sum chuan nunna a lei thei lo va, fing taka khawsakna erawh chuan tûna kan nun ngei pawh a humhim theih bâkah, tâwp thei lo nun neih theihna kawng pawh min hawnsak hial thei a ni.

I neih bâkin nung suh. Kan thil duh apiang hi kan mamawh a ni kher lo. Kan mamawh chu kan dah pawimawh ber tûr a ni. Thil engemaw chu kan mamawh niin kan inhre nghâl tlat thei; mahse, a nihna takah chuan kan mamawh ni lovin, kan duh vâng mai a lo ni ṭhîn. Mi fing chuan a pawisa thawh chhuah chu mamawh zualpui​—ei leh in te, silh leh fên te, chênna in te, leh thil dang dang te atân a hmang hmasa ang. Chuta a chuang bângte a hman hmain, thil dang lei belh nâna a daih dâwn leh dâwn loh chu a ngaihtuah ang. A tehkhin thu pakhatah, Isua chuan mi pakhatin ‘atîrin ṭhuin . . . a man tûr chin a chhût’ tih a sawi a ni.​—Luka 14:28.

Philippines rama fa pathum nei nu leh pa mal ṭan, Eufrosina chu kum engemaw zât aṭanga a pasalin a kalsan avângin, inchâwm nâna pawisa lâkluhna kawngah harsatna tâwk a, pawisa chu fîmkhur takin a hmang ṭhîn a. Chutah, pawisa an neih zât an hmanna kawnga an ngaih pawimawhte hre tûrin a fate chu a zirtîr a ni. Entîr nân, a fate’n an thil duhzâwng engemaw an hmu thei a. Lei lo vang, ti mai lovin, heti hian a chhûtpui ṭhîn a: “In duh a nih chuan in nei thei alâwm; mahse, duh in thlan a ngai ang. Thil pakhat lei nân chauh pawisa kan nei a. In thil duh chu kan lei dâwn nge, tûn kâr atâna kan chawhmeh tûr sa tlêm tê emaw, thlai hnah emaw kan lei dâwn zâwk? In duh thlang rawh u,” tiin. A tlângpui thuin, naupangte chuan an hre thiam thuai a, thil dang aiin ei leh in tûr an thlang zâwk ṭhîn a ni.

Lungawi rawh. Bible thu bul dang chuan: “Ei tûr leh silh tûr neiin chûngah chuan kan lungawi ang,” a ti a. (1 Timothea 6:8) Tangka sum ngawr ngawr chuan hlimna a thlen lo. Mi rethei tam tak an hlim êm êm laiin, mi hausa tam tak chu an hlim lo va. Mi retheite chuan nuna thil mamawhte chauh neia lungawi dân chu an zir a ni. Isua chuan thil pawimawh zâwk tin zâwn thei “mit fîm” neih chungchâng a sawi a ni. (Matthaia 6:22) Chu chuan mi chu lungawi tûrin a ṭanpui a. Mi rethei tam tak chuan Pathian nêna inlaichînna ṭha an neih avângin, an lungawi a, chhûngkaw nun hlim an nei a ni​—tangka suma lei theih loh chu.

Hêngte hi mi retheite’n an dinhmun an hmachhawn theih nâna Bible thurâwn chhawr tlâk takte zînga ṭhenkhat mai a ni a. Thil dang tam tak pawh a la awm a ni. Entîr nân, sum khawh ralna chîn dân ṭha lo zialzûk leh pawisa khelhna te pumpelh rawh; nuna thil pawimawh zâwk, a bîk takin thlarau lam thiltum, chu hre rawh; hna zawn hmuh harsatna hmunah chuan, mi dangte mamawh thiamna neih tum rawh, tihte hi. (Thufingte 22:29; 23:21; Philippi 1:​9-​11) Bible chuan “finna leh ngaihruat thiamna dik tak” hmang tûrin a fuih che a ni, ‘i nunna atân nunna a nih’ dâwn avângin.​—Thufingte 3:​21, 22.

Bible thurâwnte chuan retheihna nêna inchai buaite chu tlêm azâwngin chhâwk mah se, nakina a la awm zêl dâwn leh dâwn lohvah zawhna a la awm cheu va. Mi retheite chu rethei reng tûra ruat an ni em? Nasa taka hauhsakna leh a lutuka retheihna inkâr inthlauhna hi siam ṭhat a ni ngai ang em? Mi tam takin an hriat loh a chinfel dân kawng chu i lo chhût ang u.

Bible-in Beisei Chhan Tûr A Pe

Mi tam takin Bible chu lehkhabu ṭha a ni tih an pawm a. Amaherawhchu, inthlâk danglamna ropui tak lo thleng thuai tûr chanchin a sawi chu an hmaih ṭhîn.

Pathianin retheihna pawh tiamin mihringte harsatna zawng zawng tiveng tûrin chêt lâk a tum a. Mihring sawrkârte’n an tihtheih lohzia, a nih loh leh an tihduh lohzia chu an lantîr tawh avângin, Pathianin thlâk thleng a tum a ni. Engtin nge? Bible chuan Daniela 2:​44-ah chiang takin a sawi: “Vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram zawng zawngte hi a tikeh sawmin a tiral zâwk ang a, kumkhuain a ding reng ang,” tiin.

Hêng “ram zawng zawngte,” a nih loh leh sawrkârte a tihchhiat hnuah chuan, Pathian ruat Lalin ro a rêl tawh ang. Chu Rorêltu chu mihring ni lovin, Pathian anga vân lama thiltithei tak, tûna intluk tlân lohnate tireh tûra thiltihtheihna neitu hi a ni. Chu mi ti tûrin Pathianin a fapa neih chhun chu a ruat a ni. (Tirhkohte 17:31) He Rorêltuin a tih tûr chu Sâm 72:​12-14 chuan a târ lang: “Pachhiain a auhvin ani chuan a chhanhim ang a, mi rethei, ṭanpuitu nei lo pawh chu, a chhanhim ang a. Mi rethei leh pachhiate chu a khawngaih ang a, pachhiate nunna chu a chhandam ang. An nunna chu hnehchhiahna leh nunrâwnna lak ata a tlan ang a, an thisen chu ani ngaih chuan hlu tak a ni dâwn si a,” tiin. Beisei tûr ropui tak a va ni êm! A tâwpah chuan hahdamna a thleng dâwn ta! Pathian ruat Rorêltu chuan mi rethei leh pachhiate tân thil a rawn ti dâwn a ni.

Chu mi hunah chuan retheihna nêna inkûngkaih buaina tam tak chu tihvên a ni bawk ang. Sâm 72 châng 16 chuan: “Leiah, tlâng chungahte hian, buh tam tak a awm ang,” a ti. Ṭâm avângte, sum neih loh avângte, a nih loh leh rorêl dik loh avâng tein ei tûr tlâkchhamna a awm tawh ngai lo vang.

Buaina dangte pawh tihven a ni bawk ang. Entîr nân, tûn lai mi tam tak zâwkte chuan mahni in tia sawi tûr pawh an nei lo va. Mahse, Pathian chuan: “Inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang. Mi dang awmna tûrin in an sa tawh lo vang a, mi dang eiah grêp huan an siam tawh lo vang: thing dam chhûng nîte ang hian ka mite dam chhûng nîte chu a awm dâwn si a, ka mi thlante chu rei tak an thawh chhuah chungah chuan an lâwm dâwn a ni,” tih a tiam a ni. (Isaia 65:​21, 22) Mi tinte chuan mahni in leh lo neiin, mahni hna an thawk tawh ang. Chuvângin, Pathianin retheihna zawng zawng kumkhua atâna tihven min tiam a ni. Chutah chuan hausa leh rethei inkâra inthlauhnate a awm tawh lo vang a, rethei taka ei zawng an awm tawh bawk hek lo vang.

Miin hêng Bible thutiamte a hriat hmasak ber ṭumin, thil ni thei tûrah a ngai lo mai thei. Nimahsela, Bible ngun lehzuala bihchianna chuan hun kal tawha Pathian thutiam zawng zawng chu a thleng famkim vek tih a târ lang a. (Isaia 55:11) Chuvângin, hei hi thil ni mai thei a ni lo. Chu aimah chuan, zawhna pawimawh zâwk awm chu hei hi a ni, Chu mi a lo thlen huna hlâwkpui tûrin eng nge i tih ang?, tih hi.

Chutah Chuan I Awm Ve Ang Em?

Pathian sawrkârna a nih avângin, Pathianin chu rorêlna hnuaia khua leh tui ni tûra a pawm mi kan ni tûr a ni a. A pawm mi nih theih dân pawh min hriattîr bawk a ni. A kaihhruainate chu Bible-ah a awm vek a ni.

Rorêl tûra ruat, Pathian Fapa chu mi fel a ni a. (Isaia 11:​3-5) Chuvângin, he sawrkârna hnuaia nung tûra pawmte chu mi fel an ni ve tûr a ni. Thufingte 2:​21, 22 chuan: “Mi tluangte chu leilungah hian an chêng ang a, ṭha famkimte chu chutah chuan an awm reng a; mi suaksualte erawh chu leilung ata tihboral an ni ang a, vervêk taka titute chu tihboral phiar an ni ang,” a ti.

Hêng thil phûtte tlin tûra zir dân kawng a awm êm? Aw, awm e. Bible zirna leh a kawhhmuhnate nunpuina hmangin, he hma bâk ropui tak hi i nei thei ang. (Johana 17:3) Jehova Thuhretute chuan chu mi zirna kawnga ṭanpui che chu an châk a ni. Retheihna leh rorêl dik lohna tawng ngai lo tûr khawtlânga i tel theih nân he hun remchâng hi hmang ṭangkai tûrin kan sâwm che a ni. (w03 8/1)

[Phêk 5-naa milem]

Eufrosina: “Pawisa fîmkhur taka hmanna chuan kan chhûngkaw mamawhte nei thei tûrin min ṭanpui”

[Phêk 6-naa milem]

Pathian nêna inlaichînna ṭha leh chhûngkaw nun hlim chu suma lei theih a ni lo