Jehova, Thutak Pathian Chu
“Aw LALPA, thutak Pathian, nangin mi tlan ta.”—SAM 31:5.
1. Dâwtthu awm hmaa lei leh vâna thil awm dân chu eng ang nge ni?
TUNHMA chuan dâwtthu awm loh lai a lo awm tawh ṭhîn a. Hmuh theih loh thlarau ram chu thlarau thil siam ṭha famkimte’n luahin, anmahni Siamtu, “thutak Pathian” rawng chu an lo bâwl a ni. (Sâm 31:5) Chutih lai chuan dâwtthu leh inbumna rêng a awm lo. Jehova chuan a thlarau fate chu thutak a hrilh ṭhîn a. Chutianga a tih chhan chu anmahni a hmangaih vâng leh a ngaihsak êm vâng a ni. Lei lam dinhmun pawh chutiang bawk chu a ni a. Jehova chuan mipa leh hmeichhe hmasa ber chu a siam a, a kawng ruahman kaltlangin, anni chu fiah tak, tlang tak, leh thutakin a be pawp ṭhîn a ni. Chu chu a va ropui dâwn êm!
2. Dâwtthu chu tuin nge hmang ṭan a, engvângin nge?
2 Nimahsela, a tâwpah Pathian thlarau fa pakhat chu huaisen takin Jehova kalhtu pathianah a insiam ta a. He thlarau thil siam, Diabol-Setana tia hriat tâk hian mi dangin amah an biak chu a duh a. A thiltum tihhlawhtlin nân, dâwtthu chu mi dangte a thuhnuaia dahna hmanruaah a hmang ṭan ta a. Chutianga a tih avângin “dawthei a ni [a], dâwt pa pawh a ni” ta a ni.—Johana 8:44.
3. Engtin nge Adama leh Evi’n Setana dâwt sawi an chhân lêt a, chu chuan eng nge a rah chhuah?
3 Rûlpui hmangin Setana chuan hmeichhe hmasa ber Evi hnênah, Pathian thupêk pawisa lo va, ei loh tûra khap thingrah a ei chuan a thi dâwn lo tih a hrilh a. Chu chu dâwt a ni. Chu bâkah, a ei chuan Pathian ang a lo ni ang a, a chhia leh a ṭha a thliar hrang thei dâwn tih a hrilh belh a. Chu pawh chu dâwt bawk a ni. Evi chu a hmain tuman la bum ngai lo mah se, rûlpui thusawi leh Pathianin a pasal Adama hnêna a sawi chu a inrem lo tih a hre ngei tûr a ni a. Chutichung chuan, Jehova aiin Setana thu chu a ring ta zâwk a. Hneh taka buma awmin, thingrah chu a lo va, a ei ta a ni. A hnuah Adama pawhin a ei ve ta a. (Genesis 3:1-6) Evi ang bawkin Adama pawhin dâwt a la hre ngai rêng rêng lova; mahse, ani chu bum a ni ve lo. (1 Timothea 2:14) Chuvângin, a thiltih chuan amah Siamtu a hnâwlzia a târ lang a ni. Mihringte chunga a rah chhuah lo thleng chu a râpthlâk hle mai. Adama thuâwih lohna avângin, sualna leh thihna—chhiatna leh lungngaihna tam takte—chuan a thlahte zawng zawng a fan chhuak ta a ni.—Rom 5:12.
4. (a) Eden huana dâwtthu sawite kha engte nge? (b) Setana buma kan awm loh nân eng nge kan tih ang?
4 Dâwtthu pawh a darh tel ve zêl a. Eden huana sawi dâwtthute chu Jehova dikna hmai chhana beihna a ni tih kan pawm tûr a ni. Setana chuan Pathian chu rilru chhia pua nupa tuak hmasate hnêna thil ṭha engemaw pe duh lo tlatah a puh a. Chu chu thu dik a ni lo rêng rêng. Adama leh Evi chuan an thuawih lohna chu an hlâwkpui lo. Jehova sawi ang ngeiin an thi zâwk a ni. Nimahsela, Setana chuan Jehova sawichhiaa a beihna chu a chhunzawm zêl a, kum zabi tam tak a liam hnuah pawh Setana chu “khawvêl zawng zawng bumtu” tia ziak tûrin tirhkoh Johana chu thlarauva thâwk khumin a awm a ni. (Thu Puan 12:9) Diabol-Setana bumna pumpelh tûrin, Jehova leh a Thu dikziaah rinna pumhlûm kan nei tûr a ni. Jehova rinna chu engtin nge i neiin i tihngheh theih ang a, a Hmêlhmain a tihchhuah dâwtthu leh inbumna thute lakah engtin nge kan invên theih ang?
Jehova Chuan Thutak A Hria
5, 6. (a) Jehova chuan eng hriatna nge a neih? (b) Mihringte hriatna neih leh Pathian hriatna neih chu eng anga khaikhin nge ni?
5 Bible chuan Jehova chu ‘engkim siamtu’ a nih thu a târ lang fo va. (Ephesi 3:8, 9) Ani chu “vân te, lei te, tuifinriat te, a chhûnga awmte zawng zawng Siamtu” a ni. (Tirhkohte 4:24) Jehova chu Siamtu a nih avângin, thil engkim nih phung dik tak a hria a ni. Tehkhin nân: Mahni ngeia a pianhmang tûr duanga, mahni in tûr mahni kut ngeia satu pa pakhat han ngaihtuah teh. Ani chuan a insak chu a hre chiang êm êm anga, a insak lo thlîrtu aiin a hre rîl zâwk ngei ang. Mite chuan mahni thil duan leh siam chhuah chu an hre chiang hle a ni. Chutiang bawkin, Siamtu chuan a thil siam engkim chu chipchiar takin a hria a ni.
6 Zâwlnei Isaia chuan Jehova hriatna nasatzia chu heti hian mawi takin a sawi chhuak a ni: “Tuin nge tuite chu a kutphah khuar leka teha, vân khi khâp leha teha, leia vaivut hi tehkhâwng pakhat leka thun veka, tlângte chu khîn leka bûk kha le? Tuin nge LALPA thlarau chu thil tih dân tûr kawhhmuh le? A nih loh leh tunge a remruatsaktu nia amah zirtîr le? Ani chuan tunge a râwna, tuin nge amah chu hriattîra, rorêlna kawng entîra, hriatna zirtîra, hriatthiamna kawng entîr ngai le?” tiin. (Isaia 40:12-14) Jehova chu “finna Pathian” leh “hriatna famkim” neitu a ni ngei mai. (1 Samuela 2:3; Joba 36:4; 37:16) Ani nêna khaikhin chuan kan hriatna chu a va chau êm! Mihringte hian hriatna ropui leh mak tak tak an nei ṭeuh chung pawhin, thil siam kan hriatna chu Pathian “kawng pâwn lam lek” a ni a. “Thiltihtheihna ri thâwm” nêna khaikhin chuan “a beitham” hle a ni.—Joba 26:14.
7. Jehova hriatna chungchângah Davida chuan eng thu nge a pawm a, chuvângin eng nge kan pawm ve tûr chu?
7 Jehova chu min Siamtu a nih avângin, min hre chiang hle dâwn tih chu a chiang a. Lal Davida chuan chu chu a pawm a ni: “Aw LALPA, nangin ngun takin mi en chhuak a, mi hre ta. Nangin ka ṭhut leh ka din hi i hre ṭhîn a, ka ngaihtuahna hi hla tak aṭang pawhin i hre thiam ṭhîn. Ka kal leh ka mu hi mi en ngun ṭhîn a, ka awm dân zawng zawng hi i hre vek a. Ngai teh, aw LALPA, nangin i hriat fai vek loh chu, ka leiah hian thu rêng rêng a awm lo,” tiin a ziak a ni. (Sâm 139:1-4) Davida chuan mihringin duhthlan theihna a hmang tih erawh a hria a ni—Pathian min pêk a thu zawm theihna leh zawm loh theihna chu. (Deuteronomy 30:19, 20; Josua 24:15) Nimahsela, Jehova chuan mahni kan inhriat aiin min hre chiang zâwk daih a. Kan tâna ṭha ber tûr chu a duhin, min kaihruai thei dinhmunah a ding bawk. (Jeremia 10:23) Dik takin, thutak min zirtîr tûr leh min tifinga, min tihlim tûrin zirtîrtu inthuam ṭha zâwk, mi thiam zâwk tumah an awm lo.
Jehova Chu A Dik
8. Engtin nge Jehova a dik tih kan hriat theih?
8 Thutak hriat chu thu khat a ni a, thudik tak sawi reng, mi dik nih chu thu dang daih a ni thung. Entîr nân, Diabola chuan ‘thutaka awm loh’ chu a thlang a. (Johana 8:44) Inkalh takin, Jehova chu “thu tak ngah” Pathian a ni. (Exodus 34:6) Bible chuan Jehova dikna chungchâng a sawi nawn ṭhîn a. Tirhkoh Paula chuan “Pathian daw rual a nih lohna” leh Pathian chu “dâwt sawi thei lova” a nih thu a sawi a ni. (Hebrai 6:18; Tita 1:1, 2) Dikna chu Pathian mize pawimawh tak pakhat a ni a. Chuvângin Jehova chu kan rinchhanin a chungah kan innghat thei a ni; ani chuan a mi rinawmte a bum ngai si lo va.
9. Jehova hming chu engtin nge thutak nên a inzawm?
9 Jehova hming ngei chuan a dikna a finfiah a ni. A hming awmzia chu “A Nihtîr” tihna a ni a. Hei hian Jehova chu a thutiam zawng zawngte zawi zawia Tifamkimtu a nihzia a târ lang a ni. Tu dang mahin chu dinhmun chu an chelh thei lo. Jehova chu Chungnungbera a nih avângin, a thiltumte lo thlen famkimna tûr chu engmahin a dang thei lo bawk. Jehova chu a dik mai bâkah a thu sawi zawng zawngte tithleng famkim tûrin amah chauhvin thiltihtheihna leh finna a nei a ni.
10. (a) Engtin nge Josua chuan Jehova dikna chu a tawn? (b) Jehova thutiam thleng famkim eng nge i hmuh tawh?
10 Josua chu Jehova dikzia finfiahna thil mak tak tak tawngtu mi tam takte zînga mi a ni a. Jehova’n Aigupta chunga hri sâwm a lêntîr khân, hri lo thleng tûr apiang chu a sawi lâwk ṭheuh va, chutih lai chuan Josua chu Aigupta ramah a awm a ni. Thil lo thleng famkim tak takte zîngah chuan, Kanaan mi chak takte hneha Ram Tiama hruai tûra Aigupta ram aṭanga chhanchhuah a tiamte thlen famkimna chu Josua chuan a tawng a ni. A thih dâwn hnaihah Josua chuan Israel upate hnênah: “LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo tih chu in thinlung zawng zawng leh in rilru zawng zawngin in hria e; in chungah a lo thleng ta vek a, pakhat mah thlâwn a awm lo ve,” tiin a sawi a ni. (Josua 23:14) Josua tawn thilmakte chu tawng ve lo mah la, Pathian thutiam a lo thlen dikzia chu i dam chhûngin i tawng tawh em?
Jehova Chuan Thutak A Hailang
11. Jehova’n mihringte thutak hriattîr a duh tih engin nge târ lang?
11 Hriatna zau tak nei sia fate be ngai meuh si lo pa pakhat han ngaihtuah teh. Jehova chu chutiang mi a nih loh avângin i lâwm hle lâwm ni? Jehova chuan hmangaih takin mihringte a be pawp ṭhîn a, ṭhahnemngai takin a be ṭhîn a ni. Bible chuan ani chu “Zirtîrtu Ropui Ber” tiin a ko a ni. (Isaia 30:20, NW) A hmangaih-ngilneihna avângin, a thu ngaithla duh lote pawh a be pawp bawk a. Entîr nân, Jehova chuan an ngaithla dâwn lo tih a hriat mite hnêna thu hril tûrin Ezekiela chu a tîr a ni: “Mihring fapa, kal la, Israel chhûngte hnênah chuan ka thute hi hmangin va sawi rawh,” tiin. Chutah: “An ngaithla lo ang che, kei mi ngaithla dâwn si lo va, Israel chhûngte zawng luhlul tak leh tihmawh takte an ni si a,” tiin a vaukhân tel bawk a ni. Chu chu hna harsa tak a ni a; mahse, Ezekiela chuan rinawm takin a thawk chhuak a, a thawh pahin Jehova khawngaihna a lantîr bawk a ni. Thuhrilh harsatna hmuna rawng i bâwla Pathian chunga i innghah phawt chuan, zâwlnei Ezekiela a tihchak ang bawkin nang pawh a tichak ve dâwn che tih i ring tlat thei ang.—Ezekiela 3:4, 7-9.
12, 13. Eng kawngin nge Pathianin mihringte a biak pawh?
12 Jehova chuan “mi zawng zawng chhandama awmah leh thutak hriaah” a duh a ni. (1 Tim. 2:4) Ani chuan zâwlneite, vântirhkohte, leh a hmangaih tak a Fapa, Isua Krista te hmangin thu a sawi tawh a. (Hebrai 1:1, 2; 2:2) Pilata hnênah Isua chuan: “Thutak hriattîr hi ka pian chhan leh khawvêla ka rawn kal chhan a ni. Tupawh thutaka mi apiangin ka thu an pawm ṭhîn,” a ti a. Pilata chuan chhandamna hmuh theih nâna Jehova ruahmanna chungchâng thutak chu Pathian Fapa hnên aṭang ngeia zir theihna hun remchâng duhawm tak a nei a ni. Mahse, Pilata chu thutaka mi a ni lo va, Isua hnên aṭanga zir pawh a duh hek lo. Chu ai mahin, Pilata chuan deusawh takin: “Thutak engnge ni?” tiin a chhâng zâwk a ni. (Johana 18:37, 38) A thiltih chu a va lungchhiatthlâk êm! Mahse, Isua puan chhuah thutak chu mi tam tak chuan an ngaithla a. A zirtîrte hnênah: “Nangni mit . . . chu a vânnei a ni, a hmuh ṭhin avângin; in beng pawh a vânnei a ni, a hriat ṭhin avângin,” a ti.—Matthaia 13:16.
13 Jehova chuan thutak chu Bible hmangin a vawng ṭha a, hmun tina mite hmuh theihin a siam a ni. Bible chuan thilte chu a nihna takin a phawrh chhuak a. Pathian mize bulte, a thiltumte, leh a thupêkte, mihringte dinhmun dik tak nên lam a sawi vek a ni. Isua chuan Jehova hnêna a ṭawngṭainaah: “I thu chu thutak a ni,” a ti. (Johana 17:17) Chuvângin, Bible hi lehkhabu danglam bîk tak a ni a. Pathian engkim hretu thâwk khuma ziak lehkhabu awmchhun a ni. (2 Timothea 3:16) Chu chu Pathian chhiahhlawhte’n an hlut êm êm, mihringte hnêna thilpêk hlu tak a ni a. Nî tina chhiar chu a finthlâk a ni.
Thutak Chelhnghet Tlat Rawh
14. Jehova’n a tihtum a sawi ṭhenkhat chu engte nge ni a, engvângin nge ani chu kan rin theih?
14 Jehova’n a Thu hmanga thil min hrilhte chu kan la urhsûn hle tûr a ni. A chungchângah thudik a sawi reng a, a tih tum chu a ti ngei ngei dâwn a ni. Pathian rinchhan chhan tûr tam tak kan nei a. Jehova’n “Pathian hre lo mi leh kan Lalpa Isua chanchin ṭha âwih lo mite chunga phuba” a lâk tûr thu a sawi hi kan ring nghet tlat thei a ni. (2 Thes. 1:6-8) Jehova’n felna ûmtute a hmangaih thu a sawi te, rinna lantîrtute hnênah chatuan nunna a pêk tûr thu a sawi te, leh natna, ṭahna, leh thihnate a nuaibo dâwn tih a sawi te pawh kan ring tlat thei a ni. Jehova chuan he a tâwpna ber thutiam hi innghahna tlâk a nihzia târ lan nân, tirhkoh Johana hnênah: “Ziak rawh, hêng thu hi a rinawmin a dik si a,” tiin thu a pe a ni.—Thu Puan 21:4, 5; Thufingte 15:9; Johana 3:36.
15. Setana siam chhuah dâwtthu ṭhenkhat chu engte nge?
15 Setana chu Jehova nên an inkalh chiah chiah a. Mite tihbengvâr ahnêkin, a bum zâwk mah a. Biakna thianghlim aṭanga mite lâk pên a tum chu tihhlawhtlin nân Setana chuan dâwt tam tak a siam chhuak a ni. Entîr nân, Setana chuan Pathianin a rilruin min hlat a, leia hrehawm tawrhna awmte a ngaihsak lo tih rinna min neihtîr a tum a ni. Mahse, Bible chuan Jehova’n a thil siamte nasa taka a ngaihsak thu leh suahsualna leh hrehawm tawrhna a huat thu min hrilh thung. (Tirhkohte 17:24-30) Setana chuan thlarau lam thil ûm chu hun khawhralna mai a ni tih mihringte rintîr a tum bawk. A leh lamah chuan, Bible chuan “in hnathawh leh a hming chunga hmangaihna in lantîr . . . chu theihnghilh tûrin Pathian chu mi fel lo a ni si lo” tih min hrilh thung a ni. Chu bâkah, “ani chu . . . zawngtute hnêna lâwmman pêk hmang a ni” tih chiang takin a sawi bawk.—Hebrai 6:10; 11:6.
16. Engvângin nge Kristiante chu an harhvân reng ang a, thutak an chelh ngheh reng ang?
16 Setana chungchângah, tirhkoh Paula chuan: “Krista, Pathian anpui, a ropuizia chanchin ṭha êng chuan anmahni a chhun ên theih lohna tûrin chûngahte chuan he khawvêl pathian hian ring lote rilru a tidel ta a,” tiin a ziak a. (2 Korinth 4:4) Diabol-Setana chuan mi ṭhenkhat chu Evi angin a bum hneh êm êm a. A ṭhen lahin Adama kawng chu an zawh thung a ni; bum ni si lova, duhrêng vânga thuâwih lohna kawng chu. (Juda 5, 11) Chuvângin, Kristiante chu harhvâng renga, thutak chelh nghet renga an awm chu a pawimawh a ni.
Jehova Chuan “Rinna Dik Tak” A Phût
17. Jehova duhsakna dawng tûrin eng nge kan tih ang?
17 Kawng engkima a dik avângin, Jehova chuan amah betu zawng zawngte pawh dik ve tûrin a beisei a. Fakna hla phuahtu chuan: “LALPA, i puan inah chuan tunge lo mikhual ang? I tlâng thianghlimah chuan tunge lo awm ang? Dik taka awma, fel taka tia, a rilrua thutak tak sawi mi chu,” tiin a ziak a ni. (Sâm 15:1, 2) Jehova tlâng thianghlim sawina he hla satu Juda mite rilruah chuan, Lal Davida’n a puan in saka thuthlung bâwm a dahna hmun Zion Tlâng chu a lo lang ngei ang. (2 Samuela 6:12, 17) Tlâng leh puan in chuan Jehova awmna hmun chu min hriatchhuahtîr a. Chu mi hmunah chuan mite chuan a duhsakna ngên tûrin Jehova an pan thei a ni.
18. (a) Pathian ṭhian nih nân eng nge ngai? (b) A dawta thuziakah eng nge sawiho ni dâwn?
18 Jehova ṭhian ni duh apiangte chuan an hmui mai ni lovin, ‘an rilruah’ thutak an sawi tûr a ni. Pathian ṭhian dik takte chuan rilru ngîl tak an nei tûr a ni a, “rinna dik tak” an lantîr tûr a ni bawk; dikna thiltihte chu thinlung aṭanga lo chhuak a ni si a. (1 Tim. 1:5; Matthaia 12:34, 35) Pathian ṭhian chu rilru kawi emaw, bum hmang emaw a ni thei lo; “LALPAN . . . bum hmang mi chu a ten riau ṭhîn” si a. (Sâm 5:6) Khawvêl pum puia Jehova Thuhretute chuan an Pathian entawna thu dik tak sawi chu an tum hrâm hrâm a ni. A dawta thuziak chuan he mi chungchâng hi a enfiah ang. (w03 8/1)
Engtin Nge I Chhân Ang?
• Engvângin nge Jehova chuan thil engkim a hriat dik vek?
• Engin nge Jehova chu a dik tih târ lang?
• Jehova chuan engtin nge thutak a laihlan?
• Thutak chungchângah hian, eng nge phût kan nih?
[Phêk 10-naa milemte]
Thutak Pathian chuan a thil siamte chanchin engkim a hre vek