Retheite An Rethei Telh Telh

“A tam zâwk rethei leh manganga an awmna khawtlâng chu a duahin, a hlim tak tak thei lo.”

MIPUI khawsak rêlbawl dân zir mi Adam Smith chuan kum zabi 18-naah a chunga thu khi a lo sawi a. Chu a thusawi dikzia chu a lang chiang tawlh tawlh tih mi tam takin an pawm a ni. Hausa leh rethei inthlauhna chu a chiang telh telh a. Philippines ramah chuan, mipui awmzât hmun thuma ṭhena hmun khat chu nî tin $1 (U.S.) aia tlêmin an khawsa a ni; ram hausaah chuan chutiang zât chu darkâr pawh tling lohvah an hlawh chhuak a ni. The United Nations Human Development Report 2002 sawi dânin, “khawvêl mi zaa panga, mi nei nungte chuan zaa panga mi retheite pawisa lâkluh zât lêt 114 an lalût a ni,” a ti.

Mi ṭhenkhat chu dinhmun ṭha thawkhata an awm laiin, mi tam tak chu mahni ram lovah an chêng a, a remchânna lai laiah bûk sain an khawsa mai ṭhîn. Ṭhenkhat chu chutiang khawp pawhin an vânnei ve lo; lei chârah lehkha khawng emaw, plastic them emaw chauh phahin, kawtthlêrah an khawsa mai mai a. Mi tam tak chuan an theih ang kawng zâwng zâwngin hahthlâk tak leh rim takin ei an zawng a​—bawlhhlawh paihna hmunte an thianfai a, rit an phûr a, a nih loh leh tawlailîr tê hmangin bawlhhlawh zînga thil hralh leh theihte chu an lakhâwm a ni.

Mi hausa leh retheite inkâra intluk tlân lohna chu ram hnufualah chauh a awm lo, World Bank sawi angin “ram tinah hian ‘mi rethei awmna vêng’ a awm,” a ni. Bangladesh leh United States-te kan en chuan, mi ṭhenkhatte chu hausa hle mah se, ei khawp emaw, chênna tûr emaw neih nâna theih tâwp chhuaha beih ngai an awm a ni. The New York Times chuan 2001 U.S. Census Bureau report pêk chu la chhuakin, United States rama hausa leh rethei inkâr inthlauhna chu a ṭhanchhoh zêlzia a târ lang a. “Mipui awm zât zînga a hausa lam zaa pangate chuan ram puma chhûngkuate pawisa lâk luh zât belhkhâwm chanve lawih chu an dawng a . . . Mipui awm zâta a rethei lam zaa pangate chuan pawisa lâk luh zât belhkhâwm zaah 3.5 chauh an dawng a ni,” a ti. Ram dang tam takah pawh dinhmun chu a inang emaw, a chhe zâwk emaw a ni. World Bank hian report a pêk dânin khawvêla mipui zawng zawng zâ zêla 57-te chu nî tin $2 aia tlemin an khawsa tih a târ lang bawk.

Dinhmun tichhe zual tûrin, kum 2002-ah chuan sumdâwnna lama hotu liante rin phâk bâka hausakna chanchin chuan mi maktaduai tam takte chu a timangang a ni. Dân piah lama thiltihna awm chiah lo mah se, mi tam tak chuan an hotu liante chu, Fortune magazine sawi angin, “nasa takin, âwihawm lo khawpin, mi dangte hmusit khawp hialin an hausa a ni” tih ngaih dân an nei a ni. Khawvêla hêng thilthlengte han ngaihtuah hian, mi tam tak an retheih hle laia mi ṭhenkhatin beisei lâwk lohva dollar maktaduai za têl an neih thut mai hi a thiam awm em ni le, tih ṭhenkhat chuan an ngaihtuah a ni.

Retheihna A Awm Reng Dâwn Em?

Hei hi retheite dinhmun khirh tak sukiang tûrin tuman hma an la lo tihna a ni lo. Tum ṭha tak nei sawrkâr hotute leh ṭanpui ngaite ṭanpuitu pâwlte chuan dinhmun thlâk thleng tûrin rawtnate an pu lût ngei mai. Nimahsela, a rahchhuah chu a phûrawm lo reng tho mai. Mi thiam tam takte chuan hmasâwn tûrin thawkrim ṭhîn mah se, Human Development Report 2002 sawi dânin “ram tam takte chu tûn hma kum 10, kum 20 leh a ṭhenah chuan kum 30 kalta ai khân a rethei zâwk” a ni.

Hei hian retheite tân beisei a tibo em? Tûna ṭangkai thei tûr finna chhawr tlâk tak rualin, a tihven dân i la ngaihtuah ngai loh mai theihte hriat nân, a dawta thuziak hi chhiar tûrin kan sâwm che a ni. (w03 8/1)