Sakhuain Khawvêl Remna A Thlen Ang Em?
August nî 28 aṭanga August nî 31, 2000 thleng khân ram 73 aṭanga palai 500 chuangte chu New York Khawpuiah an kalkhâwm a. Chûng palaite chuan, United Nations-ah “Kumsâng bi-a Khawvêl Remna tûrin Sakhua leh Thlarau lam Kaihruaitute inhmuh khâwmna” an nei a ni. Hruaitu hrang hrangte—ṭhenkhat diar khimte, kawrfual sêrthlum rawng hate, lu-a sava hmul tawnte, leh ṭhui loh kawr dum fual hate—chuan rinna chi hrang tam tak an lantîr a. Chûngho zîngah chuan, Baha’i sakhua te, Buddhist sakhua te, Islam sakhua te, Jain sakhua te, Juda sakhua te, Shinto sakhua te, Sikh sakhua te, Taoist sakhua te, Zoroaster sakhua te, leh Khristianna ram sakhuate an tel a ni.
Palai kalkhâwmte chuan, an inkhâwmpui nî li neiha a hmasa ni hnihte chu United Nations-ah an hmang a. Mahse, inkhâwmpui ruahmantu leh a sensote tumtu chu United Nations ni lovin, pâwl hrang hrangte an ni zâwk a ni. Amaherawhchu, UN leh sakhaw hruaitute chuan retheihna te, hnam inthliarna te, chhehvêl buaina te, indona te leh mi tichhe thei râlthuamte titâwp tûra thawhho a pawimawhzia an sawiho tho a ni.
Palaite chuan, “Khawvêl Pumpui Remna Atâna Intiamkamna” lehkha pawimawh takah chuan hming an ziak a. Tharum thawhna leh indona te chu “engemaw châng chuan sakhuana hminga tih,” a nihzia hriat ni mah se, chûng hming ziaktute chu “remna zawnna kawngah, United Nations nên an thawkho” tih chu lehkha ziak chuan a târ lang a. Mahse, an thawhho dân chungchâng chiah târ lanna erawh a awm lo a ni.
A nî hnihnaah chuan, inkhâwmpui general-secretary Bawa Jain-a chuan, kum engemaw zât kalta khân United Nations-a lem ziak chu a lo hmuh tawh thu sawiin a hawnna thusawi ropui tak chu a tlip ta a ni. Chu lem ziak chu pa sâng tak pakhat, United Nations Secretariat in ai maha sâng zâwk a ni a. Chu mi lem chuan in chu kawngka ang maiin a kik a. Milem hnuaiah chuan: “Remna Lal” tih a inziak bawk a ni. Mr. Jain-a chuan: “Ka hmuh tirh phat aṭangin [milem] chuan ka rilru a khawih hle a. Mi hrang hrang hnênah [a] awmzia ka zâwt a. Vawinah hian a chhânna ka hmu ta niin ka hria. Nangni, khawvêl puma thlarau lam leh sakhaw lam hruaitute heta in lo kal khâwmna hian, United Nations kawngka kiktu remna lal chu [nangni] in ni tih min hrilh chiang hle a ni” tiin a sawi a ni.
Mahse, Bible ngaih dân chu a dang daih a. Bible chuan Remna Lal chu Isua Krista a nihzia a târ lang thung a ni. Ani chuan he khawvêl politics emaw, sakhaw hruaitute thawh rimna emaw hmang lovin, Pathian Lalram hmangin khawvêl pumpui remna a rawn thlen zâwk dâwn a ni. Chu Lalram—Pathian vân lam inawpna—chuan mihring thuâwite chu hlawhtling takin a rawn suihkhâwm ang a; tichuan, he leiah hian Pathian duhzâwng chauh tih a ni tawh dâwn a ni.—Isaia 9:6; Matthaia 6:9,10. (w01 3/15)