Bible Zirtîr Nungchang Chu A Ṭha Ber Em?

“PAWL chuan a mi leh sate himna leh kaihhruaina pe thei tûr dân ṭha tak a mamawh” tiin German thuziaktu leh television thupuangtu tak chuan a sawi a ni. Chu chu a finthlâk hle. Mihringte dinhmun ngelnghet thei tûr leh changtlung tak ni tûr chuan a chhia leh a ṭha, a dik leh dik lo finfiah thei vântlâng tehkhâwng nghet tak neih ngai a ni. A a nih chuan: Pâwlho leh a mi leh sate tân chuan eng tehnate nge ṭha ber ang? tih chu zawhna a ni ta a ni.

Bible zirtîr nungchang ṭhatnate chu tehkhâwnga hman a nih chuan, nun ngelnghet tak leh hlimawm takah mite chu an hruai ang. Tin, chu chuan chûng zâwmtu mipuite chu a tihlim sawtin, a tinghet sauh dâwn a ni. Chu chu thil awm dân a ni em? Bible-in thil pawimawh tak pahnih a sawi inneihnaa rinawmna leh ni tin nuna rilru dikna te chu i lo ngaihtuahho ang u.

I Kawppui Chu Vuan Tlat Rawh

Min Siamtu chuan Adama a siam zawhah a kawppui tûr atân Evi a siam leh a. An inpumkhatna chu mihringte chanchina inneihna hmasa ber a nih bâkah, kumkhaw daih tûr a ni. Pathian chuan: “Mipain a nu leh a pa a kalsan ang a, a nupui a vuan ang,” tiin a sawi a ni. A hnu kum 4,000 vêlah Isua Krista chuan chu inneihna tehkhâwng chu a hnungzuitute zawng zawng tân a sawinawn leh a ni. Chu bâkah, innei si lova mipat hmeichhiatna hman chu a dem bawk.​—Genesis 1:​27, 28; 2:​24; Matthaia 5:​27-​30; 19:5.

Bible-in a sawi angin, inneihna hlimawm tak atâna kawng pawimawh tak pahnih chu inhmangaih tawnna leh inzah tawnna a ni. Chhûngkaw lû ber pasal chuan a nupui duhzâwng dah hmasain hmangaihna a lantîr tûr a ni a. Tin, ‘hriat thiamna’ a nei tûr a ni a, a “vîn” tûr a ni lo. Nupui pawhin a pasal chu a “hlau thiam” tûr a ni. Hêng dân bulte hi nupate’n an zawm thlap chuan inneihnaa harsatna tam tak chu hneh theih emaw, pumpelh theih emaw a ni. Tichuan, pasalin a nupui a vuan nghet tlat tûr a ni a; tin, nupui pawhin a pasal chu a vuan tlat bawk tûr a ni.​—1 Petera 3:​1-7; Kolossa 3:​18, 19; Ephesi 5:​22-​33.

Mahni kawppuite rinawm taka vuan tlat tûra Bible tehkhâwng zawmna chuan nupa hlimna a thlen em? Aw le, German rama mipui ngaihdân zawhna chungchâng hi han ngaihtuah teh. Inneihna a ngheh nân eng thilte nge pawimawh tiin mite chu zawh an ni a. Mite ngaihpawihmawh ber chu rinawm tawnna a ni. An inkârah rinawmna a awm tih an hriat chuan nupate chu an hlim sauh ṭhîn tih hi i pawm dâwn lo’m ni?

Buaina Lo Chhuak Ta Se Engtin Nge Ni Ang?

A nih leh nupa inkârah inhialna nasa tak lo chhuak ta sela, engtin nge ni ang? An inhmangaihna chu lo tlahniam ta se engtin nge ni dâwn? Chutiang dinhmunah chuan inṭhen mai chu a ṭha ber lo vang maw? A nih loh leh, mahni kawppuite rinawm taka vuan tlat tûra Bible tehkhâwng zawm chu a la finthlâk cheu em?

Bible ziaktute chuan mihring ṭhat famkim lohna avângin nupa zawng zawngin buaina an hmachhawn dâwn tih an hre chiang hle a ni. (1 Korinth 7:​28) Mahse, nungchang chungchânga Bible tehkhâwng zawmtu nupate chuan inngaidam tawnin an harsatnate sutkian chu an la tum tho a ni. Dinhmun ṭhenkhat​—uirena emaw, kut inthlâkna emaw ang chi te​—avânga Kristianin awm hran emaw, inṭhen emaw ṭha a tih châng chu a awm ngei mai. (Matthaia 5:​32; 19:9) Mahsela, chhan bul bâl awm lo emaw, mi dang neih duh vâng emawa inṭhenna chuan mahni hmasialna a lantîr a. Chu chuan nunah ngelnghehna leh hlimna a thlen ngai lo hul hual a ni. Entîrna i lo en ang u.

Peter-a chuan an nupa nun chu tûn hma angin a nung tawh lo niin a hria a.a Tichuan, a nupui chu kalsanin mahni pasal tlânsan ve tho Monika-i nên an inkawp ta a ni. Engtin nge thil chu a nih chhoh zêl? Thla tlêm a ral hnu chuan Peter-a chuan Monika-i nêna khawsak chu “ka lo suangtuah ang ngawta thil awlai a ni lo” tiin a sawi. Engvânga awlai lo nge? A nupui hmasa ang bawkin tûna mi pawhin ṭhat famkim lohna a neih vâng a ni. Chu ai maha pawi zâwk chu, mahni hmasiala, hmanhmawh taka a thutlûkna siam chuan sum leh pai lama buaina namên lo a thlen a. Chu bâkah, an chhûngkaw nun inthlâkthlengna nasa tak chuan Monika-i fate chu a tilungngai hle bawk a ni.

He thiltawnin a târ lan ang hian, nupa inkârah buaina a lo chhuahin, inṭhenna chu a chinfelna a ni khât khawp mai. Leh lamah chuan, buaina nasa tak kârah pawh Pathian Thu, Bible-a nungchang ṭha hlutnate chuan inneihna chu a humhim a bâkah inneihna hlimawm tak a thlen ṭhîn a ni. Hei hi Thomas-a leh Doris-i te chung thu-ah pawh a hriat theih a ni.

Doris-i pasal Tomas-a chuan kum 30 an inneih hnuah zu nasa taka ruih a chîng ṭan a. Tichuan, Doris-i chu beidawnnain a khat a, a tâwpah chuan inṭhen zai an rêl ta ringawt mai a. Doris-i chuan Jehova Thuhretute zînga pakhat hnênah chu thu chu a hrilh a. Chu Thuhretu chuan Bible-in inneihna chungchâng a sawite chu a lo kawhhmuh a, inṭhen nghâl mai lo va buaina chinfel dân kawng chu a pasal nên zawng hmasa tûrin a fuih a ni. Chutiang chuan Doris-i chuan a ti ta a. Thla rei lotê chhûng chuan inṭhen pawh ngaihtuah tawh lovin, an buainate an chinfel an dun ta zâwk a ni. Bible thurâwn zawmna chuan an inneihna chu a tinghet a, an buainate chinfelna hun a pe bawk a ni.

Thil Engkima Rilru Dikna

Rinawm taka kawppui vuan nghet tlat tûr chuan mize nghet neih leh dân bul hmangaihna neih a ngai a. He khawvêl dinhmun chhe tak kâra rilru dik vawng reng thei tûr pawhin chutiang mizia bawk chu neih a ngai a ni. Bible chuan rilru dikna chungchâng a sawi tam hle a. Tirhkoh Paula chuan kum zabi pakhatna Kristian Judai rama mite hnênah chuan heti hian lehkha a thawn a: “Engkimah dik taka awm kan duh,” tiin. (Hebrai 13:​18, NW) Chu chu engtihna nge ni?

Mi rirlu dik chu a thu tak a, dâwtsawina ata a fihlîm a ni. Hleihnei lovin mi dangte a dâwr a, a tlang a, a zahawm a, mi thlêm emaw, hruaikawi emaw a chîng lo. Chu bâkah, mi rilru dik chu mahni mihringpuite bum ngai lo mi, mi rinawm a ni bawk. Mi rilru dikte chuan inrinchhanna leh inrinngamna an awmtîr a, chu chuan rilru put hmang ṭha leh mihring inlaichînna nghet a thlen ṭhîn a ni.

Mi rilru dikte chu an hlim em? Aw, hlimna tûr chhan an nei alâwm. Hlemhlêtna leh inbumna a hluar hle chung pawhin mi rilru dikte chuan midangte ngaihsân an hlawh tlângpui ṭhîn. Ṭhalaite zînga thu zawh chianna neihah chuan rilru dikna chu ṭhatna a ni tiin zawhna chhângte zînga zaa 70 te’n an chhâng a ni. Chu bâkah, kan naupang emaw, kan upa emaw pawh ni sela, ṭhian anga kan ngaihte tân chuan rilru dikna a pawimawh hmasa ber a ni.

Christine-i chu kum 12 mi a nih aṭangin thil rûk dân zirtîr ṭan a ni a. Tichuan, rûk rûk thiam tak a lo ni chho ta a ni. Ani chuan “Ni khatah pawisa fai DM 5,000 [$2,200, U.S.] lai rûk chhuah theih châng pawh ka nei” tiin a sawi. Mahse, Christine-i chu vawi engemaw zât man a ni a, tân ina khung mai theih dinhmunah a ding reng a ni. Mahsela, Jehova Thuhretute’n Bible-in rilru dikna chungchâng a sawite an han hrilhfiah chuan, Bible zirtîr nungchang tehkhâwngte chuan a rilru a khawih ta hle mai a. Tichuan, “Rûk hmang chuan ru tawh suh sela” tih fuihna thu chu zawm a tum ta a ni.​—Ephesi 4:​28.

Christine-i chu Jehova Thuhretute zînga mi pakhat nia baptisma a chan chuan, rûk hmang a ni tawh lo. Thuhretute chuan rilru dikna leh Kristian mize dangte chu an dah pawimawh êm avângin, thil engkima rilru dik put chu a tum ṭâng ṭâng a ni. Lausitzer Rundschau chanchinbu chuan: “Nungchang lam pang sawina rilru dikna te, insûmtheihna te, leh ṭhenawm khawvêng hmangaihna te chu Thuhretute chuan an rinnaah an dah chungnung tak zet a ni,” tiin a sawi a ni. A nun inthlâk danglam chungchâng chu Christine-i chuan engtin nge a ngaih? “Rûk rûk ka bansan avângin tûnah chuan tûn hma aiin ka hlim zâwk a. Mi zahawmte zînga telah ka inhria a ni” tiin a sawi a ni.

Mi Zawng Zawngin An Ṭangkaipui

Mahni kawppuite chunga rinawm leh mi rilru dikte chu anmahni an hlim mai bâkah, khawtlâng tân pawh an ṭha tlângpui bawk a ni. Hlawhfa chhawrtute chuan mi bum ngai lo hnathawktute chu an duh zâwk a. Kan zain ṭhenawm khawvêng rintlâk neih kan duh ṭheuh va; tin, mi tluang takin a enkawl dâwra thil lei chu kan duh ṭheuh bawk a ni. Hlemhlêtna hnâwltu ramveimi te, police te, leh rorêltu te chu kan zah a ni lawm ni? Miin an tâna remchan avâng chauh ni lo va, rilru dik tak pu chunga dân bul anga thil a tih chuan khawtlângin nasa takin a hlâwkpui a ni.

Chu bâkah, nupa rinawm tak nih chu chhûngkhaw ngelnghet dinna bulpui a ni a. Mi tam zâwk chuan Europe khawmuala ramveimi mi pakhat thusawi hi an pawmpui ngei ang, ani chuan: “Tûn laia mihringte himna hmun chu chhûngkua a ni,” tiin a sawi a ni. Chhûngkaw muanawm tak chu a tê ber aṭanga a lian ber thlengin hima inhriatna an neih theihna hi a ni a. Chuvângin, mahni kawppui chunga rinawmte chuan khawtlâng ngelnghet din tûrin an ṭanpui a ni.

Nupa intlânsanna te, court-a inṭhenna te leh naupang inchuhna thubuai te awm ta lo sela, mi tinin kan ṭhatpui dân tûr chu han ngaihtuah teh. Tin, rûkru te, dâwr rawk chîng te, eirûk chîng te, hotu lian eirûk hrât te, a nih loh leh scientist dâwt hmang te hi awm ta lo se, engtin nge ni ve ang? Chûng chu mumang ang lek em ni? Bible ngaihsak tak taktute leh kan hma lam hun tûr a sawite ngaihsaktute tân chuan mumang lek a ni lo. Pathian Thu chuan Jehova Messia Lalram chuan he leilunga mihring inawpna zawng zawng hi a rawn awp dâwn tih min tiam a ni. Chu mi Lalram hnuaiah chuan mi zawng zawngte chu Bible zirtîr nungchang nên inmila nung tûra zirtîr an ni ang. Chutih hunah chuan, “Mi felte chuan ram hi an luah ang a, a chhûngah hian kumkhuain an awm reng ang.”​—Sâm 37:29.

Bible Zirtîr Nungchang chu

Pathian Lehkha Thu Thianghlim ngun taka zirtu mi maktaduai tam takte chuan Bible zirtîrnate hi mihring ngaihtuahna aia nasa taka chungnung zâwk Pathian finna aṭang lo kal a ni tih an hria a. Chûng mite chuan Bible chu rintlâk leh kan tûn lai nun atâna pawimawh a ni tih an pawm a ni. Anni chuan Pathian Thua zirtîrnate ngaihsak chu an tâna thil ṭha ber a ni tih an hria a ni.

Chuvângin, chutiang mite chuan Bible fuihna thu: “I thinlung zawng zawngin LALPA ring la nangma hriatnaah innghat suh; i kawng zawng zawngah chuan hre reng la, i kawngte chu a kawhhmuh zêl ang che,” tih chu an ngaipawimawh hle a ni. (Thufingte 3:​5, 6) Chutianga an tihin, anmahni ngeiah hmasâwnna a lang a; tin, an vêla awmte pawhin an lo hlâwkpui bawk a ni. Tin, mi zawng zawngin Bible zirtîr nungchang an zawm hun tûr, “nunna . . . la awm leh tûr,” chungah rinna nghet tak an nei bawk.​—1 Timothea 4:8.

[Footnote]

[Phêk 5-naa thu lâk chhuah]

Nupa buaina nasa tak kârah pawh Pathian Thu, Bible nungchang ṭha hlutnate chuan inneihna chu a humhim bâkah, hlimawm takah a thlen ṭhîn

[Phêk 6-naa thu lâk chhuah]

Hlemhlêtna a hluar hle chung pawhin, mi rilru dikte chuan mi dangte ngaihsân an hlawh tlângpui ṭhîn