Nungchang Ṭha Hlutnate A Tlahniam Mêk
“HETIANG thil hi a la thleng ngai lo reng reng,” tiin German ram hruaitu hlui Helmut Schmidt-a chuan a sawi a. Ani chu tûn hnai maia sâwrkâr mi liante rinawm lohna chanchin an chhuahte avângin a rûm a ni. “Duhâmna avângin nungchang ṭha hlutna pawh a bo zo ta a nih hi,” a ti hial a ni.
Mi tam takin a ngaihdân chu an pawmpui a. Nungchang ṭha hlutnate chu Pathian thu, Bible atânga lo chhuak a ni a, chu chu mi tam takin thil dik leh dik lo tehna kawnga anmahni kaihruaitu atân kum tam tak chhûng an lo hmang tawh a ni. Mahse, chûng chu tûnah chuan hnâwl a ni tawh a, Kristian sawrkâr nia inchhâlna ramah tak ngial pawh hnâwl a ni tawh a ni.
Bible Zirtîr Nungchang Chu A Pawimawh Em?
Bible-in a zirtîr nungchang ṭhatnash chuan rilru dikna leh rinawmnghehnate pawh a tel a. Mahse, dâwtsawi te, hlemhlêtna te leh inbumna te chu a hluar êm êm tho a ni. The Times of London chanchinbuin a sawi dânin, mi sual chhuitu police ṭhenkhatte chuan, “ruihhlo an man tawhte misual kuta pêk leh nân emaw, misual pâwlte thubuai chhui lai thaibo nân emaw ṭum khatah £1000,000 lai an hlawh ṭhîn nia hriat a ni.” Austria ramah chuan pawisa dahkhamna lama inbumna chu tihdân
phûng pângngai anga ngaih a ni hial tawh a. Tin, thil chhui mite’n “German science khawvêla inbumna tenawm ber,” an chhuichhuahna chuan German ram mi thiamho chu a barakhaih hle bawk. “German rama inthlah chhawnna lam zir mite zînga mi lâr tak” professor pakhat pawh thu phuahchawp ziak leh midang hmuh chhuahsa mahni hmuhchhuah anga tam tak ziak danglam anga puh a ni.
Bible-a nungchang ṭhatnaah chuan kumkhaw daih tûra ngaih nupa inkâra rinawmna a tel a. Mahsela, nupa inṭhenna zât chu a pung chho zêl a ni. Catholic chanchinbu Christ in der Gegenwart (Tûn Lai Kristian) tih chuan “Hnam humalhna Switzerland ramah tak ngial pawh nupa inṭhenna chu a pung deuh deuh a ni” tiin a sawi. Netherland ramah ve thung chuan nupa, za zêla 33-te chu an inṭhen reng bawk a ni. German ram khawtlâng nun phung inthlâk nasat dân lo hretu chuan kum tlêm kalte khân heti hian a ziak a: “Tûnah chuan inneihna hi hmân lai thil leh thil hlui tawh anga ngaih a ni a. Chuvângin, mite chu kum khua atân an innei duh an awm tawh lo,” tiin.
Kawng leh lamah chuan mi maktaduai tam takte chuan Bible-a zirtîr nungchang tehnate chu tûn laiah pawh rinchhantlâk leh pawimawhna neiah an ngai a ni. Swiss-German ramri-a awm nupa tuak khat chuan Bible zirtîr nungchang zirna chuan an nun a tihlim sawt tih an hmu chhuak a. An tân chuan, “an nun dân engkima kaihhruaitu pakhat chauh a awm a. Chu chu Bible a ni.”
Eng nge i ngaih ve dân? Bible hi kaihhruaitu ṭha tak a ni thei ang em? Bible zirtîr nungchang ṭhatna chu tûn laiah a chhawrtlâk em?