Nungchang Thianghlimna Pathian Thlîr Dân

“Kei hi LALPA in Pathian, in ṭhatna tûra nangmahni zirtîrtu, in kalna tûr kawnga hruaitu che u chu ka ni.”​—ISAIA 48:17.

1, 2. (a) Mi tam tak chuan mipat hmeichhiatna chungchâng hi engtin nge an thlîr? (b) Kristiante’n mipat hmeichhiatna chungchâng eng thlîr dân nge an neih?

TUN lai khawvêl hmun tam takah chuan, nungchang chungchâng chu mi mal duhthlanna anga ngaih a lo ni ta. Mite chuan mipat hmeichhiatna hi inneih hnu chuahva hman tûr ni kher lo vin, hmangaihna lantîrna pângngai a ni a, duh hun huna hman mai tûr niin an ngai hial a ni. Mi dang a tihnat loh phawt chuan, mahni khawsak dân tûr mahnia inrêl chu a pawina awm lovah an ngai a ni. An ngaih dân chuan, nungchang lamah, a bîk takin mipat hmeichhiatna lamah phei chuan ro inrêlsak loh tûr a ni tawp mai a ni.

² Mahse, Jehova hretute thlîr dân erawh chu a dang daih a. Jehova an hmangaih avâng leh tihlâwm an duh avângin Bible kaihhruainate chu lâwm takin an zâwm a. Jehova’n anni chu a hmangaih a, an ṭhatna tûr, leh an hlimna tûrin kaihhruaina a pe tih an hre tlat a ni. (Isaia 48:17) Pathian chu nunna Hnâr a nih avângin, an taksa an hman dân tûrah a kaihruaina zawn chu a âwm a ni; a bîk takin, nun inhlanchhâwnna nêna inzawm thilah phei chuan a âwm lehzual a ni.

Hmangaih Siamtu Thilthlâwnpêk

3. Kristianna rama mi tam takte chuan mipat hmeichhiatna chungchângah eng nge an zirtîr a, chûng an zirtîrnate chu engtin nge Bible nên a inkalh?

³ Khawvêl mite ngaih dân nêna inpersan takin, Kristianna rama mi ṭhenkhatte chuan mipat hmeichhiatna hman chu thil zahthlâk tak, sual tak niin an thlîr a, Eden huana “sual inṭanna” pawh Evi’n mipat hmeichhiatna lama Adama a thlêm thlûk vâng a ni tiin an zirtîr a ni. Chutiang ngaih dân chu Pathian thâwk khum, Bible sawi dân nên chuan a inkalh hle. Bible chuan nupa hmasa berte chu “Adama leh a nupui,” tiin a sawi a. (Genesis 2:25) Pathianin an hnênah: “Chi tam tak thlaha lo pungin, leilung hi luah khat ula,” tiin a hrilh a ni. (Genesis 1:28) Adama leh Evi chu fa nei tûrin thu a pe a, a thupêkte an zawm avânga a hrem leh si chuan Pathian tân chuan awmzia a nei lo vang.​—Sâm 19:8.

4. Engvângin nge Pathianin mihringte hnênah mipat hmeichhiatna a pêk?

⁴ Kan nu leh pa hmasa berte hnêna thupêkah chuan, mipat hmeichhiatna hman nachhan bul ber chu chi thlah nân a ni tih kan hmu a, chu thupêk chu Nova hnêna pêk leh a ni. (Genesis 9:1) Nimahsela, Pathian Thu chuan a chhiahhlawh nupui pasal neite chu fa neih nân chauhva mipat hmeichhiatna hmang tûrin a khuahkhirh lo tih a târ lang. Mipat hmeichhiatna hmanna chuan rilru leh tisa lam mamawhte a phuhrûk theiin, nupate tân hlimna bul a ni thei a. Chu chu hmangaihna thûk tak an inlantîrna a ni bawk.​—Genesis 26:​8, 9; Thufingte 5:​18, 19; 1 Korinth 7:​3-5.

Pathian Khuahkhirhna

5. Mipat hmeichhiatnaah Pathianin eng khapna nge a pêk?

⁵ Mipat hmeichhiatna hi Pathian thilthlâwnpêk ni mah se, nupate tân takngial pawh khuahkhirhna awm lo a ni lo va, a hlei a hluaka hman tûr a ni lo. (Ephesi 5:​28-30; 1 Petera 3:​1, 7) Nupa ni lote tân chuan mipat hmeichhiatna hman hi khap tlat a ni a. Hemi chungchâng hi Bible chuan a sawi chiang hle. Israel hnamte hnêna Pathian Dân pêkah chuan heti hian a chuang: “I uire tûr a ni lo” tiin. (Exodus 20:14) A hnuah, Isua’n thinlung aṭanga chhuaka mi tibawlhhlawh thei “ngaihtuahna sualte” zîngah chuan “inngaihna” leh “uirêna” a sawi tel a ni. (Marka 7:​21, 22) Tirhkoh Paula chu Korinth khuaa Kristiante hnênah: “Inngaih hi tlânsan rawh u,” tia zilh tûra tirh a ni. (1 Korinth 6:18) Tin, Hebrai mite hnêna a lehkha thawnah pawh heitang hian a ziak: “Mi zawng zawng zîngah inneih hi chawimawiin awm sela, khum pawh tihbawlhhlawh lohvin awm rawh se; inngaite leh uirête chu Pathianin a ngaihtuah dâwn si a,” tiin.​—Hebrai 13:4.

6. Bible-a “inngaihna” tih thu mal hian engte nge a huam?

⁶ Heta “inngaihna” a tih hi eng nge ni? Grik thu mal por·neiʹa tih aṭanga lehlin a ni a, a châng chuan nupa ni lote inkâra mipat hmeichhiatna hmanna a kâwk thei a ni. (1 Korinth 6:9) Tin, hmun dang Matthaia 5:32 leh Matthaia 19:​9-ahte chuan awmze zau zâwk, uirêna te, chhûngkhat hnai inpâwlna te, leh ramsate nêna inpâwlna te sawi nân pawh a hmang a ni. Nupa ni si lova mipat hmeichhiatna lam thiltih dang, kâa châkna inhrîkthlâksak te, mawngkaw pâwlna te, leh serh inkhalhsak ang chite pawh por·neiʹa zîngah a tel vek a ni. Chûng chîn dân zawng zawngte chu Pathian Thu chuan pehhêl deuh emaw, a ruh lang râwt emawin a dem vek a ni.​—Leviticus 20:​10, 13, 15, 16; Rom 1:​24, 26, 27, 32.a

Nungchang Chungchânga Pathian Dânte Hlâwkpuina

7. Nungchang lama thianghlimna chu engtin nge kan hlâwkpui?

⁷ Mipat hmeichhiatna chungchânga Pathian kaihhruainate zawm chu mihring ṭha famkim lote tân harsa tak a ni thei. Kum zabi 12-naa Juda mifing hmingthang tak Maimonides-a chuan: “Torah-a [Mosia Dâna] thil khap zawng zawng zîngah chuan chhûngkhat hnaite laka inngaihna leh inneih hmaa mipat hmeichhiatna hmanna lama khuahkhirhnate tluka zawm harsa a awm lo,” tiin a ziak hial a ni. Amaherawhchu, Pathian dânte kan zawm chuan, nasa takin kan ṭhatpui a ni. (Isaia 48:18) Entîr nân, he mi kawnga thu zawmna chuan inpâwlna aṭanga kaichhâwn theih, ṭhenkhat phei chu tihdam theih loh thihpui theih natnate lak ata min hum a.b Tin, sâwn paina lak ata min hum thei bawk a. Chu bâkah, Pathian finna zawmna chuan chhia leh ṭha hriatna thianghlim tak min neihtîr bawk a. Chu chuan mahni inhlutna min neihtîr a; tin, mi dang, chhûngkhat lainate, kan kawppuite, kan fate, kan Kristian unaute zah min kaitîr bawk a. Chutiang bawkin, inneihna hlimawm tak thlentu, mipat hmeichhiatna lama rilru put hmang dik leh ṭha min neihtîr bawk a ni. Kristian hmeichhe pakhat chuan heti hian a ziak a: “Pathian Thu, thutak chu invenhimna ṭha ber a ni. Pasal ka la nei dâwn a, Kristian mi ka pasal hnênah chuan ka nulâtna ka vawn thianghlimzia inchhuang takin ka la hrilh ang,” tiin.

8. Eng kawngtein nge kan chêtze thianghlim chuan biakna thianghlim a tihhmasâwn theih?

⁸ Nungchang thianghlimna vawnin, biakna dik chungchânga ngaih dân dik lote chu kan tikiang thei a, kan biak Pathian hnênah mite kan hîp thei a ni. Tirhkoh Petera chuan heti hian a ziak a: “Jentailte zînga in chêtzia chu mawi tak ni rawh se, chutichuan thil tisualtute anga an sawichhiat che u kawngah chuan in thil tihṭhat an hmuhte avângin fanin an awm hunah Pathian an chawimawi thei ang,” tiin. (1 Petera 2:12) Jehova be lotute’n kan chêtze thianghlimte chu hmuh hmaihin, pawm lo mah se, kan Pa, vâna mi chuan a hmu a, a pawm a, a kaihhruainate zâwm tûra kan thawhrimnaah a hlimpui hial a ni tih kan hre chiang thei a ni.​—Thufingte 27:11; Hebrai 4:13.

9. A chhan hre kîl kêl lo mah ila, engvângin nge Pathian kaihhruainaah rinnghehna kan neih ang? Hrilhfiah rawh.

⁹ Pathian rinnaah chuan, min kaihhruai dân leh min kaihhruai chhante hre thiam kîl kêl lo mah ila, kan tâna thil ṭha ber tûr a hria a ni tih rinnghehna a tel a ni. Mosia Dân aṭanga entîrna pakhat ngaihtuah ta ila. Râl beihnaa riahhmun chungchânga dân pakhat chu, zunram thiar rêng rêng chu riahhmun pâwnah phûmbo zêl tûr tih hi a ni. (Deuteronomy 23:​13, 14) Israelte chuan chutiang dânte pêk an nih chhan an hre lo mai thei a; ṭhenkhat chuan thil ṭûl lo tak niin an ngai mai thei bawk. Nimahsela, chuta ṭang chuan tûn lai damdawi lam thiamte chuan chu dânin tui a vawng thianghlim a, rannungte’n a theh darh natna hrik tam tak lak ata mi a vênghim bawk tih an hre chhuak a ni. Chutiang bawk chuan, thlarau lamah te, vântlâng lamah te, thinlung lamah te, leh taksa lamah te, leh rilru lamah te chhan a neih avângin, mipat hmeichhiatna hman chu nupate tân chauh Pathianin a phal a ni. Tûnah, nungchang thianghlimna vawng Bible thawnthua mi ṭhenkhat chanchin i ngaihtuah ang u.

Josefa​—A Nungchâng Mawina Avânga Malsâwm A Ni

10. Tuin nge Josefa chu thlêm a, ani’n engtin nge a chhân lêt?

¹⁰ Bible-a mi entawn tlâk tak pakhat Jakoba fapa, Josefa chanchin hi i hriat tawh ngei a rinawm. Kum 17 mi a nihin, Aigupta lal Pharoa vêngtu pâwl hotu, Potiphara chhiahhlawhin a awm ṭan a. Jehova chuan Josefa chu mal a sâwm a, Potiphara neih zawng zawng chunga hotu-a dah a ni ta a ni. Kum 20 chho bâwr vêl a lo nih meuh chuan Josefa chu “tlâwntlai ṭha tak a ni a, a hmêl pawh a ṭha hle a.” Chuvângin, Potifara nupui chuan a ngaizâwng a, thlêmthlûk a tum ta a. Josefa chuan a dinhmun chu hrilh chiangin, chutiang thil tih chu a pu hnêna rinawm lohna a nih mai bâkah, ‘Pathian chunga sualna’ a ni dâwn tih a hrilhfiah a ni. Engvângin nge chutianga a hrilhfiah?​—Genesis 39:​1-9.

11, 12. Pathianin inngaihna leh uirena chungchângah ziakin dân chu la pe lo mah se, Josefa khân engvângin nge chutianga a ngaihtuah theih?

¹¹ Josefa thu tlûkna chu mite hriat chhuah leh a hlauh vâng a ni lo tih a chiang hle a. A chhûngte chu hmun hla takah an awm a; tin, a pa phei chuan a thi tawhah a ngai a ni. Mipat hmeichhiatna chu lo hmang pawh ni se, a chhûngte chuan an hre hauh lo vang. Tin, Potiphara leh a chhiahhlawh mipate pawhin awm loh châng an neih ṭhin avângin, anni pawhin an hre chhuak hauh lo vang. (Genesis 39:11) Mahse, chutianga khawsak chu Pathian hmaah thuh rûk theih a ni lo tih Josefa chuan a hria a ni.

¹² Josefa chuan Jehova chanchin a hriatte chu a ngaihtuah ngei ang a. Eden huana Jehova thu puanchhuah: “Chuvângin, mipain a nu leh a pa a kalsan ang a, a nupui a vuan ang: tichuan tisa pum khat an lo ni tawh ang” tih kha a hriat ngei a rinawm bawk a. (Genesis 2:24) Chu bâkah, Philistia Lal-in a pi, Sari, neih tûra a thlêm avânga a hnêna Jehova thusawite pawh a hriat a rinawm bawk a ni. Jehova chuan chu Lal hnênah chuan: “I hmeichhe hruai avâng hian mitthi mai i ni ta; mi nupui a ni si a, . . . tichuan, kei pawhin ka chunga i thil tihsual tûr chu ka khap che a ni: chuvângin a ni, amah i khawih ka phal loh ni,” tiin a hrilh a ni. (Hawrawp kan tihâwn a ni) (Genesis 20:​3, 6) Chuvângin, Jehova’n ziakin dân chu la pe lo mah se, inneih chungchânga a duhzâwng chu a lang chiang êm êm a ni. Josefa chhia leh ṭha hriatna leh Jehova tihlâwm a duhna chuan nungchang bawlhhlawhna a hnâwltîr ta a ni.

13. Engvângin nge Josefa khân Potiphara nupui kha a pumpelh theih loh?

¹³ Amaherawhchu, Potiphara nupui chuan “nî tin maiin” amah mutpui tûrin a sâwm reng a. Engvângin nge Josefa chuan a pumpelh mai loh? Awle, chhiahhlawh a nih tlat avângin hna thawh tûr a nei a, a dinhmunte chu a tidanglam thei lo a ni. Thil hlui laih chhuahte chuan Aigupta in sak dân chu bungraw dahkhâwmna in kal tûr chuan in pui ber kal tlang ngei ngei a ngai tih a târ lang a. Chuvângin, Potiphara nupui pumpelh chu atân thil theih a ni lo.​—Genesis 39:10.

14. (a) Potiphara nupui a thlânchhiatsan hnu khân Josefa chungah eng thil nge thleng? (b) Jehova’n engtin nge Josefa rinawmna chu mal a sâwm?

¹⁴ Tichuan, an pahnih chauva inah an awm ni a lo thleng a. Photiphara nupui chuan Josefa chu a manbet a: “Mi mutpui rawh,” tiin a ngên a. Josefa chu a tlânchhe ta a. A hnâwl avânga a rilru nâ chuan amah sual tum angah a puh ta a ni. Eng nge a nghawng chhuah? A rinawmna avâng chuan Jehova’n ani chu a chawimawi nghâl em? Chawimawi nghâl lo. Lung inah phuar chunga tântîr a ni ta a ni. (Genesis 39:​12-20; Sâm 105:18) Dik lo taka rorêlna chu Jehova’n a hmu reng a, a tâwpah chuan tân in aṭangin lal inah a chawisâng ta rêng a ni. Aigupta rama mi thiltitheiber dawttu lo niin, nupui fanauvin mal a sâwm bawk a. (Genesis 41:​14, 15, 39-45, 50-52) Chu bâkah, Josefa rinawmna chanchin chu tûn thlenga Pathian chhiahhlawhte zir atân kum 3,500 kalta aṭangin ziaka chhinchhiah a ni bawk a ni. Pathian dân felte vawn tlatna avânga malsâwmna ropui tak chu a va ni êm! Chutiang bawkin, tûn laiah pawh nungchang ṭha vawn tlatna avânga hlâwkna chu kan seng nghâl kher lo mai thei a; mahse, Jehova’n a hmu reng a, a hun têah chuan mal min sâwm ang tih kan ring tlat thei a ni.​—2 Chronicles 16:9.

Joba’n ‘A Mit Atân Thuthlung A Siam’

15. Joba’n ‘a mit tâna thu a thlun’ chu eng nge ni?

¹⁵ Rinawmna vawngtu dang leh chu Joba a ni. Diabola fiahna a tuar chhûngin Joba chuan a nun a chhuilêt leh a, thil dang zawng zawngte bâkah mipat hmeichhiatna chungchânga Jehova dân bulte a bawhchhia a nih chuan hremna nasa tak pawh tawrh a inhuam thu a sawi lang a. Heti hian a sawi a ni: “Ka mit atân thuthlung ka siam a, engah nge nula ka melh ang?” tiin. (Joba 31:1) He thu hmangin, Joba chuan Pathian laka rinawm ngheh a tum tlatzia leh, châkna nêna hmeichhe melh takngial pawh a pumpelhzia a ti lang a ni. Ani chuan, ni tinin hmeichhiate chu a hmu ngei ang a, ṭanpui an ngaih châng pawhin a ṭanpui ṭhîn ngei ang. Nimahsela, anmahni ngaihzâwn avânga ngaihsak chu a tum lo. Fiahna a tawrh hma chuan mi hausa tak, “khaw chhak fate zîngah chuan mi ropui ber a ni.” (Joba 1:3) Mahse, a hausaknate hi hmeichhe dangte hîp nân a hmang ngai lo. Chiang takin, nula naupang zâwkte nêna mipat hmeichhiatna hmannaah a inhmang ngai lo.

16. (a) Engvângin nge Joba hi Kristian nupate tân entawn tûr ṭha tak a nih? (b) Malakia hun laia mipate khâ engtin nge Joba laka an danglam êm êm a, tûn lai hunah engtin nge ni ve?

¹⁶ Tichuan, hun hlimawmah leh hrehawmah pawh Joba chuan nungchang lama a rinawmna chu a vawng tlat a. Chûngte chu Jehova chuan a hmu vek a, nasa takin mal a sâwm ta a ni. (Joba 1:10; 42:12) Joba chu Kristian nupa, mipa leh hmeichhiate tân entawn tûr ṭha a va ni êm! Jehova’n a hmangaih pawh hi a mak lo ve! Chu mi nêna inpersan tak maiin, tûn laia mi tam takte nun dân chu Malakia hun laia thil thleng nên a inang êm êm thung a. Zâwlnei chuan hmeichhe naupang zâwkte neih duh avânga mipa tam takin an nupuite an ṭhen ṭhîn chu a dem a. Jehova maichâm chu hmeithaite mittuiin a khat a, chûng an nupuite “bumtu” mipate chu Pathianin a dem hlawm a ni.​—Malakia 2:​13-16.

Thianghlimna Vawng Tlattu Nula

17. Engtin nge Sulam nula chu “huan humhalh tlat” ang a nih?

¹⁷ Rinawmna vawngtu a pathumna chu Sulam nula hi a ni. Naupang si, hmêlṭha bawk si a ni a, berâm vêngtu tlangvâl chauh ni lo, Israel lal hausa tawntaw Solomona pawhin a hmangaih a ni. Hla Thlan Khâwmte-a a thawnthu pum puiah hian, he Sulam nula hian thianghlimna a vawng tlat a, chuvângin, a bul vêla awmte zah a kai phah a ni. Chu nula chuan Solomona chu hnâwl mah sela, nula thawnthu chu ziak tûrin Pathianin a thâwk khûm a ni. A hmangaih berâm vêngtu tlangvâl pawh chuan a nungchang thianghlimna chu a zah bawk a ni. Ṭum khat phei chu Sulam nula chu “huan humhalh tlat” angah a ngai nghe nghe a. (Hla Thlan Khâwmte 4:12) Hmân lai Israel hunah chuan, huan mawi tak chhûngah chuan thlai chi hrang hrang duhawm tak tak te, pangpâr rimtui tak tak te, leh thing mawi tak tak te a awm ṭhîn a. Chûng huante chu hlîng palin emaw, bangin emawa hung a ni ṭhîn a, a kawngka aṭang chauhva luh theih a ni ṭhîn. (Isaia 5:5) Berâm vêngtu tân chuan, Sulam nula rilru thianghlimna leh duhawmnate chu chutiang huan mawi vâng tak ang chu a ni a. A invawng thianghlim famkim a ni. A hmangaihna duhawm tak chu a pasal tûr atân chauh a ni ang.

18. Josefa te, Joba te, leh Sulam nula te chanchin ziak chuan eng nge min hriattîr?

¹⁸ Sulam nula chuan nungchang lama rinawmah, tûn laia Kristian hmeichhiate tân entawn tûr ṭha chungchuang a siam a. Jehova chuan Sulam nula ṭhatna chu a hmu a, a hlut bawk a; tichuan, Josefa leh Jobate ang bawkin ani chu mal a sâwm a ni. Chûng an rinawmna thiltihte chu min kaihruaitu atân Pathian Thu-ah chhianchhiah a ni. Tûn laia rinawmna vawn tuma kan thawhrimnate chu Bible-a chhinchhiah ni lo mah se, Jehova chuan a duhzâwng titute tân chuan “hriat rengna lehkhabu” a nei reng a ni. Chuvângin, nungchang thianghlim vawn tuma kan thawhrimnate chu Jehova chuan “a lo ngaithla a” a hlim êm êm ṭhîn tih i theihnghilh ngai lovang u.​—Malakia 3:16.

19. (a) Nungchang thianghlimna hi engtin nge kan thlîr ang? (b) Thuziak dawt leha sawiho tûr chu eng nge ni?

¹⁹ Rinna nei lote’n min nuihzat ṭhîn mah se, min Siamtu thuawi chu kan hlimpui a ni. Nungchang ṭha zâwk, Pathian duhzâwng nungchang chu kan nei a. Chu chu thil chhuanawm tak, hlut êm êm tûr a ni. Nungchang thianghlim vawntlatna hmangin, Pathian malsâwmnaah kan hlim thei a; tin, beiseina duhawm tak nakina lo thleng tûr malsâwmna tâwp thei lo chu kan vawng ṭha thei a ni. A nih leh, nungchang thianghlim tak vawng reng tûrin eng nge kan tih theih? He zawhna pawimawh tak hi thuziak dawt lehah sawiho a ni ang.

[Footnote-te]

I Hrilhfiah Thei Em?

• Mipat hmeichhiatna chungchângah Bible-in eng nge a zirtîr?

• Bible-a “inngaihna” tih hian engte nge a huam tel?

• Nungchang thianghlimna vawn chu engtin nge kan hlâwkpui?

• Engvângin nge Josefa te, Joba te, leh Sulam nula te chu tûn lai Kristiante tân entawn tûr ṭha tak an nih?

[Phêk 9-naa milem]

Josefa’n nungchang bawlhhlawhna a tlânchhiatsan

[Phêk 10-naa milem]

Sulam nula chu “huan humhalh tlat” ang a ni

[Phêk 11-naa milem]

Joba’n ‘a mit atân thuthlung a siam’