I Unau I Hneh Thei
“Kal la, amah leh nangmah chauhva hriatah a sualnaah chuan zilh ang che; a ngaihthlâk che chuan i unau chu i hneh a ni tawh ang.”—MATTHAIA 18:15.
1, 2. Dik lohna chungchângah Isua’n eng thurâwn ṭangkai tak nge a pêk?
RAWNG bâwl nân kum khat pawh a nei tawh lo va, chutih lai chuan, Isua chuan a zirtîrte tân zirlai pawimawh tak a pe a ni. Chûng chu Matthaia bung 18-ah i chhiar thei ang. Pakhat chu naupang ang maia kan inngaihtlâwm a pawimawhzia hi a ni. Chu mi zawhah, “hêng . . . mi tête zînga pakhat” tihtlûk hi kan pumpelh tûr leh pêng bo “mi tête” an boral loh nâna ngaiawhtîr leh chu kan tum tûr a ni tih a sawi uar hle a. Tichuan, Isuan chuan Kristiante inkâra harsatna chinfel dân thurawn ṭangkai tak leh hlu tak chu a sawi belh a ni.
2 A thusawi: “I unauvin i chungah thil tisual sela, kal la, amah leh nangmah chauhva hriatah a sualnaah chuan zilh ang che; a ngaihthlâk che chuan i unau chu i hneh a ni tawh ang. A ngaihthlâk loh che erawh chuan, mi dang pakhat emaw pahnih emaw i hnênah hruai ang che, chutichuan thu tinrêng chu hretu pahnih emaw, pathum emaw kaa tihngheha a awm theih nân. Tin, anni pawh chu a ngaihthlâk duh loh chuan kohhranho hnênah thlen ang che; tin, kohhranho pawh a ngaihthlâk duh loh chuan, ani chu i tân Jentail leh chhiahkhawntu ang ni rawh se,” tih chu i hre chhuak mai thei. (Matthaia 18:15-17) Chûng thurâwn chu eng hunah nge kan hman ang a, chutiang kan tih huna kan rilru put hmang tûr chu eng nge ni?
3. Mi dangte thil tihsual thu-ah eng tih dân tlângpui nge kan hman theih?
3 Thuziak hmasa chuan ṭha famkim lo leh sual tih duhna rilru nei vek kan nih avângin, ngaidam peih ni tûra thawh kan ngai tih chu a sawi pawimawh hle a. Chu chu kan Kristian puite thusawi emaw, thiltih emaw avânga kan rilru a nat hunin a ni bîk a ni. (1 Petera 4:8) Thinurna kal liamtîr mai chu a ṭha ber fo—ngaidama theihnghilh mai tûr chuan. Hetianga kan tih hian, Kristian kohhranah remna awmtîr angah kan inngai thei a ni. (Sâm 133:1; Thufingte 19:11) Amaherawhchu, i rilru tinatu i unaupa emaw, unaunu emaw nêna thil awm dân tihfel ngei ngai i tih châng a awm thei. Chutiang dinhmunah chuan, a chunga Isua thusawite hian kaihhruaina a pe ṭhîn.
4. Mi dangte thil tihsualah engtin nge Matthaia 18:15 hi thu bul anga kan hman theih?
4 “Amah leh nangmah chauhva hriatah a sualnaah chuan zilh ang che,” tiin Isua chuan thurâwn a siam a. Chu chu a finthlâk a ni. German ṭawnga lehlin ṭhenkhat chuan he ṭawngkauchheh hi a sualna chu “mit pali hmuhah,” sawi chhuak tûrin a ti a, a awmzia chu amah leh nangma mithmuhah chauh tihna a ni. Harsatnate a rûk têa zaidam taka i sawi chhuah hian, tihven a awlsam zâwk ṭhîn. Ngilnei lo tak emaw, huatthlala tak emawa thusawitu, a nih loh leh thil titu unau chuan i hriatah chauh a sualna chu a pawm duh zâwk ang. Mi dangin an hriatve erawh chuan, ṭha famkim lo mihring zia chuan hnial emaw, insawi thiam emaw a duhtîr mai ang. Mahse, thil awm dân chu “mit pali hmuhah” chauh i sawi chuan sual emaw, thil dik lo tihluihna emaw ai mah chuan thil hriat sual palh vâng a ni tih i hre chhuak mai thei a ni. Hriat sual palh vâng a ni tih in pahniha in hriat tawh chuan, thil in tifel thei a ni; thil ho mai mai ṭhanlentîr a, in inṭhianṭhatna tichhiattîr lovin. Chuvângin, Matthaia 18:15-a thu bulte hi, ni tin nuna rilru natna tê tham tak takah pawh a hman theih a ni.
Eng A Tihna Nge Ni?
5, 6. A chhehvêla thu awmte aṭangin, Matthaia 18:15 hian eng ang sual nge a kawh a, chu chuan eng nge a târ lan?
5 Chiang taka sawi chuan, Isua thurawn chu thu urhsun zâwkte nên pawh a inlaichîn a. Isua chuan: “I unauvin i chungah thil tisual sela,” tih a sawi a. A zau zâwnga thlîr chuan, “thil tisual” tih chuan tihsual palh engpawh emaw, tlin lohna engpawh emaw a ni thei. (Joba 2:10; Thufingte 21:4; Jakoba 4:17) Amaherawhchu, Isua’n sual a tih chu sual nasa tak a ni ngei ang tih a chhehvêla thute chuan a kawhhmuh a ni. ‘Jentail leh chhiahkhawntu anga’ thlîr theih khawpa sual titute siam thei chu sual nasa tâwk tak a ni ngei ang. Chu ṭawngkauchheh chuan eng nge a kawh?
6 Chûng thu ngaithlatu Isua zirtîrte chuan an khuaa mite chu Jentailte nên an inkâwm lo tih an hria a. (Johana 4:9; 18:28; Tirhkohte 10:28) Tin, Juda thlah ni si a, mipuite hmang dik lotu chhiahkhawntute chu an kâwm lo bawk. Dik taka sawi chuan, Matthaia 18:15-17-a târ lan thu chu sualna nasa tak a ni a, ngaihdam leh theihngilh theih mi mal intih thinurna emaw, rilru intihnatna emaw mai a ni lo.—Matthaia 18:21, 22.a
7, 8. (a) Eng ang sualna nge upate ngaihtuah tûr chu? (b) Matthaia 18:15-17 nêna inremin eng ang sualna nge Kristian pahnih inkâr chauhva chinfel theih?
7 Dân thupêk hnuaiah chuan, sual ṭhenkhat chuan rilru tihnata awmte ngaihdamna mai aia tam a mamawh ṭhîn. Pathian sawichhetu te, kalpêng te, milem biakna te, leh mipat hmeichhiatna lama sual: inngaihna te, uirena te, leh mawngkawhurna te chu upate (a nih loh leh puithiamte) hnêna hriattîr tûr a ni a, anni’n an enkawl tûr a ni. Chu chu Kristian kohhranah pawh a dik a ni. (Leviticus 5:1; 20:10-13; Numbers 5:30; 35:12; Deuteronomy 17:9; 19:16-19; Thufingte 29:24) Mahse, heta Isua’n a sawi sualna hi mi pahnih inkâr chauhva tihfel theih chi buaina a ni tih hria ang che. Entîr nân: Thinrima emaw, thîkna emaw avângin miin a ṭhian a rêl thei a. Kristian pakhatin a hun tiam dik taka zo tûr leh hmanrua bîk chikhata siam tûrin contract a hmu a. Kristian dang pakhat chuan zawi zawia a hun apianga rulh tûr emaw, rulh hun tûr ni tiam emaw neiin pawisa a pûk a. Mi pakhat chuan a pu-in a zirtîr chuan, (a hna thawhna a thlâk a nih pawhin) an intiamna hun ruat emaw, an inremna bial chhûng emawah a el emaw, a pu dâwrtute lâkpên emaw chu a tum lo vang tih a tiam a.b Unau pakhat chuan a thutiam chu a hlen loh va, a thil tih dik loh chunga a inchhîrna a neih bawk loh chuan, chu chu thu urhsûn tak a ni ngei ang.. (Thu Puan 21:8) Mahse, chutiang dik lohnate chu pahnih chuah inkârah a tihfel theih a ni.
8 A nih leh, chu mi chungchâng chu engtin nge i tihtâwp ang? Isua thusawi chu rahbi pathuma thlîr a ni fo ṭhîn a. A mal malin lo ngaihtuah i la. Sâwi danglam theih loh leh dân kal phung anga ngaih ai chuan a awmzia dik tak hriatthiam tum zâwk la, i hmangaih thiltum kha hlauh ngai suh ang che.
I Unau Hneh Tum Rawh
9. Matthaia 18:15 a taka kan hman nân eng nge kan rilrua kan vawn reng tûr?
9 Isua’n: “I unauvin i chungah thil tisual sela, kal la, amah leh nangmah chauhva hriatah a sualnaah chuan zilh ang che; a ngaihthlâk che chuan i unau chu i hneh a ni tawh ang,” tiin a sawi ṭan a. Hei hi rinthu maia innghat hmalâkna a ni lo chiang hle. I unau chuan thil dik lo a ti a, a insiam ṭhat a ngai a ni tih hmu thiam tûra ṭanpui nân fiahna emaw, chanchin kimchang tak emaw i nei tûr a ni a. Thil chu sual zualtîr emaw, rilru put hmang nghet nihtîr emaw lo vin, chêt nghâl vat chu a ṭha a ni. Chu mi ding taka ngaihtuah rengna chuan nangpawh a tichhe thei che a ni tih theihngilh suh ang che. Sawihona chu nangmah leh amah inkârah chauh tûr a nih avângin, mite khawngaih hlawh nân emaw, thiam inchantîr nân emawa midangte hnêna sawi lâwk chu pumpelh ang che. (Thufingte 12:25; 17:9) Engvângin maw? I thiltum avângin.
10. Kan unau hneh tûrin engin nge min ṭanpui ang?
10 I tum ber chu i unau hrem emaw, tihmualpho emaw, tlâkchhiattîr emaw ni lo vin, amah hneh chu a ni tûr a ni. Thil dik lo a ti tak tak a nih chuan, Jehova nêna a inlaichînna chu dinhmun hlauhawmah a awm a ni. I Kristian unau nihtîr reng chu i duh tak zet a. A fâla sawihonaah chuan i zaidam reng a, ṭawngkam na takte emaw, inmawhpuhna ṭawngkam vîn takte emaw i hman loh chuan hlawhtlinna a awmtîr thei lehzual ngeiin a rinawm. He hmangaih inhmachhawnnaah hian ṭha famkim lo, sualna nei mihring in ni ve ve tih hre reng ang che. (Rom 3:23, 24) Ani chuan amah i rêl lo va, ṭanpui i duh tak zet a ni tih a hriat chuan, buaina chu awlsam takin a tihven theih ang. He inpanna ngilnei leh thianghlim tak chuan a bîk takin finna a târ lang ang: in pahniha dik lohna in neih ve ve emaw, inhriatthiam lohna chu buaina awm chhan bulpui emaw a nih chuan.—Thufingte 25:9, 10; 26:20; Jakoba 3:5, 6.
11. Thil tisualtu-in min ngaithla lo a nih pawhin, eng nge kan tih theih?
11 Thil dik lo a thleng a, chu chu sual nasa tak a ni tih hmu tûra i ṭanpui chuan, a inlamlêttîr mai thei a. Mahse, dik tak chuan, chapona chu a dâltu a ni thei. (Thufingte 16:18; 17:19) Chuvângin, thil dik lo a tih chu pawma a inchhîr nghâl mai lo a nih pawhin, hma dang la leh nghâl lovin, i en thlithlai thei ang. Isua chuan ‘vawikhat chauh kal la, a sualnaaah chuan zilh ang che’ a ti lo. Sualna chu i chinfel theih a nih avângin, Galatia 6:1-a rilru nei chungin leh “mit pali hmuhah” pan nawn leh la chuan, i hlawhtling mai thei asin. (Juda 22, 23.) Anih leh, sual chu tih a ni tih leh a chhâng lêt lo vang tih i hriat chuan engtin nge ni ang?
Ṭanpuina Puitling La Rawh
12, 13. (a) Dik lohna chinfel nân eng rahbi pahnihna nge Isua’n a sawi? (b) He rahbi zawhnaa thurâwn inchawih takte chu engte nge ni?
12 Thil sual nasa tak tipalh ni ta la, mi dangte’n beidawngin hnuchhawn nghâl ta che sela, i duh ang em? Duh lovang. Chutiang zêlin, Isua pawhin rahbi hmasa ber hnûah, pawm tlâka Pathian chibai bûknaah nang leh mi dangte nêna a inpumkhat nân i unau hneh i tumna chu bânsan loh tûr a ni tih a kawhhmuh a ni. Isua chuan a rahbi pahnihna tlângpui hetiangin a sawi leh a: “A ngaihthlâk loh che erawh chuan, mi dang pakhat emaw pahnih emaw i hnênah hruai ang che, chutichuan thu tinrêng chu hretu pahnih emaw, pathum emaw kaa tihhngeha a awm theih nân,” tiin.
13 Ani chuan “mi dang pakhat emaw, pahnih emaw” hruai tûrin a ti a. Rahbi hmasa ber i zawh hnu chuan, unau tam takte nêna buaina sawikhâwm emaw, bial kantu hriattîr emaw, a nih loh leh unaute hnêna buaina chungchâng ziaka hriattîr tûrin i zalên a ti lo bawk. Thubuai hi la remfel loh a nih avângin, nangmah pawh chu a dik lo zâwk dinhmunah i ding mai thei tih hria ang che. Mi rêl hrât nihtîr thei chanchin dik lo thehdarhtu nih chu i duh lo vang. (Thufingte 16:28; 18:8) Mahse, Isua chuan mi dang pakhat emaw, pahnih emaw hruai tûrin a sawi a ni. Engvâng nge ni ang? Tin, chu chu tute nge ni thei ang?
14. Rahbi pahnihna zawhnaah tunge kan kalpui theih?
14 Sualah a inbarhlût a ni tih hminna leh Pathian leh nangmah nêna inremna a neih theih nâna inlamlêt tûra chêttîrna hmangin i unau chu hneh i tum a ni. Chu mi tihlawhting tûr chuan, mi dang “pakhat emaw, pahnih emaw” chu a dik lo a ni tih hretu ni thei se a duhawm hle. Anni chu chûng thil thlen laia lo awm ve, a nih loh leh sum dâwnna chungchângah eng nge a tih (a tih loh) tih thu-ah chanchin dik tak hretu an ni thei ang. Chutiang thuhretu an awm remchân loh chuan, chutiang thila thiltawn lo nei tawh chu hruai la; tichuan, thil thleng chu a dik lo tak tak a nih leh nih loh tihnghehin a awm thei ang. Chu bâkah, nakina mamawh a nih tâkin, anni chu thil sawi tawh te, thu dik hrilh tawhte leh beihna siam tawhte nemnghehnaah chuan thuhretu an ni thei bawk ang. (Number 35:30; Deuteronomy 17:6) Chuvângin, anni chu ṭanlam nei lo mai emaw, dân kengkawhtu mai emaw an ni ngawt lo va, an rawn tel chhan chu i unau leh an unau hneh tûra ṭanpui hi a ni.
15. Rahbi pahnihna chu zawh kan ngai a nih chuan, engvângin nge Kristian upate chu an ṭangkai ang?
15 Chûng i mi hruaite chu kohhran upate an ni tûr a ni khêr chuang lo. Mahse, unaupa puitling, upate chuan an thlarau lam tlinna hmangin ṭanpuina an nei thei ang. Chutiang upate chu “thlipui laka bîkna hmun ang leh thlihrâng laka inhumhimna ang a ni ang; thlalêra lui luang ang leh ramrova lungpui lian tak hlim ang mai chu.” (Isaia 32:1, 2) Anni chuan thil ngaihtuahnaah leh unaute siamṭhatnaah thiltawn an nei a ni. Tin, thil dik lo titute pawhin chutiang “mihringte hnêna thilpêkte” lakah rinngamna lantîrna tûr chhan ṭha an nei bawk.c (Ephesi 4:8, 11, 12) Thilawm dânte chu chutiang mi puitling hmaa sawi chhuahna leh anmahni nêna ṭawngṭaina neihna chuan boruak thar a siam thei a, tihven theih loh nia lang buainate pawh a tiveng thei ṭhîn a ni.—Jakoba 5:14, 15, khai khin rawh.
Hneh Tûra Beihna Hnuhnûng Ber
16. Isua sawi rahbi pathumna chu eng nge ni?
16 Rahbi pahnihte’n thil a tihfel theih loh chuan, kohhran enkawltute chu rahbi pathumnaah an inrawlh ngei ngei a ni. “Tin, [pakhat emaw, pahnih emaw] pawh chu a ngaihthlâk loh chuan kohhranho hnênah thlen ang che; tin, kohhranho pawh a ngaihthlâk duh loh chuan, ani chu i tân Jentail leh chhiahkhawntu ang ni rawh se.” Hei hian eng nge a kaihhnawih?
17, 18. (a) ‘Kohhran hnêna sawi’ tih a awmzia hre thiam tûrin eng entîrna hian nge min ṭanpui? (b) He rahbi hi tûn laiah engtin nge kan hman?
17 Hei hi kohhran pum pui inkhâwm ṭhinna emaw, special inkhâwmna emawah a sualna emaw, a dik lohna emaw sawi chhuak tûr tihna niin kan hre lo. Pathian Thu aṭangin tih dân tûr âwm kan ruat thei a ni. Hel hmang te, inkhawhral hmang te, leh ruih hmang te chungchânga hmân lai Israelte chunga tih dân tûr hi han en ila: “Miin fapa luhlul tak, hel hmang tak nei ang sela, a nu leh a pa thu âwih lovin, an thununna pawm duh lo sela, a nu leh a pa chuan an kai ang a, an khaw upate hnênah an khaw kulh kawngka bulah an hruai tûr a ni; tin, an khaw upate hnênah chuan, ‘He kan fapa hi luhlul tak leh hel hmang tak a ni a, kan thu pawh a âwih duh lo va; inkhawhral hmang leh ruih hmang mi a ni,’ an ti tûr a ni. Tichuan khuaa mi zawng zawngte chuan lungin an dêng hlum tûr a ni,” tih chu.—Deuteronomy 21:18-21.
18 Mi thil sual tih chu a hnam pum puiin an ngaithlain, ro an rêlsak lo va; a chipui zawng zawngte pawhin chutiangin an ti hek lo. ‘Upaa’ pawmte chuan mipui aiawhin an ngaihtuah zâwk a ni. (Deuteronomy 19:16, 17-a “chu mi huna puithiamte leh rorêltute” rêlfel thu buai nên khai khin rawh.) Chutiang bawkin, tûn laiah pawh rahbi pathumna zawh a ngaih chuan, kohhran aiawhtu, upate’n an ngaihtuah a ni. An tum chu thuhmun a ni; a theih hrâm chhûng Kristian unau hneh chu. Anni chuan thu buai chungchânga ngaih dân lo siam lâwkna emaw, hleih neihna emaw tel lo va, rorêl dikna an lantîrna hmangin hei hi an ti a ni.
19. Thil awm dân ngaihla tûra ruat upate chuan eng nge tih an tum ang?
19 Sual tih ngei a ni nge ni lo (a nih loh leh la tih chhunzawm zêl a ni dâwn nge dâwn lo) tih hriat nân thu dik chhût an tum ang a, thuhretute thusawi an ngaithla bawk ang. Anni chuan kohhran chu chhiatna leh khawvêl thlarau aṭanga vênhim an duh a ni. (1 Korinth 2:12; 5:7) An Pathian lehkha thu lama an tlinna milin, anni chuan, “zirtîrna dik tak kawngah chuan mi a fuih theihna tûr leh, hnialtute chu thiam loh a chantîr theihna tûrin,” an bei ang. (Tita 1:9) Thil dik lo titute chu: “Ka koh lai che u khân mi in chhân duh lohva, thu ka sawi lai khân benga in hriat duh lohva, ka mithmuha thil sual chu in tih zâwka, ka thil lawm loh zâwng chu in thlan avângin,” tia Jehova zâwlneiin a ziah Israel mite ang an nih loh beisei a ni.—Isaia 65:12.
20. Thil sual tituin a ngaihthlâk duh lo va, a inlamlêt duh loh chuan Isua thusawi tihngei tûr chu eng nge ni?
20 Nimahsela, mi sual tlêm tê chauhvin chutiang rilru put hmang chu an lantîr a ni. Chutiang rilru put hmang an lantîr chuan, Isua kaihhruaina pêk chu a chiang hle a ni: “I tân Jentail leh chhiahkhawntu ang ni rawh se,” tih chu. Lalpa chuan an laka nunrâwng emaw, natna hreawm tak tawrhtîr duhna emaw chu a sawi lo. Mahse, thil sual ti inchhîr lote kohhran aṭanga hnawtchhuak tûra tirhkoh Paula zirtîrna nên inkalhna a nei lo. (1 Korinth 5:11-13) Hei pawh hian atâwpah chuan mi sual hnehna a rahchhuak mai thei a ni.
21. Kohhran aṭanga hnawhchhuah te tân eng beiseina nge la awm thei?
21 Isua tehkhin thua fapa tlânbo aṭang hian, hei hi a nih theih dân kan hmu thei a. Tehkhin thu-ah chuan, hmangaih taka khawsakhona a pa in a chhuansan hnu chuan, chu mi sual chu ‘a inhre chhuak a.’ (Luka 15:11-18) Thil dik lo titu ṭhenkhatte chu eng hunah emaw an inhre chhuak ang a, “Diabola thang ata an chhuak” ang tih Paula chuan Timothea hnênah a sawi a ni. (2 Timothea 2:24-26) Sim duh lo sual titu tupawh kohhran aṭanga hnawh chhuah tûrte chuan, Pathian lawm nihna leh Kristian mi rinawm nghette nêna inkawmkhâwmna chu an chân ngeiin an inhria ang a; tichuan, an inhre chhuak leh ang tih chu kan beisei tlat a ni.
22. Engtin nge kan unau kan la hneh cheu theih?
22 Isua chuan Jentail leh chhiahkhawntute chu tlan phâk loh angin a thlîr lo. A hnuhnûng zâwk zînga mi pakhat, Levia mi Matthaia chu a inlamlêt a, tih tak zetin ‘Isua a zui’ a, tirhkoh ni tûra thlan a ni hial a ni. (Marka 2:15; Luka 15:1) Chutiang zêlin, tûn laiah pawh thil sual titu chuan “kohhranho pawh a ngaihthlâk duh loh” chuan hnawhchhuah a ni a; mahse, a hunah chuan inlamlêt a, a kawngte a siam ngil chu kan nghâk thei a ni. Chutianga a tih a, kohhran mi leh sa a nih leh chuan, biakna dik huang chhûnga awm tûra kan unau kan hnehna chu kan hlimpui hle ang.
[Footnote-te]
a McClintock leh Strong’s Cyclopedia chuan: “Thuthlung Thar-a chhiahkhawntute chu mahni ram phatsantute leh kalpêngte, sakhaw mi lote nêna an inkawm fona avânga intibawlhhlawhte, leh awpbettute hmanrua anga ngaih an ni. Mi sualte zînga chhiar tel an ni a . . . An inla hrang a, rual pâwl chinte chuan an kâwm lo, an ṭhiante chu anmahni anga mi chuangtlai anga thlîrte an ni,” tiin a sawi.
b Sumdâwnna emaw, pawisa lam thilah emaw chuan ngamthlêmna, dâwtthu, a nih loh leh bumna chu Isua’n sual a tihah hian a tel thei vek a ni. A târ lan nân, Matthaia 18:15-17-a chhinchhiah kaihhruaina a pêk zawhah, Isua chuan chhiahhlawh pahnih pawisa pûka, pe leh thei lote chungchâng tehkhin thu a pe.
c Bible lama mi thiam pakhat chuan: “Thil dik lo titu chuan mi pahnih emaw, pathum emaw chu (a bîk takin mi zahawm an nih chuan) mi pakhat, a bîkin ngaih dân thuhmun neihpui lotu, ai chuan a ngaihthlâk duh zâwk châng a awm ṭhîn,” tiin a sawi a ni.
I Hre Chhuak Em?
◻ A bul berah, eng ang sualnaah hian nge Matthaia 18:15-17 hi hman a nih?
◻ Rahbi pakhatna zawh kan ngaihin eng nge kan hriat reng tûr?
◻ Rahbi pahnihna zawh ngei kan ngaih chuan tunge ṭanpuitu ni thei ang?
◻ Rahbi pathumnaah tute nge inrawlh a, engtin nge kan unau chu kan la hneh theih cheu?
[Phêk 18-naa milem]
Judate chu chhiahkhawntute lakah an inthiarfihlîm. Matthaia chuan a kawngte kalsanin Isua a zui
[Phêk 20-naa milem]
“Mit pali hmuhah” thil chu kan tifel thei fo