Chhiartute Zawhna
Jehova Thuhretute chuan vote thlâk hi engtin nge an thlîr?
Hemi chungchânga thlîr dân dik nei tûra Pathian chhiahhlawhte ṭanpuitu Bible thu bul chiang tak a awm a. Nimahsela, vote thlâk hrim hrim kalhtu thu bul a awm lo niin a lang. Entîr nân, company director-te tân an company nghawngtu thu tlûkna siam tûrin vote an lâk loh chhan tûr a awm lo. Jehova Thuhretute kohhranah pawh inkhâwm hun tûr leh kohhran sum hmanna tûr chungchânga thu tlûkna siam nân, bân phara vote pêk a ni ṭhîn.
Mahse, polictics inthlanna lama vote thlâk hi eng nge ni? Democratic ram ṭhenkhatah chuan inthlanpui nîah mipui zaa 50 vêl thlengin vote thlâk lo an awm thei a. Jehova Thuhretute erawh chu, mi dangte’n vote thlâk tûra dikna an neihah an va inrawlh lo va; politics inthlanpuite kalhin campaign lah an nei hek lo. Chutiang inthlanpuia an thlan tlin thuneitute chu an zahin, an thlâwp zâwk a ni. (Rom 13:1-7) Inthlanpui atâna ding tuemaw an vote dâwn leh dâwn loh chungchângah chuan, Jehova Thuhretu mi mal tinte chuan a Bible zirtîr chhia leh ṭha hriatna leh Pathian leh Sawrkâr chunga a mawhphurhna a hriatthiam dân ṭanchhanin thu tlûkna an siam ang. (Matthaia 22:21; 1 Petera 3:16) He mi mal thu tlûkna an siamna kawngah Thuhretute chuan thil tam tak an ngaihtuah tel a ni.
A hmasain, Isua Krista chuan a hnungzuitute chungchângah: “Khawvêlin anni chu an hua a, khawvêla mi an nih loh avângin, kei khawvêla mi ka ni lo ang bawk hian,” a ti. (Johana 17:14) Jehova Thuhretute chuan he thu bul hi an ngai pawimawh hle a. “Khawvêla mi an nih loh” avângin, khawvêl politics thilah an tualdâwih a ni.—Johana 18:36.
A pahnihnaah, tirhkoh Paula chu a hun laia mite tân Krista aia “palai” niin a insawi a. (Ephesi 6:20; 2 Korinth 5:20) Jehova Thuhretute chuan Krista Isua chu tûnah chuan Pathian vân Ram lalṭhutthlênga ṭhu tawh Lalber a ni tih leh anni chuan palai angin chumi chanchin chu an puang chhuak tûr a ni tih an hriain, an ring a ni. (Matthaia 24:14; Thu Puan 11:15) Ram tâna palaite chu tirh an nihna ram chhûng thila inrawlh lo tûra beisei an ni a. Pathian vân Lalram aiawhtute kan nih angin, Jehova Thuhretute chuan an awmna ram politics lam thila inrawlh loh chu an mawhphurhna niin an hria a ni.
Ngaihtuah tûr a pathumna chu, an thlan tlin hruaitu thiltih chungah mawhphurhna an nei tel hi a ni. (1 Timothea 5:22 nên khaikhin rawh.) Kristiante chuan chutiang mawhphurhna an lâk duh leh duh loh ngun takin an ngaihtuah tûr a ni.
Palinaah, Jehova Thuhretute chuan an Kristian inpumkhatna chu an ngaihlu hle a. (Kolossa 3:14) Sakhuate hi politics thila an inrawlh hian, sakhaw pâwl khatah inṭhen hranna a thleng fo ṭhîn. Isua Krista entawnin, Jehova Thuhretute chuan politics aṭanga inlahrangin, an Kristian inpumkhatna chu an vawng a ni.—Matthaia 12:25; Johana 6:15; 18:36, 37.
A pangana leh a tâwpnaah, politics aṭanga an inlâkhran avângin Jehova Thuhretute chuan party hrang hranga mi zawng zawngte hnênah Pathian Lalram thuchah pawimawh tak chu zalên takin an hrilh thei a ni.—Hebrai 10:35.
Kan târ lan tâk Bible thu bulte ṭanchhanin, ram tam taka awm Jehova Thuhretute chuan politics inthlannaa vote thlâk lo tûrin mi mal thu tlûkna an siam a, chu chu an chênna ram dânpuiin a phal a ni. Mahse, ram dânin vote thlâk ngei ngei tûrin phût lui ta se, engtin nge ni ang? Chutiang dinhmunah chuan, Thuhretu mi mal tinte tân dinhmun chinfel dân tûr chungchângah an chhia leh ṭha hriatna leh Bible ṭanchhanin thu tlûkna an siam a ngai ang. Tuemaw tân vote thlâkna hmun thlenga a va inlan leh lan loh chu a thu tlûkna siam tûr a ni a. Vote thlâkna hmuna a thiltih chu amah leh Siamtu inkâra thil a ni.
November 15, 1950, chhuak Vênnainsâng, phêk 445 leh 446 chuan: “Kaisara’n a khua leh tuite vote thlâk ngei ngei tûra a tihna hmunah chuan . . . [Thuhretute] chu vote thlâkna hmunah an va kal thei a. Chu chu vote pêkna lehkha chunga an ṭan lam chhinchhiahna chunga thil va nemkai emaw, va ziak emaw tûra an kohna hmun a ni. Vote thlâktute chuan vote pêkna lehkhaah an tih tûr chu an ti ṭhîn. Chumi hmunah chuan, Pathian hmaah a thuhretute chuan Pathian thupêkte leh an rinna milin thil an ti tûr a ni. Vote thlâkna hmuna a tih tûr hrilh chu kan mawhphurhna a ni lo,” tiin a sawi.
Ring lo mi pasala nei Kristian nupui chu a pasalin vote thlâk tûrin tilui ta se, engtin nge ni ang? Awle, Kristiante chu sawrkâr thuneitute hnuaia an awm angin, ani chu a pasal thu neihna hnuaiah a awm a. (Ephesi 5:22; 1 Petera 2:13-17) A pasal thu âwih a, vote thlâkna hmun thlenga a va kal chuan, chu chu ama thu tlûkna siam a ni a. Tu mahin an sawisêl tûr a ni lo.—Rom 14:4 nên khaikhin rawh.
A nih leh, sawrkâr lamah vote thlâk ngei ngei tûra phûtna dân awm lo mah se, vote thlâkna hmuna kal lote chungah huatna nasa tak, khutthlâk duhna hial ang chi awm ta se engtin nge ni ang? A nih loh leh, vote thlâk tûra phût luina dân a awm lo chung pawhin vote thlâkna hmuna kal lote chu, kawng engemaw taka nasa taka hrem an nih chuan engtin nge ni ang? Hetiang leh a anpui dinhmunahte chuan, Kristian chuan a tân thu tlûkna a siam tûr a ni. “Mi tinin mahni phur an phur ṭheuh dâwn si a.”—Galatia 6:5.
An ram inthlanpuiah, Jehova Thuhretu ṭhenkhat chu vote thlâkna hmuna an kal laiin a dangte an kal lo tih an hmuh hian, chu chu ṭhenkhat chuan tlûk phah nân an hmang mai thei a. ‘Jehova Thuhretute chu an tih dân a inang lo,’ an ti mai thei. Mahse, mite tân hetiang chi thilahte hian Kristian tinte’n Pathian Jehova hmaah thu tlûkna an siam tûr a ni tih chu hriat a ngai a ni.—Rom 14:12.
Dinhmun khirh tak hnuaiah Jehova Thuhretute chuan eng ang thu tlûkna pawh siam se, anni chuan an Kristian tualdâwihna leh zalên taka thusawi theihna vawn chu an tum tlat a ni. Engkimah hian anmahni tichak tûr te, finna pe tûr te, leh engti kawng maha an rinna phatsan lo tûrtea ṭanpui tûrin Pathian Jehova an rinchhan tlat a ni. Chutiang chuan, fakna hla phuahtu thusawi an rinzia an târ lang a ni: “Nang chu ka lungpui leh ka kulhpui i ni si a; chuvâng chuan i hming avângin mi hruaiin mi kai ang che,” tih hi.—Sâm 31:3.