ZIRLAI 14

Thu Pawimawh Laite Târ Chhuah

Hebrai 8:1, 2

KHAIKHAWMNA: Ngaithlatute chu i thusawi man tûrin ṭanpui la, thu pawimawh laite chu i thiltum leh thupui nêna a inzâwm dân tichiang rawh.

Thiltum nei rawh. I thusawiin a tum chu mite chanchin hriattîr nge, hmin nge, a nih loh leh thilti tûra chêttîr nge tih chu ngaihtuah la; tichuan, chu mi nêna inmilin sawi ang che. Thu pawimawh zawng zawng chuan i thiltum hlawhtling tûrin a ṭanpui che tih chian rawh.

Heti hian inzâwt rawh: ‘He thupui chungchângah ngaithlatute’n eng zawhnate leh hnial kalhnate nge an neih mai theih? Chûng zawhnate leh hnial kalhnate chu eng anga indawtin nge an rawn zawh ang?’ tiin. Tichuan, i thusawi chu ngaithlatute’n an man a, an hriatthiam a, an pawm theih nân chumi indawt dân i hriat nêna inmilin siamrem ang che.
I thusawi thupui chu sawi uar rawh. I thusawi chhûngin a thupuia ṭawngkam pawimawhte emaw, a tlukpui ṭawngkam dangte emaw sawi nawn fovin, i thupui chu sawi uar rawh.
Thu pawimawh laite chu fiah tak leh hriat awlsam takin sawi rawh. I thupui nêna inkungkaihna nei, i hun neih chhûnga ṭha taka i zirtîr theih tûr thu pawimawh laite chauh thlang rawh. Thu pawimawh nei tam lutuk lo la, fiah taka sawiin, a inkârah châwl lawk la; tichuan, thu pawimawh dangah ṭha takin lût ang che.

Ngaithlatute’n an lo man theih nân thu pawimawh laite chu i thuhmahruaiah i sawi lang thei a, a nih loh leh chûngte chu an hriat reng theih nân a tlipnaah i sawi nawn leh thei a ni.