ZIRLAI 15

Rin Tlatna Nêna Sawi

1 Thessalonika 1:5

KHAIKHAWMNA: Thutak leh i thusawi a pawimawhna i rinnghehzia târ lang rawh.

Ṭha takin inbuatsaih rawh. I thusawi tûr thuziaka a pawimawh zual bîkte leh chûng thute a dikzia Bible-in a finfiah dânte i hriatthiam thlengin zir ang che. I thusawia a pawimawh laite chu ṭawngkam tawi fel taka sawi tum rawh. Chûng chuan ngaithlatute a ṭanpui dân tûr chu ngaihtuah la, thlarau thianghlim dîlin ṭawngṭai ang che.

I thusawi tûr thuziak i bel nân leh nâl taka i sawi theih nân a ri chhuakin sawi chhinna nei ang che.
Rin tlatna târ langtu ṭawngkamte hmang rawh. Thu leh hla chhuaha ṭawngkam hmante chu a ngai ngaia sawinawn lovin, mahni ir-âwm chhuakin sawi rawh. I thusawi i rinzia târ langtu ṭawngkamte thlangin hmang ang che.
Phûr tak leh tih tak zetin sawi rawh. Hriat theih tâwka ringin sawi la, mawi lo anga ngaih a nih loh chuan, ngaithlatute nên mitmeia inzawmna nei ang che.

Rin tlatna nêna thusawi chu remhre lo tak, thu duh tak, leh mi dang nawr luih chînna nên hriat pawlh suh. Phûr taka i sawi hunah pawh, hmangaihna telh ang che.