Chanchin Ṭha An Hrilh Dân Kawngte

KRISTIANTE chu “hnam tina mi zirtîrahte siam” tûra thupêk an ni a; mahse, tihluihna hmanga mi dangte nawrin, an inlehtîr tûr tihna a ni lo. Isua hnathawh tûr pêk chu “thuhnuairawlhte hnênah chanchin ṭha hril” te, “thinlung lungchhiate tuam” te, “lungngai zawng zawng thlamuan” te hi a ni. (Matthaia 28:19; Isaia 61:​1, 2; Luka 4:​18, 19) Jehova Thuhretute chuan Bible aṭanga chanchin ṭha puan chhuahna hmangin chutiang tih chu an tum a. Hmân lai zâwlnei Ezekiela ang bawkin, “thil tenawm tih tawhte avânga thawpika ṭap ṭhînte” chu zawn chhuah an tum a ni.—Ezekiela 9:⁠4.

Tûn lai dinhmun avânga lungngaite an zawn chhuah dân hriat lâr ber chu in tina kal hi a ni. Chutiang chuan Isua’n ‘thu hril leh Pathian ram chanchin ṭha thlen chunga khaw lian leh khaw tê te a fan zêl’ laia a tih ang khân, mite an hmuh theih nân theihtâwp an chhuah a. (Luka 8:1; 9:​1-6; 10:​1-9) Tûn laiah, a theihna hmunah chuan Jehova Thuhretute chuan kum khata vawi engemaw zât tal in tin tlawh a, in neitute nêna tualchhûng emaw, khawvêl thilthleng emaw an ngaihven zâwng thilte leh an ngaihsak zâwng thilte chu rei lo te chhûng tal titipui an tum ṭâng ṭâng a ni. Bible châng pahnih khat vêl lek chu an chhiarpui mai thei a, in neituin a tuipui chuan, Thuhretu chuan a sawibelhpui theih nân an hun remchâng neiha tlawhkîr tûrin ruahmanna a siam thei a. Bible leh Bible hrilhfiahna thu leh hla chhuahte pawh hmuh theihin a awm a, in neituin a duh chuan, in lama a thlâwna Bible zirna an neihpui ṭhîn a ni. Hêng Bible zirna ṭangkai tak tak maktaduai tam takte hi khawvêl puma mi mal leh chhûngkuate chu neihpui an ni.

Kawng danga mi dangte hnêna “ram chanchin ṭha” an hrilh dân chu Kingdom Hall-a inkhâwmna hmangin a ni. Chutah chuan Thuhretute chuan chawlhkâr tinin inkhâwm an nei ṭhîn a. Inkhâwm pakhat chu tûn lai thil ngaihvenawm tak takte chungchâng thua vântlâng thusawi a ni a, chu chu Vênnainsâng magazine thuziak hmanga Bible thupui emaw, hrilh lâwkna thu emaw zirnain a zui bawk a ni. Inkhâwm dang leh chu Thuhretute chu chanchin ṭha puangtu ṭha lehzual an lo nih theihna tûra anmahni zirtîrna school a ni a, chu mi zawhah tualchhûng biala thuhrilh rawngbâwlna chungchâng sawikhâwmna hun bîk tûra ruahman chu neih zawm a ni ṭhîn. Tin, Thuhretute chu pâwl tlêm tê tea insem darhin, mi mal inah Bible zir tûrin chawlhkâr khatah vawikhat an kalkhâwm ziah bawk.

Hêng inkhâwm zawng zawngahte hian tupawh an tel thei a. Thawhlâwm khawn a ni ngai lo. Chûng inkhâwmte chu mi zawng zawng tân a ṭangkai êm êm a ni. Bible chuan: “Hmangaih leh thil ṭha tiha inchawk tho tûrin inngaihtuah tawn ang u; ṭhenkhat tih dân anga kan inkhâwmte bânsan lovin, infuih tawn zâwk ang u; ni chu lo hnai telh telha in hriatin infuih tawn nasa lehzual sauh rawh u,” a ti a. Mahnia zir leh zir bingna neih chu a ṭûl a; mahse, mi dangte nêna inkhâwmhona chuan min tiphûr a ni: “Thîrin thîr a tihriam a, chutiang bawkin miin a ṭhian hmêl a tihriam,” a ni.​—⁠Hebrai 10:​24, 25; Thufingte 27:​17.

Thuhretute chuan an nî tin thiltihnaah mi dangte hnêna chanchin ṭha hrilh theihna hun remchâng an neih apiang chu an hmang ṭangkai bawk a. Chûng chu ṭhenawmte nêna han titi zawk emaw, bus leh thlawhnaa an zinpuite han titipui lawk emaw a ni thei a; tin, ṭhiante leh chhûngte, a nih loh leh chhûn chawlh laia hna thawhpuite nêna titina hun rei zâwk neih pawh a ni thei bawk. Isua he khawvêla a awm laia thuhrilhna a neih tam tak pawh kha chutiang bawk chu a ni​—⁠tuipui kama a kal lai te, tlânga a ṭhut lai te, mi ina chaw a kîl lai te, mo lawmnaa a tel lai te, a nih loh leh Galili Tuipuia sangha manna lawnga a zin laite khân thu a hril zêl a ni. Inkhâwmna inahte leh Jerusalem biak inahte pawh a zirtîr bawk a. A awmna apiangah Pathian Ram thu sawi theihna hun remchâng a hmu zêl a ni. He mi chungchângah pawh Jehova Thuhretute chuan a hniaka zui chu an tum tlat a ni.​—⁠1 Petera 2:21.

ENTAWN TUR SIAM HMANGA THUHRILHNA

Thu hrilhtu che chu a thuhrilh che anga a awm si loh chuan, hêng chanchin ṭha hrilhna kawng chi hrang hrangte hian awmzia a nei lo vang. Thu engemaw sawi a, sawi loh anga mahni awm leh daih si chu vervêkna a ni a, sakhaw vêrvêkna chuan mi maktaduai tam takte chu Bible a hnuchhawntîr a. Chu mi chungchângah chuan Bible mawhpuh tûr a ni lo. Lehkhaziaktute leh Pharisaite chuan Hebrai Pathian Lehkha Thu an nei a; mahse, Isua chuan mi vervêkte tiin a dem a ni. Mosia Dân an chhiar ṭhin thu a sawi zawhah a zirtîrte hnênah hetiang hian a sawi zawm a: “An hrilh apiang che u chu ti ula, zâwm zêl ang che u; an thiltih ang erawh chu ti ve suh ang che u, sawi zawng an sawi ṭhîn a, an ti si ṭhîn lo a ni,” tiin. (Matthaia 23:⁠3) Kristianin nundân ṭha taka nunga entawn tûr a siam chu dârkâr tam tak thusawi aiin a ṭha zâwk a ni. He thu hi ring lo mi pasala nei Kristian nupuite hnênah hetiang hian kawhhmuh a ni: “Thu lovin an nupuite chêtziaa hnehin an awm thei ang, ṭih dêk chunga in chêtze thianghlim enin,” tiin.​—⁠1 Petera 3:​1, 2.

Chuvângin, Jehova Thuhretute chuan chanchin ṭha chu mi dangte hnênah he mi kawnga hrilh chu an tum bawk a ni: mi dangte an hrilh Kristian nun dân ṭha nunpuina kawnga entawn tlâk nihna hmangin. ‘Thil engkim miin an chunga tiha an duh tûr ang apiang chu, mi chungah pawh tih ve’ an tum tlat a. (Matthaia 7:12) Hetiang nungchang hi an Thuhretu nihpuite, an ṭhiante, an ṭhenawmte, a nih loh leh chhûngkhatte chungah chauh ni lo, mi zawng zawng chungah lantîr an tum tlat a ni. Ṭha famkim an nih loh avângin, an hlawhtling pumhlûm reng thei bîk lo va. Mahse, Lalram chanchin ṭha hrilhna mai bâkah a theih hun apianga mi dangte ṭanpui chu an duh tak zet a ni.​—⁠Jakoba 2:​14-17.

[Phêk 19-naa milem]

Hawaii

[Phêk 19-naa milem]

Venezuela

[Phêk 19-naa milem]

Yugoslavia

[Phêk 20-naa milemte]

Ṭha taka ruahman Kingdom Hall-te chu, Bible sawikhâwmna hmun a ni

[Phêk 21-naa milemte]

An in chhûngkhur nunah leh mi dangte an kawmnaah, Thuhretute chuan an thil hrilhte chu nunpui an tum tlat