Chanchin Ṭhain A Thlen Malsâwmnate
“Thuhnuairawlhte hnênah chanchin ṭha hril tûra LALPAN hriak mi thih avângin . . . thinlung lungchhiate tuam tûr te, . . . lungngai zawng zawng thlamuan . . . tûr tein mi tîr a ni.”—ISAIA 61:1-3.
1, 2. (a)Engah nge Isua chu a inchantîr a, engtin nge? (b) Isua puanchhuah chanchin ṭha chuan eng malsâwmna nge a thlen?
RAWNGBAWLNA a ṭan tirh lam Sabbath ni khat chu, Isua chu Nazareth khua inkhâwmna inah a awm a. Chhinchhiahnain a sawi dânin, “zâwlnei Isaia lehkhabu chu a hnênah an pe a. Tin, lehkhabu zial chu a phelh a, he thu ziakna lai hi a chhiar a, ‘Riangvaite hnênah chanchin ṭha hril tûra mi ruat avângin Lalpa thlarau chu ka chungah a awm,’” tih hi. Hrilh lâwk thu chu a chhiar thla zêl a. Tichuan a ṭhu a: “He Pathian Lehkha Thu hi vawiinah hian in hriatah a lo thleng ta,” a ti a.—Luka 4: 16-21.
2 Hetiang hian, Isua chuan chanchin ṭha hriltu leh thlamuanna thu kengtu tûra hrilh lâwk chu amah a nihzia a târ lang a ni. (Matthaia 4:23) Isua thusawi tûr chu chanchin ṭha a va ni tehrêng êm! A thu ngaithlatute hnênah: “Kei khawvêl êntu ka ni; tupawh mi zui chu thimah a lêng tawp lovang a, nunna êng a nei zâwk ang,” tih a hrilh a ni. (Johana 8:12) “Ka thua in awm reng chuan ka zirtîrte in ni tak tak ang. Tin, thutak in hria ang a, thutak chuan bâwih a bân ang che u,” a ti bawk. (Johana 8:31, 32) A ni, Isua chuan “chatuana nunna thu” a nei a ni. (Johana 6:68, 69) Êng, nun, bâwih bânna—hêngte hi malsâwmna hlu a ni ngei mai!
3. Eng chanchin ṭha nge Isua zirtîrte’n an hril?
3 C.E. 33, Pentikost hnuah chuan, zirtîrte chuan Isua hnathawh, chanchin ṭha hrilhna chu an chhunzawm zêl a. Anni chuan “ram chanchin ṭha hi” Israel mite leh Jentailte hnênah an hril a ni. (Matthaia 24:14; Tirhkohte 15:7; Rom 1:16) An thu hril lo dawng duhtute chuan Pathian Jehova chu an lo hre ta a. Anni chu sakhuana lama an saltânna ata tihzalen an ni a, an Lalber, Isua Krista nêna vâna chatuan rorêlna beiseina nei, thlarau lam hnam thar, “Pathian Israelte” zînga mi an lo ni ta a ni. (Galatia 5:1; 6:16; Ephesi 3:5-7; Kolossa 1: 4, 5; Thu Puan 22:5) Chûng chu malsâwmna hlu a va ni êm!
Tûn Laia Chanchin Ṭha Hrilhna
4. Eng kawngin nge chanchin ṭha hril tûra thupêk chu tûn laiah a thlen famkim tawh?
4 Tûn laiah chuan, hriak thih Kristiante chuan “berâm dang” zînga pung zêl “mipui tam takte” ṭanpuinain, atîra Isua hnêna pêk hrilh lâwkna thupêk chu an tithleng famkim zêl a. (Thu Puan 7:9; Johana 10:16) Chuvângin, chanchin ṭha chu tûn hma zawng aia nasaa puanchhuah a ni tawh a ni. Jehova Thuhretute chu ‘thuhnuairawlhte hnêna chanchin ṭha hril tûr te, . . . thinlung lungchhiate tuam tûr te, salte hnêna chhuahna thu leh mi tângte hnêna tân in hawnna thu sawi tûr te, LALPA lungawi kum thu leh kan Pathian phuba lâk ni thu sawi tûr te, lungngai zawng zawng thlamuan tûr tein’ ram leh hmun 235-ah an feh chhuak tawh a ni. (Isaia 61:1, 2) Chuvângin, Kristian chanchin ṭha hrilhna chuan mi tam takte hnênah malsâwmna a thlen zêl a, “hrehawm eng anga awmte” pawh a thlamuan zêl a ni.—2 Korinth 1:3, 4.
5. Chanchin ṭha hrilhna chungchângah, engtin nge Jehova Thuhretute chu Kristianna ram kohhrante lakah an danglam bîk?
5 Kristianna ram kohhrante chuan chanchin ṭha chu kawng chi hrang hrangin an thehdarh ve a. Pâwl tam tak chuan ram dangah saphun siam tûrin missionary-te an tîr chhuak a ni. Entîr nân, The Orthodox Christian Mission Center Magazine chuan Madagascar ram te, Africa khawmual chhim lam ram te, Tanzania ram te, leh Zimbabwe ram tea Orthodox missionary-te rawngbâwlna chanchin chu a târ lang a ni. Amaherawhchu, Kristianna ram kohhran dangte ang bawkin, Orthodox Kohhran mi leh sa tam zâwkte chu chanchin ṭha hrilhnaah an tel lo. Mahse, inpumpêk tawh Jehova Thuhretu zawng zawngte chu chanchin ṭha hrilhnaah an tel vek thung a. Anni chuan chanchin ṭha hrilh chu an rinna takzia tilangtu a ni tih an hria a ni. Paula chuan: “Miten thinlungin an ring a, felna an hmu ṭhîn a; kain an ṭan a, chhandamna an hmu bawk ṭhîn a ni,” a ti. Thil ti tûra chêttîr lo rinna chu, a nihna takah chuan, a thi a ni.—Rom 10:10; Jakoba 2:17.
Chatuan Malsâwmna Thlentu Chanchin Ṭha Chu
6. Eng chanchin ṭha nge tûn laiah hrilh a nih?
6 Jehova Thuhretute chuan chanchin ṭha awm thei zînga ṭha ber an hril a. Anni chuan dawng duhte hnênah Bible keuvin mihringte’n Pathian an hnaih theihna tûr te, sual ngaihdamna tûr te, leh chatuan nun beiseina tûr tea Isua’n a nun a hlan thu chu an kawhhmuh a ni. (Johana 3:16; 2 Korinth 5:18, 19) Anni chuan Pathian Ram chu hriak thih Lalber, Isua Krista hnuaiah vânah din a ni tawh a, chu ram chuan rei lo têah he leia suahsualnate tibo vekin, lei chu Paradis-ah a chantîr dâwn a ni tih an puang a. (Thu Puan 11:15; 21:3, 4) Isaia hrilh lâwkna thlen famkim nân, an ṭhenawmte hnênah tûn hi mihringte’n chanchin ṭha an la dawn theih hun, “LALPA lungawi kum,” a ni tih an hrilh a ni. Chu bâkah, rei lo têah Jehova’n inchhîrna nei lova thilsual titute a tihboral hun, “Pathian phuba lâk nî” a lo thleng thuai dâwn tih an vaukhân bawk.—Sâm 37:9-11.
7. Eng thiltawnin nge Jehova Thuhretute inpum khatzia târ lang a, engvângin nge chutiang inpum khatna chu kan neih?
7 Vânduaina leh leilung chhiatnaa khat he khawvêlah hian, hei hi chatuan hlâwkna thlen thei chanchin ṭha awmchhun a ni. Chu chanchin ṭha pawmtute chu hnam te, chi te, leh retheih leh hausak avâng tea inthlei hrang lo, khawvêl pum huap Kristian inunauna inpumkhat tlatte zînga mi an lo ni a. Anni chu ‘hmangaihna an inbel a ni, phuar famkimna a nih avângin.’ (Kolossa 3:14; Johana 15:12) Chu hmangaihna chu nikuma Africa rama thilthlengah a hmuh theih a ni. Tûk khat chu, chu ram khawpuiah chuan silai ri a lo chhuak ta phut mai a. Sawrkâr ding lai paih thlâk tumna a chhuah vâng a lo ni a. Thilthleng chu a hnam zâwnga inbeihna lama a inher tâkah chuan, Thuhretu chhûngkaw pakhat chuan an hnampui ni lo Thuhretu dang an inah an awmtîr a, chuvângin sawisêl a hlawh hle a. Chu chhûngkua chuan: “Kan inah chuan Jehova Thuhretute chauh alâwm khawsa a,” tiin an chhâng a ni. An tân chuan, hnam hrang nihna chu a pawimawh lo; Kristian hmangaihna—ṭanpui ngaite ṭanpuina—chauh lo chu. Thuhretu ni lo an chhûngte pakhat chuan: “Sakhua zawng zawnga mite chuan an mi leh sate chu an phatsan vek a. Jehova Thuhretute chauhvin an phatsan lo a ni,” a ti. Tual râl awmna ramte aṭanga chutiang chanchin dawnte chuan, Jehova Thuhretute hian ‘unauhote hmangaihna’ an neih tak zetzia a târ lang a ni.—1 Petera 2:17.
Chanchin Ṭhain Mite Nun A Thlâkthleng
8, 9. (a)Chanchin ṭha pawmtute chuan eng inthlâkthlengna nge an neih? (b) Eng thiltawnte hian nge chanchin ṭhain thil a tihtheihzia târ lang?
8 Chanchin ṭha chuan, Paula’n “nunna tûna awm sa leh la awm leh tûr” a tih nên inzawmna a nei a. (1 Timothea 4:8) Chu chuan nakin hun atâna beiseina nghet leh ṭha tak a pêk bâkah, “nunna tûna awm sa” pawh a tichangkâng a ni. Pathian duhzâwng nêna inrema an nun theih nân, Jehova Thuhretute chuan an nun chu Pathian Thu, Bible hmangin an kaihruai a ni. (Sâm 119:101) Felna leh thianghlimna an neih avângin, an mizia pawh a lo thar ta a ni.—Ephesi 4:24.
9 Franco-a chungchâng thu hi lo ngaihtuah ta ila. Mi thinram tak a ni a. A beisei anga thil a awm theih loh apiang chuan a thin a ur thei êm êm a, thil a tichhe rem rum ṭhîn. A nupui chuan Jehova Thuhretute hnênah Bible a zir a, Thuhretute entawn tûr siam chuan Franco-a chu insiam ṭhat a ngai a ni tih zawi zawiin a hriatchhuahtîr a. Tichuan, an hnênah Bible a zir ve ta a, a tâwpah chuan thlarau rah remna leh insûmtheihna chu a lantîr ve thei ta a ni. (Galatia 5:22, 23) Ani chu kum 2001 rawngbâwl kuma Belgium rama baptisma chang mi 492 zîngah a tel thei ta a ni. Alejandro-a chanchin hi ngaihtuah bawk teh. Chu tlangvâl chu damdawi ngawl a vei nasat avângin, a damdawi lei nâna thil hralh theih tûr zawngin bawlhhlawh paihna hmunah a khawsa hial a ni. Kum 22 mi a nihin, Jehova Thuhretute chuan Alejandro-a chu Bible zirpuiah an sâwm a, ani chuan a lo pawm ve mai bawk a. Bible chu nî tin chhiarin, Kristian inkhâwmnaahte a tel ta a. A nun a tih thianghlim chakzia chu, thlaruk pawh a tlin hmain chanchin ṭha hrilhnaah a tel thei a—nikum Panama rama chanchin ṭha hriltu mi 10,115 te zînga mi a lo ni ta a ni.
Chinchin Ṭha—Thuhnuairawlhte Malsâwmtu Chu
10. Tute’n nge chanchin ṭha chu chhâng lêt a, an nun kawng chu engtin nge a lo inthlâk danglam?
10 Isaia chuan chanchin ṭha chu thuhnuairawlhte hnêna hriattîr a nih tûr thu a lo hrilh lâwk a. Tute nge thuhnuairawlhte chu? Tirhkohte bu-a “chatuana nun duhna rilru dik tak nei” tia a sawite hi an ni. (Tirhkohte 13:48, NW) Anni chu dinhmun chi hrang hrang aṭanga thutak lo dawng duh, mi inngaitlâwm takte an ni. Chûng mite chuan Pathian duhzâwng tihnain khawvêl pêkte aia nasa zâwk malsâwmna a thlen tih an hria a ni. (1 Johana 2: 15-17) A nih leh, Jehova Thuhretute chuan chanchin ṭha an hrilhna kawngah mite thinlung engtin nge an thlen?
11. Paula sawi dânin, chanchin ṭha chu eng anga hrilh tûr nge ni?
11 Aw le, Korinth mite hnêna: “Unaute u, kei zawng Pathian thurûk hrilh che uin in hnêna ka lo kal lai khân, thusawi ropui leh finna ropui nêna lo kal ka ni lo. Isua Krista, amah ngei khenbeha a awm thu chauh lo chu in zîngah engmah rêng hriat ka tum loh kha,” tih ziaktu tirhkoh Paula entîrna siam hi lo ngaihtuah ta ila. (1 Korinth 2:1, 2) Paula chuan a thu ngaithlatute chu a finna hmanga hîp a tum lo. Pathian thu chiang tak, tûn laia Bible-a inchhinchhiahte bâk chu engmah a zirtîr lo. Paula’n chanchin ṭha hrilhna kawnga a ṭhian, Timothea a fuihna pawh hi ngaihtuah bawk teh: “Thu chu hril rawh; a hunah te, a hun lovah te pawh bei zêl rawh,” tih hi. (2 Timothea 4:2) Timothea chuan Pathian chanchin, “thu” chu a hril tûr a ni. Hetiangin Paula chuan Timothea chu a fuih bawk: “Hnathawktu, thutak thu fel taka hmang chu zak tûr a ni lo angin, Pathian ngaiha ṭhaa inentîr tûrin ṭhahnem ngai rawh,” tiin.—2 Timothea 2:15.
12. Engtin nge Jehova Thuhretute chuan Paula thute leh a entawn tûr siam chu an ngaih pawimawh?
12 Jehova Thuhretute chuan Paula entawn tûr siam leh Timothea a fuihna thute chu an ngai pawimawh a ni. Pathian Thu thiltihtheihna chu an pawm a, an ṭhenawmte hnêna beiseina leh thlamuanna an pêk hunah an hmang ṭangkai a. (Sâm 119:52; 2 Timothea 3:16, 17; Hebrai 4:12) A ngaihven mite’n an hun âwl neiha Bible hriatna an neih lehzual theihna tûrin, Bible ṭanchhan thu leh hla chhuahte pawh an hmang ṭangkai ve bawk a. Mahse, Pathian thâwk khum Thu chuan mi inngaitlâwmte thinlung chu a khawih ngei dâwn tih an hriat avângin, mite chu Bible aṭang ngeia kawhhmuh an tum zâwk ṭhîn. Chutianga Bible an hmanna chuan anmahni rinna ngei pawh a tichak bawk a ni.
‘Lungngai Zawng Zawng Thlamuanin’
13. Kum 2001 chhûng khân, lungngaite thlamuan a ṭûlna chu eng thilthlengin nge tizual?
13 Kum 2001-na chuan chhiatna râpthlâk tak tak a tawn avângin, mi tam takte chuan thlamuan an mamawh a. Entîr nân, kum kalta September thla khân, United States ram New York khawpuia World Trade Center leh Washington, D.C. kianga Pentagon chu mi sualin a bei a ni. Chu beihna chuan ram pum pui chu a va bârakhaih nasa êm! Chutiang hunah chuan, Jehova Thuhretute chuan “lungngai zawng zawng thlamuan” tûra tirh an nihna chu hlen an tum hrâm hrâm a ni. Thiltawn ṭhenkhat chuan an tih dân chu a târ lang ang.
14, 15.Hun chi hrang hrangah Thuhretute chuan engtin nge Bible hi lungngaite thlamuan nân hlawhtling taka an hman theih?
14 Hun bikima rawngbâwltu, Thuhretu pakhat chuan kêa kal nu pakhat hnênah tûn hnaia mi sual beihna chungchâng a ngaih dân a zâwt a. Chu nu chu a han ṭap ta mai a. A tawrh nasat thu leh engemaw ti taka ṭanpui theih a duh thu a hrilh a ni. Thuhretu chuan Pathianin kan zavaiin min ngaihsak a ni tih hrilhin, Isaia 61:1, 2 chu a chhiarsak a. Mi tinin thlamuanna an mamawhzia sawitu, chu nu chuan Pathian thlarauva thâwk khum thu chu ṭha a ti hle a ni. Tract chu dawngin, Thuhretu chu a in lama lêng tûrin a sâwm ta hial a ni.
15 Chanchin ṭha hrilha kal chhuak Thuhretu pahnih chuan pa pakhat, a hnathawhna ina hnathawk mêk an va tawng a. World Trade Center-a chhiatna thleng avânga thlamuan tumin Pathian Lehkha Thu aṭanga thlamuanna thu chu a kawhhmuh a. A phalna ngeiin 2 Korinth 1:3-7 chu an chhiar a. Chu mi Bible chângah chuan: “Thlamuanna hi Krista zârah achuang aliam a ni,” tih thu a tel a ni. Chu pa chuan a ṭhenawm Thuhretute’n thlamuanna thu an hrilh avângin lâwmthu a hrilh a: “In hnathawh ropui tak hi Pathianin malsâwm rawh se,” tiin duhsakna a hlân hial a ni.
16, 17.Eng thilthleng pahnihte hian nge Bible-in chhiatna râpthlâk tak avânga lungngaite leh buaite a ṭanpui thei tih târ lang?
16 Tuina neite tlawhkîrtu Thuhretu pakhat chuan, a kal hmasaka lo ngaihventu, nu pakhat fapa chu a tawng a. Thuhretu chuan chhiatna thlen hnua an ṭhenawmte a ngaihtuahzia a hrilhfiah a ni. Thuhretuin mahni hun hmanga ṭhenawmte a kan kual tih a hriat chuan mak a ti hle a. World Trade Center bul lawka hna thawk a ni a, mi sualin an suama thilthleng zawng zawng chu a hmuh vek thu a hrilh ta a ni. Tichuan, Pathianin tawrhna awm a phal chhan a han zawh chuan Thuhretu chuan Bible châng a kawhhmuh a, Sâm 37: 39-na: “Mi felte chhandamna chu LALPA lak ata a ni a: ani chu mangan laia an kulhbîng a ni ṭhîn,” tih pawh a kawhhmuh tel a ni. Chu pa chuan Thuhretu chhûngte chu an dam leh dam loh zâwtin, tlawhkîr tûrin a sâwm a; tin, a tlawh avânga a lâwmzia a hrilh mawlh mawlh bawk a ni.
17 Mi sual beihna a thlen hnua Jehova Thuhretute thlamuanna dawngtu mi sang tam takte zîngah chuan, ṭhenawmte an tlawhnaa an tawn nu pakhat a tel a. Ani chu thilthleng avângin a lungngai êm êm a, Sâm 72:12-14 thu: “Pachhiain a auhvin ani chuan a chhanhim ang a, mi rethei, ṭanpuitu nei lo pawh chu, a chhanhim ang a. Mi rethei leh pachhiate chu a khawngaih ang a, pachhiate nunna chu a chhandam ang. An nunna chu hnehchhiahna leh nunrâwnna lak ata a tlan ang a, an thisen chu ani ngaih chuan hlu tak a ni dâwn si a,” tih an chhiar lai chu a lo ngaithla kar a ni. Chûng thute chuan awmzia a va han nei tak êm! Thuhretute hnênah chuan Bible châng chu chhiar nawn leh tûrin a ngên a, sawi zawm tûra lêng lût tûrin a sâwm ta hial a ni. An titi zawh meuh chuan Bible zirna chu an nei ṭan a lo ni der tawh a ni.
18. Ṭawngṭai tûra sâwm a nih khân, Thuhretu pakhatin a ṭhenawmte chu engtin nge a ṭanpui?
18 Thuhretu pakhat chuan mi hausa awmna vêng chhûng restaurant-ah hna a thawk a. Chutah chuan Lalram chanchin ṭha ngaihven an awm ngai mang lo a ni. Khatia mi sual beihna a thlen hnu kha chuan, chu mi vêng chu a râlṭi ta riau va. Chutiang thil thlen hnu Zirtâwpni tlai lamah chuan a hnathawhna manager chuan chhiat tâwkte sûn nân mi zawng zawng chu mombati chhi êng chunga pâwna chhuak tûrin a ti a. An tawrhpuizia a hriat avângin Thuhretu pawh chu kal kawngah ngawi rengin a va ding chhuak a. Manager chuan ani chu Jehova Thuhretute rawngbâwltu a ni tih a hriat avângin, sûnna hun an hman hnuah ṭawngṭaina hlân tûrin a ngên ta a. Thuhretu chuan a ngenna chu pawmin a ṭawngṭai ta a ni. A ṭawngṭainaah chuan, lu sûn an tamzia a sawi lang a; mahse, lu sûnte chu beisei bo khawpa an lungngaih a ngai lo tih a chham tel a. Tin, chutiang thil râpthlâk takte a thlen leh tawh ngai loh hun tûr leh Bible hriat thiamna dik tak hmanga thlamuanna Pathian an hnaih vek thei a ni tih a sawi lang bawk a ni. An “Amen” hnu chuan, dâwr manager chuan dâwr pâwna awm mi 60 chuangte rualin Thuhretu chu a rawn pan a, a kuah a, lâwm thu sawiin, ṭawngṭaina a hriat tawh zînga ṭawngṭaina ṭha ber a nih thu a hrilh a ni.
Khawtlâng Tâna Malsâwmna
19. Eng thiltawnin nge mi ṭhenkhatin Jehova Thuhretute nungchang tehna sâng tak an hria a ni tih târ lang?
19 Tûn laia mi tam takte sawi angin, Jehova Thuhretute rawngbâwlna vênga awmte chuan hlâwkna an hmu a ni. Engtin nge remna te, rinawmna te, leh nungchang thianghlimna vawngtute chu ṭhatna awmtîrtu an nih loh theih ang? Central Asia ram pakhatah chuan, Thuhretute chuan tûn hmaa state security agency officer lo ni ṭhîn pa pakhat an tawng a. Ani chuan a hnathawh laiin sakhaw chi hrang hrang enfiah tûra tirh a nih thu a sawi a. Jehova Thuhretute a enfiah ṭum chuan an rinawmna leh an nungchang ṭhatna chuan a rilru a khawih hle a ni. An rinna nghet tak leh an thu zirtîrte chu Bible ṭanchhan vek a nih avângin a lo ngaisâng hle ṭhîn a. Chu pa chuan Bible zir tûra sâwmna chu a pawm nghâl a ni.
20. (a)Nikuma Jehova Thuhretute rawngbâwlna chuan eng nge a târ lan? (b) Engin nge thawh tûr a la tam tih târ lang a, engtin nge chanchin ṭha hrilh tûra kan chanvo neih chu kan thlîr?
20 Târ lan theih thiltawn tam tak zînga he thuziaka tlêm azâwng kan târ lante aṭangin, Jehova Thuhretute chu kum 2001 rawngbâwl kum chhûngin mite ṭanpuiin an buai hle a ni tih a chiang hle. Mi maktaduai tam tak an titipui a, lungngai tam takte an thlamuan bawk a; chûng an chanchin ṭha hrilhna chuan rah ṭha tak a chhuah a ni. Chu rawngbâwl kum chhûng chuan mi 263,431-te chuan Pathian hnêna an inpumpêkna chu baptisma changin an entîr a. Khawvêl pum puiah chuan chanchin ṭha hriltu chu mi zâ zêlah 1.7-in an pung a ni. Tin, Isua thih Hriatrengna hun serha lo kal khâwm mi 15,374,986-te chuan hna thawh tûr tam tak a la awm tih a târ lang. (1 Korinth 11:23-26) Chanchin ṭha dawng duhtu mi thuhnuairawlhte chu i zawng zêl ang u. Jehova lungawi kum a tâwp hma loh zawng “thinlung lungchhiate” i thlamuan zêl ang u. Chanvo lungawi thlâk a va ni êm! Kan zain Isaia thusawi: “LALPA-ah chuan nasa takin ka hlim ang a, ka nunna hi ka Pathianah chuan lâwm takin a awm ang,” tih chu kan tithangkhâwk tak zet a ni. (Isaia 61:10) Pathian chuan he a thutiam: “Lalpa Pathian chuan felna leh fakna hnam tinrêng hmâah chuan a chawrtîr dâwn si a,” tih a tihthlen famkim nân min hmang zêl rawh se.—Isaia 61:11. (w02 1/1)
I La Hria Em?
• Engtin nge Isua puanchhuah chanchin ṭha chu mi thuhnuairawlhte’n an hlâwkpui?
• Eng malsâwmna nge kum zabi pakhatnaa Isua zirtîrte chanchin ṭha hrilh lo pawmtute chuan an dawn?
• Engtin nge tûn laia dawng duhte chu chanchin ṭhain mal a sâwm?
• Engtin nge chanchin ṭha hril tûra kan chanvo neih chu kan thlîr?
[Phêk 15-naa milemte]
Jehova Thuhretute chuan chanchin ṭha hril tûra an mawhphurhna chu an hre reng
[Phêk 17-naa milemte]
Chanchin ṭha pawmtute chu inpum khat tlat khawvêl pum huap inunauna zînga mi an lo ni