Scientist-te’n An Hriat Loh Chu

Scientist-te chuan vân thengreng khi kawng tinrêngin an zir chiang tawh niin a lang a. Chuti chung pawhin, zawhna pawimawh tak tak chhân theih loh an la nei ṭeuh a ni.

Scientist-te chuan vân thengreng lo awm ṭan dân leh nunna lo inṭan dân an hria em? A chhânna mâwlmang tê chu an hre lo tih a ni. Mi ṭhenkhat chuan science pêng pakhat, vân lam chanchin zirna chuan vân thengreng lo inṭan dân a hrilhfiah thei niin an sawi a. Amaherawhchu, Pathian a awm leh awm loh hriat phâk a ni lo tih ngaih dân neitu, Dartmouth College-a vân lam chanchin zir mi, professor Marcelo Gleise-a chuan chutianga sawitute chu: “Vân thengreng lo inṭan dân chungchâng kan la hrilhfiah ngai lo,” tiin a chhâng a ni.

Chutiang bawk chuan, Science News magazine-a thuziak pakhat chuan nunna lo inṭan dân chungchângah: “Leia nunna lo inṭan dân dik tak chu chhui chhuah theih a ni lo: Hmân laiin he leiah hian eng nge thleng tih târ langtu, leilunga thil awm tam zâwkte chu a rîralna a rei tawh,” tiin a sawi a. Chûng thute aṭang chuan, vân thengreng leh nunna lo inṭan dân chungchânga zawhna hi science-in a la chhâng lo tih kan hre thei a ni

Mahse, ‘leia nunna hi siam a nih chuan tu siam nge ni ang?’ tiin i ngaihtuah mai thei a. Hêng zawhnate hi i zâwt mai thei bawk: ‘Siamtu fing leh hmangaihna ngah tak a awm a nih chuan, engvângin nge a thil siam mihringte hian hrehawm an tawrh a phal? Engvângin nge sakhaw hrang hrang awm a phal? Engvângin nge amah betute’n thil ṭha lo tam tak an tih a phal?’ tihte hi.

Chûng zawhnate chu science chuan amah maiin a chhâng thei lo va. Nimahsela, chu chu a chhânna lungawithlâk tak i hmu thei lo tihna a ni lo. A nihna takah chuan, mi tam takin a chhânna lungawithlâk takte chu Bible-ah an hmu tawh a ni.

Scientist ṭhenkhatin Bible an zirna aṭanga Siamtu a awm tih an rin nachhan hriat i duh chuan jw.org tlawh la. Video hrang hrang awmna Nunna Bul Inṭanna Chungchânga Thlîr Dânte tih chu zawng ang che.

ANNI CHU SCIENCE LEH BIBLE-IN A HMIN

Georgiy N. Koidan-a, chemist

“Ka hnaah hian molecules-te ‘rem khâwm’ a tel ṭhîn a. Chu chu chess khelh ang a ni: i chêt dân tûr tam tak chu i ngaihtuah lâwk a ngai a. Thil pakhat i tih hmaih chuan molecule chu a chhe thei a ni. Ka hna chu buaithlâkin hnawk hle mah se, molecules-te chhûnga thil chipchiar tak awmtîr tûr a, nunna nei timûr chhûnga chemical reaction sâng tam tak awm nêna khaikhin chuan thil ho lam tak a ni. Chu chuan, leilunga thil awmte keini aia hre chiang zâwk Siamtu a awm ngei tih min rintîr a ni.

“Bible ka han zir chuan lehkhabu pangngai mai a ni lo tih ka hre ta a. Kum 2,000 dâwn lai liam taa ziah zawh tawh ni mah se, a thurâwnte chu vawiin nî thleng hian a la ṭangkai reng a ni. Chhûngkaw buaina te, hna thawhna hmuna harsatna te leh, ṭhenawm khaw vêngte nêna inhmuh thiam lohnate chinfel dân chungchâng a sawite chu a la ṭangkai hle. Ka ngaih dân chuan, chûng thurâwn rin tlâk takte chu mihringte aia nasa taka fing zâwk tu emawin a pêk a ni.”

Yan-Der Hsuuw-a, embryologist

“Mihring chî a ṭhan chhoh hian timûr zawng zawngte chu timûr ṭhenkhat hriatna thazâm te, tihrâwl te, ruh te, thisen te leh, timûr dangtea thlâk danglam tûra an thawhho a ngai a, chu chu a tâwpah mihringah a lo insiam ta ṭhîn a ni. Chûng timûrte chî pakhata a lo insiam dân dik tak chu tûn thleng hian kan la hre thiam lo. Ka hmuh dân chuan nunna hi siamtu fing takin a siam a ni ngei ang.

“Sâm 139:15, 16-nain nu chhûla chî lo ṭhan chhoh dân a sawi hi tûn hnai kumtea scientist-te thil hmuh chhuah nên a inmil hle a. Siamtuin a ziaktute hnênah puangzâr lo sela chuan, hun rei tak kaltaah khân engtin nge chutianga dik chuan an lo chhinchhiah theih ang?”

Rocío Picado Herrero: Chemistry Zirtîrtuin A Rinna A Sawi Chhuak tih video chu en rawh. Video thupui chu jw.org-ah zawng ang che.