4 NGAIHDAMNA

A AWMZIA

Ngaidam tih awmzia chu kan lungnih lohna leh chumiin a thlen mai theih thinrimnate theihnghilh hi a ni a. Mite i ngaihdam avângin i chunga an thiltih chu ho tê anga i ngaih emaw, eng mah thleng lo anga i awm emaw kher a ngai lo.

BIBLE THU BUL: “Tu pawhin tu chungah pawh thupawi nei ang ula, indawh tawnin inngaidam tawn ula.”—Kolossa 3:13.

“Mi tu emaw i hmangaih chuan a tlin lohnate zawn aiin, theih tâwp a chhuahnate chu i hmu zâwk ang.”—Aaron-a.

A PAWIMAWH CHHAN

Thinrimna i pai reng chuan i taksa leh rilru lam mai bâkah, in inneihnaah pawh chhiatna i thlen hial thei a ni.

“Ṭum khat chu ka pasalin ka rilru tina tak zettu thil a tih avângin ngaihdam min dîl a. Ngaihdam harsa ka ti hle a. A hnuah ka ngaidam ta a; mahse, a tîra ka lo ngaidam nghâl mai lo kha ka inchhîr khawp mai. Chu chuan ṭûl lo takin kan nupa inkârah harsatna a thlen a ni.”—Julia-i.

I TIH THEIHTE

MAHNI INFIAH RAWH

I kawppui thusawi leh thiltih avânga i rilru a nat leh hunah heti hian inzâwt ang che:

• ‘Ka lungni lo hma lutuk em?’

• ‘Ka lungnih lohna chhan hi ngaihdam min dîl ngai khawpa lian nge nia a, theihnghilh liam mai chi zâwk?’

I KAWPPUI NEN SAWI DUN RAWH

• Inngaidam tawn tûrin engtianga rei nge hun kan mamawh?

• A rang thei ang bera inngaidam tawn tûrin eng nge kan tih theih?

THURAWNTE

• I lungnih loh hunah i kawppui chu rilru chhia pu tûrah ngai suh.

• “Kan zain thil tam tak kan tisual fo ṭhîn,” tih hre rengin, i kawppui thiltih chu ngaihdam tum ang che.—Jakoba 3:2.

“Thil kan tihsual ve ve hian inngaihdam chu a awlsam a; mahse, pa khat zâwk chauhvin a tihsual hian a harsa ṭhîn. Ngaihdam dîlna pawm tûr chuan inngaihtlâwmna dik tak neih a ngai a ni.”—Kimberly-i.

BIBLE THU BUL: “I khingpui chu . . . rem thuai rawh.”—Matthaia 5:25.