Zah thiam taka thusawi chu in inneihna tinghet reng tûra ṭanpui theitu che u thil chârna ang a ni

NUPATE TAN

3 INZAH TAWNNA

A AWMZIA

Nupa inzah tawn takte chu an ngaih dân a inan loh hunah pawh an inngaihsak tawn a. Ten Lessons to Transform Your Marriage tih lehkhabu chuan, “Chutiang nupate chu an mi mal ngaih dânah an ding bur lo va. Chu aiin, an inhmuh thiam lohnate chu an sawi dûn a. An kawppuite thusawi chu zah thiam takin an ngaihthlâksak a, an pahniha an pawm tlân theih tûr zâwngin thu tlûknate an siam ṭhîn a ni,” tiin a sawi.

BIBLE THU BUL: “Hmangaihnain . . . mahni hma a sial lo.”—1 Korinth 13:4, 5.

“Ka nupui ka zah tih chu amah ka ngaihlu tak zetin, a rilru tina theitu leh kan inneihna tichhe theitu thil eng mah tih ka duh lohna hi a ni.”—Micah-a.

A PAWIMAWH CHHAN

Inzah tawnna a awm loh chuan nupate inkârah insawisêlna, inṭawng elna, leh inhmuhsitnate a awm thei a, mi thiamte chuan chûngte chu inṭhenna bul ṭantu niin an sawi.

“Tihelna ṭawngkam leh ṭawngkam mei nei tak hmanga biakte bâkah, fiamthu thawh nâna mahni nupui hman chu a inrintâwkna te, nangmah a rinna te, leh in inneihnate tihchhiatna mai a ni.”—Brian-a.

I TIH THEIHTE

MAHNI INFIAH RAWH

Chawlhkâr khat chhûngin, i ṭawngkam leh thiltihahte fîmkhur la. Tichuan, heti hian inzâwt ang che:

‘Engtianga zingin nge ka kawppui hi ka sawisêl a, engtianga zingin nge ka fak?’
‘A bîk takin, eng kawngtein nge ka kawppui ka zahzia ka lantîr?’

I KAWPPUI NEN SAWI DUN RAWH

Eng ang ṭawngkam leh thiltihte’n nge zah nia inhriatna neihtîr che u?
Eng ang ṭawngkam leh thiltihte’n nge zah lo nia inhriatna neihtîr che u?

THURAWNTE

I chunga zahna lantîr i duh dân kawng thum ziak la. I kawppui pawh chutiang chuan tihtîr rawh. Tichuan, in ziahte chu inthlengin, in kawppuite duh dân anga an chunga zahna in lantîr theih nân hma la ang che u.
I kawppui miziaa i duh laite chhinchhiah la. Chûng a miziate avânga i lâwmzia hriattîr ang che.

“Ka pasal ka zah tih awmzia chu ka thiltihte hmanga amah ka ngaihhlutzia leh hlim tûra ka duhzia lantîr hi a ni a. Chêtzia chauhva lantîr hi a ni reng kher lo; a châng chuan, ka thusawi ho tê leh thiltihte chuan ka kawppui ka zahzia a târ lang thei a ni.”—Megan-i.

A pawimawh ber chu, zahna dawng nia inhriatna i neihna ai mahin, i kawppuiin zahna dawng nia inhriatna a neih leh neih loh hi a ni zâwk.

BIBLE THU BUL: “Lainatna thinlung te, ngilneihna te, inngaihtlâwmna te, thuhnuairawlhna te, dawhtheihna te chuan inthuam rawh u.”—Kolossa 3:12.