Thu Hril Tûra Min Ṭanpuitu In Sakna

Governing Body chuan thawhlâwmte chu Lalram thu hrilh rawngbâwlna hlen thei tûra min ṭanpuitu inte sak nâna hman a duh a. Entîr nân, rawngbâwl kum 2023 chhûngin, Jehova Thuhretute branch office-te’n an hman dân phal pâwlte chuan thil lei nân, in sak nân, siam ṭhat nân leh, khawvêl puma Kingdom Hall-te leh Assembly Hall-te enkawl nân dollar maktaduai 500 aia tam an hmang a.a Chûngte bâkah, khawvêl puma kohhrante’n an Kingdom Hall-te an enkâwl nâna a hmante pawh a awm bawk.

Chu bâkah, thawhlâwmte chu branch office-te sak nân leh enkâwl nâna hman a ni a, chu chuan khawvêl pum huap thu hrilh rawngbâwlna huaihawt tûr leh thlâwp tlat tûrin a ṭanpui a ni. Chûng thawhlâwmte chu Kingdom Hall-te leh Assembly Hall-te sakna leh siam ṭhatnaa hman a nih theih nân, branch-a hna thawh dânte chu siam rem a ni a. Chuti chung pawhin, branch office-te siam ṭhat nân, thawm ṭhat nân leh, hmun danga sak nânte sum tam tak mamawh a la ni reng a. Engvângin nge chûng project-te chu a pawimawh êm êm? Engtin nge branch-te chuan thlawhhma rawngbâwlna hna pawimawh tak chu a thlâwp? I lo en ang u.

“Rei Tak A Awhtîr”

Branch tam tak chu kum 30, a nih loh leh 40 chuanga upate an ni a! Worldwide Design/Construction Department-a unau Nicholas-a chuan: “Ṭha taka enkawl reng in hlui takte pawh, hunte a liam zêl rualin a chhe ve zêl a. In pakhat kan han siam ṭhat hian, hun rei tak chhûng a hman zawm theih phah a ni,” tiin a sawi.

Bethel inte pawh inawpna pâwl mamawhnate mila siam danglam a ngai a. Branch office tam tak sak a nih aṭangin, khawvêl pumah thuchhuahtute pawh an pung chak hle a. Chu hmasâwnna ṭanpui tûrin, chûng office-a hna thawktu tûr tlâwmngaia inpete mamawh a ni a. Chutiang a nih avângin, a len lam a âwm tâwka lo sak, inte chu tûnah chuan hna thawktute an leng tawh lo!

Himna pawh hi thil pawimawh tak a ni a. Hun hnuhnûnga kan luh thûk tawh êm avângin, nun atâna hlauhawm leilung chhiatnate chu kan hmachhawn ngun lehzual a. (Luka 21:11) Inte siam ṭhatnaah tûn lai thiamna sâng ber berte kan hman hian, chuta hna thawktute him taka hna an thawh theih nân kan ṭanpui tihna a ni. Chûngte chuan inawpna pâwl in sakte chu chhawmdâwlna hna thawktute a hmantîr theih bâkah, leilung chhiatna a thlen hnuah pawh thlawhhma rawngbâwla thawktute ṭanpui chhunzawm zêl tûrin a ṭanpui bawk a ni.

“Jehova’n Chu Thu Tlûkna Siam Chu Mal A Sâwm”

Governing Body kaihhruaina hnuaiah, unaute chuan rawngbâwl kum 2023 chhûngin branch 43-ah siam ṭhatna hna pawimawh tak an thawk a. A awmzia chu khawvêl puma Bethel in zawng zawng zât ve dâwnah siam ṭhatna hna neih mêk a ni tihna a ni. Chu hnathawh hlutna târ langtu entîrna ṭhenkhat hi lo chhinchhiah ang che.

Angola. Angola Branch Committee member Matt-a chuan: “Hagaia 2:7-a hrilh lâwkna kawng danglam taka a thlen famkimna hi kan hmu a. Kum sâwm chhûng lekin, thuchhuahtu chu za zêla 60-in kan pung! Chuvângin, Bethel chhûngkua pawh a lêt thuma tihpun a lo ngai a. Mahse, tûna kan Bethel hi a len tâwk loh avângin, unau mamawh zât chu kan sâwm thei lo. Chuvângin, Bethel chhûngkua chuan hna an thawh rim lehzual a ngai a, overtime-te an thawh a ngai a ni,” tiin a sawi.

Unaute chu Bethel in zauh tûra an tih ngaite hre chiang tûra mawhphurhna pêk an ni a. A tîr chuan, Bethel in awm sa siam ṭhat chu a chinfel theih dân awlsam leh ṭha niin an hria a. Mahse, ngun taka an zir chian hnu chuan, siam ṭhat mai chu thawhlâwmte a ṭha thei ang bera hman dân a ni lo tih a hre thiam a. Chu aiin, a bul hnaia in pakhat chu lei a, siam ṭhat an remti ta zâwk a. Unau Matt-a chuan: “In awm sa lei a, siam ṭhat tumna chu Branch Committee hnênah kan hrilh hmasak chuan, kan tâna a ṭhat tâwk lo kan hlauthâwng deuh va. Mahse, tûnah chuan, chu in sa chu kan mamawh ang chiah a lo ni tih kan hre ta. Jehova’n chu thu tlûkna siam chu mal a sâwm,” tiin a sawi.

Angola branch chu nakinah chuan zauh belh a ngai mai thei a. Mahse, building thar leh Bethel hmuna awm module hmanga siam in te leh, inawpna pâwl hawh apartment-te chuan branch office chu thlawhhma rawngbâwlna hmasâwn chak tak thlâwp zawm zêl tûrin a ṭanpui thei a ni.

Japan. Branch in lian berte chu kum 40 dâwn kal taa sakte an ni a, in a tam zâwkte chu siam ṭhatna lian tham neih a la ni lo. Inte chu ṭha taka enkawl a ni tak meuh a, mahse, chûng inte chu hman theih hun tûr zât ruat aia reia hman a ni hlawm tawh a. Chumi avâng chuan, tûnah siam ṭhatna hnate neih mêk a ni.

Kumte a liam zêl rualin Bethel nun pawh tihdanglam ve zêl a ni a. Kum 2015 hmate kha chuan, chaw ei tûr zawng zawng chu Bethel chhûngkaw tâna buatsaihsak vek a ni a. Chuvângin, Japan rama mihring chênna tûra sak Bethel inahte chuan “choka” tê tak tê chauh a tel a. Tûnah chuan, Bethel-a awmte chuan mahniin chaw an inchhum tawh a. Chuvângin, awlsam taka mahnia ei tûrte siam a nih theih nân, Bethel room-ahte chuan choka hmun zau zâwk siam belh a ni. Japan branch-a rawngbâwl mêk unaunu Kumiko-i chuan, “Chûng choka-te chuan mahni ina awm ang mai ni hian min ngaihtîr bâkah, Bethel ruahmana tharte thlâwp tlat tûrin min ṭanpui bawk,” tiin a sawi.

Japan branch-a thawh mêk hnate chu khawvêl pum huap rawngbâwlna pêng pawimawh tak a ni a. (Matthaia 28:19, 20) Japan hi Bible bu pum tihchhuahna branch pahnih awm zînga a pakhat a ni. Chuvângin, chu in sakna project thawh mêk zînga pêng pakhat chu thil chei mawina khâwlte (trimming) bun leh Printery-a hnathawktu zawng zawngte himna atâna boruak tihthianghlimna khâwl (dust collection system) din a ni a. Chûng khâwlte leina man leh bunna man chu dollar maktaduai khat dâwn a ni; mahse, chu chuan branch chu thlarau lam chawte ti chhuak zawm zêl tûrin a ṭanpui a ni.

In sakna hna thawk a nih chhûng pawhin, Bible chu tihchhuah zawm zêl a ni a. Japan Branch Committee member unau Trey-a chuan: “In sakna hna thawh a nih chhûng pawhin, inawpna pâwl chuan Bible lehlinte chu tam lehzualin a tichhuak a, khawvêl pumah Bible mamawhna pawh a pung zêl a. Khâwl tharte bunna hna leh thu leh hla chhuahte tihchhuahna hna thawh kawpna chuan department tam tak leh hnathawktute inkârah fîmkhur taka thawhhona a neihtîr a ni,” tiin a sawi. Chûng hna harsa tak tak kârah pawh, kum 2023, March leh August thla chhûng khân, tla tinin Bible 220,000 dâwn lai tihchhuah a ni—chu chu Printery-a hnathawh buai lai bera tihchhuah a ni a. Chûng hna zawng zawngte chu sum sênso tam lutuk ngai lova thawh zawh vek a ni.

Khâwl tha hman tlêm hi in sak ṭhatna hnaa pêng pawimawh tak dang a ni leh a. Solar panels thar bun a ni dâwn a, chu chuan kum tinin khâwl tha atâna sênso zât $120,000 vêl a tihtlêm phah thei ang. Thuah thum nei dârthlalangte vuah a ni bawk dâwn a, chu chuan khâwl thate tlêm zâwka hmang tûrin min ṭanpui ang a, kum khatah $10,000 vêl kan hum theih phah ang. Chûng khâwl tha titlêmtu hmanruate hmannain in sak ṭhatna project tâna sênso zât chu tipung phah mah se, dik tak chuan, chûng panel-te leh dârthlalangte hman theih a nih chhûng hian dollar mataduai 3.5 aia tam a hum zâwk nia chhût a ni. Chu bâkah, in sakte avânga chhehvêl boruak danglam theite pawh tam takin a tikiam phah bawk ang.

“Thawh Tûr Tam Tak A La Awm”

Chûng branch pahnih sak ṭhatna hna chuan Bethel inte’n thlawhhma mamawhnate thlâwp thei tûrin thawh tûr tam tak a la awm tih a târ lang a. Mahse, hnate chu a la zo lo va. “Tam tak chu zawh fel a ni tawh; mahse, thawh tûr tam tak a la awm,” tiin Worldwide Design/Construction Department-a unau Aaron-a’n a sawi a ni. Engtin nge he hna hi hlen theih a nih ang? Ani chuan: “He project pawimawh tak thawhnaa phal taka thawhlâwm thawhtute bâkah, tlâwmngaia inhuam taka mahni inpete leh nakina rawn tel ve tuma tûna nun tisamkhaitute chungah kan lâwm tak meuh a ni. Tisa lam leh sum leh pai lama unaute ṭanpuina chu Jehova malsâwmna finfiahna chiang tak a ni,” tiin a sawi belh a ni.—Sâm 110:3.

In sakna leh siam ṭhatna hna zawng zawng chu phal taka pêk thawhlâwmte, chûng zînga a tam zâwk chu donate.jw.org kal tlanga pêk a ni a, chûng thawhlâwmte hmanga thawh a ni a. Phal taka inthawh zawm zêl avângin kan lâwm tak meuh meuh a ni.