Bengngawngte Theihnghilh An Ni Lo

Pathian Jehova chuan an dinhmun chu eng pawh ni se, mi zawng zawng chu a chungchâng leh a vân lam Lalram chungchâng zir tûrin a duh a. (1 Timothea 2:3, 4) Chuvângin, Jehova Thuhretute chuan bengngawngte pawh tiamin, mi a tam thei ang berte tân Bible leh Bible zirna ṭanpuitu thilte an tichhuak a ni. Dik tak chuan, kan inawpna pâwlin kan thu leh hla chhuahte chu sign language hmangte tâna hmuh theih tûrin videoa a sâng têlin a tichhuak a, chûngte chu sign language ṭawng 100 chuanga hmuh theih a ni! Engtin nge chûng thu leh hlate chu kan tihchhuah a, kan sem darh? Hunte a liam zêl rualin eng hmasâwnnate nge kan neih?

Engtin Nge Sign-Language Video-te Chu Siam A Nih?

Sign language thu leh hla chhuahte chu khawvêl puma ṭawng letlingtu team-te’n an tichhuak a. Team tina member-te chuan an lehlin tûr thu leh hla chhuahte chu ngun takin an endik a. A dawtah, sign language-a lehchhuah dân tûrah thu tlûkna an siam a ni. Chumi zawhah, thu leh hla chhuah chu video-in an record a. Tûnah hian, team 60-te chuan Bible zirna ṭanpuitu thilte chu sign language-in an letling mêk a, team dang 40-te chuan a châng chângin an letling bawk.

Tûn hma kha chuan, sign language-a video tihchhuah chu a man a to hle a. Video camera-te leh hmanraw dangte chu tûn laia kan hmante aiin a man a to zâwk daih a ni. Chu bâkah, video-te chu studio-a lak a ni a, chûng studio-te chu keimahnia kan siam chawp a ni a, a châng chuan in neihsate kan chei thar a ni. Sign-language ṭawng letlingtu team pakhat tâna mamawh engkim leina belh khâwm chu, $30,000b chuang a ni.

Thawhlâwmte a ṭha thei ang bera hmang tûrin kan inawpna pâwl chuan ṭawng lehlinna kal phung tihhmasâwn dân leh tihsamkhai dân kawngte a zawng a. Chuvângin, ṭangkai zâwk leh man tlâwm zâwk tûn lai hmanruate kan hmang a ni. Ṭawng letlingtu team-te chuan studio hman aiin, green screen tia koh background hring an hmang a, anmahni office-ah video an record a ni. Sign language ṭawng record-tu tûr tam tak mamawh an nih hian, unaute chuan an chanvo ṭheuh chu studio-a kal ngai lovin, office, a nih loh leh inah mahniin an record a ni.

Chutianga record-tute ṭanpuitu tûr software pawh kan siam chhuak bawk a. Chûng hmasâwnnate chuan ṭawng letlingtu team-te’n sign language thu leh hla tichhuak tûra an mamawh hun chu a chanvein a tihtlêm phah a ni. Kan unaute chu, chûng hmasâwnnate avâng chuan an lâwm hle a. Unau Alexander-a chuan: “Sign-language video-te chu tûn hma zawng aia zingin tihchhuah a ni a. Chu chuan min tihlim hle. Nî tin chûng video-te chu ka en ṭhîn,” tiin a sawi.

Tûn laiah, ṭawng letlingtu team pakhat mamawh phuhruk nân $5,000 tling lo sên a ni a. Chuvângin, sign-language video-te chu ṭawng tam zâwkin kan tichhuak thei a ni.

Engtin Nge Sign-Language Video-te Chu Sem Darh A Nih?

Team-in sign language thu leh hla a record zawh veleh, chûng video-te chuan a mamawhtute hnên a thleng tûr a ni a. Tûn hmain videocassette-te leh DVD-te kan tichhuak ṭhîn a; mahse, chûngte chu a man a tovin, hun leh tha tam tak sên a ngai a ni. Chûng record-sate chu copy chhâwntîr tûrin pâwn lam company-ah thawn a ni a. A tâwpah, videocassette-te leh DVD-te chu kohhrante hnênah thawn a ni ṭhîn. Kum 2013 chhûng ringawt khân, sign-language DVD-te siam nân $2,000,000 kan hmang.

Bengngawngte chu chûng thilpêkte avâng chuan an lâwm hle a. Mahse, cassette-te, a nih loh leh DVD-te a tam chhoh zêl avângin chûng video-te chu hman a awlsam reng lo. Dinhmun ṭhenkhatah chuan, Bible bu pakhat chauh record tûr pawhin DVD tam tak hman a ngai a. Brazil rama unau Gilnei-a chuan heti hian a sawi: “Bible châng pakhat chhiar kan duh apiangin, chumi châng chuanna videocassette kan zawn hmuh phawt a, a hnuah a châng kan zawn leh a ngai a ni. Chu chu thil harsa tak a ni,” tiin. Sign-language DVD-te hmang ṭhîn unaunu Rafayane-i chuan: “Mahnia inzirna neih chu a hahthlâk ṭhîn hle. Bible chângte, a nih loh leh a lâk chhuahnate zawng tûr ringawt pawhin hun tam tak kan hmang ṭhîn,” tiin a sawi. Thu hrilh rawngbâwlnaa kan unaute an tel hian, DVD-te, a nih loh leh videocassette-te chu ngaihventute TV-a an chhuahsak theih nân an keng ṭhîn a. Unau ṭhenkhat phei chuan anmahni DVD player-te an keng hial a ni. Hun rei pawh a liam hmain khai sawn theih DVD player screen chhawm nghâl chu hmuh theih a ni a, chûng chu unau tam takin an hmang a ni. United States-a awm Bobby-a chuan heti hian a sawi: “Bible châng pakhat kan hmuh hnuah a dang hmuhtîr leh kan duh a nih chuan, DVD dang kan hman a ngai tlângpui ṭhîn. Hei hian hun a hehin, inbiaknaah Bible kan hman tam theih loh phah a ni,” tiin.

Kum 2013 khân, Jehova inawpna pâwl chuan JW Library Sign Language app a tichhuak a, chu chuan unaute chu anmahni smartphone-te, a nih loh leh tablet-ah te sign language video-te download-in, a chhuahtîr thei a ni. Chu app chu American Sign language-a tihchhuah hmasak ber a ni a. Tichuan, kum 2017-ah, sign language zawng zawng mil thei tûra tih thar a ni. Khawvêl puma unaute chu an lâwm hle a. Brazil rama unaupa Juscelino-a chuan heti hian a sawi: “Awih a har ka ti! Governing Body-in keini bengngawngte min hmangaihzia leh ṭawngkaa thusawi theite ang bawkin thutaka hmasâwn tûra min duhzia hi ka ngaihtuah bâng thei lo. Ka phûr hle a, he app hian nasa lehzuala Bible zir tûrin min chêttîr a ni,” tiin.

Tûn laiah, sign language video zawng zawngte chu digital format-in kan tichhuak a, chûngte chu kan website leh JW Library app hmangin kan sem chhuak bawk a ni. Chuvângin, sign language thu leh hlate chu a thla têl emaw, a kum têl emaw ni lovin, ni rei lote chhûnga lehlin, record, leh sem darh theih a ni. A nihna takah chuan, sign language thu leh hla chhuah tam tak chu thu leh hla chhuah dangte ruala tih chhuah a ni.

Kan unau bengngawng ṭhenkhatte thusawi hi lo en ta ila. Unaunu Klízia-i chuan heti hian a sawi: “Kan rinna tinghet reng tûra awlsam taka hmuh theih kan mamawhte min petu eng inawpna pâwl dang nge awm? Jehova inawpna pâwlin min tihsakte hi khawvêla eng thil nên mah khaikhin theih a ni lo,” tiin. Vladimir-a chuan: “Video-te chuan Jehova’n ri hre theite a ngaihsak ang chiahin bengngawngte a ngaihsak tih min hriattîr a ni,” tiin a sawi.

Kan sign language video-te chuan he thu hi a târ lang fo ṭhîn: “He video hi khawvêl pum huap Bible zirtîr rawngbâwlna pêng pakhat a ni a, thawhlâwm hmanga chhawmdâwl a ni,” tih hi. In thawhlâwm thawhte avângin kan lâwm hle a, chûng zînga tam tak chu donate.jw.org kaltlanga thawh a ni. Hêng thawhlâwmte hian sign language hmangte pawh tiamin, mi zawng zawngte tâna Bible-te leh Bible zirna ṭanpuitu thilte tichhuak tûrin min ṭanpui a ni.