“Indo Thu Leh Indo Thuthang” Kâra Chhawmdâwlna Kalpui

He hun hnuhnûngah hian, “indo thu leh indo thuthang” hriat chu kan beisei a. (Matthaia 24:6) Mahse, chûng thilthlengte avânga kan unaute’n harsatna an tawh laiin, an mamawh ṭanpuina an dawng a ni. Kum 2022 Governing Body Hnên Aṭanga Chanchin Thar #3-naah chuan Ukraine indona tuartute tâna Europe Khaw Chhak Lama chhawmdâwlna thawh mêk chungchângah thu thlamuanthlâk tak târ lan a ni a. Engtin nge a bul hnaia indona a awm mêk chung pawhin, chhawmdâwlna chu kalpui a nih? Chhawmdâwlnain Ukraine rama kan unaute chungah eng nghawng nge a neih?

Eng Nge Mamawh A Nih? Engtia Pêk Nge A Nih?

Kum 2022, February ni 24, Ukraine rama indo a chhuah nî khân, Coordinators’ Committee chuan Ukraine rama unaute ṭanpui nân chhawmdâwlna tûr sum hman a remti a. Ukraine branch chuan Disaster Relief Committees 27 ruat lâwk sate hmangin ei leh in tûrte chu tualchhûnga mi lei nghâl vatin, a sem chhuak a ni.

Ukraine branch ṭanpuina bâkah, Jehova Thuhretute World Headquarters chuan ṭanpuina ṭangkai tak pêk theih tûrte an ngaihtuah nghâl a. Governing Body-a Coordinator committee leh Publishing committee chuan he mamawhna sawiho tûr leh hma la tûra ruahmanna siam tûrin Global Purchasing Department chu Ukraine leh Poland branch office aiawhte nêna thawkho tûrin a hrilh a. Branch tina awm Purchasing department te, Shipping department te, leh Legal department-a unau te, Ukraine Branch Committee member pakhat, leh Global Purchasing Department-a unaute chu nî tin inhmu khâwmin an thawkho a ni.

Global Purchasing Department-a Unau Jay Swinney-a chuan: “A hmasa berin, mamawhte kan hriat a ngai a. Tualchhûng unaute ei ṭhin, ei tûr leh intihthianghlimna hmanruate pêk kan duh a. Mahse, eng nge an mamawh tih ngaihtuah ringawt pawh buaina pakhat a tling. Chûng thilte chu Ukraine rama indona kârah him tak leh a rang thei ang bera pêk chhuah dân pawh kan hriat a ngai,” tiin a sawi.

Kum 2022, March ni 9-ah chuan, chûng lei tûr mamawhte chu unaute’n an rêl fel thei ta a. Bûra dah chi sa leh sangha te, buhfai te, chaw te, leh bean ang chi ei tûr bulpui dahna bâwmte chu, sahbawn leh toilet paper ang chi intihthianghlimna hmanruate ruala pêk tûr a ni a. Chutih hun lai chuan, mi pakhat tâna chawlhkâr li chhûng daih tûr thilte leina man chu U.S. $65 vêl nia chhût a ni. Kan unau a sâng têlte’n ṭanpuina an mamawh thei tih ngaihtuahin, Coordinators’ Committee chuan ṭanpuina atân sum engemaw zât hman a remti a. A nih chuan, engtin nge chûng thilte chu ṭûl lo taka unaute himna tiderthâwng si lova pêk a nih theih ang?

March ni 13 khân, Poland rama unau pahnih chuan Poland branch office aṭangin Ukraine ram, Lviv khawpui bula kudâm pakhatah an va dah chhin a. An chhuah hma nîahte chuan Poland leh Ukraine ram branch-a mite chuan tlâwmngaia inpe unau pahnihte chu zin tûra an inbuatsaihnaah an ṭanpui a. Branch chuan ramri kâna mahni mihringpuite ṭanpuina pe tûrte tâna a ṭûl anga dân lama phalna lehkha tihfel te, unaute motor-ahte chuan ṭanpuina petute tûr an ni tih chhinchhiahna sign dah te, leh unaute’n ramri an kân hnua an zawh tûr kalkawng hnai ber ngaihtuah tûrtein Ukraine rama unaute nên an thawkho a ni. Chutianga ṭha taka inbuatsaihna leh Jehova malsâwmna avângin, chhawmdâwl ṭanpuina chu Disaster Relief Committee-te hnênah dârkâr 24 chhûngin Lviv khawpuia thlenpui a ni a, kan unaute chu Poland ramah him takin an rawn kîr leh hman bawk.

Tihchhinna hmasa ber chu hlawhtling mah se, unaute chuan ṭanpuina metric ton 1 (U.S. ton 1) tling lo chiah an phur thleng thei a ni. Metric ton 200 (U.S. ton 220) vêl la mamawh nia chhût a ni. Engtin nge chutiang khawpa tam chu phurh thlen leh a rang thei ang bera sem chhuah a nih theih ang?

“I Mite Chu . . . Mahni Duh Thuin An Inpe Ṭhîn”

Ukraine rama thilthlengin kan unaute a nghawng dân chungchâng jw.org-a târ lante an chhiar hnuah, khawvêl puma unaute chuan ṭanpui an duh a. Hmun hlaa awm unau tam tak chuan thawhlâwmte chu a ṭha thei ang bera hman a ni dâwn tih hriain, Jehova Thuhretute khawvêl pum huap rawngbâwlna atân sum leh paite an thawh a. A ṭhenawm ramtea awm unaute chuan an hun leh tha leh thil neihte hmangin an ṭanpui bawk. Entîrna tlêm azâwng lo en ta ila.

,Tlâwmngaia inpe unaute chuan Poland ramah ṭanpuina bungrua a sâng têl an la khâwm a, naupangte pawhin card-te an siam bawk. Poland branch-a Purchasing Department-a thawk mêk Unau Bartosz Kościelniak-a chuan, “Jehova mite chu ‘mahni duh thuin an inpe ṭhîn,’ tih thu Sâm 110:3-a mi hi vawi tam tak ka chhiar tawh ṭhîn a. Mahse, unaute ṭanpuinate chu tûnah keimah ngeiin a takin ka hmu ta a ni, tlâwmngaia inpe unau a za têlte chu inhuam taka mahni inpe nghâl vatin, hna thawk tûrin an inpeih reng a. Chûngte chuan he Bible châng dikzia hi min hriat chiantîr a ni,” tiin a sawi.

Khawvêl puma bungraw thawn kualna company neitu Jehova Thuhretu pakhat chuan a motor-te a thlâwnin a hmantîr a, chûng motor-tea hman tûr oil-pawh a thlâwnin a pe bawk a ni. Ani chuan: “Ka tân chuan hei hi ka unaute leh Jehova ka hmangaihna lantîrna hun remchâng a ni. Ṭanpuina ka pêk theih avângin ka lâwm tak zet,” tiin a sawi. Oil thawh zât chu liter 7,700 (gal 2,034) aia tam nia chhût a ni a, unaute chuan bungruate va pe tûrin kilometer 48,000 (mêl 30,000) aia tam motor khalhin an hun leh tha leh zungte an sêng!

Unaute inhuam taka inpêkna leh an lantîr hmangaihna avângin, thilte an va dah chhin hmasak ber nî aṭanga ni 15 chhûng lek, March 28-ah ei tûr te, intihthianghlimna hmanrua te, leh damdawite chu metric ton 100 (U.S. ton 110) Ukraine ramah an thawn thleng thei a ni! Chu bâkah, kan unaute leh bungrua kan leinate’n phal taka thilte an pêk avângin, chhawmdâwlna bungrua atâna hman tûra ruat sum engemaw zât ral tûr a vêng a ni. Tûn thleng hian, Jehova Thuhretute chuan chhawmdâwl ṭanpuina thilte chu metric ton 190 (U.S. ton 209) aia tam Ukraine ramah an pe tawh a ni. Chûng thilpêkte chuan kan unaute chungah eng ngawng nge a neih?

“In Hmangaihna Pawh A Tel Reng!”

Chûng ṭanpuina thilte Lviv khawpuia a thlen chuan, Ukraine ram chhûng hmun hrang hranga awm Disaster Relief Committee-te chuan ṭanpuina mamawh unaute hnênah an pe chhuak a. Tanpuina thilte chu khawpui hrang hrangah sem darh a ni a, a ṭhen chu Lviv khawpui aṭanga kilometer 1,300 (mêl 800) aia hlaa awmte a ni. He chhawmdâwlna hna hi a ṭha thei ang bera thawh ni mah se, hun tam tak sên a ngai a ni.a

Ukraine Branch Committee member Unau Markus Reinhardt-a chuan: “He hun khirh tak chhûng hian, unau tam takte chuan a tîr phat aṭangin Jehova hmangaihna an dawng a, chhiatna a lo thlen hma aṭang daih tawh khân a inawpna pâwl aṭanga lo kal kaihhruaina zawm a ṭhatzia chu an hmu tawh bawk. Entîr nân, unaute chu chawlhkâr engemaw zât daih tûr ei leh in tûrte chu an inah dah khâwl tûra fuih an ni a. Chu kaihhruaina chungchângah Kyiv khawpuia awm kohhran upa Unau Anton-a chuan heti hian a sawi: ‘Jehova inawpna pâwl chuan dinhmun khirh tak atân min lo inbuatsaih lâwk a, chumi avâng chuan kan lâwm tak zet a ni. Ei leh in tûrte mai bâkah, radio neihna chuan kan nun a chhanhim a ni,’ tiin. Unaute’n he kaihhruaina an zawm avâng hian kan lâwm hle, a chhan chu branch office hnênah a ṭûl anga chhawmdâwlna atâna ruahmanna hun a pêk avângin,” tiin a sawi.

Chhawmdâwl ṭanpuina a rawn thlen chuan unaute chu engtin nge an awm? Kharkiv khawpuia chêng Unau Mykola-a leh Zinaida-a te chuan an rilrua awmte heti hian an sawi a ni: “In mi ngaihtuahnate chuan kan rilru a khawih hle a. Ei tûr leh damdawi min pêk avângin kan lâwm tak zet. Hêngte aṭang hian Jehova kut chiang takin kan hmu,” tiin. Chumi hmun vêka awm Unaunu Valentyna-i chuan: “Indo a inṭan aṭangin mite chu an nî tin mamawh châkkhaite lei tûrin dâwrah an intlâr pût mai a. Mamawhte chu duh hun huna lei theih a ni lo. Mahse, Jehova chuan he buaina hi a hriain a hmu a. Ani chuan unaute chu chhawmdâwl ṭanpuina an ina va sem tûrin a ruat a, chûng ṭanpuina bâwmahte chuan kan mamawh tak a awm! Beisei bo anga lang, chutiang dinhmun khirh takah pawh kawng danglam takin Jehova leh a inawpna pâwl lantîr ngaihsakna chu dawn theih a ni a. . . . A hun tak leh mamawhna a sân êm êm laia ṭanpuina kan dawng thei chu a lâwmawm tak zet,” tiin a sawi.

Mariupol khawpui chhuahsantu Yevhen-a leh Iryna-i te chuan: “Min ngaihsakna leh kan chhûngte in ṭanpuina avângin kan lâwm tak zet a. Min ring rawh u, hei hi a hun dik tak a ni. A tîrin bâwm chhûngahte chuan mamawh châkkhaite chauh awm tûrah kan ngai a; mahse kan han hawn chuan in hmangaihna pawh a lo tel reng tih kan hria!” tiin an sawi.

“Indo thu leh indo thuthang” kâra hmangaihna nei taka pêk hêng chhawmdâwl ṭanpuinaah hian Jehova thlarau leh a kaihhruaina chiang takin a tel tih in hmu thei ang. Khawvêl pum huap tâna hmangaihna nei taka in pêk thawhlâwm, chûng zînga tam tak donate.jw.org kal tlanga in pêkte chuan hmun pawimawh tak an chang a ni. In thilphalna avângin kan va lâwm tak êm!

A Rang Thei Ang Ber Leh A Him Thei Ang Bera Pêk Chhawmdâwlna

1. 

   February 24, 2022: Coordinators’ Committee chuan Ukraine ram tân chhawmdâwlna sum hman a phalsak a, chu chuan branch chu chhawmdâwlna hna thawk ṭan tûrin a ṭanpui a ni

2. 

   February 24–March 8, 2022: Ukraine branch chuan tualchhûngah mamawh châkkhai ṭhenkhat leiin, chûngte chu Disaster Relief Committee-te kal tlangin a pe chhuak ṭan a. Chu bâkah, branch office chu Poland ram aṭanga lo kal mamawhte dawng tûr leh pe chhuak tûrin a lo inbuatsaih bawk

3. 

   March 9, 2022: Coordinators’ Committee chuan Ukraine rama ṭanpui ngaite ṭanpui a remti

4. 

   March 10–12, 2022: Poland ram aṭangin Ukraine rama Lviv khawpuiah ei tûr leh mamawh châkkhaite va dah chhin tûra ruahmanna siam a ni

5. 

   March 13, 2022: Poland ram aṭangin Ukraine rama Lviv khawpuiah ei tûr leh mamawh châkkhaite dah chhin a ni

6. 

   March 14–16, 2022: Poland ram Poznan khawpui bula Assembly Hall-ah, Local Design/Construction-a thawk tlâwmngaia inpete chuan ei tûr te, leh intihthianghlimna hmanruate dahna bâwm an la khâwm

7. 

   March 17, 2022: Tihchhinna a hlawhtlin hnu ni li-ah chhawmdâwlna bâwm metric ton 13 (U.S. ton 14) chu Ukraine ramri-ah dah ṭan a ni

8. 

   March 21–27, 2022: Chu tih dân chu zuiin, Poland rama dah ṭhat chhawmdâwlna bâwm la bângte Ukraine ramah an thawn a; tichuan dârkâr 24 chhûngin mamawhna hmuna awm unaute hnênah sem chhuah a ni

9. 

   March 28, 2022: Phalna pêk a nih hnu ni 20 chhûngin, ei tûr te, intihthianghlimna hmanrua te, leh damdawi lam thilte metric ton 100 (U.S. ton 110) chu Ukraine ramah thawn luh a ni

Tûn thleng hian, Jehova Thuhretute chuan Ukraine ramah chhawmdâwl ṭanpuinate chu metric ton 190 (U.S. 209 ton) aia tam an pe tawh.