Kum 2021-a Chhiat Tâwkte Chhawmdâwlna—Kan Unaute Chu Ngaihthah An Ni Lo

Kum 2021 rawngbâwl kum chhûngina khawvêl chuan COVID-19 hripui avângin harsatna a hmachhawn zawm zêl a. “Hripui Lêng Avânga Khawvêl Puma Chhawmdâwlna,” tih thuziakin a sawi angin, hripui lêng avânga chhawmdâwlna atân dollar maktaduai tam takb kan hmang a, Chhiat Tâwkte Chhawmdâwltu Pâwl 950 aia tam din a ni bawk.

Ni e, hripuiin harsatna nasa tak a thlen rualin, leilung chhiatna dangte leh mihringte thlentîr chhiatnate chuan khawvêl pumpuia kan unaute chu a nghawng a. Chutiang chhiatna 200 chuang ṭanpui nân, Governing Body-a Coordinators’ Committee chuan COVID-19 tuarte chhawmdâwlna atân bâkah, dollar maktaduai 8 hman a remti a ni. I thawhlâwm thawhin tûn hnai maia chhiatna pahnih tuartute a ṭanpui dân hi han ngaihtuah teh.

Nyiragongo Tlângkâng

Kum 2021, May ni 22 khân, Democratic Republic of the Congo rama Nyiragongo Tlâng kâng chu a puak ṭan a. Chuta ṭanga chirh sa rawn luang chhuak chuan in te, school te, leh tui dahkhâwlnate a tichhia a. Chirh sa rawn luang chhuak chu hlauhawm awmchhun a ni lo. Tlâng a kan hnu ni engemaw chhûng chu Goma khawpui chungah tûr hlauhawm pai vaivut a tlâk bâkah, lîrnghîng lian tham vak lo pawh vawi sâwm chuang a nghîng bawk. Khawpui chhûnga mi chêng zât ve aia tam chu hmun hima insawn tûra tih an ni a. Mi a sâng têlte chu an tlânchhia a, ṭhenkhat chuan Rwanda ramri an kân hial a ni.

Hmun danga insawnte zîngah chuan Jehova Thuhretu mi 5,000 vêl an tel a. Ṭhenkhat chuan tlâng kâng avângin an inte an chân a; ṭhenkhat dang lehte in erawh chu an tlânsan hnuah rawk a ni bawk. Rwanda leh Democratic Republic of the Congo rama chhawmdâwltu pâwlte chuan chhawmdâwlna hna chu an huaihawt a. Chhawmdâwltu pâwl pakhat chungchângah Congo (Kinshasa) branch chuan: “Khawpui chhûng chu a buai hle chung pawhin, insawn chhuak tûra thupêk tihchhuah a nih hma aṭang daih tawh khân, chhawmdâwltu pâwl chuan ei tûr te, tui te, mutbu te, leh thawmhnawte a pe ṭan tawh a ni,” tiin a sawi. Kan unau 2,000 aia tam kal khâwmna khaw pakhatah chuan, chhawmdâwltu pâwl chuan puan inte kaihin, hmui tuamna (mask) te a sem a, COVID-19 hri leh tuihri inkaichhâwnna tihkiam dânte a hrilhfiah a ni.

Chhiatna a thlen aṭanga thla thum chhûngin, kan unaute chuan buhfai ton ruk aia tam, vaimim ton ruk, hriak ton thum, leh tui ton thum an pe chhuak a. Sum sên a tam loh nân, branch chuan ram dang aṭanga ei tûrte man to taka chah aiin, ram chhûnga ei tûrte chu ṭhahnem tâwk taka lei khâwm sa tûrin a hrilh a ni.

Tlâng kângin an in thar a tihchhiahsak unaunu chuan: “Kan lunghnualin hrehawm kan ti tak zet,” tiin a sawi. Mahse, a hnuah, an chhûngkua chuan tisa lam leh thlarau lamah ṭanpuina an dawng a. Tûnah chuan, unaunu chuan: “Jehova ṭanpuinain kan mamawhte chu kan la nei zêl a ni. Jehova’n kan phurritte chu min chhâwk zângkaisak tih kan hmu,” tiin a sawi.

Venezuela Rama Sumdâwnna Tlâkchhiatna

Venezuela ram chuan kum engemaw zât chhûng chu sumdâwnna lamah harsatna nasa tak a tâwk a. Chuta awm kan unaute chu ei leh in harsatna leh dân bawhchhiatna a pun avângin an dinhmun a khirh hle. Mahse, Jehova inawpna pâwl chuan anni chu a ngaihthah lo.

Rawngbâwl kum kalta chhûng khân, ṭanpuina mamawh chhûngkuate tâna ei leh in leh sahbawnte lei nân leh phurh nân dollar maktaduai 1.5 aia tam hman a ni a. Venezuela branch chuan: “Ram chhûng hmun tina awm unau zawng zawngte hnêna thla tina ei tûr ton 130 pêk chhuah chu thil awlsam lo tak a ni,” tiin a sawi. Ei leh inte chu a chhiat loh nân, unaute chuan ni rei tak chhûng pawha chhe mai lo chî ei tûrte chu an thawn fo va. Branch chuan: “Ei leh in tûrte chu a tlâwm laiin a hlâwmin kan lei ṭhîn a. Chumi hnuah, a thawn man tlâwm ber chîin kan thawn ṭhîn,” tiin a sawi.

Venezuela rama Chhiat Tâwkte Chhawmdâwltu Pâwl member pakhat Unau Leonel-a chuan a hna chu a ngaina hle a. Ani chuan: “Chhawmdâwlna hna hi hna pawimawh tak a ni a. COVID-19 hripui avânga ka nupui ka chân aṭang khân, he hnaa ka telna hian min tichak tak zet a ni. Unaute ṭanpuinaa ka buai reng ṭhin avângin ṭangkai nia inhriatna ka nei a. Jehova’n a mite kalsan lo tûra a thutiam a vawn reng dân chu keimah ngeiin ka tawng a ni,” tiin a sawi.

Chhawmdâwl ṭanpuina dawngtu unaupa pakhat chu tûn hmain chhawmdâwl ṭanpuina hnaah a lo tel tawh ṭhîn a. Ani chuan: “Tûnah chuan, ṭanpui ngai dinhmunah ka awm ve ta thung a. Tisa lam thila ṭanpuina chauh kan dawng lo. Unaute chuan kan nupain rilru hahdam taka awm tûrin min ṭanpui a. Min ngaihsak a, min thlamuan a, min fuih bawk,” tiin a sawi.

Chhiatna ṭhenkhat chu hriat lâwkna awm lovin a thleng a. Mahse, Jehova inawpna pâwl chuan chhawmdâwlna thilte chu rang taka leiin, a thawn nghâl theih ṭhin avângin khawvêl pum huap rawngbâwlna atâna in thawhlâwm thawhte avângin kan lâwm hle. Thawhlâwm thawh theih dân kawng ṭhenkhat chu donate.jw.org-ah târ lan a ni. In thilphalna avângin kan lâwm e.