Kum 2023-a Chhiatna Tuarte Chhawmdâwlna—“Jehova Hmangaihna Chu A Takin Kan Tawng”

Bible-in ‘khawvêl tâwpnaah’ chuan “hnam hrang leh hnam hrang an indo vang a,” chhiatnate a thleng ang tih a sawi a. (Matthaia 24:3, 7, NWT) Kum 2023 rawngbâwl kuma chhûng khân, chûng hrilh lâwknate thlen famkim dân chu kan hmu a. Mahse, ram 100 dawn laia indonate leh leilung chhiatnate a thleng chung pawhin, Jehova Thuhretute chuan Pathian hmangihna chu an lantîr a ni. Engtin nge?

Kum 2023 rawngbâwl kum chhûng khân, kan unaute chuan mihringte avânga chhiatna thleng leh leilung chhiatnate chu vawi 200 chuang an tuar a. Jehova Thuhretute chuan chhawmdâwlna hna atân dollar maktaduai sâwm chuang an hmang a ni.b Chu bâkah, unaute chuan tualchhûnga mamawhte tân thawhlâwmte an thawh bawk. Kan unaute tawh chhiatna tam tak zînga pahniha a tuartute ṭanpui nâna i thawhlâwmte hman a nih dân hi han ngaihtuah teh.

“Hmangaihna Dik Hi A Awm Tak Tak”

Nigeria rama hmun ṭhenkhatah chuan tui a lian ṭhîn a. Mahse, kum 2022 October thlaa tui lian kha kum sâwm chhûnga tui a len nasat ber ṭum a ni. Lo ram hectare 676,000 (acres 1,670,432) chuang tihchhiat a ni a, mi maktaduai hnih chuang awmna hmun nei lovin an awm a. Nigeria branch chuan chhawmdâwlna leh thlarau lama ṭanpuina pe tûrin Chhiatna Tuarte Chhawmdâwltu Pâwlte chu a ruahman nghâl a ni.

Unaute A Nghawng Dân

• Thuchhuahtu 7,505 chuan awmna hmun an nei lo

• In 860 chu siam ṭhat ngai emaw, tihchhiat emaw a ni

• Kingdom Hall 90 leh Assembly Hall pakhat chu tuiin a chîm

Thawhlâwmte Hman A Nih Dân

Dollar 250,000 aia tam chhawmdâwlna atâna hman a ni:

• Buh, be leh, noodle ang chi ei tûr leina atân

• Mattress leh thosi lên ang chi bungruate leina atân

• In sak ṭhatna leh thawm ṭhatna atân

Engtin nge unaute chuan thawhlâwmte chu fing thiam taka an hman? Inte chu sak ṭhat leh theih a nih leh nih loh uluk takin an en fiah a. In a thara sak ngai a awm chuan, a chheh vêla in dangte sak dân angin mâwlmang taka sak a ni ṭhîn.

Ṭanpuina dawngtu unaute chu an lâwm hle a. Unaunu pakhat chuan: “Tui lian avângin in leh lo kan chân a, kan rilru a hah lutuk. Mahse, chumi nî la la chuan unaute’n min rawn ṭanpuiin, chênna tûr hmun him tak min pe a, rilru a tihahdam khawp mai. Branch office aṭanga ei leh in tûrte kan han dawn chuan thla a muang lehzual a ni. Johana 13:34, 35 thlen famkimna mahni ngeia tawnna chuan kan rilru a khawih hle a. . . . Hmangaihna dik hi a awm tak tak. Kan mamawh hun taka ṭanpuina min rawn petu unaute chungah kan chhûngkuain thinlung takin kan lâwm a ni,” tiin a sawi.

Tualchhûnga mite pawhin chhawmdâwlna hna kan thawh dân chu an hmu a. Bayelsa State-a awm Sabagreia khaw hotu pakhat chuan: “Khawvêlah hian pâwl leh kohhran tam tak a awm a; mahse, Jehova Thuhretute chauhvin hetiang hian an ti a ni. . . . [In] inawpna pâwl hi khawvêla pâwl ṭha ber zînga mi a ni,” tiin a sawi.

“Jehova Hmangaihna Chu A Takin Kan Tawng”

Kum 2023, February thla chhûngin, Chile ramah ram kâng vawi 400 aia tam a chhuak a. Chu rama hmun pawimawh tak takte pawh tiamin, ram hectare 430,000 (acre 1,062,553) aia tam a kâng chhia a ni. Mi 8,000 vêl an insawn chhuak a. Chhiatna a thlen hnu rei lo têah branch office chuan chhawmdâwlna pêk dân tûr a ruahman nghâl a ni.

Unaute A Nghawng Dân

• Thuchhuahtu 222 chu sa him nân an tlân chhuak

• In 20 a kâng chhia

Thawhlâwmte Hman A Nih Dân

Dollar 200,000 chuang chhawmdâwlna atâna hman a ni:

• Ei tûr leh tui leina atân

• Tui alh thei, tihthianghlimna hmanruate leh, damdawi leina atân

• In sak ṭhatna atân

Chhûngkaw khat chuan an chênna in leh sumdâwnna an chân vek tih an hriat chuan an mangang hle a. Intunnunna tûr an nei tawh lo. Ni eng emaw zât chhûng chu, an in dinna ṭhin ruak huai mai han hmuhna chuan lungchhe takin a siam a ni. Mahse, an awmna tûr in sak ṭan a nih hnu chuan an hluahthâwnna chu zawi zawiin an bo ta a. Unaute hmangaihna thiltihte chuan a ṭanpui a, an rilru a khawih êm avângin, unaupa pakhat chênna tûr in saknaah an rualin an tel ve hial a ni.

Chhawmdâwlna hna chuan unau tam takte rilru a khawih hle a. Unaupa pakhat chuan heti hian a sawi a ni: “Jehova’n Chhiatna Tuarte Chhawmdâwltu Pâwl a ruahman hi thil ropui tak a ni a. Chhiatna a thlen tûkah, anni chuan a hmuna thleng nghâlin ṭanpuina an pe a ni. Khawvêl hmun danga chhawmdâwlna pêk chungchâng kan chhiar hian kan rilru a khawih hle ṭhîn a. Mahse, mahni ngeiin chûng dinhmun kan han tawh hian a danglam khawp mai. Inawpna pâwl chu kan ngaihlu lehzual a; unaute’n Pathian miziate an entawn dân leh tisa lam, thlarau lam leh, rilru lama kan mamawhte kan neih leh neih loh min ngaihsak dân chu kan ngaihhlu lehzual a ni. Jehova hmangaihna chu a takin kan tawng,” tiin.

He khawvêl tâwpna a hnaih zêl rual hian chhiatnate chu zing lehzualin a thleng dâwn a. (Luka 21:10, 11) Chutih rualin, Kristian kohhran hmangin min hmangaihtu kan Lal, Krista Isua chu “khawvêl tâwp thlengin [kan] hnênah” a awm zêl tih kan hria a ni. (Matthaia 28:20, NWT) Khawvêl pumhuapa kan rawngbâwlna chhawmdâwl tûra donate.jw.org leh kawng danga thawhlâwm in thawhte bâkah, hun leh tha in hmante chuan Lalram leh kan Lal in hmangaihzia a târ lang a. In thilphalna chungah kan lâwm tak zet a ni.