Pathian Min Hnaihtîr Lehzualtu Hlate

Rimawi hi Jehova thilpêk duhawm tak a ni a. Kan ngaihtuahna a nghawng thei a, kan rilru awm dânte a thlâk theih bâkah, phûrna te min pe thei a ni. Chumi dikzia chu kan tûn lai hlateah hian a lang chiang hle. Dik tak chuan, hêng hlate hian a chunga ka sawite aia tam a ti thei: Pathian Jehova min hnaihtîr lehzual thei a ni.

Kum 2014 aṭang khân tûn lai hla 70 chuang kan tichhuak tawh a, tûnah phei chuan a lo berah pawh chûng hlate zînga pakhat chu ṭawng 500 chuanga tihchhuah a ni tawh! Mahse, tihian i ngaihtuah mai thei, ‘Tuin nge hêng hlate hi phuah a, engtia tihchhuah nge a nih?’ tiin.

A Phêna Thilthlengte

Tûn lai hlate hi Audio/Video Services-a music team tihchhuah a ni a, hei hi Governing Body-a Teaching Committee enkawlna hnuaia awm a ni. Music team hi unau 13 hla phuahtute, music engineer-te, hun duan siamtute, leh thil ṭûl dang hrang hrang lo buaipuitute ṭanpuina hmanga din a ni a. Chu bâkah, Teaching Committee chuan hla phuahtute, rimawi remtute, leh zai thiamte pawh tiamin, khawvêl pumah he hna hi tlâwmngaia inpete’n an ṭanpui a remti bawk. Hêng unaunu leh unaupate hian an thiamna neihte hi mahni hmingthan nân ni lovin inngaitlâwm takin an hmang zâwk a ni.

Engtin nge tûn lai hlate hi tihchhhuah a nih? A hmasa berin, Teaching Committee chuan hlain a ṭanchhan tûr Bible châng a thlang a, ngaithlatute a deh dân tûr a ngaihtuah bawk a ni. Tichuan, music team-in a rimawi remtu tûrte leh a hla thu phuahtu tûrte chu a ruat a. Aw thun chhinna an nei a. Chu chu Teaching Committee chuan endik lehin a ṭûl angin kaihhruainate a pe a. Music team chuan siam ṭhat ngai chu siam lehin a takin aw thunna an nei a. Hêng hlate hi branch inte leh mi mal inte pawh tiamin, hmun hrang hrangah thun a ni ṭhîn.

Tûn lai hlate phuah leh record tûr hian kan unaute chuan thil dang bâkah, digital audio studio te, note ziakna program te, audio library te, leh computer program hrang hrangte an hmang a. Chu bâkah, he hnaah hian rimawi tumna hmanruate, mixer-te, amplifier-te, speaker-te, leh microphone te hman a ngai bawk. Microphone pakhat man hi U.S. dollar 100 aṭanga dollar 1,000 man thleng a ni thei a. Kum 2020 khân, rimawi recording hmanruate lei nân dollar 116,000 (U.S.) kan hmang a ni.

Thawhlâwmte ren chem taka hmang tûrin eng hmalâkna nge awm? Bethel-ah music team lian tak din aiin tlâwmngaia inpe tam takte hman an ni a. Chu bâkah, rimawi rem tûra hmun khata a remtu tûrte koh khâwm aiin, unaute chuan rimawi chi hrang hrang siam chhuak thei computer program-te an hmang zâwk a ni.

“Hêng Hlate Hian Ka Rinna A Tinghet”

Unaute hian tûn lai hlate hi ngaihthlâk nuam an ti hle a. Germany rama Tara-i chuan tihian a sawi: “Hêng hlate hian ka rilru hah laiin min chhâwk zângkhai tak zet a. Keima ṭawng ngeia ka ngaihthlâk hian Jehova’n min kuah ang mai a ni,” tiin. Kazakhstan rama unau Dmitry-a chuan: “Bible thu bulte nên a inkalh ang em tih ngaihtuah ngai lo hlate ngaihthlâk hi nuam ka ti a. Chumi piah lamah, hlate hian thlarau lam thilte ngaihtuah reng tûrin min ṭanpui a ni,” tiin a sawi ve bawk.

South Africa-a Delia-i pawn tûn lai hlate chungchânga a ngaih dân chu tihian a sawi chhuak a ni: “Hêng hlate hian ka rinna a tinghet a. Ka lunghnual châng, a nih loh leh dinhmun khirh tak ka hmachhawn châng hian ka dinhmun nêna inmil tak hlate a awm ziah ṭhîn. Rimawi ringawt pawhin ka rilru hahnate a tiziaawm ṭhîn!” tiin.

Tûn lai hla ṭhenkhat chuan duh a hlawh hle a. South Africa-a awm Lerato-i chuan tihian a sawi: “‘Just Around the Corner’ leh ‘The New World to Come’ hlate hian ka hmangaih tak ka nu a rawn thawhleh hun tûr min mitthlatîr a. Chûng hlate ka ngaihthlâk apiangin, min kuah tûra rawn tlân ang hian ka mitthlaah a lo lang ṭhîn,” tiin.

Tûn lai hla pakhat chu Sri Lanka rama ṭhalai pakhat tân a ṭangkai hle. Ani chuan: “Kan science zirtîrtu chuan Jehova Thuhretu ka nih avângin class hmaah nasa takin min ânkhum a. Ka hlau hle a, chhân ngaihna pawh ka hre lo. In ka thlen chuan, ka nuin ‘Study Makes You Strong’ tih hla ngaithla tûrin min fuih a. Chu hla chuan zir bingna neih leh chhân dân tûr inbuatsaih lâwk ka mamawhzia min hmuh thiamtîr a. A tûkah kan zirtîrtu chu ka be ta a. Ṭha takin min ngaithla a, Jehova Thuhretute thurin ka rawn hre thiam lehzual a ti a ni. Hetiang mi tichak thei tak hlate min buatsaihsak avâng hian Pathian Jehova inawpna pâwl chungah ka lâwm tak zet,” tiin a sawi.

Hêng hlate tihchhuah nâna mamawh sênsote chu khawi aṭangin nge kan neih? Khawvêl pum huap rawngbâwlna atâna thawhlâwm aṭangin a ni a, chûng zînga a tam zâwk chu donate.jw.org aṭanga thawh a ni. Phal taka in thawhlâwm thawhte avângin kan lâwm e.